Tölöök Inhānga Kahūich Mëtiv 6:1-34
6 Haṙēmngenre yin, ui kēken nup tölöök la-enre öi ikūö yip tarik; kūö yīö öi hòṅ meūkö tö cha tön öt teūngen yin min tö raneushöre tö aṅ in ngam Yöngre aṅ el halīöngö.
2 Lökten yěm kētö tökētu,* um föökö fanöö nö urēhěkūö meh, hòṅ meh öt sā yip mahanyatkö elmat, nö el chūök vinë-ekūötēv, el talöökö inrē kūö cha nö hòṅ eū-eu tö tarik. Tökò-òṙô pöri Chū-ö tö yīö, ngaich yip cha-a nö teūngen tö raneushöre.
3 Lökten yěm kētö tökētu hökngen ngam lātavē kël meh nö un akahalōn tö la-en ngam lāhāmö kël meh,
4 hòṅ nup tö kētu tī meh nö un meūkö tö tarik, meūkö pöri tö ngam Yöng meh aṅ el halīöngö.*
5 Yēḵ meh pöri öm vë-ekūötēv, um asīnken yip mahanyatkö elmat, yip tö hòṅ meūkö tö tarik nö vë-ekūötēv nö el chūök vinë-ekūötēv hēk pakkūö talöökö inrē, pön ööire cha-a nö meūkö tö tarik. Tökò-òṙô Chin tö meh, ngaich yip cha-a nö teūngen tö ṙòng nup taṙòkhöre la-enre.
6 Yēḵ meh pöri më-eṅ, öm vë-ekūötēv, mihôiṅ öm kuhēthötre öm höng hěngtak el öp urôhòre, ngaich löpngökūö inkūpre öm vë-ekūö ngam Yöngre, ngam töt meūkö* tö tarik öthō min anga-aṅ nö öt reushen meh.
7 Uh man havan havannyö ṙôre töp töng hěng ṙô yěm vë-ekūötēv öm sā yip tarik ing panam, yip mahavīöl-mahavīöl tit nup ṙôre yěn vë-ekūötēv kūö cha nö hāngö ṙô töm Tēv tö lōnre yěn ngatī inlahen.
8 Lökten man um asīnken cha tön akahakūö an ngam Yöng meh, tö nup kuilōn meh urēhěkūö ṙô meh öm havëken u.
9 Ngö ṙô pöri më-eṅ yěm vë-ekūötēv:
‘Kayöngö, Yöng ih aṅ el halīöngö, hetlö an yēḵ ngam minënyö meh.*
10 Yih an yēḵ ngam Pūlngö meh. Sā nup lōn meh ngaich nö teung nö el halīöngö, ngatī nup yēḵ nö teung kuilōn meh nö ing panam.
11 Kētö nup tö-örheūheu nya-aṅkūö ih, i ngih sakāmö;
12 aṙē-ĕl tökööl ih* sā ih öi aṙēlö tökööl yip tököölö fālen* nö in ih.
13 Yěn yih nup kinlaha nö ikui ih, ui halöngtuṙen öi fukngö, laklen* ih pöri tö ngam Satān.’*
14 Yēḵ meh öm aṙēlö tökööl yip tahëng min, ngaich aṙēlöng min nup tökööl meh tö ngam Yöng meh aṅ el halīöngö.
15 Yēḵ meh pöri min, öm öt aṙēlö tökööl yip tahëng, ngaich öt aṙēlöng min nup tökööl meh tö ngam Yöng meh aṅ el halīöngö.
16 Yēḵ meh öm ahik, ngaich um asīnkö yip mahanyatkö elmat, yip tö hòṅ meūkö nö ūnökūö, hòṅ yip tahëng nö meuk arëkūö cha ngaich akahalōn tö cha nö ahik. Tökò-òṙô Chin tö yīö ngaich yip cha-a nö teūngen tö raneushöre.
17 Yēḵ meh pöri öm ahik, hacham elkuire më-eṅ tö tavī-i ngaich söichlö kūöre inrē,
18 rö-ö nö kūö meh öm hòṅ meūkö tö tarik, ngam Yöng meh pöri ngam tötmaneūken, tö akahalōn tö meh öm kēken ngam inhīkö. Ngaich reushen meh min ngam Yöng meh ngam mameuk nup taṙòkhöre* la-en kahëken meh.
19 Uh yin öi hamūl kanòlô re ikūö ngih panam, ngih chūök yech, maneui inrē nö kat, ngih chūök mu-ulāiya nö filalhanga, nö ulāya.
20 Hamūl kanôlòre pöri öi el halīöngö, in ngam töt chūök yech, öt rēhěn nö chūök maneui nö kat, öt rēhěn inrē nö chūök mu-ulāya nö filalhanga, nö ulāiya.
21 Pön öp chūök nup kanòlô yīö min in e min öp ellōn yīö.
22 Ngam mat an ëāṅvö ngam alaha. Lökten yēḵ ngam mat meh nöng hēngö ngahëichka ngaich keuheūtlöre hanātö min ngam alaha meh.
23 Yēḵ ngam mat meh pöri, nö ṙōlö ngahëichka* ngaich keuheūtlöre min ngam alaha meh nöng el sinngūlö. Yēḵ ngam mat pöri ngam löktö hanātö ngam alaha nöng sangūla, iṙôkö ṙū-u öp sinngūlö ngam alaha meh min!
24 Ötkô ön ngòh mahalanṙen nö nëttak lahök lōn tö yöngṙenre, pön mihôiṅ min nö surīkhö ngam tö hěngtak, ngaich hangenlōn tö ngam tahëng hēk haköpngöre nö im tö hěngtak, ngaich öt chumkūöṙen tö ngam tahëng. Ngatī yin yī-ö inrē ötkô öi hěnghöre lök lōn ngam Tēv, hěnghöre lök lōn nup kanòlô inrē.
25 Lökten Chin öich ngö ṙô tö yīö; uh yin piṙūtkö nômöre tö öp nya-aṅkūö yīö min hēk tö öp òk yīö min inrē. Ui piṙūtkö ngam alahare, tö öp kinṙum e min. Röh öng ngam nômö nö mööḵlö tö nyā-aṅkūö? Röh öng ngam alaha nö mööḵlö tö hilā?
26 Ngëichken minë chehechōn yin lātulöng tö u nö öt teūich, ötrēhĕn nö hamūl nö el urôhòre, hanëlen u pöri ngam Yöng yīö ngam aṅ el halīöngö. Röh öi yī-ö mööḵlö tö u?
27 Achīö öp öre pumṙūta nö in yīö, öp tökô nö ṙūöhtö rô-òtö nômöre?
28 Kūö yòh öi piṙūtkö löktö yanīhi nup hilāre? Ngëichkö minë kun pūl* yin tö sīöplö nö elkahôyö; ngaich haköp öi in u; sitih inlahen sanīöpö ön. Hö-ö nun rēhěn nö harëtnyö elmatre, öt rēhěn nö kupāt.
29 Ngö ṙô pöri Chū-ö tö yīö, tö Sòlòmön nö pòrô nö pōyen nuk kanòlô ò, öt rēhěn pöri anga-aṅ nö ngatī inlahen tī nö kafānöre nö sā ṙôken nuk kanòlôre.
30 Yēḵ ngam Tēv nö mihôiṅ nö havai chehen minë kun pūl el ngam kahôyö, minë tövai töngamuh ngaich fönghötvö huṙöich nö ikūö tameūiyö, yī-ö tökūöṅnen ṙinatö-ellōn ötkô ang ngam Tēv min nö chumhënö yīö.
31 Lökten yin ui piṙūta öi ngö ṙô, ‘Asuh öp min nyā-aṅkūö hī?’ hēk ‘Asuh öp min òk hī?’ hēk ‘Asuh öp min chehen hī?’
32 Höng chahöh vē tarik nun anū-ö, vē aṅkūö ngih panam. Akahalōn an ngam Yöng yīö aṅ el halīöngö, tö u nö tötṙanāngen nö in yīö.
33 Lökten yin örheūheu, öi urěhlö* ngam Pūlngö ngam Tēv hēk tö nup tölöng* inrē nö imat ò, ngaich kē-ěkūö yīö min anga-aṅ tö minë tahëng minë tötṙanāngen nö in yīö.
34 Lökten yin ui piṙūtkö öp huṙöich, tön pumṙūtkenre öp angū-ö. Kô-òng kūö nun në sakāmö tö në kanihngenre töngamuh.
Footnotes
^ Hēk, “Ngam mameuk nup töhayunngöre.”
^ Hēk, “Ngam mameuk nup töhayunngöre.”
^ Hēk, “hòṅ het nö imat hī; akahakūö tö hanëtö e.”
^ Ṙô Krīk, “hötṙeh ih.”
^ Ṙô Krīk, “tö hötṙehevö.”
^ Hēk, “ṙānyen.”
^ Ṙô Krīk, “ngam tötlöök.”
^ Hēk, “Ngam mameuk nup töhayunngöre.”
^ Ṙô Krīk, “nö ötlöng; ötlöök.”
^ Hēk, “lilī.”
^ Hēk, “chöh.”
