Tölöök Inhānga Kahūich Mëtiv 22:1-46
22 Hēk ang Yēsū nö kētö ök töhěng inchōḵ-oṙô nö in cha nö ngö ṙô:
2 “Sā öp tö hěngtak an rācha ngam Pūlngö ngam halīöngö öp mahavëten yip tarik nö nyā, hē inpīhö öp kūön ò.
3 Tīnngö yik mahalanṙenre ngaich anga-aṅ nö chuh in yik tarik yik tö havëtu nö nyā nö chuh im inpīhö, ngaich sōḵ pöri cha-a nö yih.
4 Hēk ngam rācha nö tīnngen yik tahëng mahalanṙen nö ngö ṙô, vë-eny nang yip tö havëtu yin öi ngö ṙô, “Yěh meuk! Ngaich Chin lēnngen tī tö në nyā-aṅkūö, ngaich Chin inrē ṙatnyö likeun nuā hēk tö minë tahëng inrē töṙeūla tö alahavö, ngaich nun nöng lēn nö ṙòkhöre. Ṙòkhöre öi pöich yihtökūö ip nyina-aṅ inpīhö.”’
5 Ngaich pöri cha-a nöng öt chumkūöṙen, kiröönngöre pöri cha-a nö in nuk la-enre, ōt yik chamuh el panô-òṅre hēk ōt yik ngamëichkö nuk la-enre pön mi-inyīha;
6 kēḵ yik mahalanṙen ò ngaich yik tahëng ngaich ötlēḵken cha, fëlngen cha inrē.
7 Hūlö kūö tanānyö ngaich ngam rācha, ngaich tīnngö yik kumyung anga-aṅ nö fëlngö yik famëlhang, föngtö kūö nuk panam cha inrē.
8 Unôichrit e ngaich anga-aṅ nö ngö ṙô nö in yik mahalanṙenre, lēn nun ngaich në nyā-aṅkūö ngih inpīhö, hö-ö pöri vē tö havëtu pön höng kūönen.
9 Lökten yin chuh in nup tökiröng talöökö elpanam, ngaich yip töng maheuk kūö yīö ngaich havëten cha yī-ö nö chuh ing nyina-aṅ inpīhö.
10 Kiröönngöre ngaich yik mahalanṙen nö chuh in nuk tökiröng talöökö ngaich yik töng maheuk kūö cha nö in e ngaich havëtu tö cha, pòrô nö tölöök hēk tötlöök inrē havëtu cha-a nö ṙòkhöre, tööḵlö ngaich ngam patī tö yik tö havëtu nö nyā* nö in ngam inpīhö.
11 Hē ngam rācha pöri nö kuhēthötre nö ngëichkö yik yamih, hěngtak ngaich ök tarik maheuk ò, ök töt inyūtu tö inyut mahapīöh.
12 Ngö ṙô ngaich anga-aṅ tö ò, ‘Kahōlö, sitih inlahen öm yôkhöt öm ihih öm höng öt inyut tö inyut mahapīöh?’ Höng öt heuveū-eu ṙô pöri anga-aṅ nö sapṙô ò.
13 Ngö ṙô ngaich ngam rācha nö in yik mahalanṙenre, nyëk kël ò yin kalröön ò inrē ngaich kavalnyen ò el sinngūlö, in e min anga-aṅ nöng peuiny, hēk kap kui kanapre inrē.
14 “Pön maṙôngö yip töhavëka, höng haroh tumtak pöri min yip tökatöllöng.”
15 Kiröönngöre ngaich yik Feresī ngaich vë-ekūöre tö inlahen tīre nö hachīlngövah Yēsū nöng löktö in nup ṙô ò.
16 Lökten ngaich yik Feresī nö tīnngö yik haköptöre nö holröön yik tamömrit Heròt, ngö ṙô ngaich cha-a nö in Yēsū: “Mahaköphöti, akahalōn in tö meh öm tökô-en, im kanô-en inrē öm haköptö talöökö ngam Tēv, öt mahaṙamlōn tarik më-eṅ inrē hēk öt höng ngëichkö mòkūö tarik yěm vë-ekūö cha.
17 Vë-eny nang ih man, sitih mufē öm më-eṅ? Tö löng öng ngam inlahen hī yěi kē-ěkūö më mahayöng* tö tax hēk hö-ö ṙöng?”
18 Akahakūö pöri ang Yēsū tö ngam ellōn cha nöng ötlöng, ngö ṙô ngaich anga-aṅ nö in cha: “Ō yī-ö mahanyatkö elmat, kūö yòh öi kalaha chu?
19 Hameukhömat chu yin töp coin.” Ngaich kētö ök töhěng tinār* ngaich cha-a nö in ò.
20 Hatöönö cha ngaich ang Yēsū, nö ngö ṙô, “Insā chīö öng ngih hēk minë-eny chīö öng ngih tö kūichtu nö in e?”
21 Ngaich ngö ṙô cha-a: “Insā ngam mahayöng.” Ngö ṙô ngaich anga-aṅ tö cha: “Lökten kē-ĕkūö Kaisöör, tö nup aṅ in Kaisöör, kē-ĕkūö ngam Tēv pöri, tö nup aṅ im Tēv.”
22 Pingangkūö ngaich cha-a nö hang ṙô ò, ngaich kiröönngöre nö ṙāngen ò.
23 Hē e angū-ö sakāmö, yik Satukī nö yihtöre nö in ò, yik vamënyen ngam inköphöti invanlö tökapah nö töng ötkô-en, ngö ṙô ngaich cha-a nö hatöönö ò:
24 “Mahaköphöti, ngö ṙô ök misī Môsös: ‘Yēḵ ngòh tarik nöng kapah nöng öt kūönu, ngaich mihôiṅ ngam kahëm ò nö pīhövö tö ngam pīhötit ò, ngaich hakūöntö kūön ngam mëmre tö kapah.’
25 Sat tak yik umuh tökahëmre ōt inrē yik mëm cha, pīhövö ngaich ök maṙöinylö, ngaich kapah, nöng öt kūönu ngaich ṙāngö ök pīhöre nö ik kahëmre.
26 Ngatī inlahen ök innëtö tök linūöyö nö söl im sinat tak.
27 Unôichgöre ngaich ök kikānö nö kapah.
28 Ngaich yēḵ ò min nö hachohlöng nö ṙā-ang in yip tökapah, achīö öp min pīhö ò nö in më tö sat tak? Pön ṙòkhöre cha-a sin nö pīhö ò më tö sat tak.”
29 Ngö ṙô ngaich ang Yēsū tö cha: “Yöng vanāichö mufē yīö, pöi öt rēhěn akahakūö tö ṙô ngam Töhet Līpöre, öt rēhěn öi akahakūö tö kumlēḵ ngam Tēv;
30 pò yip tö kapah yēḵ cha min nö hachohlöng, nö öt hěngtak kamë ngam pinīhö min, pòrô kikōnyö hēk kikānö, ṙòkhöre pöri min cha-a nö sā inlahen yip ma-ahānga aṅ el halīöngö.
31 Yěi ṙô tö ngam invanlö yik tökapah pöri, höng öt köplōn öi tö ṙô ngam Tēv misī nö in yīö nö ngö ṙô:
32 Chu-ö chin Tēv Aprahām, Tēv Isāk, Tēv Yāköp inrē. Rö-ö pöri anga-aṅ nö Tēv yik tökapah, pön Tēv yip tö aṅ.”
33 Pingangkūö ngaich yik tömaṙôngö nö hang ṙô ò nö haköphöti.
34 Ngaich hē yik Feresī nö hang inlahen yik Satukī nö sō-oi ṙô tö ò nö ṙô-òvö, hamūlöre ngaich cha-a nö yihtöre nö in ò.
35 Ngaich hěngtak ök aṅ in cha, ök tö akahakūö tö minë Chööngö ök kamlaha Yēsū nö ngö ṙô:
36 “Mahaköphöti, öp yòh öp tökiröng nö in minë Chööngö?”
37 Ngaich ngö ṙô anga-aṅ nö sapṙô ò: “‘Hangenlōn man tö ngam Tēv re Yāvē,* öm keuheūttö ellōnre, keuheūttö nômöre* hēk keuheūttö elkuilōnre inrē öm hangenlōn tö ò.’
38 Angū-ö ngih raneh tökiröng nö chööngö.
39 Höng sā e ngam innëtö: ngam tö ngö ‘Hangenlōn man tö holre öm sā hanangenlōnre töre.’
40 In në tö nët nun nö kilölhaka nö ṙòkhöre në chööngö, tö nuk ṙô yik pròfĕt inrē.”
41 Hē yik Feresī nö mūlhak nö umuh ngaich ngö ṙô ang Yēsū nö hatöönö cha:
42 “Sitih mufē öi yī-ö tö Kristū? Kūön chīö ang tö ṙô yīö?” Ngaich ngö ṙô cha-a: “Kūön Tāvit.”
43 Ngaich ngö ṙô anga-aṅ tö cha: “Kūö yòh pöri ang Tāvit hē ò nö halöinyka ellōn tö ngam töhet kumlēḵ nö havëken ò nö Mā, nö ngö ṙô,
44 ‘ngö ṙô ang Yāvē* tö ngam Mā chu: “Ūichngöre man lāhāmö chu hanöng saha tī chu öich vītö yip tökunyaha elmat tö meh, nö ranöönö röön meh”’?
45 Tö lökten yēḵ Tāvit nö Mā ngö ṙô nö havëken ò, ngaich sitih inlahen min anga-aṅ nö kūön ò?”
46 Hēten tö e angū-ö sakāmö nö öt hěngtak tökô nö yihtöre nö in ò nö hatönan.
Footnotes
^ Hēk, “nö ūichtöre nö ik mīs.”
^ Ṙô Krīk, “Kaisör.”
^ Ngëichköm Tahëng Ātiköl B14.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
