Kahūich Lūkös 17:1-37
17 Ngö ṙô hēk ang Yēsū nö in yik haköptöre: “Öthō nun nö öt yih minë lökngen fanukngö ngam ṙinatö-ellōn. Yöng öt inkôlò pöri min anga-aṅ tarik, öp tö löknguṙen tī tö ngam ṙinatö-ellōn yip tahëng nö fukngö!
2 Ĕhten öp anga-aṅ tarik nöng nyëktu likeun tö nup tö langan ihong, ngaich kapòknyu nö el öp tö aṙū mai, ěhten tö cha nö hěnghang pòkūö tī tö aṅ in vē kun kūöṅnö nö fukngö.*
3 Chumkūöṙen man töre. Yēḵ öp holmaneuk meh nö köölö fālen, ngaich vëken ò më-eṅ, ngaich yěn havöötö ellōnre anga-aṅ, ngaich aṙēlen ò më-eṅ.
4 Pôrò anga-aṅ nö sat heuh nö köölö fālen nö in meh ngaich sat van anga-aṅ nö chuh in meh nö ngö ṙô, ‘Fē-ěre Chin,’ ngaich aṙēlen ò më-eṅ.”
5 Ngö ṙô hēk yik tanīnöṙô nö in ngam Mā: “Ṙūöhlö ngam ṙinatö-ellōn ih.”
6 Ngaich ngö ṙô ngam Mā: “Yēḵ ngam ṙinatö-ellōn meh nö sā ṙôken öp töng kun kun kulöl rāi, ngaich mihôiṅ min më-eṅ ngö ṙô tö ngam chōn,* ‘Teuklöre man ngaich teūchtöre öm el mai!’ ngaich hangṙô meh min anga-aṅ.
7 Achīö öp öre in yīö tö ngö ṙô töp mahalanṙen yēḵ ò nö havan nö löktö i vinī-i panô-òṅ hēk hanëlen nup sīṅp, pököre inrē ngaich ngö ṙô anga-aṅ nö in ò, ‘Ih man ilööṙen öm ūichngöre öm nyā’?
8 Kô hòng ṙöng min anga-aṅ nö ngö ṙô nö in ò, ‘Halēnkö nyā-aṅkūö Chu man tö lā harap, hanöng sā Chu öl nyā, òk inrē ngaich nyëklö ṙat re më-eṅ öm meukṙen Chu, ngaich unôich min öm nyā, òk inrē’?
9 Kô hòng pöri min anga-aṅ nö ha-öiny tī ngam mahalanṙenre, pò ò nö keūheutngen minë la-en kinë-ekūöre tö ò?
10 Ngatī inlahen më-eṅ öm keūtheuten tö minë kinë-eṅkūöre taṙòkhöre la-en, ngaich ngö ṙô: ‘Töṙahata chin chū-ö mahalanṙen. Pöich höng kēken minë la-en, minë töng tinöölö ṙô chu.’”
11 Hē Yēsū nö chuh Yērūsalem ngaich lökngö hôi Samariā anga-aṅ tö Kelelī.
12 Hē ò ngaich nö chuh in ök tö hěng tuhēt, söm tak ngaich yik tö yeūnyu mameūkö ò, höng marôvat pöri cha-a nö sökhaka.
13 Ngaich pōitô cha-a nö hū-a nö havëken ò nö ngö ṙô: “Yēsū, Mahaköphöti, aṙē-ělōn man tö ih!”
14 Ngö ṙô ngaich ang Yēsū hē ò nö meūkö cha: “Kuṙòh kiröönngöre yin, ngaich hameuktöre in yip makūö kūönṙô.” Hē cha ngaich nö kiröönngöre, höng el talöökö ngaich cha-a nö lööken.
15 Hē ök tö hěngtak ngaich nö meūköre nö lööken, ngaich pōitô ngaich anga-aṅ nö tikökṙôre nö ha-öiny ngam Tēv ngaich havan.
16 Afukngöre ngaich anga-aṅ nö iröön Yēsū ngaich ha-öiny tī ò. Ngaich yěh meuk, tö hěngtak anga-aṅ nö aṅ Samariā.
17 Ngö ṙô ngaich ang Yēsū nö meūkö ò: “Röh öi taheui öi söm tak öi tö lööken? Isuh pöri yik tö machūöhtöre tak?
18 Höng öt hěngtak hòng mahavantöre nö ha-öiny ngam Tēv, höng ngòh tahëng mihëṅṙö tarik?”
19 Ngö ṙô ngaich anga-aṅ nö in ök tarik: “Choholre man ngaich kiröönngöre, ngam ṙinatö-ellōn meh an tö lööken tī tö meh.”
20 Hē yik Feresī ngaich nö hatöönö ò nö ngö ṙô, ihē öng ngam Pūlngö ngam Tēv nö yih, ngaich ngö ṙô anga-aṅ nö sapṙô cha: “Ötkô in öi meuk tö yīhi ngam Pūlngö ngam Tēv nö sā nup tö meuktu yanīhi,
21 ngaich ngö ṙô yip tarik, ‘Ihih an!’ hēk, ‘Umu-a inrē!’ Lökten yěh meuk! tö ngam Pūlngö ngam Tēv nöng ihôi hī.”
22 Ngö ṙô ngaich anga-aṅ nö in yik mahaköp: “Yih an ngam ṙētak hē yīö min hòṅ meuk ngam sakāmö ngòh Kūön tarik, ngaich hö-ö pöri min yī-ö kô meūkö e.
23 Pön ngö ṙô min yip tarik nö in yīö, ‘Yěh meuk ihih an!’ hēk, ‘Umu-a an!’ Uh pöri yī-ö kunyī-inyre hēk ui fachūlörit cha inrē.
24 Pön sā ngam hanyālö yēḵ e nö hěng lā yanāngökūö nö el katòh ngam halīöngö, yang inrē nö i tahëng lā-a el katòh ngam halīöngö, ngatī ön min ngòh Kūön tarik ip yamih sakāmö.
25 Urēhěkūö e pöri min anga-aṅ nö pōyen inkihten hēk sō-ovö min tö më tarik in në ṙētak hī töngamuh.
26 Sā inlahen nuk sakāmö ṙētak Nō-a misī, ngatī inlahen yanīhi min ngòh Kūön tarik,
27 hanöng sā Nō-a nö öl nö yôklö nö el ök chōng, hanöng saha yanīhi ngam ṙanööingö nö öl nö keuheūtngöre tī nö haṙööingen cha, nya-avkūö yik tarik, òk hēk hapīhö inrē.
28 Ngatī inlahen yik tarik i nuk sakāmö Lòt nö nyā, òk, inyīha, teūich hēk vī patī re inrē.
29 Hanöng saha Lòt nö kunyī-inyre tö ngam panam Sôtöm, ngaich ngam tameūiyö nö sā kintaktö kumṙah nö ṙā-ang el halīöngö ngaich ṙòkhöre tī nö ha-etngen yik tarik.
30 Hē ngam sakāmö ngòh Kūön tarik min nö hameuktöre ngatī min nup sakāmö ip hē e.
31 Lökten yip tarik mi-i kui patī nö un kuhēthötre nö kē nup chehenre el patī hēk un yòhti nö kē-ě u nö chuh lātaṙeū, ngatī ṙēngen öp tarik më-el panô-òṅ nö un kē nup chehenre nup tö ṙā-ayö tö ò.
32 Köplōn yin tö inlahen ök pīhö Lòt.
33 Yěn ōt tö hòṅ ma-āinyre nö hòṅ laklö ngam nômöre, löhlö tī min anga-aṅ tö e, ngòh tö löhlö tī pöri tö e, teūngen min anga-aṅ tö e.
34 Ngö ṙô chin tö yīö, nëttiṙah nap min tarik nö el öp tö hěng pölöng tö hatööm, hěngtak min öp tö kē-ě, ngaich ṙā-ayö öp tahëng.
35 Nët tak min nap yöngnyīö tumlön nö holṙen re, hěngtak min öp tö kē-ě, ngaich ṙā-ayö öp tahëng.”
36 * —
37 Ngö ṙô ngaich cha-a nö hatöönö ò: “Isuh Mā?” Ngö ṙô anga-aṅ: “Ichūök nup alaha yip kupah min, in e min nup matēṙö nö hamūlöre.”
Footnotes
^ Ngam tö ngö, tī-iv tö yip tahëng nö öt ṙatö-ellōnre.
^ Söhötūt ngö ṙô in tö ngòh chōn nö ṙô hintī
^ Ngëichköm Tahëng Ātiköl A3.
