Tölöök Inhānga Kahūich Mëtiv 26:1-75
-
Chöh inlahen tīre më mākūö kūönṙô nö hòṅ fëlngen Yēsū (1-5)
-
Ṙöstu ngam tavī-i nö ikui Yēsū (6-13)
-
Manā-aṅ Pāska hēk inchīlngö vah Yēsū (14-25)
-
Ranulten ngam Töhet Inmūlkūö Ngam Mā (26-30)
-
Vënyen Pītör ang Yēsū nö mahngen ò min (31-35)
-
Vë-ekūötēv Yēsū nö i Ketsēmenī (36-46)
-
Kinë-eṅ Yēsū (47-56)
-
Kahòkkaṙen ikūö chūök kamhôka (57-68)
-
Mahngen Yēsū ang Pītör (69-75)
26 Hē Yēsū nö keuheūtö ṙô tö në ṙô re, ngaich ngö ṙô anga-aṅ tö yik haköptöre:
2 “Akahalōn yin töp Pāska nöng nët töre sumkam, ngaich kētu min ngòh Kūön tarik nö kilöllöng nö irōi chōn nö kumpaha.”
3 Ngaich hamūlöre yik makūö kūönṙô tö yik mākūö yik tarik inrē nö lākūö patī ök mākūö kūönṙô tö Kaifas invëka,
4 holṙenre cha-a nö chöh inlahen tīre, pön hòṅ hachīlngö vah Yēsū nö kē an* ngaich fëlngen ò.
5 Ngö ṙô pöri cha-a: “Ötkô in hē el ṙētak ngih paratīn, pön taṙōllöngṙen min yip tarik.”
6 Ngaich hē Yēsū nö i Petenī nö el patī Sīmōn ök töyeūnyu sin,
7 hē ò ngaich nö ṙònghöichkūö nö nyā,* hěngtak ngaich ök kikānö yamihtöre nö in ò, nö kumtö ök pilön ök tö aṅhavö tök tö pōiṙāi tavi-i tötahūsa, ngaich ṙöstö e anga-aṅ nö ikui ò.
8 Hē yik mahaköp ngaich nö meūkö e tainy ngaich cha-a ngaich ngö ṙô: “Kūö yòh ang ngòh kikānö nö mëichngen ngih tavi-i?
9 Inyīhiyö öre angū-ö nö pōiṙāi tö pësa, ngaich mihôiṅ anū-ö nö kētu nö in yip yāich.”
10 Hē Yēsū pöri nö akahalōn tö ṙô cha nö vë-ekūöre ngaich ngö ṙô anga-aṅ: “Kūöyòh öi uyëken ngòh kikānö öi hakihten ò? Tölöök an ngam la-en ò tö pòkūö chu.
11 Töng örheūheu yin yī-ö, öi holtuṙah tö vē yāich hö-ö pöri chū-ö höng örheūheu min öich in yīö.
12 Ṙöstö ngam tötahūsa an tavi-i ngam kikānö nö inlēnkö öp lināpngö chu.
13 Tökò-òṙô Chin tö yīö, i chūök ngih tölöök inhānga min nö ahangka, nö in në taṙòkhöre panam öthō min ngih tī ngòh kikānö nö öt kakka nö inköpkölōn tö ò.”
14 Hěngtak ngaich ök aṅ in yik tö Nëtsīön tak ök tö Yūta Iskaryôt invëka, yamihtöre nö in yik mākūö kūönṙô
15 ngaich ngö ṙô tö cha: “Yēḵ chu min öich kēten ò nö eltī yīö, ngaich asuh min öp kahëtö yīö öi in chu?” Ngaich cha-a nö ngö ṙô tö ò, kē-ěkūö meh in min tö tö 30 ṙôken chāntī coin.
16 Hēten tö e angū-ö sakāmö ang Yūta nö ngëichkö öp tölöng ṙētakre nö kēten ò nö in cha.
17 Im ranehtökūö sakāmö ngam töt aföhlöng ròtī, yihtöre ngaich yik mahaköp nö hatöönö Yēsū nö ngö ṙô: “Isuh chūök lōn öm tö ih öi halēnkö chūök meh öm nyā ngih Pāska?”
18 Ngaich ngö ṙô anga-aṅ tö cha: “Kuṙòh, chuh im panam yin, meuk öp tarik yin min umuh, ngö ṙô pöichö tö ò, ‘Ngö ṙô öp mahaköphöti: “Röhta an nö ngaich ngam tö lēnngen ṙētak chu öich holkūö vē mahaköp öich nyā ngih Pāska öich i patī meh.”’”
19 Ngatī inlahen ngaich yik mahaköp nöng sā ṙô Yēsū nö in cha, nö halēnken ngam Pāska.
20 Hē e ngaich nö harap, ūichngöre ngaich anga-aṅ nö holkūö yik tö 12 tak mahaköp nö nyā.*
21 Hē cha nö ṙònghöichkūö nö nyā ngaich ngö ṙô anga-aṅ: “Tökò-òṙô Chin tö yīö, hěngtak öp min aṅ in yīö, mahachīlngö vah tīre nö kēngen chu.”
22 Haṙivlōn ngaich cha-a hē cha nö hāngö e, hatöönö ò ngaich cha-a nö ngö ṙô: “Mā, uich höng chū-ö röh?”
23 Ngaich ngö ṙô anga-aṅ nö sapṙô cha: “Öp hol tī chu min öich söich tīre öich el ngih pingāṅl anga-aṅ mahachīlngö vah chu min nö kēngen chu.
24 Kô-en ön ngòh Kūön tarik nö tö hòṅ kiröönngöre nö sā kinūichngö inlahen ò, tötkôlò pöri öp tarik öp mahachīlngövah ò nö kēngen ò, ěhten öre anga-aṅ tarik nöng öt fötnyu.”
25 Ngö ṙô ngaich Yūta nö in ò, ngam mahachīlngövah ò: “Rappī, uich höng chū-ö röh?” Ngaich ngö ṙô Yēsū tö ò: “Ngaich man öm höng vë-enyre.”
26 Hē cha nö ṙònghöichkūö nö nyā, kēḵ ök ròtī ngaich ang Yēsū, ngaich vë-ekūötēv nö ha-öiny ngam Tēv ngaich liköölö e, ngaich kē-ěkūö yik haköptöre nö ngö ṙô: “Euṅh, nyā-aṅ e yin, angū-ö an minkahngö ngih alaha chu.”
27 Kēḵ ök kulah hēk anga-aṅ ngaich ha-öiny ngam Tēv nö ngö ṙô: “Ṙòkhöre kūö yin öi òkö e,
28 tön mahām chu an nö kinlēḵngô tö kitaktu töpòkūö tömaṙôngö, nö inṙē-ĕl tökööl.
29 Tökò-òṙô Chin tö yīö: Öt hōḵ Chin min hēk òk ngih vāin öich töngamuhangen, hanöng saha öp sakāmö, hē chu min öich òk öp tufömngöre vāin öich holkūö yīö, öich im Pūlngö ngam Yöngre.”
30 Keuheūthë ṙô ngaich cha-a nö tikökṙôre tö minë nöönyö ngam Tēv ngaich kunyī-inyre nö chuh kui ök Rôngö Òliv.
31 Unôichrit e ang Yēsū nö ngö ṙô tö cha: “Kūöṅnngöre an min ngam ṙinatö-ellōn yīö,* yēḵ yīö min öi meuk ötlinëken chu ing hatööm pön ngö kinūichngö angū-ö: ‘Fël ngam yōm sīṅp Chin min, ngaich minë sīṅp min nö parātiyö.’
32 Yēḵ chu pöri min öich hachohlöng öich ṙā-ang im kinpaha, urēhěkūö yīö chū-ö min öich chuh Kelelī.”
33 Ngö ṙô pöri Pītör tö ò: “Pòrô min vē hol chu nö kūönngöre ṙinatö-ellōn nö in meh, öthō pöri min ngam ṙinatö-ellōn chu nö kūönngöre nö in meh!”
34 Ngaich ngö ṙô Yēsū tö ò: “Tökò-òṙô Chin tö meh, lūöi heuh ṙô man min öm mahngen chu, urēhĕkūö ṙô hayöm nö takeūk ingih hatööm.”
35 Ngaich ngö ṙô Pītör tö ò: “Yēḵ chu pòrô öich anòngngö vah meh kapah, sön min öthō öich mahngen meh.” Ngatī ṙô inrē yik mahaköp nö ṙòkhöre.
36 Holtö yik haköptöre ngaich ang Yēsū nö chuh Ketsēmenī ngaich ngö ṙô anga-aṅ tö cha: “Ūichngöre yin sin öi ihih öi hökken chu töich chuh mu-a öich vë-ekūötēv.”
37 Kē-ě Pītör, tö nak tö nët tak kūön Sepetī ngaich anga-aṅ nö holre, keuheūtnyöre anga-aṅ hē-e tö kanihngenre hēk miṙivlōnre inrē.
38 Ngö ṙô ngaich anga-aṅ tö cha, “kalēḵ takô ön ngih miṙivlōn chu, ngaich takô öich sā inlahen yip tö hòṅ kapah, höng ngöh yin sin öi ihih ngaich holṙen chu öi höng aṅhaṅti.”
39 Rĕh rôvat ngaich anga-aṅ nö ṙūöhöngre tö cha sulngöre ngaich nö el tumlat nö vë-ekūötēv nö ngö ṙô: “Kayööngö, yēḵ meh mihôiṅ öm kēngen ngih kulah nö lākūö chu, hökngen e pöri nö un sā lōn chu, sā ngam lōn meh pöri.”
40 Hē ò ngaich nö havantöre nö in yik mahaköp ngaich meūkö cha anga-aṅ nöng haṙòh, ngö ṙô ngaich anga-aṅ tö Pītör: “Ötkô öi höng hĕng köṅnyṙô rô-òten aṅhaṅti öi hol chu?
41 Aṅhaṅti yin lökten, vë-ekūötēv inrē hòṅ yīö min öt kētu im kinlaha. Höng hōḵ an ngam ellōn* ötkô pöri ngam alaha.”
42 Im innët van ò hēk nö kiröönngöre ngaich ngö ṙô anga-aṅ nö vë-ekūötēv: “Kayööngö, yēḵ ngih kulah nö tötkô nö öt ôkö tö chu, hökngen e yēḵ nö un kē-ěyö nö ṙā-ang ikūö chu, hökngen ngam lōn meh pöri yēḵ nö ngatī.”
43 Havantöre hēk anga-aṅ nö in yik mahaköp ngaich kôtökūö tö cha nöng haṙòh, pò cha nö ötkô nö milaklö matre tö kūö ngam inṙòhòre.
44 Linūöi van ò ngih hēk nö ṙāngen cha nö umuh ngaich kiröönngöre nö vë-ekūötēv.
45 Yihtöre ngaich anga-aṅ nö in yik mahaköp ngaich ngö ṙô: “Ṙētak yīö öng kan ngih öi haṙòh, heūheure inrē! Yěh meuk! Yih an ngaich ngam ṙētak ngòh Kūön tarik, nö hachīlivah nö kē-ěyö nö eltī tököölö fālen.
46 Choholre yin, pöh töi kiröönngöre, Yěh meuk! Yih an nö ngaich ngam mahachīlngövah chu öich kē-ě.”
47 Ṙònghöich ṙô anga-aṅ tö e, chalô ngaich ang Yūta, ök tö hěngtak aṅ in yik tö Nëtsīön tak, holuröön anga-aṅ tö yik tömaṙôngö tarik tö sanëtu, tinkūngu inrē yik tö tīntu tö yik mākūö kūönṙô tö yik mākūö yik tarik inrē.
48 Ngö ṙô ngaich ök mahachīlngövah ò nö kē-ě, nö kētö minkahngö nö in cha: “Öp töng hāmökūö min tö chu, anga-aṅ min tö kē-ě tö yīö.”
49 Höng löötöre ngaich ang Yūta nö in Yēsū ngaich ngö ṙô: “Salām, Rappī!” ngaich hāmkūö ò.
50 Ngö ṙô pöri ang Yēsū tö ò: “Asuh öp lōn meh öm chuh hih?” Yihtöre ngaich cha-a nö kē-ě Yēsū ngaich nyëkan.
51 Hěngtak ngaich ök aṅ in yik hol Yēsū tamūöknyö sanët re ngaich fangngö nang ök mahalanṙen mākūö kūönṙô ngaich tökngö tī tö nang ò.
52 Ngö ṙô pöri ang Yēsū tö ò: “Hayulhöt ngam sanët re man pò vē mahachònglö sanët re min, nö öthō nö öt kô-òngvah tö kūö sanët.
53 Ötkô ang ṙöng ngam Yöng chu tö lōn meh, nö tīntö yip tö pōyen tö tö 12 pöltön ma-aṅhānga nö lamaklen chu?
54 Sitih inlahen taneungtökūö ön min minë ṙô ngam töhet līpöre, tö u nö töhòṅ ngatī?”
55 Ngö ṙô ngaich Yēsū nö in yik tömaṙôngö: “Tötūmu öich kan chū-ö lökten yī-ö öi sanëtu hēk tinkūngu öi kē-ě chu? Kaheuk sakāmö Chin öich haköphöti öich el ngam töhet chūök hö-ö pöri yī-ö öi kē-ě chu.
56 Ṙën pöri anū-ö nö ngatī, hòn kinheūtngen nuk tökūichi ṙô yik pròfĕt.” Höng ṙāngen ò ngaich nö ṙòkhöre yik mahaköp nö falngöre.
57 Kēten Yēsū ngaich yik kamë-an nö i patī Kaifas ök mākūö kūönṙô i chūök yik kamūich tö yik mā inrē nö mūlhakṙen.
58 Höng marôvat pöri ang Pītör nö fachūken Yēsū ngaich sölta anga-aṅ nö lā kūö patī ök mākūö kūönṙô, kuhēthötre ngaich anga-aṅ, ngaich ūichngöre nö holtöṙah yik mahalanṙen nöng ngëichkö inlahen tī cha tö ò.
59 Ngaich yik mākūö kūönṙô tö yik kamhôka inrē nö chöh samūöichlö fālen Yēsū pò cha nö hòṅ fëlngen ò.
60 Pōyen yik samūöchlö fālen ò nö yih, öt hēngö kanôtökūö pöri cha-a tö fālen ò nëttak ngaich nak yamih samūöichkö fālen ò
61 ngaich ngö ṙô: “Hang ṙô ngòh tarik an hē-e nö ngö ṙô, ‘kò-òren Chin tiṙōlngö ngih töhet chūök ngam Tēv, ngaich mānlö e min öich höng lūöi sumkam tī.’”
62 Hē ök mākūö kūönṙô ngaich nö hāngö e söklöre ngaich anga-aṅ, ngaich ngö ṙô nö in Yēsū: “Sitih öm höng öt ṙò-òvö? Asuh ön në ṙô vē vamënyö fālen meh?”
63 Höng öt ṙò-òv pöri ang Yēsū, ngö ṙô hēk ök mākūö kūönṙô nö in ò: “Kilēḵngôre Chin öich i minë-eny ngam tö aṅ Tēv öich vë-ekūö meh, vë-eny nang ih man yēḵ meh öm Kūön ngam Tēv öm Kristū!”
64 Ngaich ngö ṙô Yēsū tö ò: “Ngaich man yih më-eṅ öm höng ngatī ṙô. Töngamuhuten yin min öi meuk ngòh Kūön tarik nö ūichhaka nö lāhāmö ngam tökalēḵ kël ngam Tēv ngaich meūkan min yī-ö nö yih nö löktö el minë taṙul ngam halīöngö.”
65 Söklöre ngaich ök mākūö kūönṙô ngaich tikaichngö ök inyutre ngaich ngö ṙô: “Kô-en ön ngòh tarik nö ötlēken ngam Tēv iṙôktöre lōn öi hēk tö vamë-eny inlahen ò? Yěh meuk! Ngaich yin öi kôta ahang tö ṙô ò nö ötlēken ngam Tēv.
66 Sitih lōn öi yī-ö?” Ngaich ngö ṙô cha-a: “Hòṅ kētu sācha ön ngòh tarik nö kumpaha.”
67 Unôichrit e hēk cha-a nö kösngö elmat Yēsū, kisōl kūö ò inrē, ōt yik töng ma-anòng tö ṙôre nö fatākkūö ò
68 nö ngö ṙô: ”Ō më-eṅ Kristū. Vë-eny nang ih man achīö öp famtākkūö meh tö ih?”
69 Ūichhaka ang Pītör nö lākūö patī nö el kahôiyö ngaich hěngtak ök mahalanṙen kikānö yamihtöre nö in ò nö ngö ṙô: “Më-eṅ man inrē hol Yēsū ngam aṅ Kelelī!”
70 Mahangre pöri anga-aṅ nö öt akahakūö tö ò nö ikūö yik tömaṙôngö ngaich ngö ṙô: “Öt akahakūö Chin chū-ö tö ṙô meh.”
71 Hē ò hēk nö kuyī-inyre nö ikūö talöökö ngam patī hěngtak hēk ök kikānö mahalanṙen mameūkan ngaich ngö ṙô: “Ngòh ön inrē tarik hol Yēsū aṅ Nāsaret.”
72 Mahangre hēk anga-aṅ nö chūöku ṙô nö ngö ṙô: “Hö-ö Chin chū-ö akahakūö tö ngòh tarik.”
73 Rĕh rô-angen hēk yik samökhaka nö lā taseū Pītör nö yihtöre nö in ò nö ngö ṙô: “Akahakūö Chin tö meh öich höng im ëlô meh.”*
74 Lökten anga-aṅ nö rūttökuire ngaich kilēḵngôre nö ngö ṙô: “Höng töt akahakūö Chin chū-ö tö ò anga-aṅ tarik!” Ilööṙen ngaich nuk hayöm nö takeūk.
75 Fēḵĕlre ngaich ang Pītör tö ṙô Yēsū nö ngö ṙô: “Urēhĕkūö ṙô hayöm nö takeūk lūöi heuh min me-eṅ öm mahngen chu.” Kunyī-inyre ngaich anga-aṅ ngaich peuiny miṙivlōnre.
Footnotes
^ Hēk, “nö halökö.”
^ Hēk, “nö ūichtöre nö ik mīs.”
^ Hēk, “nö ūichtöre nö ik mīs.”
^ Ṙô Krīk, “fukngö yin min.”
^ Hēk, “kuyulōn.”
^ Hēk, “töm inlahen ṙô meh öm ṙò-òvö.”
