Tölöök Inhānga Kahūich Mëtiv 1:1-25
1 Vënyu nuk inlahen Yēsū Kristū* nö imat ngih līpöre, löknyö in Aprahām ngam michaplö ò ngaich löknyö in ngam michaplö Tāvit anga-aṅ misī. Në nun yih tumkölchap Yēsū:
2 Löknyö in Aprahām ang Isāk nö kayônyu;löknyö in Isāk ang Yāköp;löknyö in Yāköp ang Yūta ngaich ōt inrē yik kahëm ò, mëm ò inrē;
3 Löknyö in Yūta nā Pērěs nā Sēröh nö kayônyu, nak tö kayônyu tö Tēmar;löknyö in Pērěs ang Hesròn nö kayônyu;löknyö in Hesròn ang Rām;
4 Löknyö in Rām ang Amminatap;löknyö in Amminatap ang Nahsòn;löknyö in Nahsòn ang Salmôn;
5 Löknyö in Salmôn ang Pō-as nö kayônyu, Rahap minënyi ök yöng Pō-as kikānö;löknyö in Pō-as ang Opět nö kayônyu, Rūt minënyi ök yöng Opět kikānö;löknyö in Opět ang Yēsī nö kayônyu;
6 Löknyö in Yēsī ang rācha Tāvit;
ngaich löknyö in Tāvit ang Sòlòmön nö kayônyu, ngaich kayônyu ang Sòlòmön tök yöngnyīö ök pīhö Uriyā sin;
7 Löknyö in Sòlòmön ang Rehōpoām nö kayônyu;löknyö in Rehōpoām ang Apiyā;löknyö in Apiyā ang Asā;
8 Löknyö in Asā ang Yehosafat;löknyö in Yehosafat ang Yehorāmngaich löknyö in Yehorām ang Usiyā nö kayônyu;
9 Löknyö in Usiyā ang Yôtam nö kayônyu;löknyö in Yôtam ang Ahas;löknyö in Ahas ang Hēsikyā;
10 Löknyö in Hēsikiyā ang Manasē;löknyö in Manasē ang Amön;ngaich löknyö in Amön ang Yôsiā nö kayônyu;
11 Löknyö in Yôsiā ang Yökòniā tö yik kahëm ò hēk mëm ò inrē. Hē e yik Yahūti nö haköövö nö chuh Pēpilön.
12 Löknyö in Yökòniā ang Salti-ěl nö kayônyu nö i Pēpilön;löknyö in Salti-ěl ang Serūpapěl;
13 Löknyö in Serūpapěl ang Api-ut;löknyö in Api-ut ang Ēliākim;löknyö in Ēliākim ang Asōr;
14 Löknyö in Asōr ang Satòk;löknyö in Satòk ang Akim;ngaich löknyö in Akim ang Ēlihut nö kayônyu;
15 Löknyö in Ēlihut ang Elīasör nö kayônyu;löknyö in Elīasör ang Mattan;löknyö in Mattan ang Yāköp;
16 Ngaich löknyö in Yāköp ang Yôsěf nö kayônyu ök pīhö Mariā; Kayônyen Yēsū ang Mariā ök tö Kristū invëka;
17 Löktökūö in Aprahām söl in Tāvit nö 14 ṙôken minë tumkölchap. Fënsīön ṙôken minë tumkölchap nö löktökūö in Tāvit nö söl in ök ṙētak, hē më Yahūti nö haköövö nö chuh Pēpilön. Löktökūö in ök inköövö nö i Pēpilön söl in ök ṙētak Kristū, nö 14 ṙôken minë tumkölchap.
18 Ngö inlahen ök finötnyö Yēsū Kristū. Hē ök yöng ò kikānö ang Mariā nö mikahayö tö Yôsěf, urēhěkūö ò pöri nö pīhövö hē ò nö ṙömöng rēlö nö löktö in ngam töhet kumlēḵ* ngam Tēv ang Mariā nö puyōsö.
19 Kūö Yôsěf pöri nö tö akaha nö tarik, lökten anga-aṅ nö sōḵ nö sumrōngngökūö ò nö ikūö yik tömaṙôngö tarik ngaich höng hòṅ ulāikö ellōnre anga-aṅ nö hòṅ ṙāngen Mariā.
20 Unôichrit ò pöri nöng fēken në ṙô nö ellōnre, haṙòh ngaich anga-aṅ. Hěngtak ngaich ök ma-ahānga aṅ in Yāvē* tö meūkö tö ò nö el heūvö ò ök tö ngö ṙô nö in ò: “Yôsěf, më-eṅ kūön Tāvit, uh man sōḵ öm kē-ě Mariā nö pīhö meh,* tön lamöktö in ngam töhet kumlēḵ öp töpirūka tö ò.
21 Kayônyö öp töhěng tak kun nyīö kikōnyö min ang Mariā ngaich kaheuk minënyö ò min më-eṅ nö Yēsū,* kūö ò nö anga-aṅ min ṙamānyö vē taṙòkhöre tarik nö i nup tökööl cha.”
22 Ṙën angū-ö nö ngatī hòṅ ngih ṙô Yāvē* nö teungtökūö ngam tö ṙônyu tö ò misī nö löknyö elvāng ök pròfět, nö ngö ṙô:
23 “Yěh meuk! Töp tötchô-òv rēlö min nö puyōsö hěngtak öp min nyīö kikōnyö töfötnyu tö ò. Kaheuk minënyö ò min anga-aṅ nö Immanuĕl,” ngam tö ngö manah, “Holtöṙah Hī An Ngam Tēv.”
24 Hē Yôsěf ngaich nö choholre nö ṙā-ang im inṙòhò ngaich höng hō anga-aṅ tö nuk tinöölö ṙô re tök ma-ahānga aṅ in Yāvē.* Chuh patīre tī ngaich anga-aṅ tök pīhöre kikānö.
25 Hanöng saha Mariā pöri nö öl nö kayônyö ngam kūönre, öt yihtöre ang Yôsěf nö in ò, kaheuk minënyö ngam nyīö ngaich ang Yôsěf nö Yēsū.
Footnotes
^ Hēk, “Mesayā; Töhachāmö Elkui.”
^ Hēk, “Tökiröng kumlēḵ.”
^ Raneh ön ngih nö chūök minë-eny ngam Tēv Yāvē nö in minë 237 tumkang chūök u nö im tufömngöre kinlēḵngô. Ngëichköm Tahëng Ātiköl A5.
^ Ṙô Krīk, “Kē an nö chuh patī re.”
^ Töng hěngren nun minë minë-eny Yesūa hēk tö ngam Yôsuā nö i ṙô Heprāi, nö tö ngö manah “Yāvē an inyööken.”
^ Ngëichköm Tahëng Ātiköl A5.
^ Ngëichköm Tahëng Ātiköl A5.
