Tölöök Inhānga Kahūich Mëtiv 4:1-25
4 Hachō-oi ngaich ang Yēsū tö ngam töhet kumlēḵ ngam Tēv nö chuh el tönyalnyi im chūök ò nö kalaha tö ngam Satān.*
2 Ahik hē e ang Yēsū nö 40 sumkam 40 mitööm inrē, lökten nö kalēḵ ngam neūkö ò.
3 Yihtöre ngaich ngam Kamlahan ngaich ngö ṙô tö ò: “Yēḵ meh öm kūön ngam Tēv, tölṙô në ihong man yēḵ nö vīngöre nö ròtī.”
4 Ngö ṙô pöri ang Yēsū nö sapṙô ò: “Ngö kinūichngö an: ‘Rö-ö ön ngòh tarik nöng lökten ròtī nö aṅ, löktö i nup ṙô Yāvē* pöri, nup töng sitih ṙô lamöknyö elvāng ò nö aṅ min.’”
5 Unôichngöre hēk ngam Satān nö kēngen ò nö chuh in ngam töhet elpanam Yērūsalem, ngaich asöklen ò nö in öp tö marò-òl chūök takô alaha ngam töhet chūök
6 ngaich ngö ṙô anga-aṅ tö Yēsū: “Yēḵ meh öm kūön ngam Tēv, tisūtöre man yēḵ öm löktö hih, tön ngö kinūichngö an: ‘Tölṙô yip ma-ahānga re an min nö lamaklen meh hòṅ meh öt amahaiṙen öm sōngtöre kūö kunröön öm i ihong.’”
7 Ngaich ngö ṙô Yēsū nö in ò: “Ngö kinūichngö an inrē: ‘Uh man kalah ngam Tēv re Yāvē.’”*
8 Kēngen ò hēk ngam Satān nö chuh kui ök tö marò-òl kui rôngö ngaich hameukhömat ò tö në pūlngö ngih panam tö minë kanôlò, minā-aṅ u inrē.
9 Ngaich ngö ṙô hēk anga-aṅ tö Yēsū: “Keuheūttöre tī Chin min öich kē-ěkūö meh tö në yēḵ meh höng hěng heuh afukngöre öm salāmö chu.”
10 Ngö ṙô ngaich Yēsū nö in ò: “Satān, kē-ěngre man tö chu! Tön ngö kinūichngö an: ‘Höng ha-öiny ngam Tēv re man Yāvē,* anga-aṅ inrē lahöklōn meh tö nup tölöök la-en.’”
11 Ṙāngen ò ngaich ngam Satān, ngaich yěh meuk! yihtöre ngaich yik ma-ahānga nö meukṙen ò.
12 Hē Yēsū nö hāngö Yôhan nö kē-ě, lökngömuh ngaich anga-aṅ nö chuh Kelelī.
13 Unôichrit e ngaich anga-aṅ nö ṙā-ang Nāsaröt ngaich chuh Kafarnahum ngaich iyöng nö in e, ngam i taseū mai töröhta nö ikūö panam Sepulön, Naftalī inrē.
14 Ngatī inlahen ngam ṙô nö teungtökūö, ngam lamöknyö elvāng ök pròfět Isayā,
15 “Yī-ö tahëng mihëṅṙö tarik aṅ Kelelī, aṅkūö minë panam Sepulön, Naftalī inrē öi tö röhnyi lākūö mai hēk lāmuh tö Yôtön,
16 Yip tarik, amūichhak sin nö el sinngūlö, meuk ngam yöng yanāngö yip min, yip amūichhak inrē nö el nyat kinpaha, meuk ngam yanāngö min nö yih.”
17 Hēten tö e ang Yēsū nö rultenre nö ahānga nö ngö ṙô: “Havöötö ellōnre yin, tön röhta an nö ngaich ngam Pūlngö ngam halīöngö.”
18 Hē Yēsū nö ṙònghöichröön nö kiröön nö lök kūö Mai i Kelelī, meūkö Sīmōn ngaich anga-aṅ ök tö Pītör invëka tök kahëm ò inrē ang Antarū, hē ò nö meūkö cha nö kavalngö nuk inhāṅl re nö el mai, kūö cha nö kamëḵ kāḵ.
19 Ngö ṙô ngaich anga-aṅ nö in cha: “Ta-a tömrit Chu nan, töch vīten nā an kamëḵ tarik nö kāḵ.”
20 Ilööṙen ngaich cha-a nö ṙāngö nuk inhāṅl re ngaich tömrit ò.
21 Hē Yēsū nöng iṙūöhöröön nö kiröön ngaich meūkö Yāköp anga-aṅ tök kahëm ò inrē ang Yôhan. Nëtre tak cha-a nö kūön Sepetī. El kupòk cha-a hē e nö hol tö ök yöngre nö ngat tit nuk inhāṅl re. Tölṙô cha inrē ang Yēsū nö tömrit ò.
22 Ilööṙen ngaich cha-a nö ṙāngö nuk kupòk re ngaich kiröönngöre nö tömrit ò.
23 Keuheūt chahuhure ngaich anga-aṅ nö i Kelelī, el chūök cha nö vë-ekūötēv, nö haköphöti, ahangkö ngam tölöök inhangkö ngam Pūlngö inrē. Halanken nuk tö ṙōlkangen anga-aṅ invah yik tarik ngaich kēngen nuk öt kumlē-en el alaha cha.
24 Sölngö ngaich ngam hināngö ò nö keuheūtngöre chūök nö i kūö ngam panam Siriā. Lökten ngaich yik tarik nö kētö yik tövāhavö, yik tö haṙivlōn inrē tö kūö kanihngenre. Ōt inrē yik tarik in cha, yik tö aṅhav el alaha tö tötlöök ma-ahānga, mahangë-ere hēk tölum inrē ngaich halanken cha anga-aṅ nö ṙòkhöre.
25 Pōyen takô ngaich yik tarik tamömrit ò ṙama-ang Kelelī, Tekapòlis,* Yērūsalem hēk aṅ Yūta ngam lāmuh tö Yôtön.
Footnotes
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Hēk, “Kamtö chūök minë tösöm el panam.”
