Kahūich Lūkös 16:1-31
16 Ngö ṙô hēk ang Yēsū nö in yik haköptöre: “Hěngtak ök tökòlô tarik ök tö īnu tök tö hěngtak yōm chehen,* ök tö vënyu inlahen nö hayëḵngen nuk chehen ò.
2 Lökten ngaich anga-aṅ nö havëten ngam yōm chehen ngaich ngö ṙô, ‘Asuh ön në ahang Chu inlahen meh? Vënyö ṙôken nup la-enre man ngaich, tön ngaich man min öt la-evṙen el ngih patī chu.’
3 Ngö ṙô ngaich ngam yōm chehen nöng ellōnre lōn, ‘Sitih inlahen Öich min ngaich yěich ṙānyu in ngam la-en yōm chehen? Öt rēhěn chū-ö öich kalē-en, öich ul tumlat öich el panô-òṅ, aṙē-ěv inrē öich i cheū-a.
4 Heūṅ! Ngaich Chin akaha elmat töp tö hòṅ inlahenre, hòṅ chu Öich öt kē-ěyö öich im la-en yōm chehen ngaich hō-en chu min yip tarik aṅ ngam patī.’
5 Hěng hěngtak havëti ngaich anga-aṅ nö in yik tö hötṙehevö nö in ök mā ò, ngö ṙô anga-aṅ nö hatönkö kūö ök raneh, ‘iṙôken hötṙeh öm më-eṅ in öp mā chu?’
6 Ngö ṙô anga-aṅ, ‘2,200 litör tavī-i ṙòng òliv.’ Ngö ṙô ngaich ngam yōm chehen, ‘Kē ngih ëkriment man ngam kahūich mat meh ngaich ūichngöre öm ilööṙen öm kūichhöt ngam tö 1,100.’
7 Ngö ṙô hēk anga-aṅ nö hatön öp tahëng, ‘Vë-eny nang chu man, iṙôken hötṙeh öm më-eṅ?’ Ngö ṙô ngaich anga-aṅ, ‘170 kuintöl sāiny.’ Ngö ṙô ngaich anga-aṅ nö in ò, ‘euṅh, kē ngih ëkriment man ngam kahūich mat meh sin, ngaich kūichhöt ngam tö 136.’
8 Öt akahaṙa ngam yōm chehen, sön pöri ngam mā ò nö eū-eu ò, kūö ò nö holtö mikah elmatre nö la-evṙen. Ṙën chin öich ngatī ṙô in yīö kūö më tarik in në ṙētak hī töngamuh nö mööḵlö mikah elmat tö më tarik lamök el ngam hanātö.
9 Ngö ṙô Chin inrē tö yīö: Vī holre yin ikūö ngih tötlöök panam löktö in minë tö michūḵṙen kanôlò, hòṅ e min yěn keuheūt ngaich kē-ě yīö min më hol yīö öi chuh im tö örheūheu chūökö.
10 Ngòh tökô-en nö i tö rahëichyen tökô-en min anga-aṅ nö i tö pōyen ngaich ngòh tö michūḵṙen nö i tö pōyen, tö michūḵṙen min anga-aṅ nö i tö rahëichyen.
11 Lökten yēḵ yīö hameuktöre öt michūḵṙen i nup kanôlò ngih tötlöök panam, ngaich achīö min öp kamë-ekūö yīö tö öp tökô-en kanòlô?
12 Ngaich yēḵ meh min hameuktöre öt michūḵṙen i nup kanôlò yip tahëng, ngaich achīö min öp kamëtö ngam kanòlô ngam tö halēniṙen nö chö-önyten meh?
13 Ötkô ön ngòh mahalanṙen nö nëttak lahöklōn tö yöngṙenre, pön mihôiṅ min nö surīkhö ngam tö hěngtak, ngaich hangenlōn tö ngam tahëng hēk haköpngöre inrē nö im tö hěngtak ngaich öt chumkūöṙen tö ngam tahëng. Ngatī yin yī-ö inrē ötkô hěnghöre löklōn ngam Tēv, hěnghöre löklōn nup Kanôlò inrē.”
14 Ngaich yik Feresī tö hangenlōn tö rupīö, hayë-e Yēsū ngaich cha-a, hē cha nö hang nuk ṙô ò.
15 Lökten ngaich Yēsū nö ngö ṙô nö in cha: “Höng hameuktöre yin löök ikūö më tarik, akahakūö pöri ngam Tēv tö nup ellōn yīö. Pò nup ṙô tökiröng nö imat tarik nöng sin-òkkūö anū-ö nö imat ngam Tēv.
16 Höng tamölngö ik ṙētak Yôhan nun minë chööngö, tö minë ṙô tökūichi tö yik pròfět hēten tö ngam inhangkö ngam Pūlngö ngam Tēv nö ahangka, hòṅ yip tö ṙōl mihëṅṙö tarik nö kalēḵ alaha nö kuhēthötre nö in e.
17 Lööṙen chanuhngöre an ngam halīöngö töng panam inrē, öt hěnghang milôhò pöri min nup chööngö nö öthō nö öt teungtökūö urēhěkūö u nö chuhngöre.
18 Ngòh tarik ṙamā-ang pīhöre ngaich kē pīhöre tö tahëng ngaich min anga-aṅ nö töng ma-asěha* ngaich yěn ōt öp tö hòṅ pīhövö tö ngam tö ṙā-ayö kikānö, ngatī inrē min anga-aṅ nö töng ma-asěha.
19 Hěngtak ök tökòlô tarik ök tö inyūtu tök tö pörpölömat hēk tö payānga mat inrē, töng kuchīken anga-aṅ hēk töng örheūheu inrē nö haṙamlōnre nö kaheuk sakāmö.
20 Hěngtak pöri ök mi-icheū-a tö Lāsörös minënyi, ök tö keuheūtngöre alaha tö seh, höng ṙā-ayö anga-aṅ nö ikūö inkūp ök tökòlô tarik.
21 Ngaich anga-aṅ nöng kapahare nö hòṅ nyā nuk tö suktöre nö löktö kui mīs ò, yihtöre inrē nuk am nö kurak kūö nuk seh ò.
22 Unôichrit tö rěh rò-angen ngaich ngam mi-icheū-a nö kapah ngaich yik ma-ahānga nö kēten ò nö in Aprahām.
Ngatī inrē ngam tökòlô tarik nö kapah ngaich ūliyö.
23 Höng chöökö nômö ngam tökòlô tarik nö el anūlö,* in e anga-aṅ nö môklö kūöre ngaich meūkö Aprahām nö marôvat, in ò inrē ang Lāsörös.
24 Havëken ò ngaich ök tökòlô tarik nö ngö ṙô, ‘Kayööngö Aprahām, aṙē-ělōn tö chu. Tīnten Lāsörös man nö sumtö kuntī re nö mufov ngih litāk chu, tön ngaich chin chöknyi nômö ihih öich ikūö ngih tö hūkūö tameūiyö.’
25 Ngö ṙô pöri ang Aprahām, ‘Kūön, fēkö nuk inlahenre man öm kumchikngenre in nuk tövai takô chehenre, höng la-al nuk kanihngenre pöri ang Lāsörös. Kuchīken pöri ngaich anga-aṅ nö ihih ngaich höng chöökö nômö më-eṅ.
26 Hěnghöre ōt inrē ngih tökiröngti vëlö nö ihôi hāṅ tö meh ngaich yěn ōt tö hòṅ chuh in meh ngaich ötkô anga-aṅ nö chööḵngen e nö lökngö hih nö chuh in meh.’
27 Ngö ṙô ngaich anga-aṅ, ‘Yēḵ e nö ngatī, hòṅ aṙētu ṙô Chin tö meh, tīnten ò man yēḵ nö i patī öp yöng chu,
28 hòṅ ò nö chuh in yip tö taneui tak mëm chu ngaich mikahtö elmat cha, hòṅ cha cha-a min nö öt chöknyi nômö yēḵ cha nö chuh hih.’
29 Ngö ṙô pöri ang Aprahām, ‘Īnu yip tö nup chööngö Môsös hēk tö nup ṙô yik pròfět inrē, hökngen cha nö hang ṙô cha.’
30 Ngö ṙô ngaich anga-aṅ, ‘Hö-ö, kayööngö Aprahām, yěn hěngtak öp chamuh in cha ṙamā-ang in yip tö ngaich nö kapah ngaich öthō min cha-a nö öt havöötö ellōnre.’
31 Ngö ṙô pöri ang Aprahām nö in ò, ‘Yēḵ cha nö öt hangṙô Môsös hēk yik pròfět inrē ngaich pòrô öp tö yòh tö hachohlöng nö ṙā-ang in yip tökapah ngaich öt ṙatö-ellōnre min cha-a nö in ò.’”
Footnotes
^ Hēk, “ngamëichken minë la-en el patī.”
