Tölöök Inhānga Kahūich Mëtiv 20:1-34
20 “Pò ngam Pūlngö ngam halīöngö nö sā öp tö hěngtak mākūö öp tö hěng patī, öp tö ka-eūilökūö tö peuheū nö kiröönngöre, nö havah yip tö la-evṙen nö el öp panô-òṅ vāin ò.
2 Hō-o lōn ngaich anga-aṅ tö yik tö havëka, nö kö hěngtāk kinë-eṅkūö tö tinār* nö raneushö cha i tö hěng sakāmö, ngaich tīnngen cha anga-aṅ nö chuh el panô-òṅre.
3 Im tö machūötöre köṅny ṙô hēk anga-aṅ tö peuheū nö kiröönngöre ngaich meuk yik tahëng anga-aṅ nöng sökhaka nö i pakkūö talöökö pachār pön öt taneūnguṙen tö la-enre;
4 ngö ṙô ngaich ngam mākūö panô-òṅ nö in cha, ‘Kuṙòh kiröönngöre yin yī-ö inrē chuh el öp panô-òṅ chu, kē-ěkūö yīö Chin min töp tö sā ṙôken la-en yīö.’
5 Kiröönngöre ngaich cha-a nö chuh el panô-òṅ hēk anga-aṅ nö kiröönngöre im tö 12 köṅny ṙô tö sakāmö, im tö lūöi köṅny ṙô inrē nö kiröönngöre nöng ngatī inlahen.
6 Ngaich im manā-aṅ hēk anga-aṅ nö kiröönngöre im tö taneui köṅny ṙô tö lā harap, ngaich kôtö kūö tö yik tahëng nöng sökhaka, ngaich ngam mākūö ngam panô-òṅ nö hatöönö cha nö ngö ṙô, ‘Kūö yòh öi höng hěng sumkam öi höng sökhaka öi ihih öi höng öt la-evṙen?’
7 Ngaich ngö ṙô cha-a tö ò, ‘Pön öt hěngtak kamëtö la-en ih.’ Ngaich ngö ṙô anga-aṅ tö cha, ‘Kuṙòh kiröönngöre yin yī-ö inrē el öp panô-òṅ chu.’
8 “Harap töre ngaich ngam harap, ngaich ngö ṙô ngam tö panô-òṅvö töm mahayōmken minë chehenre, havëten yip töla-evṙen man, ngaich kētö raneushö cha, löktö kūö in yip mu-unôich tö yīhi tī öm reushen cha nö ṙòkhöre öm söl in yip tö-urēhěten.’
9 Hē yik tö taneui köṅny ṙô ṙē-ěl alaha nö yihtöre, ṙòkhöre cha-a nö kö hěng tāk taneūngen tö tinār.*
10 Hē yik tö-urēhěten alaha nö la-evṙen nö havëtu, ngaich mötlö taneūngen cha-a tö raneushöre tö lōnre tö yik holre, höng kö hěng tāk kinë-ekūö pöri cha-a tö tinār* nö raneuhsö cha nö ṙòkhöre.
11 Kūö cha ngaich nöng hēngö taneūngen tö tinār, līn ngaich cha-a
12 ngaich ngö ṙô tö ngam mā, ‘höng hěng kanta rò-òten yin vē mu-unôichten nö la-evṙen, ngaich haṙongtu raneuhsö tö meh nö in ih, öi tö hěng sumkam öi la-evṙen öi el ngam tökalēḵ tavūöi!’
13 Ngö ṙô pöri ngam mā nö sapṙô ök tö hěngtak aṅ in cha, ‘Mah, öt tö miyëḵ Chin tö meh. Röh öm hē-e töhō-olōn tö töhěng tinār* nö raneushö meh öm la-evṙen in chu?
14 Lökten man kēḵ ngam rupīöre ngaich kuṙòh kiröönngöre. Kanahanglōnre Chin tö ṙôken tīre öich kē-ěkūö ngòh mu-unôich nö sā ṙôken tī chu öich in meh.
15 Ötkô ṙöng öich kanahnguṙen öich in në rupīöre öich sā lōnre tö u nö chehen chu? Kunyahalōn öm ṙöng, kūö chu öt ma-iöṅhtīre?’*
16 Ngatī yin min vē mu-unôich nö urěh, ngaich vē mu-urěh min, nö unôich.”
17 Hē cha ngaich nö ṙòkhöre nö chuh Yērūsalem, ngôṅ yik tö 12 tak mahaköp ngaich ang Yēsū, ngaich haköhngen chūökre nö vë-ekūö cha nö ngö ṙô:
18 “Yěh Meuk! Tö hī öi chuh Yērūsalem, ngaich in e min ngòh kūön tarik nö kētu nö eltī yip mākūö kūönṙô tö yip kamūich inrē, ngaich cha-a min nö fëlngen ò
19 ngaich kēten ò nö eltī yip tahëng mihëṅṙö tarik nö hayë-e, fōho, kilöllöng inrē nö kumpaha. Im linūöi sumkam pöri min anga-aṅ nö choholre.”
20 Unôichrit e nö yihtöre ök pīhö Sepetī nö holtö nak kūönre nö yihtöre nö in Yēsū ngaich sōnngöre nö ikūö ò, ngaich salāman pön hòṅ hēngö havëka nö in ò.
21 Ngaich ngö ṙô ang Yēsū nö in ò: “Asuh öp lōn meh?” Ngaich ngö ṙô anga-aṅ, “kilēḵngôre man yēḵ hòṅ nā kūön chu nö ūichhak nö el ngam Pūlngö meh, hĕng tak lāhāmö meh, hĕng tak lātavē meh.”
22 Ngö ṙô pöri ang Yēsū tö ò: “Höng hö-ö yin akahalōn tö ngam havëköre. Mihôiṅ an, òk kūö öp kulah öp ahòkkūö chu min? Vōkö inrē tö ngam vinôkö ngam vahōk chu min?” Ngaich ngö ṙô cha-a: “Heūṅ mihôiṅ an.”
23 Ngaich ngö ṙô ang Yēsū tö cha: “Kô-en nan mihôiṅ òk kūö öp kulah min, ngam kinëtö anūichö nāṅ pöri lāhāmö chu hēk lātavē chu inrē, öt kētu chööngö chū-ö öich kēten u, pön kinë-eṅkūö yip töhalēnkaṙen tö ngam Yöng chu anū-ö.”
24 Hē yik tö söm tak ngaich nö hāngö e, ngaich kunyahalōn cha-a nö in nak tö nëttak tö kahëmre.
25 Havëtö yik mahaköp pöri ang Yēsū nö in re ngaich ngö ṙô: “Akahalōn yin tö vē mā ing panam, nö töpōi vahī tö chööngö nö ikui tarik, minā-av inrē yip tökiröng nö ikui cha.
26 Ötkô pöri yī-ö öi ngatī öi sā inlahen cha; ngòh tö hòṅ kiröng pöri nö in yīö, hòṅ mameukṙen yīö min anga-aṅ,
27 ngòh tö hòṅ urěh nö in yīö, tanölöṙô yīö min anga-aṅ.
28 Ngaich sā inlahen ngòh Kūön tarik, rö-ö nö yamih nö tömeūken tö tarik, mameukṙen cha pöri ane inrē kamëngö nômöre nö ṙāi tömaṙôngö.
29 Hē cha ngaich nö kunyī-inyre nö ṙā-ang Yerikō, ngaich maṙôngö yik tarik yamihtöre nöng chūkörit ò.
30 Ngaich yěh meuk! nët tak nak töt meuk tarik töng amūichak nö i taseū talöökö, hē cha nö hāngö Yēsū nö lök umuh ngaich havëken ò cha-a nö pōitô nö ngö ṙô: “Mā, më-eṅ Kūön Tāvit aṙē-ělōn man yēḵ tö ai!”
31 Vëkö ṙô cha pöri yik tömaṙôngö pön hōten cha nö ṙāngôre; vaichtö ṙūöhnyôre pöri cha-a nö ngö ṙô: “Mā, aṙē-ělōn man yēḵ tö ai, më-eṅ Kūön Tāvit!”
32 Sökngöre ngaich ang Yēsū ngaich havëten cha ngaich ngö ṙô: “Asuh öp lōn nā inlahen chu öich in nā?”
33 Ngaich ngö ṙô cha-a tö ò: “Mā, lōnu an tö në matre nö hòṅ lööken.”
34 Keuheūtnyöre ngaich ang Yēsū tö miṙēḵlōnre tö cha, ngaich lūölkö mat cha, ilööṙen ngaich nuk mat cha nö meuk ngaich tömrit ò cha-a.
Footnotes
^ Ngëichköm Tahëng Ātiköl B14.
^ Ngëichköm Tahëng Ātiköl B14.
^ Ngëichköm Tahëng Ātiköl B14.
^ Ngëichköm Tahëng Ātiköl B14.
^ Hēk, “öich löökö la-en.”
