Kahūich Lūkös 24:1-53
24 Im ranehtökūö sakāmö ngam afta, ka-euilökūö yik yöngnyīö nö chuh in ök anūlö, nö kumtö nuk tötahūsa masāla.
2 Hē cha pöri nö ngëichken ök anūlö ngaich meuk ök ihong cha-a aṅkūö e nöng marôvat nö pilöniyö,
3 hē cha ngaich nö kuhēthötre ngaich öt maheūku cha-a tö ngam alaha ngam Mā Yēsū.
4 Ṙömöng uṙeh alaha cha-a tö ngam inlahen re, chalô ngaich nak tö nëttak tarik samökhak nö ikūö cha tö kalē-ě yanāngö mat inyut.
5 Höng sōnhakkūö ngaich yik yöngnyīö nö ngëichkö lātaṙeū tökūö pinhë-eṅkūöre. Ngö ṙô ngaich nak tarik: “Ngam tö aṅ tarik, kūö yòh öi chöhan öi in vē tökapah?
6 Öt ōt ök nö ihih pön ngaich nö hachohlöng. Fēkö ṙô ò yin, hē ò nö i Kelelī ngaich asuh ök ṙô ò hē e nö in yīö,
7 tö inlahen ngòh Kūön tarik nö kētu min nö eltī yip tötlöök hēk kilöllöng min nö irōi chōn ngaich fëli, hachohlöng pöri min anga-aṅ im linūöi sumkam.”
8 Fē-ělre ngaich cha-a tö ngam ṙô ò,
9 havan ngaich cha-a nö löktö in ök anūlö ngaich vë-eny nang yik tö Kahuksīön tak hēk tö yik taṙòkhöre tarik inrē.
10 Cha-a yin vē yöngnyīö, Mëri Mektelīn, Yôhanna hēk Mariā ök yöng Yāköp. Ōt inrē yik tahëng yöngnyīö in cha, vamë-eny nang yik tanīnöṙô tö në ṙô.
11 Ngaich pöri yik tanīnöṙô tö yik tahëng inrē mahaköp nöng öt ṙatö-ellōnre tö ṙô yik yöngnyīö nö vë-eny nang cha.
12 Choholre ngaich ang Pītör ngaich fal nö kū-ö tö in ök anūlö, sōntökūöre anga-aṅ nö ngëichkö lātuhēt el ök anūlö ngaich höng meuk ök tövai hilā anga-aṅ nöng ṙā-akṙen, höng pingangkūö ngaich anga-aṅ nöng ellōnre lōn tök maheukre nöng kiröönngöre.
13 Yěh meuk pöri! Im hē e angū-ö sakāmö nak tö nët tak mahaköp chamuh im tuhēt Ēmīös, ngam tö 11 kilomitör* rôvat tö Yērūsalem,
14 ngaich vë-ekūö höö cha-a tö minë tö ngaichngen inlahngen.
15 Hē cha nöng ṙònghöichṙô nö kakken u, yihtöre ngaich ang Yēsū nö in cha ngaich holröön cha nö kiröön,
16 öt akahakūö pöri cha-a tö ò.
17 Ngö ṙô ngaich anga-aṅ nö hatöönö cha: “Asuh öp kan ṙô nā an höng la-alkūöre ṙô an kiröön?” Sökngöre ngaich cha-a, nöng līnö arëkūö.
18 Ngaich hěngtak ngaich ök in cha tö Kli-opas minë-eny samapṙô ò nö ngö ṙô: “Höng më-eṅ öm töt akahalōn tö inlahen nuk tö ngaichngen in në sakāmö nö i Yērūsalem?”*
19 Ngö ṙô ngaich anga-aṅ nö hatöönö cha: “Nö asuh öp kòl inlahngen?” Ngö ṙô ngaich acha-a: “Öt hang inlanken Yēsū öm kan më-eṅ ök aṅ Nāsaröt? pōyen nuk la-en minhôiṅyö ò hēk inköphöti, nö inmeuktö ò nö anga-aṅ pròfět nö ikūö ngam Tēv hēk tarik inrē;
20 ngaich më mākūö kūönṙô tö yik mākūö tinlööken nö kēten ò nö im kinpaha ngaich tōkngen ò nö i rōi chōn.
21 Ngaich īhö höng maheūṅkku tö ò nö anga-aṅ min ṙamānyen Israel. Heūṅ, ngaich inrē nö lūöihang sumkam rò-angen ngih inlahngen.
22 Hēk rīkre yik yöngnyīö elhôi ih pumngangtökūö ih tö inlahen e, pön hē cha nö ka-euilökūö nö chuh in ök anūlö ò
23 ngaich öt meuk ök alaha ò cha-a. Yihtöre ngaich cha-a nö vë-eny nang ih tök maheukre pinngangkūö, tö cha nö meuk nak ma-ahānga vamë-eny nang cha, tö ò ngaich nö ha-aṅlöng.
24 Rīkre ngaich yik aṅ in ih chamuh in ök anūlö, ngaich sā ṙô yik yöngnyīö nö vë-eny nang ih, ngatī nuk maheuk ih, hö-ö pöri īhö meūkö ò.”
25 Ngö ṙô ngaich anga-aṅ nö in cha: “Yī-ö töt akaha, kūö yòh öi kihngen öi ṙatö-ellōn i nuk ṙô yik pròfět!
26 Öt tö hòṅ ngatī inlahen ang Kristū nö hayë-e ngaich teūngen min tö ngam kanôlò minā-aṅre?”
27 Ngaich löktökūö in ök Līpöre Môsös söl in nuk Līpöre yik pròfět anga-aṅ nö mikahtö elnang cha tö nuk tökūichi inlahen ò nö imat minë Līpöre.
28 Ngaich cha-a nö hòṅ teung nö in ök tuhēt chahūhure, hameuktöre pöri anga-aṅ nö sā tö hòṅ iṙūöhöröön nö kiröön.
29 Ṙōlheuh ṙô pöri cha-a nö ngö ṙô nö in ò: “Höngngöh man in ih tön ngaich an nö hòṅ harap ngaich inrē min nö hòṅ sangūla.” Höngngöhtöre ngaich anga-aṅ nö i patī cha.
30 Hē ò ngaich nö ūichngöre nö nyā* nö in cha, kē ök ròtī ngaich anga-aṅ ngaich ha-öiny ngam Tēv ngaich fôkö e ngaich kē-ěkūö cha.
31 Möl ngaich cha-a nö löpnyörekūö mat ngaich akahakūö tö ò. Höng chaṙēvi pöri ngaich anga-aṅ nö ikūö cha.
32 Vë-ekūöre ngaich cha-a nö ngö ṙô: “Hē hāṅ kiröön el talöökö ngaich ik sā ò nö mikahtö elnang hāṅ tö manah ṙô ngam töhet Līpöre ngaich hö-ö hòng aya-a ai paṙööyi ellōn tö nup ṙô ò?”
33 Im hē-e ngaich cha-a nöng ilöö havan nö chuh Yērūsalem, ngaich meūkö ò cha-a nö mūlhakṙen nö elhôi yik tö Kahuksīön tak hēk tö yik tahëng mahaköp,
34 yik tö ngö ṙô: “Kô-en öp kòl Mā nö ha-aṅlöng, meūkö öp tö Sīmōn!”
35 Ngatī cha-a nö vënyö nuk inlahenre hē cha nö el talöökö, ngamuh inrē vahënyö cha inlahen cha hē ò nö fòk ök ròtī ngaich möl cha-a nö akahakūö tö ò.
36 Höng ṙònghöichṙô cha-a nö kakken e, chalô ngaich ang Yēsū nö söktöhëich nö elhôi cha ngaich ngö ṙô nö in cha: “Lanāmö yēḵ in yīö.”
37 Pa-ekūö takô ngaich cha-a, tarūka cha-a pön ngö ṙô lōn cha-a tö ò nöng ma-ahānga.
38 Ngaich ngö ṙô ngaich anga-aṅ tö cha: “Kūö yòh öi röiyö alaha, kūö yòh öi katöönga ellōn?
39 Ngëichken minë kël chu hēk kalröön chu yin, Chū-ö chin kòl; lūölken chu, ngëichken chu yin tön töt tangëḵ-evö yin vē ma-ahānga, sā maheuk yīö öi in Chu.”
40 Höng ṙò-òvö anga-aṅ nö hameukhömat cha tö minë këlre hēk kalröönre.
41 Öt ṙatö-ellōnre cha-a tökūö ṙôken ngam ṙanamölōnre hēk pinngangkūöre, ngö ṙô ngaich anga-aṅ nö in cha: “Ōt hòng nyā-aṅkūö hī in yīö?”
42 Kē-ěkūö ò ngaich cha-a tök töhěng milôhò töharāngö alaha kāḵ,
43 kē-ě e ngaich anga-aṅ ngaich nyā nö lākūö cha nö ṙòkhöre.
44 Ngö ṙô ngaich anga-aṅ: “Köplōn öi tö në ṙô Chu hē chu öich ṙömöng in yīö, vë-eny nang yīö Chin hē-e öich ngö ṙô, tö minë tökūichi inlahen chu in ngam Chööngö Môsös hēk imat nup līpöre kahūich yik Pròfět hēk imat ngam līpöre Salmai nö tö hòṅ hateūngi anū-ö nö ṙòkhöre.”
45 Mikahtö elnang cha ngaich anga-aṅ tö manah minë tökūichi nö imat ngam Līpöre,
46 ngaich ngö ṙô nö in cha, “Ngö kinūichngö an, tö inlahen Kristū min nö tötlēkaṙen ngaich hachohlöng pöri min anga-aṅ im linūöi sumkam nö ṙā-ang in yip tökapah,
47 ahangka min angū-ö nö löktökūö Yērūsalem nö keheūtngöre chūök nö ikūö në panam, tö yip tö hòṅ teūngen tö inṙē-ěl tökööl re nö havöötö ellōnre nö i minë-eny ò.
48 Yī-ö yin tö hòṅ vënyen në ṙô.
49 Ngaich yěh meuk! Söömhökūö yīö chin min tö ngam kumlēḵ ngam kinlēḵngô ngam Yöng chu nö in Chu. Hanöng sā yīö öi öl öi teūngen tö ngam kumlēḵ nö löktö lātulöng, höngngöhren yī-ö ikūö ngih panam.”
50 Kumnyīnyen cha ngaich anga-aṅ tö ngam panam nö chuh Petenī ngaich hachônglö këlre nö kētö inkôlò cha.
51 Höng ṙònghöichṙô anga-aṅ nö kētö inkôlò cha ngaich ṙāngen cha, kēḵlöng ngaich anga-aṅ nö el halīöngö.
52 Sōntökūöre ngaich cha-a nö salāmö ò ngaich holtö ṙanamlōnre nö havan nö chuh Yērūsalem.
53 Ngaich kaheuk sakāmö cha-a nö el chūök vinë-ekūötēv nö ha-öiny ngam Tēv.
Footnotes
^ Ṙô Krīk, “60 Istātiā.” Sā ṙòkti ngam tö 185 maël (606.95 fīt) ngam tö hěng Istātiā. Ngëichköm Tahëng Ātiköl B14.
^ Hēk lohten, “Töng hěngtak öm kan më-eṅ mahavötköre i Yērūsalem öm töt akahakūö?”
^ Hēk, “ūichtöre nö ik mīs.”
