Tölöök Inhānga Kahūich Mëtiv 18:1-35
18 Hē e yik mahaköp nö yihtöre nö in Yēsū ngaich hatöönan nö ngö ṙô: “Achīö öp min tö pōiyö nö im Pūlngö ngam halīöngö?”
2 Hěngtak havëti ngaich ang Yēsū tök kun nyīö nö in re, ngaich asöklen ò nö elhôi cha
3 ngaich ngö ṙô: “Tökò-òṙô Chin tö yīö, yēḵ yīö min öi öt haṙī-ingre,* öi vīngöre sā inlahen ngòh kun nyīö, öthō min yī-ö teunghöt kuhēthötre im Pūlngö ngam halīöngö.
4 Lökten, yip ma-asīntöre nö sā inlahen ngòh kun nyīö nö hayāichngöre anga-aṅ min töpōiyö nö im Pūlngö ngam halīöngö;
5 yip hamô-en yip tö ngatī inlahen kun nyīö min nö i minë-eny chu hamô-en chu min cha-a.
6 Yip tö hěng hang tak pòkūö* pöri min tö aṅ in vē kun kūöṅnö nö pala-aiṙen vē ṙamatö-ellōnre nö in chu, ěhten öre cha-a nöng nyëktu likeun tö nup tö langan ihong nup tö nyëktu nö i likeun nup köttö nö chuvīṙöre, ngaich kapöknyu nö el ngam tö aṙū mai.
7 Pōihangen takô ön min ngih panam nö ötkôlò, kūö e nö vītö pinlāngen* nö el talöökö yip ṙamatö-ellōnre! Kô-en nö öt hōḵ nö öt yih nup lökngen pinlāngen, tötkôlò pöri min öp tarik vamītö fanukngö nö el talöökö yip ṙamatö-ellōnre!
8 Lökten, yēḵ ngam kël meh hēk töm kalröön meh nö pò-òvkūö* tö meh öm köölö fālen, rökngen e më-eṅ ngaich marôvat tī öm kavalngen e tö meh. Ĕhten man min höng hěngtit kël hēk kalröön inrē öm kuhēthötre im nômö, tö minë kël meh hēk tö minë kalröön meh min nö keuheūthötre nö kavalhötvö nö el öp töt nyangngökūö tameūiyö.
9 Yēḵ ngam mat meh nö pò-òvkūö tö meh öm köölö fālen, pi-ôknyen e më-eṅ ngaich marôvat tī öm kavalngen e tö meh. Ĕhten man min höng hěngtit mat öm kuhēthötre im nômö tö minë mat meh min nö nët ngöre lā-a nö kavalhötvö nö ikūö öp töt nyangngökūö tameūiyö.*
10 Chumkūöṙen yin lökten öi in më kun kūöṅnö, hòṅ yīö min öt kūön elmat yěi ngëichken cha. Ngö ṙô Chin tö yīö tö yip ma-ahānga cha nöng örheūheu nö sökhak nö ikūö ngam Yöng chu aṅ el halīöngö.
11 *——
12 Sitih lōn öi yī-ö? Yěn hěngtak öre öp tarik tö 100 aṅ in tö nup sīṅp re ngaich hěng hang nòng nup in u tö lō-ongkūö, hö-ö hòng min anga-aṅ nö ṙāngö nup tö 99 nö ikui rôngö ngaich kiröönngöre nö chöh ngam tö lō-ongkūö?
13 Ngaich yēḵ ò min nö kôtökūö tö ò, tökò-òṙô Chin tö yīö, tö ò min nö mötlö ṙanamlōn tökūö taneūngenre tö ngam tö hěng nòng ngam tö chatngen nö in minë tö 99 töt lō-ongkūö.
14 Ngatī inlahen ngam Yöng chu* nö öt lōnu tö töhěng hang tak in vē kun kūönö nö ötkôlò.
15 Yěn köölö fālen öp tö hěngtak holmaneuk meh nö in meh, kuṙòh kiröönngöre nan tö ò ngaich vë-eny nang ò töp fālen ò* an höng nā-a nyöre. Yēḵ ò min nö hangṙô meh ngaich tö teūngen min më-eṅ tö ngam holmaneukre.
16 Yēḵ ò pöri nö öt hòṅ hangṙô meh, ngaich hěng, hēk nët tak kahë hēk më-eṅ tö holre öm vë-ekūö ò, hòn löknyö elvāng nap tö nët tak hēk tö lūöi tak mameuk nup ṙô tö vënyu nö hakööpi.
17 Ngaich yēḵ ò nö sōḵ nö hang nup ṙô cha ngaich vë-eny nang ngam māṅ. Ngaich yēḵ ò nö sōḵ nö hangṙô ngam māṅ inrē, hökngen ò më-eṅ ngaich nöng sā inlahen yip tahëng mihëṅṙö hēk mahamūl ṙāi kinëhöt chehen inrē.
18 Tökò-òṙô Chin tö yīö, nup nyahëkngö yīö min öi ing panam urěhangen min anū-ö nö nyëkiyö nö el halīöngö, nup lahuhlö yīö min öi ing panam urěhangen min anū-ö nö luhlöngö nö el halīöngö.
19 Tökò-òṙô Chin hēk tö yīö, yěn nët tak aṅ in yīö nö ing panam tö hēngö ellōn nö havëkö nup havëkö re ngaich kē-ěvkūö min cha-a tö nup töng havëköre tö ngam Yöng chu ngam aṅ el halīöngö.
20 Pön i chūök nap tö nët tak hēk yip tö lūöi tak nö hamūlöre min nö i minë-eny chu, umuh min chū-ö el ṙôngö cha.”
21 Unôichrit e ang Pītör nö yihtöre nö in Yēsū ngaich hatöönan nö ngö ṙô: “Mā, yēḵ öp holmaneuk chu öre nö köölö fālen nö in chu ngaich hòṅ ām kataheuh chū-ö öich aṙēlen ò? Tölngö tö sat heuh hòng?”
22 Ngaich Yēsū nö ngö ṙô tö ò: “Rö-ö Chin ngö ṙô tö meh öm höng tölngö tö sat heuh, tön tölngö tö 77 van pöri.
23 Lökten ön ngam Pūlngö ngam halīöngö nö sā öp tö hěngtak rācha öp tamölṙô yip mahalanṙenre nö havantö nup hötṙeh re nö in ò.
24 Hē ò nö rultenre nö kaheuk nuk hötṙeh cha ngaich kētu ök tö hěngtak mahalanṙen nö ikūö ò ök tö tafūöl körōr tinār* ṙôken hötṙeh.
25 Öt heūveu-en pöri anga-aṅ nö kēnyö nuk hötṙeh re, lökten ngam mā ò nö kētö chööngö nö hōten ò nö inyihiyö nö holtö öp pīhöre, kūönre tö nup taṙòkhöre inrē chehen töng aṅ in ò hòn kēnyu nuk hötṙeh ò.
26 Afukngöre pöri ngam mahalanṙen nö ikūö ò nö ngö ṙô, ‘Rachëichtöre tī man öm kētö ṙētak chu, ngaich Chin min öich kēnyö nup hötṙeh re.’
27 Aṙē-ěvlōn takô ngaich ngam mā tö ngam mahalanṙenre ngaich ṙāḵlen ò, aṙēlen ò inrē tö nuk hötṙeh ò.
28 Kiröönngöre pöri ngaich ngam mahalanṙen ngaich chöh ök tahëng tak holre tö sā ò nö mahalanṙen ök tö 100 tinār* ṙôken hötṙeh, kē an ngaich anga-aṅ ngaich kiröich likeun ò nö ngö ṙô, ‘Havantö nup hötṙeh re man nup kahë meh öm in chu.’
29 Afukngöre ngaich ngam hol ò nö i röön ò nö vë-ekūö ò nö ngö ṙô, ‘Rachëichtöre tī man öm kētö ṙētak chu, ngaich Chin min öich kēnyö në hötṙeh re.’
30 Ngaich sōḵ anga-aṅ nö hangṙô ò, kiröönngöre pöri, ngaich chaphöt ò nö el chēl, hanöng sā tī ò nö kēnyö nuk hötṙeh re.
31 Ngaich hē yik hol ò nö meūkö e ngaich cha-a nö pōyen miṙivlōn, yihtöre ngaich nö vë-eny nang ngam mā tö inlahen ò.
32 Havëten ò ngaich ngam mā ngaich ngö ṙô tö ò: ‘Më-eṅ tötlöök mahalanṙen, ngaich man hē e öm hòṅ aṙētu tö chu ngaich aṙēlen meh chū-ö öich ṙālen meh tö nuk hötṙeh meh.
33 Ötkô öm më-eṅ inrē aṙē-ěvlōn tö ngam holre öm sā chu öich aṙē-ěvlōn tö meh?’
34 Hūlökūö tanāinyö ngaich ngam mā nö in ò ngaich kēten ò nö in yik kamlonghöt ò, hanöng sā tī ò nö öl nö keūheutnyöre tī tö nuk hötṙeh re.
35 Ngatī tī an min ngam Yöng chu aṅ el halīöngö nö in yīö yēḵ yīö öt löknyö ellōnre lōn öi aṙēlö holre.”
Footnotes
^ Hēk, “halööktitre.”
^ Ngam tö ngö, tö tī-ivö tö yip tahëng tarik nö ṙāngenre nö im ṙinatö-ellōnre.
^ Hēk, “ihong fanukngö.”
^ Hēk, “sōngtörekūö kunröön tī tö meh.”
^ Ngëichköm Tahëng Ātiköl A3.
^ Hēk lohten, “yīö.”
^ Ṙô Krīk, “halööktit ò.”
^ Hēk, “tö 10,000 kinlaha ṙôken chānti telent.” Ngëichköm Tahëng Ātiköl B14.
^ Ngëichköm Tahëng Ātiköl B14.
