Tölöök Inhānga Kahūich Mëtiv 25:1-46
25 Sā yip tö söm tak an rēlö, ngam Pūlngö ngam halīöngö; yip kamë nup ëāṅvöre, ngaich kiröönngöre nö höngkūö öp töhapīhö.
2 Taneui tak yik in cha, yik tötakaha; ngaich taneui tak, yik tö-akaha.*
3 Pò yik tötakaha, hē cha nö kēḵ nuk ëāṅvöre, öt keunkö mak u pöri cha-a nö in re.
4 Keunkö mak ëāṅvöre pöri yik tö-akaha, nö el pilön.
5 Ngaich kūö ngam töhapīhö nö hāṅtö yīhi, haṙòhlö ngaich cha-a, ngaich ṙōlngöre nö haṙòh.
6 Ik chūöl hatööm ngaich ök hamū-a nö havëken cha nö ngö ṙô: ‘Yěh meuk, yih an ngaich ngam töhapīhö! Lökten yin öi kunyī-inyre, öi höngkūö ò.’
7 Choholre ngaich yik rēlö nö ṙòkhöre; ngaich halēn nuk ëāṅvöre.
8 Ngö ṙô pöri yik tötakaha nö in yik tö-akaha, ‘Kētö mak në ëāṅvö ih yin; tön hòṅ nyangngö nun nö ngaich.’
9 Ngö ṙô pöri yik tö-akaha nö in cha: ‘Hö-ö; öt kô-òrekūö in min tö yīö. Kuṙòh, lahë yin chuh in yip mi-inyīha, öi havahare mak ëāṅvöre.’
10 Ṙòngmö kiröönngöre cha-a nö havahare mak ëāṅvöre, yih ngaich ngam töhapīhö. Kuhēthötre ngaich yik tölēnen nö holröön ò, nö im nyina-aṅ inpīhö.
11 Öpikūö ngaich ngam inkūp, unôichngöre ngaich yik tahëng rēlö nö yih, ngaich ngö ṙô, ‘Mā, Mā, löpnyökūö ih!’
12 Ngö ṙô pöri anga-aṅ, nö sap ṙô cha, ‘Tökò-òṙô Chin tö yīö, hö-ö Chin akahakūö tö yīö.’
13 Lökten yin aṅhāṅti; tön öt akahalōn yin tö sakāmö, öt rēhĕn öi akahalōn tö ṙētak yanīhih ngòh Kūön tarik.
14 Sā öp tarik an ngam Pūlngö ngam halīöngö öp chamuh tahëng panam, mahavëtö yik mahalanṙenre ngaich kētö nuk kanôlòre nö eltī cha.
15 Hĕng tak ök tötaneui kinlaha kinë-eṅkūö tö coin chāntī,* nët ök tahëng, ngaich hĕng kinlaha kinë-ekūö ök linūöi tak, nöng kö sā ṙôken tölngö kanò-òṅ cha, ngaich kiröönngöre anga-aṅ nö chuh tahëng panam.
16 Ilööṙen ngaich ök mahalanṙen ök tö taneui kinlaha kinë-eṅkūö tö coin chāntī, nö kiröönngöre, ngaich inyiha nö löktö in minë tö taneui kinë-ekūöre ngaich teūngen anga-aṅ hēk tö tötaneui coin chāntī.
17 Ngatī inrē ök tönëtö taneūngen tö coin, nö nëtö taneūngen hēk tö coin chāntī.
18 Ök tö hēngö taneūngen pöri tö coin chāntī nöng kiröönngöre, ngaich ulngö ngam kinë-ekūöre tö ngam mā nö el tumlat nöng hayunngen e.
19 Marô-angen takô pöri, yih ngaich ngam mā nö in yik mahalanṙenre; ngaich tölṙô cha nö kētö kinṙöötöre nö in ò.
20 Yihtöre ngaich ök tö taneui kinlaha kinë-ekūö tö coin ngaich kētö nuk tö taneui anga-aṅ coin havahlöre, ngaich ngö ṙô, ‘Mā, taneui nuk vahë coin kinë-ekūö chu tö meh; Yĕh meuk, taneūyö taneūngen Chin, tö tahëng coin.’
21 Ngaich ngö ṙô ngam mā tö ò: ‘Tölngö tö-akaha, hēk tökô-en man öm mahalanṙen. Tökô-en inrē öm i tö rahëichyen. Hamālöng man ngaich tö chu, öm hayöng në töpōyen chehen. Hanôltö ṙanamölōnre man inrē in ngòh mā meh.
22 Unôichngöre nö yihtöre ök tönëtö kinë-ekūö tö coin; ngaich ngö ṙô tö ò, ‘Mā chu, nët nuk vahë coin kinë-ekūö chu tö meh; yĕh meuk, nëtö taneūngen Chin hēk, tö tahëng coin.’
23 Ngaich ngö ṙô ngam mā tö ò: ‘Tölngö tö-akaha, hēk tökô-en man öm i törahëchyen! Hamālöng man ngaich tö chu, öm hayöng në töpōyen chehen. Hanôltö ṙanamölōnre man ngaich in ngòh mā meh.’
24 Im mana-aṅ nö yihtöre, ök töhěng kinlaha taneūngen tö coin; ngaich ngö ṙô: ‘Mā, akahalōn Chin tö meh, öm tö kësen, kēḵ ṙòng nup töt taheūichre man inrē, kē ṙòng taneūich inrē öm i nup töt hamūlre.
25 Lökten chū-ö öich pa-ekūö tö meh, ngaich höng kiröönngöre öich ulngen ngam coin kinë-ekūöre öich el tumlat. Euṅh, kò-òren man kē ngam chehenre.’
26 Ngaich ngö ṙô ngam mā, nö sap ṙô ò: ‘Më-eṅ tötlöök, tö ṙahata mahalanṙen, yēḵ meh akahalōn tö chu, öich kēḵ ṙòng taneūch öich inup töt taheūichtöre, hamūl inrē öich inup töt hamūlre.
27 Ngaich öre me-eṅ höngkö yanīhi chu öm chaphöt ngam pësa* chu nö el pënk; ngaich yēḵ chu öich yih, ngaich kô-òren öre öich teūngen tö u, nö holtö ṙāi röönre.
28 ‘Lökten yin kēḵngö ngam töhěng coin chāntī öi in ò ngaich kēten e öi in ngam tö söömö aṅ in tö coin.
29 Pò vē tö īnu ngaich kē-evkūö min cha-a nö hēk; ngaich pōyen aṅ in min cha-a. Ngòh töt aṅhav in pöri, kē-ĕyö min nup töng mi-in ò.
30 Kavalnyen ngam töt yanööluṙen tī yin mahalanṙen nö elkahôyö, el ngam sinngūlö, i chūök pameuiny, kamap kui kanapre inrē.’
31 Hē ngòh Kūön Tarik min nö yih nö im kanôlòre, ṙòkhöre min yip ma-ahānga nö hol ò, ngaich ūichlöre min anga-aṅ nö el öp kantēra kanôlò.
32 I kūö ò min nö hamūlö vē taṙòkhöre tarik aṅkūö në panam, ngaich haköhngen nup sīṅp tö nup pöököre min anga-aṅ tö höö, sā tī ngòh yōm sīṅp ò nö haköhngen u tö höö.
33 Lahāmö tī min anga-aṅ tö nup sīṅp re, lātavē pöri nup pöököre.
34 Ngaich ngö ṙô min ngam Rācha tö cha yip lāhāmö ò: ‘Ta-ih, yī-ö tö kôlò tö tī ngam Yöng chu, amīnu tö ngam Pūlngö tö halēnkaṙen tö pòkūö yīö, hētentö ranehlö ngih panam.
35 Pò chu ha-aṅlöng tö yīö, hē chu kapahare; Kētu òk chū-ö tö yīö, hē chu haṙëhe nômö. Hachūöklöng chū-ö tö yīö, hē chu öich öt lööṙu yih;
36 kafānö chū-ö tö yīö, hē chu öt hilāṙu. Chöhka chū-ö tö yīö, hē chu vāhavö. Yihka chū-ö tö yīö hē chu el chēl.’
37 Ngaich ngö ṙô min yip tölöök, nö sapṙô ò: ‘Mā, ihē öi īhö meūkö meh kapahare ha-euk, ngaich kētö nyā-aṅ meh hēk haṙëhe nômö, ngaich kētö òk meh?
38 Ihē öi īhö meūkö meh ötlööṙu yih, ngaich hachūöklen meh; hēk öt hilāṙu, ngaich kafānö meh?
39 Ihē öi īhö meūkö meh vāhavö, hēk el chēl, ngaich yihken meh?’
40 Ngaich ngö ṙô min ngam Rācha nö sap ṙô cha, ‘Tökò-òṙô Chin tö yīö, i tum heuh tī yīö i vē kahëm chu, vē yāich takô, ngaich mi-in chu tī yī-ö.’
41 Ngaich ngö ṙô min anga-aṅ tö cha: ‘Yip lātavē, kē-ĕngre yin, ṙā-ang in chu, yī-ö tötkôlò, el ngam tötnyangngö tameūyö, tö halēnkaṙen tö pòkūö ngam satān, tö yip ma-ahānga ò inrē.
42 Pò chu öt kētu nyā-aṅ tö yīö, hē chu kapahare ha-euk, öt kētu òk chū-ö tö yīö, hē chu haṙëhe nômö.
43 Öt hachūöklöng chū-ö tö yīö, hē chu öt lööṙu yih, öt kafānö chū-ö tö yīö, hē chu öt hilāṙu; öt chöhka chū-ö tö yīö, hē chu vāhavö el chēl inrē.’
44 Ngaich ngö ṙô min cha-a nö sapṙô ò: ‘Mā, ihē öi īhö meūkö meh kapahare, haṙëhe nômö, öt lööṙu yih, öt hilāṙu, vāhavö, el chēl inrē, ngaich rö-ö öi meukṙen meh?’
45 Ngaich ngö ṙô min ngam rācha, nö sapṙô cha: ‘Tökò-òṙô Chin tö yīö, i tum heuh yīö öt ngatī tī öi in vē yāich takô, ngaich rö-ö yī-ö tö tī-iv in Chu.’
46 Chuh el ngam tö örheūheu min cha-a ötinkôlò;* im nômö pöri tö örheūheu-aṅ yip tölöök.”
Footnotes
^ Hēk, “yik tö holtö mikahelmatre nö la-evṙen.”
^ Ṙô Krīk, “telent.” hěngren töm tö 20.4 kg. Ngëichköm Tahëng Ātiköl B14.
^ Ṙô Krīk, “chāntī.”
^ Ṙô Krīk, “rööki min anga-aṅ.” Ngam tö ngö, nö im nômö.
