Tölöök Inhānga Kahūich Mëtiv 11:1-30
11 Keuheūthë ṙô ang Yēsū nö halēn yik tö 12 tak mahaköp ngaich kiröönngöre anga-aṅ nö chuh in minë tahëng panam nö haköphöti hēk ahangkö ngam tölöök inhānga inrē.
2 Hē Yôhan pöri nö el chēl ngaich hang nuk la-en Kristū anga-aṅ, lökten nö tīntö yik haköptöre nö chuh in ò
3 hòṅ cha nö hatöönö ò nö ngö ṙô: “Öp Yamih misī tö Eūka, më-eṅ öm kan tö hökka, tahëng ṙöng öp ahökkö ih?”
4 Ngaich ngö ṙô ang Yēsū tö cha: “Kiröönngöre yin umu-a vë-eny nang Yôhan tö nup maheuk yīö hēk ahang yīö inrē:
5 Teūngen yin vē tötmeuk ngaich nö meuk, kiröön inrē vē tökaròk, lööken vē töyeūnyu, vē töt hang inrē ngaich nö hang, hachohlöng tökapah nö ṙa-ang im kinpaha, vënyu nang inrē vē yāich tö ngam tölöök inhānga.
6 Tö ṙamlōn öp anga-aṅ tarik öp töt pala-aiṙen* nö hang në inlahen chu.”
7 Hē cha ngaich nö kiröönngöre nö ṙa-ang umuh, kaknyöre ngaich ang Yēsū nö vë-eny nang yik tömaṙôngö tö inlahen Yôhan nö ngö ṙô: “Asuh ök taheui hatīönkö yīö hēk ngahëichkö yīö öi el tönyalnyi? Ngëichkö öp tafūyu* hòng öp tö fööka tö kuföt ngaich halöinyköre?
8 Asuh ök rih hatīönkö yīö taheui öi kiröönngöre? Meuk tarik hòng ṙöng yī-ö tö chehenu tö tötanyīka* rēsöm? Mi-iyöng el patī rācha pöri vē tarik tö chehen tö tötanyika rēsöm hilā.
9 Kūö yòh pöri yī-ö öi kiröönngöre öi chuh el tönyalnyi? Hatīönkö öp pròfět hòng? Heūṅ, ngö ṙô pöri Chū-ö tö yīö, ök hatīönkö yīö taheui öi chuh el tönyalnyi mötlö anga-aṅ tö pròfět.
10 Anga-aṅ ön ngòh tö ngö kinūichngö inlahen: ‘Yěh meuk! Tīntö ma-ahāngare Chin min nö mu-urēhěkūö meh, nö mahalēnkö el talöökö meh min nö urěh!’
11 Tökò-òṙô Chin tö yīö, i tumtak yik tarik tö fötnyu nö ngaich tö kikānö, öt hěngtak in cha tökiröng tö Yôhan ök Vamôk, öp manā-angkūö kanūönö pöri nö im Pūlngö ngam halīöngö töpōyö min anga-aṅ tö Yôhan.
12 Löktökūö i nuk sakāmö Yôhan ök Vamôk söl ing töngamuh, nöng ngam Pūlngö ngam Tēv tö chöhö tö tarik nö holtö kumlēḵ alahare ngaich yip tö kô-en kumlēḵ alaha nö chöhö e, teūngen cha-a min tö e töngamuh.
13 Pön höng samöl in nuk ṙētak Yôhan nuk ṙô yik Pròfět hēk tö minë Chööngö inrē nö kūichö;
14 Kò-òren öi ṙatö-ellōnre tö ngih ṙô hēk hö-ö kò-òren, tö ‘Ĕlaicha min nö öthō nö öt yih,’ anga-aṅ ön ngòh.
15 Ngòh tö elnānguvö, hökngen ò yēḵ nö akah elnang tö në ṙô chu.
16 “Sitih ṙô öich vö min öich asīnten vē tarik i ngih ṙētak hī töngamuh? Tö cha nöng sā inlahen yip nyīö amūichhak nö ikūö markět nö havëkö yip holre nö nyamtô,
17 nö ngö ṙô: ‘Havai ṙô re īhö öi föö minë fanööre, hö-ö pöri yī-ö öi hòṅ kiṙīöm; harāmöre īhö öi peuiny, hö-ö pöri yī-ö öi kōk elngòh re öi hòṅ haṙivlōn.’
18 Öt sā yip tahëng tarik ang Yôhan yip yamih nöng nyamā, sön pöri më tarik nöng ngö ṙô tö ò, ‘Aṅhav el alaha an tö tötlöök ma-ahānga.’
19 Yih inrē ngòh Kūön tarik ngaich sā yip tahëng nö nyā òk inrē, sön më tarik nöng ngö ṙô tö ò, ‘Yěh meuk! Ngam tö pōivat nö nyā hēk mihiyōi-aṅ inrē, hol vē mahamūl ṙāi kinëhöt chehen hēk vē tököölö fālen an inrē.’ Hameuktu pöri ngam mikah nö löktö inup tölöng ṙòng nup la-en.”
20 Holtö tanāinyöre ngaich anga-aṅ nö ngö ṙô tö minë panam, minë chūök ò sin nö hameuktö minë la-en pinngangkūö, kūö u nö öt havöötö ellōnre lökten ò nö ngö ṙô:
21 “Tötkôlò man më-eṅ Kòrasīn! Tötkôlò man më-eṅ Petsĕitā! Pön hameuknyu nuk pinngangkūö la-en nö in meh misī, yēḵ u öre nö hameuknyu nö i Tūrös, Sītōn inrē ngaich öre yip aṅ Tūrös hēk Sītōn inrē nö ūichngöre nö el tumlat ngaich hayutlöre tö sāk hēk tūi kuire tö tisum nö hameuktö miṙivlōnre.
22 Lökten Chin öich ngö ṙô tö yīö, ěhten nun min në panam Tūrös, Sītōn inrē tö inlahen yīö hē öp Sakāmö Kinṙôka.
23 Ngaich më-eṅ Kafarnahum, hapōilöng öm min tölōnre öm el halīöngö? Höng chuh lātaṙeū man min el chūök tökapah, pò nup minhôiṅyö la-en nup tö hameuknyu nö in meh, ṙömöng ngöh öre anū-ö töngamuh yēḵ u nö i Sôtòm.
24 Lökten Chin öich ngö ṙô tö yīö, tö yīö min öi höchngen tö ngam panam Sôtòm ip Sakāmö Kinṙôka.”
25 Hē e ang Yēsū nö ngö ṙô: “Ō kayööngö, Mā ngam halīöngö, panam inrē, ha-öinyö meh Chin öich ikūö vē tömaṙôngö tarik pöm hayunngö në ṙô nö i vē tö akaha, tö heuveū-en inrē, hameukten u pöri më-eṅ öm in vē tëṅnö nyīö.
26 Kūö u, Kayööngö, nö lōn meh takô nö ngatī inlahen.
27 Kētu nun në taṙòkhöre nö eltī chu tö ngam Yöng chu, öt hěngtak tö kô nö keuheūtlöre mikahkūö tö ngam Kūön höng ngam Yöng; ngatī inrē nö öt hěngtak tö kô nö keuheūtlöre mikahkūö tö ngam Yöng höng ngam Kūön, anga-aṅ inrē öp lōn ngam Kūön chūök ṙô ò nö hameuknyen u.
28 Ō yī-ö tö larā tökūö ṙôken la-enre hēk tö langan tökūö ṙôken kumre, yihtöre yin in chu, hòṅ chu min öich kētö haneūheu yīö.
29 Keunlöre yin tö ngam kaneun chu, ngaich haköp öi in chu tön tö ṙēmen Chin hēk tö yāichö ellōn inrē ngaich öthō min öi öt teunglen tö haneuhlö nômöre.
30 Pön kaneūnen ngam kaneun chu, höh inrē angū-ö.”
Footnotes
^ Hēk, “töt fukngö töpòkūö chu.”
^ Hēk, “tö hěngkangṙen nö kiyôp töt ngöönö ṙěh.”
^ Hēk, “töpayānga.”
