Kahūich Lūkös 8:1-56
-
Më yöngnyīö hamòlröön Yēsū (1-3)
-
Inchōḵ elmat inlahen ngam tameūich (4-8)
-
Kūö yòh ang Yēsū nö kētö inchōḵ-oṙô (9, 10)
-
Vënyu manah ngam tineūichtö kulöl (11-15)
-
Öt öptukui an ngam ëāṅvö (16-18)
-
Yöng Yēsū kikānö hēk kahëm ò inrē (19-21)
-
Ṙaptö chanôichö ang Yēsū (22-25)
-
Tīnngö yik tötlöök ma-ahānga ang Yēsū nö el alaha nuk ha-un (26-39)
-
Kūön Yairös; lūölkö taseūrit inyut Yēsū ök kikānö (40-56)
8 Ilöö unôichrit e ngaich ang Yēsū nö chuh in minë panam hēk tuhēt inrē, nö ahangkö ngam tölöök inhangkö ngam Pūlngö ngam Tēv nö in yik tarik. Hōlu anga-aṅ tö yik tö Nëtsīön tak mahaköp,
2 ōt yik yöngnyīö in cha, yik tö kēnyu el alaha tö tötlöök ma-ahānga hēk halankaṙen invah inrē. Tö sā Mëri ök tö Mektelīn invëka, ök tö kēnyu el alaha tö yik tö sat tak tötlöök ma-ahānga,
3 Yôhanna ök pīhö Kūsa, ök mahayōmken nuk inlānen Heròt, Sūsanna hēk tö yik tahëng inrē yöngnyīö, ṙòkhöre cha-a nö meukṙen Yēsū hēk tö yik haköptö ò nö kēten minë töng aṅ in re kanôlò.
4 Ōt yik tarik yamih nö kö löktö in minë tahëng panam, hē yik tömaṙôngö ngaich nö hamūlöre nö in ò ngaich kētö ök töhěng anga-aṅ inchōḵ-oṙô nö ngö ṙô:
5 “Hěngtak ök yōm panô-òṅ kumröönngöre nö teūich. Hē ò ngaich nö ṙònghöichṙen nö teūich, rīkre ngaich nuk kulöl tö suktöre nö i taseū talöökö ngaich rööntu kui anū-ö, ngaich nup chehechōn nö kiteūtöre ngaich nyāngen u.
6 Rīkre nuk tö suktöre nö ikūö tö ihongu tumlat, ngaich sīöplö anū-ö ngaich ilöö nyīkngö, kūö u nö öt aṙū-uti röönti.
7 Rīkre pöri hēk nuk kulöl tö suktöre nö el töchökhukūö, ngaich kihngen sanīöpö anū-ö tö tī nuk töchökhukūö chōn, pön rāitikui tö tī u.
8 Ōt pöri hēk nuk kulöl tö suktöre nö el tövai tumlat, ngaich pöpnyikūö, unôichrit e ngaich anū-ö nö kētö ṙòng re nö 100 ṙòng.” Hē kinheūtö ṙô ò ngaich pōitô anga-aṅ nö ngö ṙô: “Ngòh tö elnanguvö, hökngen ò yēḵ nö akah elnang tö në ṙô chu.”
9 Hatöönö ò pöri ngaich yik haköptö ò tö manah ngam inchōḵ-oṙô ò.
10 Ngaich ngö ṙô anga-aṅ: “Höng yī-ö yin tökē-ĕvkūö tö mikah elmatre tö minë ṙô tö hayūni manah, inlahen ngam Pūlngö ngam halīöngö, höng inchōḵ-oṙô pöri anū-ö nö imat më tahëng tarik, pò cha nöng mātuvö, hö-ö pöri nö meuk, nāngu yin, hö-ö pöri nö hang, ötrēhěn inrē nö akaha elnang tö manah u.
11 Ngih ön manah ngih inchōḵ-oṙô: Ngam kulöl ngam ṙô ngam Tēv.
12 Minë kulöl tö suktöre nö i taseū talöökö, cha-a yip tarik töng hamang ngam ṙô, yihtöre pöri ngaich ngam Satān nö kēngen ngam ṙô nö ṙā-ang ellōn cha, hòṅ cha nö öt ṙatö-ellōnre hēk öt teūngen inrē tö inyööken re.
13 Ngam kulöl tö suktöre nö in ngam tö ihongukūö tumlat, cha-a yin vē tarik töng hamang ngam ṙô ngaich holtö ṙanamölōnre nö hō-en e, hö-ö pöri nö kööpö röönti, töng rahëichtakūö pöri ngam inlahen cha nö ṙatö-ellōnre ngaich yěn yih minë kinlaha ngaich fukngö cha-a.
14 Ngaich ngam kulöl tö suktöre nö in minë töchökhukūö chōn, cha-a yin vē tarik töng hamang ngam ṙô, kūö nup pinṙūtölōnre pöri kanôlò hēk inṙamlōn nö lō-ongkūö tö tī u ngaich rāitikui cha-a ngaich öt kētö tövai ṙòng re.
15 Ngam kulöl pöri tö suktöre nö el ngam tövai tumlat, cha-a yin vē tarik tö yāichö ellōn, hang ngam ṙô cha-a ngaich haköpngen u nö ellōnre ngaich holtö manööyöre nö kētö tölöök ṙòng re.
16 Öt hěngtak tarik tamòttökūö ëāṅvö ngaich öptökui e tö pingāṅl hēk ṙāhöt e inrē nö elkatòh pölöng, ṙāḵten u pöri cha-a nö el chūökrit ëāṅvö, hòṅ yip tarik kumhēthötre nö meuk ngam yanāngö.
17 Pön öt hěng töhayūni ngaich öt hameuknyu nö lākūö, ötrēhěn nö ōt chehen tö ulāikaṙen inyunngö öp töt mikahngen hī nö hameuknyu nö lākūö.
18 Lökten man chumkūöṙen tö inlahen re öm hangihtöre, pön ngòh tö aṅhavin, kē-ěvkūö hēk min anga-aṅ, ngòh töt aṅhavin pöri, kē-ěyö min nup aṅ in ò nup chehen ò tö lōn ò.”
19 Chuh in Yēsū ngaich ök yöng ò kikānö hēk tö yik kahëm ò inrē pön hòṅ meukkūö ò, kūö më tömaṙôngö pöri cha-a nö pōyen lökten nö öt teungta nö chuh in ò.
20 Ngaich ngö vinë-eny nang ngaich anga-aṅ: “Höng sökhak öp kòl yöng meh kikānö hēk tö yip kahëm meh inrē nö lātunyī pön hòṅ meukkūö meh.”
21 Ngö ṙô ngaich anga-aṅ nö sapṙô cha: “Vē yih yöng chu kikānö hēk kahëm chu, vē hamang ṙô ngam Tēv ngaich lök in u.”
22 Hěngheuh hēk ang Yēsū tö yik haköptö ò nö yôklö nö el ök tö hěng nòng kupòk, ngaich ngö ṙô anga-aṅ nö in cha: “Ta-a töi havāngngöre töm mai öi chuh lāmuh.” Kiröönngöre ngaich cha-a nö el ök kupòk.
23 Haṙòh pöri ngaich anga-aṅ. Chalô ngaich ök chanôichö el ngam mai, tööḵlö ël ngaich ngam kupòk tö ngam mai mihôiṅ öre cha-a nö kapah.
24 Yihtöre ngaich yik haköptö ò ngaich kilangken ò nö ngö ṙô: “Mahaköphöti, Mahaköphöti, ngaich in kòl min chuh im kinpaha!” Choholre ngaich anga-aṅ ngaich vëken ngam kuföt, ṙaptöre ngaich ngam chanôichö nö el ngam mai ngaich kalūöng angū-ö.
25 Ngö ṙô ngaich anga-aṅ nö in yik haköptöre: “Kūö yòh öi öt ṙatö-ellōnre töm Tēv min nö hayööken yīö?” Pingangkūö ngaich yik mahaköp nö meūkö e ngaich vë-ekūö höö nö ngö ṙô: “Achīö takô ang anga-aṅ ngòh tarik? Uroh ngam kuföt tö ngam mai inrē nö hang chööngö ò.”
26 Teung ngaich cha-a nö ik panam Keresēn, ök tö rònglö nö lākūö Kelelī.
27 Hē ò pöri ngaich nö yôkti nö ikūö kuyāyö, hěngtak ngaich ök tarik aṅ ök panam mameukkūö ò, ök tö aṅhav el alaha tök tötlöök ma-ahānga. Tö marô-angen anga-aṅ nöng öt inyūtu alaha nö havötköre, öt mi-iyöngkö patī inrē anga-aṅ, pön höng mi-i kui kupah.
28 Hē ò ngaich nö meūkö Yēsū, hū-a ngaich anga-aṅ ngaich afukngöre, ngaich pōitô nö ayôṙa, nö ngö ṙô: “Më-eṅ Yēsū, Kūön ngam Tēv Lamātulöng tö në taṙòkhöre, asuh öp la-en meh chuh in chu? Aṙētö ṙô chu man, uh chin öich hakihtuṙen.”
29 (Pò Yēsū nö tölṙô ök tötlöök ma-ahānga nö kunyī-inyre nö ṙā-ang el alaha ök tarik. Ṙōlheuh ngam tötlöök ma-ahānga nöng iyöng el alaha ngam tarik,* örheūheu anga-aṅ nö aṅtu ngaich nyëki tö sayôk, halökī inrē tö inlök, sön pöri anga-aṅ nö litòknyen nup nyanëk re, ngaich ngam tötlöök ma-ahānga nö afalngen ngam tarik nö chuh in nup tö chēvhakṙen chūökö.)
30 Hatöönö ò ngaich ang Yēsū nö ngö ṙô: “Achīö öp minë-eny meh?” Ngö ṙô anga-aṅ: “Pöltön.” Kūö më tötlöök ma-ahānga nö pōyen nö el alaha ò.
31 Hòṅ aṙētu ṙô cha-a tö ò nö un tölṙô cha nö chuh el nuk tö aṙū-uti chūökö.
32 Pōyen nuk ha-un tö ṙònghöichṙen nö hanëlöng nö ikui rôngö, lökten ngaich yik tötlöök ma-ahānga nö hòṅ aṙētu ṙô tö Yēsū, nö hökiṙen nö chuh el alaha nuk tö pōyen ha-un.
33 Lökten ngaich yik tötlöök ma-ahānga nö kunyī-inyre nö ṙā-ang el alaha ök tarik ngaich meuthöt nö chuh el alaha nuk tö pōyen ha-un. Ṙòkhöre ngaich nuk ha-un nö veut nö fal ngaich tisūtöre nö lātaṙeū ngaich fuk el mai ngaich ṙòkngörevah nuk ha-un nö kapah.
34 Hē yik mahanëlö ha-un nö meuk ngam inlahen cha ngaich falngöre cha-a nö chuh im panam, ngaich keuheūtnyöre ṙô nö vë-eny ngam inlahen ò.
35 Hē cha ngaich nö yihtöre nö meuk ngam inlahngen cha sin. Chuh in Yēsū ngaich cha-a, ngaich meuk ngam tarik, ngam tö aṅhav el alaha sin tö ök tötlöök ma-ahānga, höng lēntöhöichṙen anga-aṅ nöng inyūtu nö iröön Yēsū nö ūichhaka. Pa-ekūö ngaich yik tarik hē cha nö meūkö e.
36 Yik tö kôtamat nö meuk ngih inlahngen ngaich vë-eny inlahen ök tarik cha-a, ök tö aṅhav el alaha sin tö ök tötlöök ma-ahānga, nö sitih inlahen ngaich anga-aṅ nö lööken.
37 Ngaich yik tömaṙôngö tarik yamihtöre yik tö röhta nö im panam Keresēn. Tölṙô Yēsū cha-a nö kiröönngöre nö ṙā-ang umuh, kūö cha nö pa-ekūö takô. Lökten ngaich Yēsū nö yôklö nö el ök kupòk ngaich kiröönngöre nö ṙā-ang umuh.
38 Ngaich öp tarik tö kēnyu el alaha tö ök tötlöök ma-ahānga, ṙōlheuh ṙô anga-aṅ nö hòṅ aṙētu ṙô nö in Yēsū nö hòṅ holṙöön ò nö kiröönngöre. Tīnngörit ò pöri ang Yēsū nö ngö ṙô:
39 “Havan man chuh patī re, ngaich nup tī ngam Tēv nö in meh ngaich vënyen u më-eṅ öm in yip taṙòkhöre tarik.” Kiröönngöre ngaich ngam tarik ngaich vë-eny nang yik tarik aṅkūö ngam panam tö inlahen tī Yēsū nö in ò.
40 Hē Yēsū nö havan ngaich holtö ṙanamlōnre yik tömaṙôngö nö ha-öinytö yīhi ò, kūö cha nö ṙòkhöre nöng hökken ò.
41 Hěngtak ngaich ök tarik yamihtöre, ök tö Yāirös minë-eny, ök mahayōmken ngam chūök vinë-ekūötēv. Afukngöre ngaich anga-aṅ nö iröön Yēsū nö hòṅ aṙētu ṙô tö ò nö chuh patī ò,
42 pò ök tö hěng maneuk kūön ò kikānö, ök tö 12 höiny samyeūheu nö hòṅ ngaich nö kapah.
Hē Yēsū nö ṙònghöichröön nö kiröönngöre, ngaich yik tömaṙôngö nö havīlen ò nö holṙöön ò.
43 Hěngtak ök yöngnyīö tö 12 samyeūheu rò-òten tö ngam invah kunnyāhen, ngaich öt hěngtak tökô nö lööken tī töm invah ò.
44 Yihtöre pöri ngaich anga-aṅ nö löktö lā-uk Yēsū ngaich lūölkö taseūrit ök inyut ò, hē e ngaich ngam kunnyāhen ò nö nyôklö.
45 Ngö ṙô ngaich ang Yēsū: “Achīö öp lamūölken chu?” Ṙòkhöre pöri yik tarik nö mahangre nö öt lūölken ò, ngö ṙô ngaich ang Pītör: “Mahaköphöti, höng singngen meh yin kòl vē tömaṙôngö.”
46 Sön pöri ang Yēsū nö ngö ṙô: “Ōt öp lamūölken chu, tön ilöö akahaiṙen chin töp kumlēḵ re nö kunyī.”
47 Hē ngam yöngnyīö ngaich nö akahaiṙen tö Yēsū nö akahalōn, holtö pinhë-eṅkūöre ngaich anga-aṅ nö yihtöre nö in ò ngaich afukngöre nö iröön ò ngaich keuheūtnyö ṙô re ngaich anga-aṅ nö vënyö nuk inlahen re nö ikūö yik tömaṙôngö tarik, tö ò nö kūö yòh nö lūölken ò hēk sitih inlahen anga-aṅ nö ilöö lööken.
48 Ngö ṙô ngaich ang Yēsū nö in ò: “Kakūönö, ngam ṙinatö-ellōn meh an tö lööken tī tö meh. Kuṙòh, umu-a man ngaich, um hēngö pinṙūtölōn.”
49 Hē ò nö ṙònghöich ṙô nö ṙò-òvö, yihtöre ngaich ök tarik alaha ök mākūö chūök vinë-ekūötēv, ngaich ngö ṙô: “Ngaich ök kūön meh nö kapah, ngaich kūö yòh min hēk öi hakihten ngam Mahaköphöti.”
50 Hē Yēsū ngaich nö hanglöre, ngö ṙô ngaich anga-aṅ nö in ök mākūö chūök vinë-ekūötēv: “Uh man pa-ekūö, höng ṙatö-ellōnre man, öthō öp min nö öt lööken.”
51 Hē Yēsū ngaich nö teung nö in ök patī, ngaich öt halöngten yik tahëng anga-aṅ nö kuhēthötre, höng hē Pītör, Yôhan, Yāköp hēk tö nak yöng ök nyīö kikānö.
52 Ṙòkhöre pöri yik tarik nö harāmöre hēk kōköre tökūö miṙivlōnre tö kinpaha ngam nyīö kikānö. Ngö ṙô pöri ang Yēsū: “Uh yin peuiny, tön hö-ö an ngam nyīö kikānö nö kapah pön höng haṙòh.”
53 Hē cha ngaich nö hangṙô Yēsū ngaich hayīölngen ò cha-a nö miyëḵṙen, pön akahalōn cha-a tö ngam nyīö nö kapah.
54 Kēḵ kël ngam nyīö ngaich ang Yēsū ngaich ngö ṙô: “Choholre man!”
55 Aṅhlö* ngaich ngam nyīö kikānö ngaich choholre, tölṙô kinëtö nyā-aṅ ngam nyīö ngaich ang Yēsū.
56 Öt kūöngu ṙanamölōn nak yöng ök nyīö kikānö, hē cha nö meūkö ò nö aṅhlö, sōḵten cha pöri ang Yēsū nö hěngtak vahë-eny nang tö ngam inlahen cha.
Footnotes
^ Hēk lohten, “nöng marò-òten anga-aṅ nö kēḵ öp tarik nö in re.”
