Tölöök Inhānga Kahūich Mëtiv 17:1-27
17 Unôichrit tö tafūöl sumkam ang Yēsū nö ngò-òṅ hē Pītör, Yāköp hēk tök kahëm ò inrē ang Yôhan nö hol ò nö chuh kui ök tömarò-òl kui rôngö, öt hōlu cha-a tö tahëng nö in e.
2 Haṙīḵngöre mineūkö ngaich ang Yēsū nö ikūö cha. Sā yanāngö mat ngam tavūöi ök arëkūö ò nö meūkö, yāngö mat inrē nuk hilā ò nö meūkö.
3 Chalô ngaich tö cha nö meūkö nā Môsös nā Ĕlaicha nö vë-ekūö Yēsū.
4 Ngö ṙô ngaich ang Pītör tö Yēsū: “Mā, ṙamlōn in kūö ih öi ihih. Yēḵ meh hō-olōn tö ih, ngaich mihôiṅ īhö lūöyö vahīlö tö inrūkui, hěng inrūkui meh, hěng inrūkui Môsös ngaich hěng inrūkui Ĕlaicha inrē.”
5 Ṙònghöich ṙô hē e anga-aṅ, ilöö kahultu kui ngaich cha-a tök tö isoh taṙul, ngaich yěh meuk! hāngö ngaich ök ṙô nö löknyö el ök taṙul ök tö ngö ṙô: “Hanangenlōn chu ön ngòh nö Kūön chu, in ò Chin ṙamölōn takô,* hangṙô ò yin.”
6 Hē yik mahaköp nö hāngö e, fātngökūöre ngaich cha-a tökūö pinhë-eṅkūöre.
7 Haröhtöre pöri ang Yēsū nö in cha ngaich lūölken cha, nö ngö ṙô: “Choholre yin. Uh yin pa-ekūö.”
8 Hē cha nö môklökūöre ngaich meūkö Yēsū cha-a nöng hěngtak nö umuh.
9 Hē cha ngaich nö ṙònghöichröön nö yônti nö ṙa-ang kui ngam rôngö ngaich kētö chööngö ang Yēsū nö in cha nö ngö ṙô: “Uh pöichö vahënyu nang tö ngam tö meūkö, hanöng saha ngòh Kūön tarik nö choholre nö ṙā-ang in yip tökapah.”
10 Hatöönan pöri yik mahaköp nö ngö ṙô: “Kūö yòh pöri yip kamūich nö ngö ṙô tö Ĕlaicha nö ötkô takô nö öt urěhtö yīhi?”
11 Ngaich ngö ṙô anga-aṅ nö sapṙô cha: “Kò-en öp Ĕlaicha nö tö hòṅ yih, hòn sā re nö hēk në taṙòkhöre ik lā urěh.
12 Ngö ṙô pöri chū-ö tö yīö, tö Ĕlaicha nö ngaich nö ihih, rö-ö pöri cha-a nö akahakūö tö ò. Höng hakihten ò cha-a nö sā nup töng lōnre inlahen tīre tö ò. Ngatī ön min inrē ngòh Kūön tarik nö hakihtuṙen tö cha.”
13 Akahalōn ngaich yik mahaköp tö ò nö ṙôten Yôhan ök Vamôk nö in cha.
14 Hē cha ngaich nö yihtöre nö in yik tömaṙôngö ngaich hěngtak ök tarik yamihtöre nö in ò ngaich simngöre nö ikūö ò ngaich ngö ṙô tö ò:
15 “Mā, aheūkölōn man tö ngòh kūön chu, tön hangīhire ön. Pōihangṙen takô ön nö ngaich töm invahre. Hēṙu ön ṙung nö fukkūö tameūiyö hēk fuk el mak inrē.
16 Ngaich lang öich kēten ò nö halankaṙen tö më haköptö meh, höng ötkô pöri cha-a nö halanken ò.”
17 Ngö ṙô ngaich ang Yēsū: “Ō yī-ö töt ṙinatu-ellōn hēk töt hòṅ chiplö öi tarik, hòṅ irò-òten öich hēk min öich in yīö? Irò-òtö manööyö öich min öich in yīö? Kēten ò yin ihih nö in chu.”
18 Vëken ök tötlöök ma-ahānga ngaich anga-aṅ ök më-el alaha ök nyīö kikōnyö ngaich kunyi-inyre anga-aṅ nö ṙā-ang in ò, hēten tö e ngaich ök nyīö nö lööken.
19 Unôichrit e yik mahaköp nö yihtöre nö in Yēsū ngaich ngö ṙô tö ò: “Kūö yòh öi īhö ötkô öi kēnyen ngam tötlöök ma-ahānga?”
20 Ngaich ngö ṙô anga-aṅ tö cha: “Kūö ngam ṙinatö-ellōn nö kūönen nö in yīö. Tökò-òṙô Chin tö yīö, yēḵ ngam ṙinatö-ellōn yīö öre nöng sā ṙòngòng öp kun kun kulöl rāi, ngaich mihôiṅ öre yī-ö öi ngö ṙô tö ngih rôngö, ‘Kē-ěngre man ṙā-ang ihih ngaich kiröönngöre umu-a,’ ngaich kò-òren angū-ö nö kē-ěngre, ngaich öt hēngö öt kanô-ò öre yī-ö.”
21 *——
22 Hē Yēsū tö yik haköptö ò inrē nöng ṙömöng i Kelelī nöng hěngkang chūök ngaich ngö ṙô anga-aṅ nö in cha: “Kē-ě ön min ngòh Kūön tarik ngaich kētu nö eltī yip tökunyaha elmat tö ò,
23 ngaich fëlngen ò min cha-a, hachohlöng pöri min anga-aṅ unôichrit tö lūöi sumkam.” Haṙivlōn ngaich cha-a hē cha nö hāngö e.
24 Hē cha ngaich nö teung nö i Kafarnahum, yihtöre ngaich yik tarik nö in Pītör yik tö örheūheu nö kēḵ nup rupīö ngam töhet chūök ngaich ngö ṙô cha-a tö Pītör: “Öt kētö tax ngam töhet chūök öp mahaköpten yīö?”
25 Ngaich ngö ṙô anga-aṅ: “Heūṅ, kē-ěti öp.” Hē ò pöri ngaich nö kuhēthötre nö el öp patī, ngaich ngö ṙô ang Yēsū urēhěkūö ṙô ò nö hòṅ hatöönan: “Sīmōn, sitih lōn öm më-eṅ? In chīö aich vē rācha ngih panam nö kēḵ ṙāi kinëhöt chehen, ṙāi tumtak tarik inrē? In yip kūön hòng hēk in yip tahëng ṙöng?”
26 Ngaich ngö ṙô anga-aṅ: “I yip tahëng,” ngaich Yēsū nö ngö ṙô tö ò: “Töngö manah ön chěi, tö më kūön nö mihôiṅ nö öt kētö tax.
27 Ngih pöri, hòṅ hī min öt pò-òvkūö tö cha nö kavē-ěre, kuṙòh kiröönngöre man chuh el mai sumngen öp vòk re ngaich kēḵ öp kāḵ öp mu-urěhlö, tuvānyö elvāng ò, ngaich hěng tāk min öp rupīö kanôtökūö meh. Kē-ě e më-eṅ ngaich kētö e in cha, tī hā nyöre tö meh.”