Tölöök Inhānga Kahūich Mëtiv 7:1-29
7 Ṙāngenre yin ui vīlö fālen holre, hòṅ yīö min öt vīlöng fālen;
2 pön sā ṙô yīö min öi kahòkkö holre, ngatī inlahen kinṙòkken min yī-ö. Ngaich nup inlahen tī yīö öi kalah holre, anū-ö min kinlaha yīö.
3 Kūö yòh öm më-eṅ ngëichkö pinṙōnghöt mat ngam holre ngaich rö-ö öm meuk ngam chōn elmat re?
4 Hēk sitih kanô-òṅ öm ngö ṙô tö ngam holre, ‘Hökngen chu man öich kēnyö ngam pinṙōnghöt mat meh,’ öm höng aṅhav mat tö ngam tökiröng chōn?
5 Ō më-eṅ mahanyatkö elmat! Urěh man sin öm kēnyö ngam tökiröng chōn elmat re hòṅ meh löökö mat öm kēnyö ngam pinṙōnghöt mat ngam holre.
6 Uh man öm kētö nup töhet nö i am, un rēhěn nö kavaltu nup töpōiṙāi tasëhe nö i kūö ha-un hòṅ u nö öt rööntö kui u, ngaich havöölö kūöre nö kāpö meh.
7 Iṙūöhö ṙô yin havëḵ-a, ngaich öthō min öi öt teūngen, iṙūöhen inrē öi chöh, ngaich öthō min öi öt kôtökūö, iṙūöhötī yin kuröngkö kūö inkūp, ngaich öthō min ngam inkūp nö öt löpnyukūö.
8 Pò ngòh töng mahavë-a, teūngen anga-aṅ, ngòh chamöh inrē, kôtökūö min anga-aṅ, anga-aṅ inrē ngòh töng kumrönga, löpnyukūö min anga-aṅ.
9 Achīö öp öre in yīö öp tö havëka kūö töp kūönre tö ròtī ngaich kē-ěkūö ò anga-aṅ tö ihong?
10 Hēk yěn havëkö kūö ò anga-aṅ tö kāḵ ngaich kē-ěkūö ò hòng anga-aṅ tö pēch?
11 Lökten, yēḵ yīö yī-ö öi töthet ngaich akahakūö tö nup tölöök chehen kahëtöre öi in yip kūönre, iṙôkhöl tī ang min ngam Yöng yīö aṅ el halīöngö nö kētö nup tölöök chehen nö in yip mahavë-a nö in ò!
12 Lökten, sā lōn yīö tö inlahen tī yip tahëng nö in yīö ngaich hòṅ ngatī inlahen tī yī-ö öi in cha. Pön ngatī ṙô inrē ngam Chööngö tö nuk ṙô yik Pròfět inrē.
13 Kuhēthötre yin lökhöt el ngam tö cheūktikūö inkūp, pön pōitikūö ngam inkūp, pōiti ël inrē ngam talöökö ngam chamuh im öt kanòlô ngaich maṙôngö yip kumhëthötre nö lökhöt in e.
14 Pön cheūkti kūö ngam inkūp hēk kūönti ël ngam talöökö ngam chamuh im nômö, ngaich kūönen yip tö kôtökūö tö e.
15 Haṙēmngenre yin tö yip tötkô-en pròfět yip yamihtöre nö in yīö nö inyuttö uk sīṅp, ellōn cha pöri nup tö tainy am aṅ el inchōn.
16 Löktö in nup ṙòng la-en cha yin min öi akahakūö tö cha. Mihôiṅ aich ṙöng vē tarik nö hamūl angkūr nö i ṙòng nup tö chökhukaha kiyôp hēk kò-òren hòng nö hamūl anychīr nö i ṙòng nup töng mameunylö chōn?
17 Ngatī inrē në töng tövai chōn nö ṙôngu tö tölöök, ötkô pöri në tötkòlô chōn nö ṙôngu tö tölöök.
18 Ötkô ön ngòh tökòlô chōn nö ṙôngu tö tötkòlô, ötrěhěn ngòh tötkòlô chōn nö ṙôngu tö tökòlô.
19 Ngòh chōn töt ṙôngu tö tökòlô, kūöltu min ngaich kavalhötvö nö ikūö tameūiyö.
20 Lökten yin min öi höng lökten in nup ṙòng nup la-en yip tarik öi akahakūö tö cha.
21 Ngòh töng ngö ṙô tö chu, ‘Mā, Mā,’ öt hěngtak min in cha tö teunghöt nö kuhēthötre nö im Pūlngö ngam halīöngö, höng yip mahateungngö nup kuilōn ngam Yöng chu pöri höng cha-a min kumhēthötre nö im Pūlngö ngam halīöngö.
22 Maṙôngö yip min tö ngö ṙô tö chu in nup sakāmö anū-ö: ‘Mā, hö-ö öi īhö misī ameū-a öi i minë-eny meh, öt i minë-eny meh ṙô hòng īhö inrē öi ahōngö yip tötlöök ma-ahānga hēk öt i minë-eny meh hòng öi kēken nup tö pōyen pinngangkūö la-en?’
23 Ngaich sapṙô cha min chū-ö öich ngö ṙô: ‘Höng töt akahakūö Chin chū-ö tö yīö! Kiröönngöre yin öi ṙāngen chu, yī-ö tö la-evṙen tö töchōich!’
24 Lökten, öp töng hamang në ṙô chu töngamuh kēkö kaha u inrē kaheuktu min anga-aṅ nö sā inlahen öp tö akaha tarik öp vamīlö patī re nö ikui ihong.
25 Chalô ngam tö kalēḵ kumṙah yih ngam ṙanööingö kalēḵ ngam kuföt nö fööngö ngam patī ngaich öt fukngö angū-ö, kūö e nö ikui ihong chūök rööntö machööḵlö.
26 Öp töng hamang në ṙô chu pöri töngamuh, hö-ö pöri nö kēkö kaha u, kaheuktu min anga-aṅ nö sā öp tökulō-ovö tarik vamīlö öp patī re nö i kuyāyö.
27 Chalô ngam tö kalēḵ kumṙah, yih ngam ṙanööingö, kalēḵ ngam kuföt nö fööngö ngam patī ngaich fukngö angū-ö ngaich payāyi.”
28 Hē kinheūtö ṙô Yēsū, pingangkūö ngaich yik tömaṙôngö nö hang ṙô ò nö haköphöti,
29 kūö ò nö öt sā ṙô yik kamūich, sā ṙô öp tö minā-avö pöri tarik yěn haköphöti.
