Tölöök Inhānga Kahūich Mëtiv 28:1-20
28 Unôichrit ngam Haneūheu Töhet Sakāmö, hē minlīlö peuheū im ranehtökūö minë tö sat sumkam, yihtöre Mëri Mektelīn tök tahëng inrē Mariā nö ngëichkö ök anūlö.
2 Ngaich yěh meuk! yih ök yöng kumyeūnö, pön hěngtak ök ma-ahānga Yāvē* yamônti nö ṙā-ang el halīöngö ngaich kēngö ök ihong anga-aṅ nö ikūö ök anūlö ngaich ūichngöre nö in e.
3 Sā mineūkö hanyālö anga-aṅ, isoh takô nuk chehen ò nö sā insōho tacham.
4 Kichëyöre takô yik amahati tökūö pinhë-eṅkūöre, ngaich nöng sā inlahen yip kupah.
5 Hē yik kikānö pöri nö chuh in ök anūlö, ngaich ngö ṙô ök ma-ahānga nö in cha: “Uh yin pa-ekūö, chöhö Yēsū yin kòl yiröh ök tö kilöllöng nö irōi ök chōn nö fëliyö.
6 Hö-ö ök kòl nö ihih, pön ngaich nö hachohlöng, sā ṙô ò vahë nö vë-eny nang yīö, kò-òren yin öi ngëichkö ngih chūöktit ò nö ṙāḵtu.
7 Lökten yin veūten kiröönngöre öi vë-eny nang yip haköptö ò, tö ò ngaich nö hachohlöng nö ṙā-ang in yip tökapah. Ngaich urēhěkūö yīö min anga-aṅ nö chuh Kelelī ngaich in e yī-ö min öi meukkūö ò. Höng angū-ö ön ngih ṙô vahënyö chu öich chuh in yīö.”
8 Hē cha ngaich nö hāngö e, ilööṙen ngaich cha-a nö kiröönngöre nö ṙā-ang in ök anūlö nöng holtö vanööṙö re, hěnghöre ötkūöngu inrē ngam ṙanamölōn cha. Höng fal ngaich cha-a nö chuh in yik mahaköp nö vë-eny nang cha.
9 Ngaich ilööṙen ang Yēsū nö asatkūö cha nö el talöökö, ngaich ngö ṙô nö in cha: “Salām!” Yihtöre ngaich cha-a nö in ò ngaich sulngöre nö kēḵ kalröön ò nö salāman.
10 Ngaich ngö ṙô Yēsū tö cha: “Uh yin pa-ekūö! Kuṙòh, kiröönngöre vë-eny nang yip haköptö chu, hòṅ cha nö chuh Kelelī, in e yip min nö meukkūö chu.”
11 Hē yik kikānö nö ṙömöng el talöökö, rēvre ngaich in yik amahtö kui kupah, kumnyī nö chuh el panam nö vë-eny nang yik mākūö kūönṙô tö nuk maheukre ahangre inrē.
12 Lökten ngaich yik mākūö kūönṙô tö yik mākūö yik tarik nö hamūlöre nö vë-ekūöre, unôichrit e ngaich cha-a nö pōyen kahëti tö chāntī nö in yik kumyung hòṅ cha nö öt vënyö nuk maheukre ahangre inrē nö in yik tahëng
13 ngaich ngö ṙô nö in cha: “Ngö ṙô öi pöich, ‘Ik sā ih öi haṙòh ngaich yih yik mahaköp nö ulāingö ök alaha ò tö hatööm.’
14 Ngaich yěn hāngö u min öp mahayöng, ngaich īhö min vamë-eny nang ò,* uh yī-ö öi pinṙūtu lōn.”
15 Kēḵ nuk coin chāntī ngaich yik amahati, ngaich nöng sā vinë-engkūö cha, ngatī inlahen cha-a, keuheūtngöre chūök ngaich ngam ṙô nö hāngö nö in yip Yahūti nö söl ing töngamuh.
16 Chuh Kelelī ngaich yik tö 11 tak mahaköp nö chuh kui ök rôngö ök chūök Yēsū nö hòṅ meukkūö cha.
17 Hē cha ngaich nö meukkūö ò, ngaich sōntökūöre cha-a nö salāman, rīkre pöri yik in cha tö katööngalōn.
18 Yihtöre pöri ang Yēsū nö in cha, ngaich ngö ṙô: “Ṙòkhöre nun në chööngö nö kētu nö in chu el halīöngö, ing panam inrē.
19 Lökten yin kuṙòh, vīten vē taṙòkhöre tarik nö mahaköp nö in chu, vōkö cha i minë-eny ngam Yöng, Kūön hēk ngam töhet kumlēḵ inrē,
20 haköpten cha nö haköp nup taṙòkhöre tīnöölô yīö tö Chu. Yěh meuk! Örheūheu Chin holtöṙah yīö söl ip manāngen ngih panam.”*
