Kahūich Lūkös 13:1-35
-
Havöötö ellōnre tön kapah min (1-5)
-
Inchōḵ elmat inlahen ngam chōn anychīr töt ṙôngu (6-9)
-
Lööken ök yöngnyīö tö singutnyöre uk hē ṙētak Haneūheu Töhet Sakāmö (10-17)
-
Inchōḵ-oṙô i alaha ngam kulöl rāi tö ngam inföh (18-21)
-
Kalēḵ alaha kuhēthötre el ngam tö cheuktī talöökö (22-30)
-
In Heròt, “öp am aṅ el inchōnngö” (31-33)
-
Miṙivlōn Yēsū töm panam Yērūsalem (34, 35)
13 Ōt yik tarik hē e umuh vamë-eny nang Yēsū tö inlahen tī Pailĕt nö fëlngen yik aṅ Kelelī kamëtö tökētu nö el chūök vinë-ekūötēv.
2 Ngö ṙô ngaich anga-aṅ nö in cha: “Sitih lōn öi yī-ö, mötlö öt lanöökö hòng më aṅ Kelelī itumtak yip aṅ Kelelī nö ṙòkhöre, kūö cha nö ngatī inlanken?
3 Ngö ṙô chin tö yīö, hö-ö! Yēḵ yīö min öt havöötö ellōnre ngaich ngatī inlahen inhetngö min yī-ö.
4 Sitih lōn öi yī-ö tö yik tarik tö 18 tak tö fukkui tök tö marò-òl patī i Sīlōm, karāntöre kui cha-a nö lātaṙeū ngaich kapah, mötlö öt lanöökö hòng cha-a tö yik taṙòkhöre tarik mi-iyöng i Yērūsalem?
5 Ngö ṙô Chin tö yīö, hö-ö! Yēḵ yīö min öt havöötö ellōnre ngaich ngatī inlahen inhetngö min yī-ö.”
6 Unôichrit e ngaich anga-aṅ nö kētö ngih inchōḵ-oṙô: “Hěngtak ök tarik tameūichtö chōn anychīr nö el ök panô-òṅ angkūr, chöh ṙòng ök chōn anga-aṅ, öt hēngö taneūngen pöri anga-aṅ tö ṙòng ò.
7 Ngö ṙô ngaich anga-aṅ nö in ök yōm panô-òṅ: ‘Lūöi samyeūheu chū-ö öich yihtöre in ngòh chōn öich meūka töre min öich teūngen tö ṙòng ò, öl pöri öich höng hēngö taneūngen tö ṙòng ò. Kūölten ngòh chōn! Kūö yòh ang nöng yëḵngen kūötī töng tumlat?’
8 Ngö ṙô ngaich ngam yōm panô-òṅ nö in ò: ‘Hökngen ò man nö hěngtöre samyeūheu rò-òten, hòṅ chu ulröön tö ò ngaich tūitö sô nuā.
9 Tövāyen an min yēḵ ò nö ṙôngu in nup yamih sakāmö, yěn hö-ö pöri ngaich kūölten ò min më-eṅ.’”
10 Haköphöti ang Yēsū nö el chūök vinë-ekūötēv hē ṙētak ngam Haneūheu Töhet Sakāmö.
11 Hěngtak ök yöngnyīö tö 18 samyeūheu rò-òten nö aṅhav el alaha tök tötlöök ma-ahānga ngaich anga-aṅ nö öt kalē-en* tö tī ò, singutnyöre uk ngaich anga-aṅ öt rēhěn nö kô nö hachiplöre.
12 Hē Yēsū nö meuk ngam yöngnyīö, ngö ṙô ngaich anga-aṅ: “Kuṙòh, ngaich man ṙānyu ṙā-ang im öt kumlē-enre.”
13 Ṙāḵtö eltīre ngaich Yēsū nö ikui ngam yöngnyīö ngaich ilööṙen anga-aṅ nö chiplöre, ha-öiny ngam Tēv ngaich anga-aṅ.
14 Hē ök mākūö chūök vinë-ekūötēv pöri nö meūkö Yēsū nö halanken tövāhavö hē el ṙētak Haneūheu Töhet Sakāmö, tainy ngaich anga-aṅ ngaich ngö ṙô nö in yik tarik: “Höng tafūöl nun minë sakāmö hē ṙētak tö la-evṙen, lökten yin hē u öi halanken tövāhavö, ui hē el ṙētak Haneūheu Töhet Sakāmö.”
15 Ngö ṙô ngaich ngam Mā nö sapṙô ò: “Yī-ö mahanyatkö elmat, öt hěngtak hòng in yīö lamuhlö köttö re hēk nuā re ngaich ha-ôkö u tö mak hē el ṙētak Haneūheu Töhet Sakāmö?
16 Ngaich yòh ngòh yöngnyīö, ngòh kūön Aprahām ngam tö 18 samyeūheu rò-òten nö haköövö tö ngam Satān, tövaich hòng ngam inlahen ò nö ṙānyu nö ṙā-ang in e, hē ṙētak ngam Haneūheu Töhet Sakāmö?”
17 Hē Yēsū nö ṙôten tö u, ṙòkhöre ngaich yik tö kunyaha elmat tö ò nö sirōngkūö, ṙamlōn pöri yik tömaṙôngö nö meuk minë tölöök la-en ò.
18 Lökten hēk anga-aṅ nö ngö ṙô: “Sā yòh öng ngam Pūlngö ngam Tēv, sitih tī öich min asāḵtö e?
19 Sā ṙēngen öp tö kun kun kulöl rāi an ngam tö teūichtu tö öp tö hěngtak tarik nö el öp panô-òṅ ò, sīöp ngaich angū-ö nö tökiröng nö chōn ngaich pōyen nup chehechōn elkahôiyö kumteūtöre nö irōi ò.”
20 Ngö ṙô hēk anga-aṅ: “Sitih tī öich min asāḵtö ngam Pūlngö ngam Tēv?
21 Sā ṙēngen öp inföh* an öp tökalūichtu töp tö hěngtak yöngnyīö nö in öp tösöm kilō* atta, lökten ngaich angū-ö nö föh.”
22 Haköphöti ngaich ang Yēsū nö in minë panam hēk tuhēt ngaich iṙūöhöröön nö kiröönngöre nö chuh Yērūsalem.
23 Hěngtak ngaich ök tarik mahatönö ò nö ngö ṙô: “Mā, höng rahëichyen yip min tö teūngen tö inyöökenre?” Ngö ṙô ang Yēsū nö in ò:
24 “Mā-ainyre man kuhēthötre lök el ngam tö cheūktikūö inkūp, tön ngö ṙô chin tö meh, pōyen yip min tö hòṅ kuhēthötre nö ël e, hö-ö pöri min nö kô.
25 Yěn choholre min ngam mākūö ngam patī nö öpngökūö ngam inkūp ngaich söktöhëich min më-eṅ öm lātunyī ngaich kurönga öm ngö ṙô: ‘Mā, löpnyökūö ih man.’ Ngaich ngö ṙô min anga-aṅ: ‘Öt akahakūö chin tö öp löktö yīö.’
26 Ngaich ngö ṙô min yī-ö, ‘Holkūö meh in vahë öi nyā hēk òk inrē ngaich haköpten ih më-eṅ öm ikūö talöökö.’
27 Ngö ṙô pöri min anga-aṅ, ‘Öt akahakūö chin tö öp löktö yīö. Ō yī-ö tötlöökö la-en, ṙūöhöngre yin ngaich kiröönngöre öi ṙā-ang in chu!’
28 Yēḵ yīö min öi meūkö Aprahām, Isāk, Yāköp hēk tö yik pròfět nö ṙòkhöre nö im Pūlngö ngam Tēv ngaich kavalnyu yī-ö öi elkahôiyö, in e min yī-ö höng peuiny hēk kiṙīöt kui kanapre inrē.
29 Rö-ö nöng angū-ö pön yihtöre min yip tarik nö löktö lā chuhöt, lā sūng, lā kapā hēk lā lòhngö inrē ngaich ūichtöre min nö ip mīs nö el ngam Pūlngö ngam Tēv.
30 Yěh meuk! rīkre yik mu-urěh, nö unôich min ngaich yip mu-unôich, nö urěh.”
31 Hē e ngaich yik Feresī nö yihtöre ngaich ngö ṙô nö in Yēsū: “Kiröönngöre man ṙā-ang ihih, tön hòṅ fëlngen meh öp Heròt.”
32 Ngö ṙô ngaich anga-aṅ nö in cha: “Kiröönngöre umu-a, vë-eny nang öp am aṅ el inchōnngen, ‘tö chu öich töngamuh hēk huṙěich öich kēnyen më tötlöök ma-ahānga hēk halanken yip tarik tö nup invah cha ngaich keuheūtngen në la-enre im tö lūöi sumkam.’
33 Pòrô pöri öp töng yòh, löktökūö töngamuh chū-ö, huṙěich hēk im linūöi sumkam inrē öich höng la-evṙen tö ngam la-enre, pön ötkô ngòh tö hěngtak pròfět nö fëliyö nö lātunyī tö Yērūsalem.
34 Ō Yērūsalem, Yērūsalem famëlngö yik pròfět, kumleh kui cha inrē yik tö tīntu nö in meh, ām heuh öich lang öich hamūlö yīö öich sā öp yöng hayöm nö hamūl kūönre nö el këlre! Sōḵ pöri yī-ö.
35 Yěh meuk! Sō-ov ön ngaich ngam patī yīö* tö ngam Tēv. Ngö ṙô chin tö yīö, töngamuhangen yin min öt meukkūö chu, hanöng sā ṙô yīö min ngö ṙô: ‘Tökòlô an ngam yamih nö i minënyö Yāvē.’”*
Footnotes
^ Hēk, “lum.”
^ Hēk, “tö aföhlöng.”
^ Ṙô Krīk, “seah māp.” Ngam töhěng seah nö tö sā ṙôken ngam tö 7.33 litör. Ngëichköm Tahëng Ātiköl B14.
^ Ngam tö ngö, chūök yīö vë-ekūötēv.
^ Ngëichköm Tahëng Ātiköl A5.
