Kahūich Lūkös 21:1-38
21 Môklökūöre ngaich anga-aṅ nö ngëichken yik tökôlò yik chamaplö nuk kahëtöre nö el nuk kòntripiūsön pòks.
2 Meuk ök tafīösi ngaich anga-aṅ ök töng hāṅten nö chaplö nuk tö nët tāk pësa,* nuk töng ötkô nö ṙāi tī hī tökūö kun ṙôkenre,
3 ngö ṙô ngaich anga-aṅ: “Tökò-òṙô Chin tö yīö, ngòh yāich tafīösi an tö mötlö ṙôken chahaplö nö i tumtak cha.
4 Pò cha nö ṙòkhöre nö chaplö nuk tö pōyen aṅ in re, hö-ö pöri ngòh yöngnyīö pön höng keuheūttöre tī tö nuk töng aṅ in re nuk löktö inlahen ò nö ha-aṅ nômöre.”
5 Unôichngöre ngaich yik aṅ in cha nö kakkö inlahen ngam töhet chūök tö e nö sitih inlahen nö hanyöötö tö minë tövai ihong hēk tö minë tökētu inrē chehen,
6 ngö ṙô ngaich anga-aṅ: “Yih nup sakāmö tö në taṙòkhöre maheuk yīö nö öt hěng hang min ihong tö ṙā-ayö nö hachaphen höö öp töt suktu min.”
7 Ngö ṙô ngaich yik mahaköp nö hatöönö ò: “Mahaköphöti, ihē ön min në ṙô nö teungtökūö, ngaich yěn röhta yanīhi min öp ṙētak u ngaich asuh min öp minkahngö u?”
8 Ngö ṙô ngaich anga-aṅ: “Haṙēmngenre yin hòṅ yīö öt halō-oikūö, tön pōyen yip min yamih nö i minë-eny chu nö ngö ṙô, ‘Chū-ö chin anga-aṅ’ hēk ‘Röhta an inrē ngam tö halēniṙen ṙētak.’ Uh yī-ö öi tömrit cha.
9 Hēk yēḵ yīö öi hang minë kinyūngö hēk tinṙōlen* ngaich ui pa-ekūö, tön tö hòṅ yih nun anū-ö, öt ilööṙen pöri min ngam manāngen nö yih.”
10 Ngö ṙô hēk anga-aṅ: “Pò në panam min nöng la-al höö hēk pūlngö inrē nöng la-al höö.
11 Kiröng kumyeūnö inrē min nup yamih, ṙōlkang chūök min ngam inyāichö hēk tölëlngökūö invah inrē nö keuheūtngöre chūök, yöng pinhë-eṅkūö min nö meūkö hēk meūkö min minë tökiröng minkahngö nö el halīöngö.
12 Urēhěkūö në ṙô pöri min nö teungtökūö yip tarik nö kē-ě yīö, hakihten yīö, kēten yīö inrē el chūök vinë-ekūötēv hēk hachēlhöt yīö inrē, kētu inrē min yī-ö öi ikūö yip mahayöng hēk ikūö yip rācha töpòkūö ngam minë-eny chu.
13 In e min yī-ö öi ṙētakvö öi vë-eny nang cha.
14 Lökten yin öi ellōnre tī tö ngih, öi ui urěhangen tī halēnngö nup ṙôre öi vë-ekūö cha tö inlahen re,
15 pöich chū-ö min kamëtö ṙô hēk mikah öich in yīö, ngaich yěn pòrô min yip la-al yīö nö hamūlöre, sön min cha-a nö ötkô nö sapṙô yīö.
16 Hēk söl in yip yöng yīö kikōnyö hēk kikānö, kahëm yīö, holmaneuk yīö hēk hol yīö inrē min nö kēngen* yīö, fëlngen yīö min inrē,
17 kunyahavö min yī-ö töpòkūö ngam minë-eny chu.
18 Öt hěng hang miköchö pöri min keūyö yīö tö suktöre.
19 Kūö ngam manööyöre pöri min yī-ö öi teūngen tö ngam nômöre.
20 Yēḵ yīö min öi meūkö Yērūsalem nö havīlöng tö yip kumyung, ngaich akahalōn yī-ö tö e nö röhta inhetngö.
21 Ngaich yip mi-i Yūta hökngen cha nö ilööṙen nö falngöre nö chuh kui rôngö, ngaich yip lamatuhēt nö i Yērūsalem ngaich kunyī-inyre cha-a ngaich yip tö röhta nö in e ngaich un kuhēthötre nö i Yērūsalem,
22 pò në sakāmö min nö ṙētak invahalvah* hòṅ minë tökūichi nö ṙòkhöre nö teungtökūö.
23 Höng yöng kanihngen pöri min yip puyōsö, yip mahapō kūönre inrē yöngnyīö hē u anū-ö sakāmö! Lökten min nö yih nup tökiröng kanihngen nö ing panam hūlö kūö tanānyö inrē min nö in vē tarik.
24 Fëli min cha-a tö sanët, haköövö inrē min cha-a nö chuh in minë taṙòkhöre panam,* rööntu kui pöri min Yērūsalem tö më tahëng mihëṅṙö tarik hanöng sā kinheūtten öp ṙētak cha.
25 Rö-ö nöng angū-ö, pön meūkö min minë minkahngö nö in ngam tavūöi, chingëṅt, taneūsömat inrē, yöng kanihngen min nö ikui vē tarik ikūö ngih panam, pön kunṙôkö min nö el mai hēk halënyköre inrē min minë mahūṅvö öt akahakūö min cha-a töp chūökre nö laklö nômöre.
26 Asuh nup min hēk tö meūkö tö hī nö ikūö ngih panam, angū-ö min mufē yip tarik nöng pinhë-eṅkūönyöre pön meūkö min minë minkahngö nö el halīöngö nö kayīna.
27 Ngaich unôichrit e min cha-a nö meukten ngòh Kūön tarik nö löktö el halīöngö nö holtö kumlēḵre, kanôlòre inrē.
28 Ngaich yěi meuk në ṙô pöri nö teungtökūö ngaich môklökūöre yī-ö öi chiptöhëichṙen öi sökhak tön ngaich an nö röhta yanīhi ngam ṙinānyö yīö.”
29 Kētö ök inchōḵ-oṙô hēk ang Yēsū nö in cha: “Chumkūöṙen yin ngëichkö ngam anychīr chōn hēk tö minë taṙòkhöre chōn.
30 Yěn meunynyi minë tufömngöre rōi ngam chōn ngaich ilöö akahakūö yī-ö tö ranöhta yanīhi ngam sikehngö.
31 Ngaich ngatī yī-ö yěi meuk në ṙô nö teungtökūö ngaich akahalōn yī-ö tö ranöhta yanīhi ngam Pūlngö ngam Tēv.
32 Tökò-òṙô Chin tö yīö, hanöng sā në ṙô nö öl nö ṙòkhöre nö teungtökūö öthō min ngih michaplö nö chuhngöre.
33 Chuhngöre an min ngam halīöngö, ngih panam inrē öt chanūhuvṙen pöri në ṙô chu.
34 Haṙēmngenre pöri yī-ö öi ngëichköre hòṅ ngam ellōn yīö nö öt langanköti, öi höng lōntö ngam hinyōyö min hēk infēkö nup nya-aṅkūö ngam nômöre, ngaich ilööṙen min ngam sakāmö nö yih nö ikui yīö nöng sā pinnyööpömat
35 nö hachīlö yīö. Pön ngatī yanīhi min angū-ö nö ikui vē tarik, mi-iyöngkūö në taṙòkhöre panam.
36 Lökten yin ui halöngngenre öi haṙòhlö, örheūheu pöri vë-ekūötēv hēk havë-a inrē hòṅ yīö ötkò-òngvah tö ngam tö halēniṙen ṙētak hēk sökhak öi ikūö ngam Kūön tarik.”
37 Ngatī inlahen ang Yēsū nö haköphöti tö hē el sakāmö nö el chūök vinë-ekūötēv ngaich kiröönngöre tö hatööm nö kunyī-inyre tö ngam panam nö chuh kui Rôngö Òliv ngaich in e nöng ngöh.
38 Ṙòhköre më tarik nö ka-euilökūö tö peuheū nö yihtöre nö el ngam töhet chūök nö hangṙô ò.
Footnotes
^ Ṙô Krīk, “nët lēpta.” Ngëichköm Tahëng Ātiköl B14.
^ Hēk, “lina-alkūö.”
^ Hēk, “hachīlngövah.”
^ Hēk, “kinṙôkö.”
^ Hēk, “më tahëng mihëṅṙö tarik.”
