Tölöök Inhānga Kahūich Mëtiv 16:1-28
16 Yihtöre ngaich yik Feresī tö yik Satukī inrē nö in Yēsū, ngaich kalahan nö tölṙô ò nö hameuktö minkahngö nö löktö el halīöngö.
2 Ngaich sapṙô cha ang Yēsū nö ngö ṙô: “Yēḵ e nö harap ngaich ngö ṙô yī-ö, ‘vāyö kūö ön min ngih panam pò ngam halīöngö nö ngāṅv takô nö meūkö,’
3 ngö ṙô hēk yī-ö hē el peuheū, ‘Ufōvö kūö ön ngih panam hēk hòṅ kumṙah lohten min, pön meūkö ngam halīöngö nö ngāṅv, meūkö inrē minë taṙul.’ Heuveū-euṙô takô yī-ö öi höng ngëichkö ngam halīöngö ngaich vë-eny inlahen kūö ngam panam, pòrô pöri yī-ö öi meuk minkahngö minë ṙētak, ötrēhěn pöri öi akaha elmat tö manah u.
4 Öt tahëngu lōn yin vē tötlöök tarik in në ṙētak hī töngamuh hēk vē töt ṙinātu-ellōn* pön höng hòṅ meuk nup minkahngö, höng hěng pöri ngam minkahngö kinë-eṅkūö cha ngam inlahen Yôna.” Keuheūt hë ṙô anga-aṅ tö u ngaich kiröönngöre nö ṙāngen cha.
5 Hē yik mahaköp nö havāngngöre nö chuh im tahëng lā-a, vaichngö pöri cha-a nö öt chap kumre tö nyā-aṅre tö ròtī.
6 Ngö ṙô ang Yēsū tö cha: “Luvë-akkūö tī yin tö minë matre, haṙēmngenre inrē tö nup inföh ròtī aṅ in yip Feresī hēk Satukī inrē.”
7 Lökten ngaich cha-a nö ngö ṙô, nö vë-ekūö re: “Hö-ö pöri ayī-ö kumtö nyā-aṅre tö ròtī.”
8 Hē Yēsū ngaich nö akahalōn tö ellōn cha ngaich ngö ṙô anga-aṅ: “Yī-ö tö kūöṅnen ṙinatö-ellōn, kūö yòh öi vë-ekūöre öi kakkö inlahen re öi öt keunkö nyā-aṅre tö ròtī?
9 Höng öl öi kan öi akaha elmat, höng öt köpölōn öi tö inlahen yik tö 5,000 ṙôken tarik, nö kô-òng kūö nö nyā nuk töng taneui ròtī tööḵlö inrē nuk kuvôkö hē-e, tö nuk chööḵkūö tö keūnö tö yīö?
10 Höng öt köpölōn öi inrē tö inlahen yik tö 4,000 ṙôken tarik nö kô-òng kūö tö nuk tö sat ròtī, ngaich tööḵlö inrē hē e nuk kuvôkö* tö nuk chööḵkūö cha nuk tö keūnö tö yīö?
11 Kūöyòh öi kan höng öt akaha elnang tö ṙô Chu? Yěich rö-ö kòl öich kakkö ròtī öich in yīö, pöich höng tamölṙô yīö öi haṙēmngenre tö nup inföh ròtī aṅ in më Feresī hēk Satukī inrē.”
12 Möl ngaich cha-a nö akaha elnang tö ṙô ò, tö ò nö rö-ö nö ṙô tö ròtī pön ṙô tö minë inköphöti ṙô më Feresī hēk Satukī inrē.
13 Hē Yēsū ngaich nö yihtöre nö im panam Kaisarī Filipī ngaich hatön yik haköptöre anga-aṅ nö ngö ṙô: “Sitih ṙô aich vē tarik nö havëken ngòh Kūön tarik?”
14 Ngaich ngö ṙô cha-a nö sapṙô ò: “Rīkre yip tö ngö ṙô tö meh, Yôhan ök vamôk, Ĕlaicha ngö ṙô yip tahëng, Yarimiā ngö ṙô yip muh, pròfět ngö yip inrē.”
15 Ngö ṙô ngaich ang Yēsū nö hatöönö cha: “Achīö, öich Chū-ö tö ṙô yīö?”
16 Ngaich ngö ṙô ang Sīmōn Pītör nö sapṙô ò: “Më-eṅ man Kristū Kūön ngam tö aṅ Tēv.”
17 Ngaich ngö ṙô ang Yēsū tö ò: “Më-eṅ Sīmōn kūön Yôna töṙamlōn man më-eṅ pön öt tarik öp vamë-eny nang meh tö u anū-ö ṙô, ngam Yöng chu pöri aṅ el halīöngö vamë-eny nang meh tö u.
18 Ngö ṙô Chin inrē tö meh: Pītör man më-eṅ, i kui ngòh ihong tī Chin min öich mānlö ngih māṅ re, öt kanô-òvö inrē min minë inkūp ngam Chūök Kupah* tö e.
19 Kē-ěkūö meh Chin min tö në chāpi ngam Pūlngö ngam halīöngö, nup töng nyahëkngö meh min ing panam urěhangen min ngaich anū-ö nö nyëki nö el halīöngö hēk nup tö luhlöng tö meh nö ing panam urěhangen min ngaich anū-ö nö luhlöng nö el halīöngö.”
20 Unôichrit e ngaich anga-aṅ nö sōḵngen yik mahaköp takô, nö hěngtak vahë-eny nang tö tarik tö ò nö anga-aṅ Kristū.
21 Hēten tö e ngaich anga-aṅ nö vë-eny nang yik mahaköp, tö ò min nö chuh Yērūsalem ngaich in e min anga-aṅ nö ṙōlkangen ötlinëken nö eltī yip mā, mākūö kūönṙô hēk yip kamūich inrē, in e min anga-aṅ nö fëli, ngaich havanlöre min unôichrit tö lūöi sumkam.
22 Tūökngö kël ò ngaich ang Pītör nö harēvngö chūökre nö vëken ò nö ngö ṙô: “Mā uh man ngatī ṙô tö inlahenre; ötkô takô man min më-eṅ öm ngatī ötlinëken.”
23 Havööngökūöre pöri anga-aṅ tö Pītör ngaich ngö ṙô: “Më-eṅ Satān, kiröönngöre man umu-a marôvat tö chu!* Më-eṅ man lökngen fanukngö chu, pò ngam mufē meh nö öt sāḵta nö im mufē ngam Tēv, pò meh höng sā mufē tarik.”
24 Unôichrit e ngaich ang Yēsū nö vë-ekūö yik haköptöre nö ngö ṙô: “Yěn tarīku tö hòṅ tömkörit chu hökngen ò yēḵ nö hayëḵngenre nö keun ngam chōn inkihten* ngaich tömkörit chu nöng iṙūöhö röön.
25 Pò ngòh tarik tö hòṅ laklö ngam nômöre nö löhlö tī min tö e, ngòh tö löhlö tī pöri min tö nômöre tö pòkūö chu teūngen anga-aṅ min tö e.
26 Kô-en ön ngòh tö hěngtak tarik yěn keuheūtlöre kūö pòrô tö ngih panam löhlö tī pöri tö ngam nômöre, asuh öp min yanöölen ò yěn ngatī? Hēk asuh öre öp kahëtö ngòh tö hěngtak tarik nö ṙënngen ngam nômö?
27 Pön kô-en min ngòh Kūön tarik nö yih nö im kanôlò ngam Yöngre nö hol tö yip ma-ahānga re ngaich reushen yip taṙòkhöre tarik min anga-aṅ tö tösā ṙòng nup la-en cha.
28 Tökò-òṙô Chin tö yīö, in vē tö sökhak nö ihih töngamuh ōt yip min in cha, töt kamlah ngam kinpaha hanöng saha mat cha nö meuk ngòh Kūön tarik nö yih nö im Pūlngö re.”
Footnotes
^ Ṙô Krīk, “ma-asěhköre.”
^ Hēk, “tökiröng kuvôkö.”
^ Ṙô Krīk, “kiröönngöre man, tömrit chu.”
