Kahūich Lūkös 2:1-52
2 Ngaich hē u anū-ö sakāmö ök chööngö ṙāma-ang in Kaisör* Òköstös hinôtö më taṙòkhöre tarik aṅkūö* ngam panam nö kūichhöt minë-enyre.
2 (Angū-ö ön ngih raneh kinūichö minë-enyre hē ṙētak Kurēnias nö mākūö Siriā.)
3 Lökten ngaich cha-a nö ṙòkhöre nö chuh in nup panam chūök finötnyöre nö kūichhöt minë-enyre.
4 Mi-iyöng kūö ök panam ang Yôsěf Nāsaröt i Kelelī nö lamökngörit in ngam mikūönö Tāvit hēk michaplö ò inrē, lökten anga-aṅ nö chuh Yūta ngam panam Tāvit ngam tö Petlihem invëka inrē.
5 Hòṅ ò nö kūichhöt minë-enyre nö holten Mariā, pön ngaich hē e anga-aṅ nö pīhövö tö Mariā ngaich inrē anga-aṅ nö röhten kinyô-ò.
6 Hē cha nö ṙömöng i Petlihem, yih ngaich ngam ṙētak Mariā nö hòṅ kayôḵ.
7 Kūöntö kikōnyö ngaich anga-aṅ ök lanòh, öt teūngen cha-a tö chūökre nö el patī hameūheure, lökten ngaich anga-aṅ nöng lömngen ngam nyīö nö el hilā ngaich haṙōlngen ò nö el ök chūökkūö nuā.
8 Ōt inrē yik umuh yōm sīṅp im kamngö, töng ngöh nö el maitān nö aṅtö nuk sīṅp re hē el ṙētak hatööm.
9 Hěngtak ngaich ök ma-ahānga Yāvē* yamihtöre nöng sökhak nö lākūö cha ngaich havīlöng cha-a tö ngam hanātö kanôlò Yāvē,* lökten cha-a nö pa-ekūö takô.
10 Ngö ṙô pöri ök ma-ahānga nö in cha: “Uh yin pa-ekūö, yěh meuk! Kumtö tölöök inhānga chin öich chuhih öp löktö ṙanamölōn yip taṙòkhöre tarik min.
11 Fötnyu an nö ngaich töngamuh ngam mahayööken yīö nö i panam Tāvit, anga-aṅ öp Mā Kristū.
12 Ngih ön minkahngö ò min nö akahka tö yīö: Kôtökūö yin min tö öp nyīö nöng lömtöhëichṙen nö el hilā nöng ṙōlhaka nö el chūökkūö nuā.”
13 Ilööṙen yip tömaṙôngö aṅ el halīöngö nö holtö öp ma-ahānga nö ha-öiny ngam Tēv nö ngö ṙô:
14 “Ha-öiny ngam Tēv yēḵ el halīöngö, lanāmö inrē taneūngen yip tarik ing panam, yip töṙamölōn tī tö ngam Tēv.”
15 Hē ngam ma-ahānga ngaich nö havanlöre nö chuh el halīöngö, ngö ṙô ngaich yik yōm sīṅp nö vë-ekūöre: “Ta-a töi kiröönngöre chuh Petlihem öi ngëichhören ngih ṙô Yāvē* nö vë-eny nang hī.”
16 Haveutṙenre ngaich cha-a nö kiröönngöre, in e ngaich cha-a nö meūkö Mariā hēk Yôsěf tö ök nyīö inrē nö ṙōlhak nö el chūökkūö nuā.
17 Hē yik yōm sīṅp nö meuk ök nyīö ngaich vënyen nuk töng ṙô ök ma-ahānga cha-a tö inlahen ngam nyīö.
18 Pingangkūö yik töng hamang ṙô yik yōm sīṅp nö vë-eny nang cha,
19 höng ellōnre tī pöri ang Mariā tö në ṙô, fēkö minë tö aṙū-uti manah u inrē nöng ellōnre.
20 Havan ngaich yik yōm sīṅp nöng ha-öiny ngam Tēv hēk hapōilen ò inrē, asā vinë-eny nang cha, ngatī inlahen nuk maheuk cha hēk ahang cha inrē.
21 Unôichrit ngam hinëvhöre höiny sumkam, yih ngaich ngam ṙētak tunnyinyngö ngam nyīö, kaheuk minë-eny ò ngaich cha-a nö Yēsū, angū-ö ön ngih minë-eny ò ṙô ök ma-ahānga urēhěkūö pinrūkö ò.
22 Sā minë chööngö Môsös hē ṙētak ngam inhetlö ò nö yih, chuh Yērūsalem ngaich cha-a nö hameukten ò nö ikūö Yāvē,*
23 sā kinūichngö e nö im chööngö Yāvē:* “Pò vē lanòh kikōnyö nö töhet cha-a nö ikūö Yāvē.”*
24 Ngaich kētö tökētu cha-a nö sā minë chööngö kahëtö Yāvē:* “hěng tahôl nuk nyö-öṅ hēk nët nòng kūön pumpa.”
25 Ngaich yěh meuk! hěngtak ök tarik tö Simiōn minë-eny aṅ Yērūsalem, nö tölöök hēk maha-öiny ngam Tēv inrē, tö īnu anga-aṅ tö ngam töhet kumlēḵ ngaich hamökkö ṙētak ngam Tēv inrē nö kētö inreuskö alaha më Israel.
26 Hameukhumat inrē anga-aṅ tö ngam töhet kumlēḵ ngam Tēv hanöng sā ò nö öl nö meukkūö Kristū ngam tö katöllöng tö Yāvē,* öthō min anga-aṅ nö meukkūö ngam kinpaha.
27 Kuhēthötre ngaich anga-aṅ nö el ngam chūök vinë-ekūötēv, pön hachō-o tö ngam töhet kumlēḵ. Hē ök nyīö Yēsū nö kēhötvö tö nak yöngre nö lātuhēt hòṅ cha nö hateungngö minë Chööngö tökētu,
28 ful ngam nyīö ngaich ang Simiōn ngaich ha-öiny ngam Tēv:
29 “Ō më-eṅ Mā Lamātulöng tö në taṙòkhöre, ngaich ön min ngòh mameukṙen meh nö holtö lanāmöre nö chuh im kinpaha, pön sā ṙô meh kilēḵngôre,
30 kôtamat chū-ö öich meukkūö ngam inyööken lamöktö in meh,
31 ngaich ngam kahëtö meh inrē, hòṅ vē taṙòkhöre tarik aṅkūö ngih panam min nö meūkan,
32 Hanātö inmeukhömat yip tahëng mihëṅṙö tarik, ane inrē kanôlò vē tarik meh Israel.”
33 Pingangkūö nak yöng ök nyīö nö hang minë kinakkö inlahen ò.
34 Ngaich kētö inkôlò ò ang Simiōn ngaich ngö ṙô nö in ök yöng ò Mariā: “Yěh meuk! Lökngö fanukngö taṙòkhöre Israel an min hēk löklen chanòhlö yip taṙòkhöre inrē, ane inrē minkahngö nup tö sō-ovö ṙô
35 (tömarôtòng öp min fël tö tafūnikūö tī tö ngam nômö) hòn hameuknyu min nup mufē ellōn yip tömaṙôngö.”
36 Hěngtak ök umuh tö Anna minë-eny pròfět kikānö tö ngaich nö ṙēḵtivö kūön Fënu-el lamökngörit ök mikūönö Asēr. Höng sat samyeūheu rò-òten anga-aṅ nö in ök pīhöre unôichrit inlahen ò nö hapīhö,
37 tafīösi ngaich anga-aṅ hē ò nö 84 samyeūheu ṙēḵti. Öt ṙāngenre anga-aṅ nö chuh el ngam chūök vinë-ekūötēv, ahik hēk vë-elkui nö peuheū harap ṙô, iṙūöhen inrē anga-aṅ nö la-evṙen tö minë töhet la-en.
38 Yih ngaich anga-aṅ im ṙētak ngaich kētö nöönyö ngam Tēv hēk vënyö inlahen ngam nyīö nö in yik tömaṙôngö, yik töng hamökkö ṙinānyö Yērūsalem.
39 Hē nā Yôsěf nā Mariā nö keuheūten tö minë la-enre asā minë Chööngö Yāvē,* havan ngaich cha-a nö chuh im panam Nāsaröt i Kelelī.
40 Ngaich ngam nyīö nö sīöpö ṙôkö, kumlēḵ, mikah inrē ngaich köp ngam inkòlô ngam Tēv nö ikui ò.
41 Örheūheu minā yöng ò nö sā inlahen minë tö nehngenre inlahen cha nö kaheuk samyeūheu nö chuh Yērūsalem nö kēken ngam paratīn pāska.
42 Hē ò nö 12 höiny samyeūheu ngaich chuh Yērūsalem cha-a nö sā ngam tö nehngenre inlahen cha nö kēken ngam paratīn.
43 Hē cha pöri nö havan hē kinheūten ngam paratīn, höng ngöhngöre pöri ang Yēsū nö i Yērūsalem, höng öt akahalōn pöri minā yöng ò tö inlahen ò.
44 Pön höng ngö ṙô lōn cha-a tö ò nöng holröön yik tahëng krup nö havan, lökten ngaich cha-a nö halēnken ngam tö hěng sumkam ṙētak röön re nö kiröönngöre. Unôichngöre pöri ngaich cha-a nö chöhö ò nö in yik hanöng kisānöre hēk yik mikahkūöre inrē.
45 Hē cha pöri nö öt kôtökūö tö ò, havan ngaich cha-a nö chuh Yērūsalem ngaich chöhan nö in nup chūökö.
46 Unôichrit tö lūöi sumkam ngaich cha-a nö kôtökūö tö ò nö el chūök vinë-ekūötēv, nö ūichtöhëichṙen nö elhôi yik mahaköphöti nö hangihtö ṙô cha hēk hatönö cha inrē.
47 Ngaich yik hamang ṙô ò nö pingangkūö tö mikah ò hēk tö heuneū-eu ṙô ò inrē nö sapṙô cha.
48 Hē nak yöng ò ngaich nö meūkan nö umuh ngaich pingangkūö cha-a, ngö ṙô ngaich ngam yöng ò kikānö: “Kūön, kūö yòh öm ngatī inlahen tī tö ai? Yěh meuk, ngaich āyö töm yöng meh ai höng sā tökatūöyaṙen ai chöhö meh.”
49 Ngö ṙô pöri anga-aṅ nö in cha: “Sitih öich kan chöhö tö nā? Öt akahalōn an tö Chu öich el patī ngam Yöngre?”
50 Öt akahakūö pöri cha-a tö manah ngam ṙô ò.
51 Kiröönngöre ngaich anga-aṅ nö holröön cha nö chuh Nāsaröt hēk örheūheu nö milēḵṙen tö cha.* Höng ellōnre tī pöri ngam yöng ò kikānö tö në ṙô.
52 Ṙūöhölre ṙôkö hēk mikah ang Yēsū ngaich köp inrē ngam hanangenlōn ò tö ngam Tēv hēk tö yip tarik inrē.
Footnotes
^ Ṙô Krīk, “Kaisör.”
^ Hēk, “minë taṙòkhöre panam.”
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Hēk, “elkatòh chööngö cha inrē.”
