Tölöök Inhānga Kahūich Mëtiv 2:1-23
2 Kayônyu ngaich hē e ang Yēsū nö i Petlihem i Yūta. Rācha hē e ang Heròt* nö i Yūta hē u anū-ö sakāmö, unôichrit nuk ṙētak hē finötnyö Yēsū, ngaich yěh meuk! haroh tumtak yik tö akaha tarik* yamih nö i Yērūsalem,
2 ngaich ngö ṙô cha-a: “Isuh ap rāchakūö Yahūti öp tö fötnyu? Tön meuk ngam taneūsömat ò in, hē ih öi lā Chūhöt. Lökten in öi yih öi salāman.”
3 Pa-ekūö ngaich ök Rācha Heròt nö hāngö e tö yik taṙòkhöre inrē tarik i Yērūsalem.
4 Hamūltö yik mākūö kūönṙô tö yik kamūich ngaich ang Heròt ngaich hatöönö cha töp kamtö chūök Kristū* min nö kayônyu.
5 Ngaich ngö ṙô cha-a: “I Petlihem i panam Yūta pön ngatī kinūchngö angū-ö tö ök pròfět:
6 ‘Më-eṅ, Petlihem panam Yūta öt tö kūöṅnö man öm in yip mahayöng, pön löknyö in meh min öp töhěngtak rācha öp tö sā inlahen yōm sīṅp nö hayöngken më tarik chu Israel nö hachōkūö cha.’”
7 Höng hayunkenre ngaich ang Heròt nö tölṙô invëtö yik tö akaha tarik,* pön hòṅ hatöönö cha nö mikahtökūöre tök ranehtö mat cha nö meuk ök taneūsömat.
8 Ngö ṙô ngaich anga-aṅ hē ò nö tīnngörit cha nö chuh Petlihem: “Kuṙòh, holtö chumkūöṙenre yin öi chöh kamtö chūök öp nyīö ngaich yēḵ yīö min öi kôtökūö tö ò, ngaich yih öi mikahtölōn chu, hòṅ Chu chū-ö inrē kiröönngöre öich salāman.”
9 Kiröönngöre ngaich yik tö akaha tarik, unôichrit ṙô ök rācha Heròt nö tölṙô cha, ngaich yěh meuk! meuk ngam taneūsömat hēk cha-a ngam tö meūkö sin tö cha nö lā Chūhöt. Kiröön anga-aṅ nö urēhěkūö cha ngaich sökngöre nö ikui ök patī, ök chūök ök nyīö nöng ngöh.
10 Hē cha ngaich nö meuk ngam taneūsömat nö sökngöre, keuheūtnyöre ngaich cha-a tö ṙanamlōnre.
11 Kuhēthötre cha-a ngaich nö el ök patī ngaich meuk ök nyīö tö ök yöng ò inrē kikānö ang Mariā. Sōntöre ngaich cha-a nö ikūö ök nyīö nö salāman, kö ṙòngnyökūö nuk kumṙenre cha-a töpōiṙāi chehen ngaich kētö inlōnti nö in ngam nyīö tö sunna, lōpān hēk mūr inrē.
12 Vë-ekūö cha pöri ngam Tēv nö löktö i heūvö nö sōten cha hēk nö havan nö chuh in Heròt, lökten cha-a nö harīkngö talöököre nö havan nö chuh panamre.
13 Hē cha ngaich nö kiröönngöre, yěh meuk! hěng tak ök ma-ahānga aṅ in Yāvē* tö meūkö tö Yôsěf nö i heūvö ök tö ngö ṙô nö in ò: “Choholre kēḵ ngam nyīö tö ngam yöng ò inrē kikānö, ngaich falngöre öi chuh Aikup ngaich höngngöh öi umuh yēḵ Chu öt tölṙô yīö öi kiröönngöre. Tön chöh ngòh nyīö öp Heròt, pön hòṅ fëlngen ò.”
14 Lökten ang Yôsěf nö choholre tö hatööm ngaich kēḵ ngam nyīö tö ök yöng ò inrē kikānö, ngaich kiröönngöre nö chuh Aikup.
15 In e cha-a ngaich nöngngöh hanöng saha kinpaha Heròt. Ngatī inlahen taneungtökūö ngaich ngam ṙô Yāvē* ngam ṙô ò nö löknyö elvāng ök pròfět re nö ngö ṙô: “Löknyö Aikup ṙô Chin min öich havëkö ngam kūön re.”
16 Hē Heròt ngaich nö meuk yik tö akaha tarik nö hachīlngen ò, hūlökūö ngaich ök tanānyö ò. Tīnngö yik tarik alahare ngaich anga-aṅ nö chuh Petlihem tö nuk panam inrē ranghö u nö fëlngö yik nyīö tö nët höiny samyeūheu hēk yik tökūöṅnö ṙēḵti inrē tö cha, nö asā rò-angen ök ṙētak ò nö hatönkö kūö yik tö akaha tarik.
17 In ngih inlahngen öi meuk taneungtökūö ṙô ök pròfět Yarimiā nö ngö ṙô:
18 “Hāngö öp ṙô nö i Rāmā öp pööinyṙô pameuny hēk tö haṙivlōn inrē. Peuny ang Rēchöl, peuny yik kūönre anga-aṅ, sōḵ anga-aṅ nö inṙamulōn pön hö-öv yik kūön ò.”
19 Hē Heròt ngaich nö kapah, yěh meuk! Hěngtak ök ma-ahānga Yāvē* tö meūkö tö Yôsěf nö i heūvö nö i Aikup.
20 Ngaich ngö ṙô anga-aṅ: “Choholre man kēḵ ngam nyīö tö ngam yöng ò inrē kikānö ngaich kiröönngöre öi chuh im panam Israel, tön kapah yik nö ngaich tö hòṅ fëlngen ngam nyīö.”
21 Choholre ngaich Yôsěf ngaich kēḵ ök nyīö tö ök yöng ò inrē kikānö nö chuh im panam Israel.
22 Höng hangtöre pöri anga-aṅ tö Arkelās nö hayöng nö i Yūta nö i chūöktit ök yöngre Heròt. Vöö ngaich ang Yôsěf nö chuh in e, vënyu nang inrē anga-aṅ tö ngam Tēv nö löktö i heūvö. Lökten ngaich anga-aṅ nö chuh im tahëng lā-a ngam panam Kelelī.
23 Iyöngtöre ngaich cha-a nö im panam tö Nāsaröt invëka. Hòn inteungngö ngam ṙô yik pròfět: “Tö ò min nö havëka nö aṅ Nāsaröt.”*
Footnotes
^ Hēk, “ma-akah inlahen minë taneūsömat.”
^ Hēk, “Mesayā; Töhachāmö Elkui.”
^ Hēk, “ma-akah inlahen minë taneūsömat.”
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Lohten ön ngih ṙô “meunynyi” nö tö kē-ě nö im ëlô Heprāi.