Tölöök Inhānga Kahūich Mëtiv 3:1-17
3 Hē u anū-ö sakāmö ang Yôhan ök vamôk nö yih nö el tönyalnyi nö i Yūta ngaich ahānga,
2 nö ngö ṙô: “Havöötö ellōnre yin tön röhta an nö ngaich ngam Pūlngö ngam halīöngö.”
3 Anga-aṅ ön ngòh Yôhan, tö vënyu inlahen tök pròfět Isayā nö ngö ṙô: “Hangihtöre, hāngö öp pööinyṙô öp töhěngtak hamu-a nö el tönyalnyi, ‘Halēnkö talöökö Yāvē* yin, hachip nup talöökö ò.’”
4 Inyūtu misī ang Yôhan tö sanôi ūṅt, inmööpuṙat inrē anga-aṅ tö uk töṙeūla. Höng kāḵ nuk tö kun kun anga-aṅ mufākö ngaich òk tö pachāka hönī aṅ el inchōn.
5 Ngaich yik tarik aṅ Yērūsalem, ṙòkhöre yik aṅ Yūta, tö minë panam inrē nö ṙòkhöre, minë tö röhta nö i taseū ngam tahël Yôtön, nö yihtöre nö in ò,
6 vënyö nuk tökööl re cha-a, ngaich vōkö* cha anga-aṅ nö el ök Tahël Yôtön.
7 Hē Yôhan nö meuk yik Satukī hēk tö yik Feresī nö yihtöre nö in ngam chūök ò nö kētö ngam vinôkö ngaich ngö ṙô anga-aṅ tö cha: “Yī-ö kūön pēch, achīö öp ngaich tamölṙô yīö öi falngöre tö ngam yamih lanīnö?
8 Lökten yin öi löktö in nup la-enre öi hameuktöre havöötö ellōnre.
9 Uh inrē öi ngölōn, ‘Muvöhngu in īhö tö Aprahām.’ Tön ngö ṙô Chin tö yīö tö ngam Tēv nö mihôiṅ nö vīten në ihong nö kūön Aprahām.
10 Ngaich an ngam hanīöng nö i rööntö minë chōn. Nup chōn töt ṙôngu min tö tölöök, kūöltu min anū-ö ngaich kavalhötvö nö ikūö tameūiyö.
11 Kôngen Chin chū-ö höng vōkö yīö aṅhtī tö mak, pò yīö havöötö ellōnre, öp mu-unôichrit chu pöri min, tömötlö kanò-òṅ anga-aṅ tö chu, ötrēhěn Chin kô luhnyö nup rehen kūö kunrööpö ò. Anga-aṅ min vamôkö yīö nö aṅhtī tö ngam töhet kumlēḵ, tameūiyö inrē.
12 Eltī ò an nö ngaich ngam chōn kinchang ṙòng sāiny, ha-etlö el öp chūök sāiny* re min anga-aṅ ngaich hamūl nup sāiny nö el nup chūök re, fönghöt nup nëlö pöri min anga-aṅ nö ikūö tameūiyö öp töthō min nö nyangngö.”
13 Ngaich Yēsū nö löktö Kelelī nö chuh el ök tahël Yôtön, kūö ò nö hòṅ vōkö tö Yôhan.
14 Ngö ṙô pöri ang Yôhan nö sōngen ò, “Chū-ö chin öre tö hòṅ vōkö tö meh, ngaich kūö yòh më-eṅ öm yihtöre in chu?”
15 Ngö ṙô pöri ang Yēsū nö sapṙô ò: “Hökngen e yēḵ nö ngatī töngamuh, tön tölöök* an nö imat ngam Tēv.” Lökten ngaich ang Yôhan nö öt sōngen ò.
16 Hē kinheūten ò nö vōkö, ilööṙen ngaich ang Yēsū nö yôklö nö ṙā-ang el ngam mak. Löpnyöre kūö ngaich ngam halīöngö ngaich meūkö ngam töhet kumlēḵ ngam Tēv nö sā inlahen nyö-öṅ nö teungtöre nö i kui ò.
17 Löktö el halīöngö inrē nö hāngö ök ṙô tö ngö: “Hanangenlōn chu ön ngòh nö Kūön chu, in ò Chin ṙamölōn* takô.”
Footnotes
^ Ngëichköm Tahëng Ātiköl A5.
^ Hēk, “chupeuktu.”
^ Hēk, “Vīt.”
^ Hēk, “tölöng.”
^ Hēk, “Hō-en.”
