Tölöök Inhānga Kahūich Mëtiv 15:1-39
15 Unôichrit e yik Feresī tö yik kamūich, nö löktö Yērūsalem, ngaich yihtöre nö in Yēsū ngaich ngö ṙô nö in ò:
2 “Kūö yòh aich më haköptö meh nö filal chööngö yik muvöhngö ih? Tö sā ngam inlahen cha nö öt söich tīre urēhěkūö cha nö nyā.”*
3 Ngö ṙô ngaich ang Yēsū nö sapṙô cha: “Kūö yòh öi yī-ö inrē öi filal minë chööngö ngam Tēv tö minë chööngö vahīre?
4 Tö sā ngih inchōḵ-oṙô, tö ngam Tēv misī nö ngö ṙô, ‘milēḵṙen man tö ngam yöngre kikōnyö hēk tö ngam yöngre kikānö,’ hēk ‘ngòh töt lamëḵkôre tö yöngre tö kikōnyö hēk yöngre tö kikānö ngaich hòṅ fëli anga-aṅ.’
5 Ngö ṙô pöri yī-ö, ‘Yēḵ ngòh tö hěngtak tarik nö ngö ṙô tö ngam yöngre kikōnyö hēk tö ngam yöngre kikānö: “Nuk töng mi-in chu, nuk tö mihôiṅ nö yöölen tī tö meh, kētu nuk ngaich tö chu nö tökētu nö in ngam Tēv,”
6 sā töng öt milēḵṙen ngaich anga-aṅ tö minā yöngre yěn ngatī inlahen.’ Ngatī inlahen yī-ö öi filal minë chööngö ngam Tēv tö kūö minë chööngöre.
7 Ō yī-ö mahanyatkö elmat, kò-òṙô ök pròfēt Isayā nö eūkö inlahen yīö:
8 ‘Höng i minuhre ṙô yin nö milēḵṙen tö chu, marôvat pöri minë ellōn cha tö chu.
9 Höng chanök alaha ngam inlahen cha nö ha-öönyö chu, kūö cha nö haköptö minë chööngö tarik nö chööngö ngam Tēv tö ṙô cha.’”
10 Havëtö yik tömaṙôngö ngaich ang Yēsū nö in re ngaich ngö ṙô tö cha: “Hangihtöre yin, haköp manah ngih ṙô yin ngih tö ngö:
11 Nup lamökhöt elvāng ngòh tarik, hö-ö anū-ö nö chōchngöre tī tö ò, nup lamöknyö elvāng pöri nö kunyi-inyre anū-ö töchōchngöre tī tö ò.”
12 Yihtöre hēk yik mahaköp nö in ò ngaich ngö ṙô: “Akahalōn öm tö yip Feresī nö līn tö kūö minë ṙô meh?’’
13 Ngö ṙô ngaich anga-aṅ nö sapṙô cha: “Nup töng sitih chōn nup töt teūichtu tö ngam Yöng chu ngam aṅ el halīöngö ngaich teuklöng min anū-ö.
14 Hökngen cha nö līn. Tön hö-ö yip kòl nö meuk ngaich pöri nöng hòṅ hachō-okūö tahëng, yēḵ ngòh tötmeuk nö hachō-okūö ngam tötmeuk nëtre tak min cha-a nö suktöre nö el nāli.”
15 Hē Pītör ngaich nö hāngö e ngaich ngö ṙô anga-aṅ: “Vë-eny nang ih man tö manah ngih inchōḵ-oṙô.”
16 Ngaich ngö ṙô anga-aṅ: “Höng öl öi yī-ö inrē öi akaha elnang?
17 Höng öt akaha elmat öi yī-ö tö nup lamökhöt elvāng nö chuh el ngam aich hī ngaich meutnyi nö hēk?
18 Nup lamöknyö elvāng pöri nö meutnyi nö löknyö im ellōn, anū-ö nup töchōchngöre tī tö ngòh tarik.
19 Tö sā nup tötlöng mufē nö löknyö im ellōn ngam löktö minë finël tarik, insěha,* chinô-òṅkānö, unlāya sinūöichkö fālen holre, ötlinëkô inrē.
20 Anū-ö nun töchōchngöre tī tö ngòh tarik öt ngam inlahen hī yěi öt söchtīre urēhěkūöre öi nyā.”*
21 Kiröönngöre ngaich ang Yēsū nö ṙā-ang umuh, ngaich chuh in minë panam Tūrös hēk Sītōn inrē.
22 Ngaich yěh meuk, hěngtak ök yöng nyīö aṅ in u anū-ö panam ök aṅ Finikē yamihtöre nö in ò, ngaich pōitô nö ayôṙa nö ngö ṙô: “Ō më-eṅ Mā Kūön Tāvit aṙē-ělōn man yēḵ tö chu, tön meūtö el alaha öp kūön chu kikānö töp tötlöök ma-ahānga.”
23 Höng öt hěng höiny milôhò ṙô pöri ang Yēsū nö sapṙô ò. Lökten yik haköp tö ò nö yihtöre nö in ò, ngaich ṙōlheuh ṙô nö in ò nö ngö ṙô: “Tīnngen ò man, tön höng ayôṙa an nö fachūkörit hī.”
24 Ngö ṙô ngaich anga-aṅ nö in cha: “Hö-ö Chin tö tīntu öich chöh yip tahëng, tö tīntu pöri öich chöh nup töchatngen sīṅp aṅ patī Israel.”
25 Höng yihtöre pöri hēk ngam yöngnyīö, nö in Yēsū ngaich sōnngöre nö salāman nö ngö ṙô: “Më-eṅ Mā chu hayööken chu man!”
26 Ngaich sapṙô ò anga-aṅ nö ngö ṙô: “Ötkô nun në nyā-aṅkūö nyīö nö kavaltu nö ikūö kun am.”
27 Ngö ṙô pöri ngam yöngnyīö: “Mā lööngö ṙô man, sönen pöri ṙung në kun am nö nyā nup pinṙōngö, nup tösuktöre nö ṙā-ang el mīs öp yōmre.”
28 Ngö ṙô ngaich ang Yēsū hē ò nö hang ṙô ò: “Kiröng takô an ngam ṙinatö-ellōn meh, lökten sā ngam lōn meh ngaich hökngen e yēḵ nö ngatī.” Ilööṙen ngaich ök kūön ò nö lööken ik hē e.
29 Kiröönngöre hēk ang Yēsū nö ṙā-ang umuh ngaich haröhtöre nö ip mai Kelelī, yônlö ngaich anga-aṅ nö ikui ök rung ngaich ūichngöre nö in e.
30 Maṙôngö ngaich yik tarik yamihtöre nö in ò nö kētö yik tökaròk, tölum, töt meuk, tötkô nö ṙô-òvö, ngaich kēten cha nö iröön ò, hòṅ ò nö halanken cha.
31 Pingangkūö ngaich yik tö tömaṙôngö nö meuk hē cha nö meuk yik tötkô nö ṙô-òvö nö kahôka ṙô, lööken inrē yik tökaròk hēk tölum, meuk yik tötmeuk lökten cha-a nö ha-öiny ngam Tēv Israel.
32 Havëtö yik haköptöre ngaich ang Yēsū ngaich ngö ṙô nö in cha, “keuheūtnyöre Chin tö miṙēḵlōnre meuk vē tömaṙôngö tarik, kūö cha ngaich nö uroh nö lūöi sumkam rò-òten nö in hī. Öt rēhěn cha-a nöng aṅhavin tö nyā-aṅkūöre, ötkô chū-ö öich höng tīnngörit cha nöng ha-euk pön mihôiṅ min cha-a nö tayē nö el talöökö tö kūö neūköre.”
33 Ngö ṙô pöri yik mahaköp nö in ò: “Isuh chūök öi min öi teūngen tö töngatī ṙôken nyā-aṅkūö, hòṅ vē tömaṙôngö nö hatööḵngenre nö nyā?
34 Ngö ṙô ngaich ang Yēsū nö hatöönö cha: “Iṙôken nup ròtī aṅ in yīö? Ngö ṙô cha-a sat nun ngaich ōt inrē në tö kun kun kāḵ.”
35 Tölṙô yik tömaṙôngö ngaich anga-aṅ tarik nö ūichngöre nö el tumlat,
36 kēḵ nuk tö sat ngaich anga-aṅ ròtī, tö nuk kun kāḵ inrē nö eltīre, ngaich ha-öiny ngam Tēv, fôkö u ngaich anga-aṅ ngaich kēten u nö in yik mahaköp, hòṅ cha nö katölhö kūö yik tömaṙôngö tö u.
37 Ṙòkhöre ngaich cha-a nö tööḵngen nö nyā, ngaich hamūlö nuk chööḵkūö cha ngaich tööḵlö nuk tö sat kuvôkö tö ṙôken u.
38 Lohten nö 4,000 ṙôken yik kikōnyö nyamā hěnghöre yöngnyīö hēk nyīö inrē yik in cha.
39 Keuheūtheṙen ngaich anga-aṅ nö tīnngen yik tömaṙôngö ngaich yôklö nö el kupòk, ngaich yih nö im panam Makatan.
Footnotes
^ Ngam tö ngö, öt söich tīre asā minë la-en kui panam.
^ Ngam tö ngö, öt söich tīre asā minë la-en kui panam.
