Kahūich Lūkös 14:1-35
-
Lööken ngam tarik tö yöölö alaha hē ṙētak ngam Haneūheu Töhet Sakāmö (1-6)
-
Hayāichngöre yěm havëtu in nup tökiröng nyinā-aṅ (7-11)
-
Havëten yip tötkô nö haṙënngen tī meh (12-14)
-
Inchōḵ elmat inlahen yik töhavëtu vamīkö inlahenre (15-24)
-
Ṙôken ṙāi hī yěi vītöre mahaköp (25-33)
-
Sāl tö chatngen kumchik (34, 35)
14 Hěngheuh hēk ang Yēsū nö chuh patī ök yöngkūö Feresī nö nyā ngaich hatīönken ò ngaich cha-a.
2 Hěngtak ngaich ök umuh tarik lamākūö ò tövāhavö tökūö yanöölö alaha re.*
3 Hatönkūö yik Feresī hēk tö yik tö akahakūö tö minë Chööngö ngaich ang Yēsū nö ngö ṙô: “Tölöng öng ngam inlahen hī öi halanken yip tövāhavö hē el ṙētak Haneūheu Töhet Sakāmö?”
4 Ngaich pöri cha-a nöng öt hěng milôhò ṙô. Lūölken ök tarik ngaich ang Yēsū ngaich lööken tī tö ò, tīnngen ò ngaich anga-aṅ.
5 Ngö ṙô hēk ang Yēsū nö in cha: “Yěn ōt öre in yīö tö suktöre kūön hēk nuā nö el mak hē el ṙētak Haneūheu Töhet Sakāmö, ngaich achīö min öp tö ilööṙen nö tūöklen ò?”
6 Öt heuveū-eu ṙô cha-a nö kētö sanapṙô ngam intöönö.
7 Unôichrit e hē ò hēk nö meuk yik yamih tö havëtu nö sitih inlahen cha-a nö katöllen nuk tö halēniṙen chūök. Ngaich ngö ṙô anga-aṅ:*
8 “Yěn ōt mahavëten meh öm chuh nyinā-aṅ inpīhö, ngaich um ūich el nup tö halēniṙen anūichö. Pön lohten nö ōt yip tahëng tö havëtuvö yip tö mööḵngöre tö meh.
9 Ngaich ngam mahavëten nā min nö yihtöre nö ngö ṙô nö in nā, ‘Hökngen ngòh tarik nö ūichngöre nö ihih.’ Ngaich aṙē-ěvö min nā-a pön hòṅ choholre min an ūich el nup lamārit anūichö.
10 Lökten yēḵ meh öm havëtu, ngaich ūichngöre më-eṅ öm el minë anūichö lamārit takô, ngaich yěn yihtöre min ngam mahavëten meh nö ngö ṙô, ‘Më-eṅ hol chu, umū-a man chuh lākūö ūichngöre.’ Ṙūöhölre minlēken min ngaich më-eṅ öm ikūö yip tö havëtu.
11 Pò ngòh tö hòṅ hapōilöre min nö in yīö, hayāichiyö min anga-aṅ, ngòh tö hòṅ hayāichngöre pöri nö in yīö, hapōilöngö min anga-aṅ.”
12 Unôichrit e ngaich anga-aṅ nö ngö ṙô nö in ök mahavëköre: “Yēḵ meh öm halēnkö nyā-aṅkūö tö sakāmö hēk harap inrē, ngaich um havëken yip holre, kanônyöre, hanöngkisānöre hēk tökôlò inrē holmaneukre. Lohten min cha-a nö haṙënngen tī meh nö havëten meh nö nyā, ngaich höng ṙōngren min yī-ö.
13 Yēḵ meh pöri halēn nyinā-aṅ, ngaich havëten yip yāich, tölum, tökaròk hēk tötmeuk më-eṅ,
14 ngaich teūngen min më-eṅ tö ṙanamlōnre, pò cha nö öt heuveū nö haṙënngen nup kahëtö meh. Hē yip tölöök tarik min nö hachohlöng ngaich möl min më-eṅ teūngen tö raneushöre.”
15 Hē ök tö hěngtak aṅ in yik tö havëtu nö hāngö e, ngö ṙô ngaich anga-aṅ: “Töṙamölōn öp anga-aṅ öp nyamā* nö el ngam Pūlngö ngam Tēv.”
16 Ngö ṙô ngaich ang Yēsū nö in ò: “Hěngtak ök tarik mahalēn tökiröng nyinā-aṅ, ngaich pōyen yik tö havëtu tö ò.
17 Hē yanīhi ṙētak ngam nyinā-aṅ ngaich nö rultenre, tölṙô yik mahalanṙenre ngaich anga-aṅ nö havëten yik tarik ngaich ngö ṙô, ‘Ih yin ngaich, ngaich nun nö lēn në nyā-aṅkūö.’
18 Ṙôkhöre pöri cha-a nöng vīkö inlahen re. Ngö ṙô ök raneh, ‘Hěng öp panô-òṅ havah Chu hòṅ kiröönngöre chin öich ngëichhören e, lökten man aṙēten Chu.’
19 Ngö ṙô hēk ök innëtö, ‘Taneui tahôl nup havah chu nuā ngaich hòṅ kiröönngöre chū-ö öich ngëichhören u, lökten man aṙēten Chu.’
20 Ngö ṙô hēk ök tahëng, ‘Fömngöreṙen inpīhö Chin, lökten Chin öich ötkô öich yih.’
21 Havan ngaich ök mahalanṙen ngaich keūheutnyö ṙô re nö vënyen në nö ik yōm patī. Hūlökūö tanāinyö ngaich ngam yōm patī ngaich ngö ṙô nö in ngam mahalanṙen re, ‘Ilööṙen man chuh kūö talöökö hēk tökūönö talöktu inrē elpanam, ngaich kumten yip yāich, tölum, tötmeuk hēk tökaròk inrē nö ih.’
22 Rěh rô-angen, ngö ṙô ngaich ngam mahalanṙen, ‘Mā, sā öp tīnölöṙô chu ngatī inlahen chū-ö, sön pöri nö ōt nup chūökö.’
23 Ngö ṙô ngaich ngam yōm patī nö in ò, ‘Kuṙòh, chuh el talöökö hēk nup talöökö inrē in nup tö röhta patī ngaich timlö alaha yip tarik nö chuh hih, hòṅ ngih patī chu nö tööḵlö.
24 Ngö ṙô Chin tö yīö, tö yik tarik yik tö havëtu, nö öt hěngtak min in cha kamlah në nyā-aṅkūö chu.’”
25 Ngaich maṙôngö ngaich yik tarik hamòlröön Yēsū nö kiröön, havöölökūöre ngaich anga-aṅ nö ngö ṙô:
26 “Yěn ōt öp tö hòṅ yihtöre nö in chu ngaich öt kunyaha elmat* anga-aṅ tö ngam yöngre kikōnyö, yöngre kikānö, pīhöre, kūönre, kahëmre, mëmre hēk tö ngam nômöre inrē, ngaich ötkô anga-aṅ nö tamömrit chu.
27 Ngòh tötkô nö keun ngam chōn inkihten* hēk tömrit chu inrē, ötkô anga-aṅ nö haköp nö in chu.
28 Tö sā ngih inchōḵ elmat, achīö öp in yīö tö hòṅ vīlö öp tökiröng patī ngaich öt urěh nö ūichngöre nö kaheuk ṙôken ṙāi e yēḵ ò nö kô nö keūheutngen e hēk yěn hö-ö?
29 Pò ò min nöng sā amul rööntö machööḵlö ò, hö-ö pöri nö vīlöre tī töm tömarô-òl chūök patī, ngaich yip mameuk min nö hayīölngen ò,
30 ngaich ngö ṙô: ‘Höng hòṅ vīlö patī ön ngòh tarik, ötkô pöri nö keūheutngen e.’
31 Hēk achīö öp öre rācha öp kumröönngöre nö hòṅ kiyung öp tahëng rācha öp töt urěh nö ūichngöre nö halēnöre, yēḵ ò nö kô nö holtö tö 10,000 kumyung nö lā-al yip yamih tö 20,000 kumyung?
32 Yěn ötkô anga-aṅ nö lā-al cha ngaich höng marôvat anga-aṅ nö tīntö yip tarik alahare nö chuh in öp tahëng rācha nö vë-engkūö ò.
33 Ngatī ṙēngen, yěn ötkô öp tö hěngtak in yīö nö ṙāngö* nup kanôlò re ngaich ötkô anga-aṅ nö mahaköp nö in chu.
34 Tö kuchik an ngam sāl. Yěn öt köp pöri min ngam sāl nö haṙeihu, mihôiṅ öi min hēk vī-i e nö haṙeihu?
35 Ötrēhěn an nö kôlòkūö tī tö ngam tumlat hēk ötrēhěn nö kô nö kalūöchtu nö im sô nuā. Pön höng kavalngen e yip tarik. Hökngen ngòh tö elnānguvö nö hang në ṙô chu töngamuh.”
Footnotes
^ Chölōtör ön nö i ṙô Hintī
^ Ṙô Krīk, “nö inchō-ovṙô.”
^ Ṙô Krīk, “nyāma ròtī min.”
^ Hēk, “kūöṅnen hanangenlōn.”
^ Hēk, “harööḵngen.”
