Tölöök Inhānga Kahūich Mëtiv 10:1-42
10 Havëtö yik tö 12 tak mahaköp ang Yēsū nö in re ngaich kē-ěkūö cha tö minhôyö tö tötlöök ma-ahānga hòṅ cha nö ahōnyen cha nö ṙā-ang el alaha yik tarik, halanken nuk töṙōlkangen invah, öt kumlē-en cha inrē.
2 Në nun yih minë-eny yik tö 12 tak tanīnöṙô: Sīmōn ök raneh ök tö Pītör invëka hēk Antarū ök kahëm ò, Yāköp ök kūön Sepetī, Yôhan inrē ök kahëm ò.
3 Filip, Partòlòmai inrē, Tômas, Mëtiv inrē ök mahamūl ṙāi kinëhöt chehen, Yāköp ök kūön Alfai, Tattai inrē.
4 Sīmōn ök tö ngöt,* Yūta Iskaryôt inrē ök mu-unôichngöre nö hachīlngövah ò nö kē-ě.
5 Cha-a yin vē tö 12 tak tahīnngö Yēsū nö ngö ṙô nö tölṙô cha: “Uh pöichö chuh panam yip tahëng mihëṙö, ui kuhēthötre inrē i panam yip aṅ Samaria;
6 höng chuh in nup tö chatngen pöri sīṅp chu i patī Israel.
7 Öp töng chūök yīö kiröönngöre ngaich ahānga öi ngö ṙô: ‘Röhta an nö ngaich ngam Pūlngö ngam halīöngö.’
8 Halanken yip tövāhavö, hachohlö tö kapah, lööken tī tö yip töyeūnyu hēk ahōngö yip tötlöök ma-ahānga. Höng öt ṙāyu kinë-ekūö yin tö u, lökten ui ṙāyu tī öi kēngen u.
9 Uh yin keun kö humlum, un rēhěn rupīö, un rēhěn pësa nö el kapang yīö,
10 uh rēhěn öi keun kö chūök nyā-aṅre öi kiröönngöre, ui nët tahôl kaheunka tö chehenre, ui nët tahôl kunröpö, ui keunkö tinkungre, tön öthō ön ngòh tö la-evṙen nö öt nyā nö ip chūökre nö la-evṙen.
11 In nup elpanam hēk tuhēt inrē chūök yīö öi kuhēthötre, chumkūöṙen öi chöh yip tarik in e yip tö hōḵ nö hang ngaich höngngöh öi umuh, hanöng saha yīö öl kiröönngöre.
12 Salām tö yīhire yī-ö, yēḵ yīö öi kuhēthötre el nup patī.
13 Yēḵ yip tarik aṅ nup patī nö hōḵ, hökngen ngam kumchikṙen aṅ in yīö nö yih nö in cha, yēḵ cha pöri nö sōḵ hökngen ngam kumchikṙen aṅ in yīö nö havantöre nö in yīö.
14 Yěn ōt yip tarik töt hamô-en yīö el nup patī hēk el panam, öt rēhěn nö hòṅ hang ṙô yīö ngaich yēḵ yīö öi kunyī-inyre ṙā-ang el nup patī cha hēk ṙā-ang el nup panam cha ngaich pitōngngö pitung röönre yī-ö.
15 Tökò-òṙô Chin tö yīö höichngen nup anū-ö min panam ip Sakāmö Kinṙôka tö inlahen nuk panam Sôtöm, Kômòra.
16 Yěh meuk! Tīnngen yīö Chin höng sā sīṅp elṙôngö nup tö tainy am aṅ el inchōn; lökten yin sā inlahen nup pēch nö hööngöre,* sā nup nyö-öṅ inrē nup töthēngö fālen tö töchōich.
17 Haṙēmngenre yin tö yip tarik, yip tö mihôiṅ min nö kēhöt yīö nö el chūök kamhôka ngaich mihôiṅ min nö tölṙô finôhö yīö nö el nup chūök cha nö vë-ekūötēv.
18 Mihôiṅ min inrē öi kētu öi ikūö yip mahayöng hēk ikūö yip rācha inrē töpòkūö chu, hòṅ yīö min öi vamënyen chu ikūö cha hēk ikūö yip tahëng mihëṅṙö inrē.
19 Yēḵ cha pöri min nö kē-ě yīö ngaich kēten yīö nö ikūö yip kamhôka, ui yaha pinṙūtölōn tö öp ṙô yīö min öi in cha hēk tö öp inlahen ṙô yīö inrē öi vë-eny nang cha, nup töng ṙô yīö pöri min höng hē e min yī-ö akahakūö tö nup tö hòṅ vahënyöre;
20 Tön rö-ö yin öi yī-ö min tö ṙò-òv pön ngam töhet kumlēḵ ngam Yöng chu tö ṙò-òv min nö hayööken yīö.
21 Kētö yip mëm re hēk kahëm re min cha-a nö eltī yip tö hòṅ fëlngen cha, ngatī inlahen min ngam inyööngö kikōnyö nö kēngen më kūönre, më nyīö min nö hòṅ choholre nö la-al më yöngre nö hòṅ fëlngen cha.
22 Surīkhu min yī-ö tö taṙòkhöre tarik töpòkūö ngam minë-eny chu. Ngòh tököp* pöri nö söl manā-aṅ anga-aṅ min tö hayöökaṙen.
23 Yěn hakihten yīö min cha-a ip töhěng panam ngaich afalngöre yī-ö chuh ip tahëng panam. Tökò-òṙô Chin tö yīö, öl rēhěn min öi keuheūt röön öi lök el ngam panam Israel, hanöng saha yanīhi ngòh Kūön tarik.
24 Rö-ö ön ngòh mahaköp nö mötlö tö ngam mahaköptöre, öt rēhěn ngòh mahalanṙen nö mötlö tö ngam yöngṙen re.
25 Yěn sāḵta pöri ngòh mahaköp nö in ngam mahaköptöre hēk ngòh mahalanṙen nö in ngam yöngṙen re ngaich nöng töng kirööngen angū-ö, yēḵ ngam tö patī-iv nö kaheūkö nö Pě-elsipul* ngaich kūö yòh min yip aṅ patī ò nö öt ngatī invëka?
26 Lökten uh yin pa-ekūö tö cha, tön öthěng min tö kahūmi kui nö töt ṙòngnyu kui hēk öt hěng tahayūni nö töt meūkö min tö yip tömaṙôngö.
27 Nup ṙô chu in yīö töngamuh öich el sinngūlö, el hanātö yī-ö öi ṙò-òv tö u, nup ṙô chu tö hireūtka nö el nang yīö, yònlö yī-ö öi chuh kui nup patī cha öi eūken u.
28 Uh yin pa-ekūö tö yip tarik yip tö hòṅ fëlngen ngam alaha, ötkô pöri nö fëlngö ngam nômö, pa-ekūö pöri yī-ö tö ò öp tö mihôiṅ nö hěnghöre fëlngö ngam nômö töm alaha inrē nö el chūök öt inkòlô.*
29 Röh nup ṙung tö nët nòng kun chehechōn nö i-inyīhiyö nö hěng tāk ṙāi tö pësa? Öt hěng nòng pöri tö suktöre nö in u nö el tumlat nö öt mikahlōn ngam Yöng yīö.
30 Kaheūki nun minë keūyö yīö nö ṙòkhöre.
31 Lökten yin öi ui pa-ekūö, tön pōiṙāi yin tö nup tö ṙōlnòng kun chehechōn.
32 Lökten ngòh hamô-en chu nö ikūö yip tarik, hō-en ò chū-ö min nö ikūö ngam Yöng chu ngam aṅ el halīöngö.
33 Ngòh samô-en chu pöri min nö ikūö yip tarik, ngaich sō-en ò chū-ö min öich ikūö ngam Yöngre ngam aṅ el halīöngö.
34 Uich yamih tölōn yīö öich ing panam öich kumtö lanāmö, rö-ö Chin öich yamih öich kumtö lanāmö, sanët pöri.
35 Pöich tī-iv ngaich tö yip kūön nö la-al yöngre tö kikōnyö, ngam kūön kikānö nö la-al ngam yöngre kikānö, ngam kan kūön nö la-al ngam yöng pīhöre kikānö.
36 Kô-en nöng aṅ el töhěng patī yip tö kunyaha elmat tö höö.
37 Ngòh tö mötlö hanangenlōn tö yöngre kikōnyö hēk kikānö tö chu, ötkô anga-aṅ nö tamömrit chu.
38 Ngòh tö sōḵ nö keun ngam chōn inkihten* ngaich öt hòṅ tömrit chu, ötkô anga-aṅ nö mahaköp nö in chu.
39 Ngòh lamaklö ngam nômöre öt teūngen min anga-aṅ tö e. Ngòh tö löhlö tī pöri min tö ngam nômöre töpòkūö chu, teūngen min anga-aṅ tö e.
40 Ngòh hamô-en yīö min, hamô-en chu anga-aṅ. Ngaich ngòh hamô-en chu, hamô-en ò anga-aṅ inrē ngam tamīnten chu.
41 Ngòh hamô-en pròfět kūö ò nö pròfět, teūngen min anga-aṅ tö raneushöre nö sā raneushö yik pròfět. Ngòh hamò-òṅ tarik kūö ò nö tölöök nö tarik, teūngen min anga-aṅ tö raneushöre nö sā raneushö yip tölöök tarik.
42 Tökò-òṙô Chin tö yīö yip kamë-ekūö më kun kūöṅnö tö tö ufov mak, kūö cha nö akahakūö tö cha nö mahaköp nö in chu, öthō min cha-a nö löhlö tö raneushöre.”
Footnotes
^ Ṙô Krīk, “Kananai.”
^ Hēk, “yěn meuk nup kanihngen.”
^ Hēk, “tömöi.”
^ Invëkö Satān, ngam rācha hēk yöngkūö yip tötlöök ma-ahānga.
