Tölöök Inhānga Kahūich Mëtiv 9:1-38
9 Yôklö ang Yēsū nö el kupòk ngaich havāngngöre nö chuh im tahëng lā-a nö chuh panamre.
2 Ngaich yěh meuk! hěngtak ök tövāhavö tarik tölum* tökeuntu tö yik tarik nö el ök chamamre. Hē Yēsū nö meuk ngam ṙinatö-ellōn cha, ngaich ngö ṙô anga-aṅ tök tövahavö tölum: “Kūön, uh man pa-ekūö! Tön aṙēlöng nup tökööl meh nö ngaich.”
3 Rēvre ngaich yik kamūich tö ngö ṙô nö ellōnre: “Ötlēḵkôre ön ngòh tarik tö ngam Tēv.”
4 Hē Yēsū nö akahakūö tö ṙô mufē ellōn cha ngaich ngö ṙô anga-aṅ: “Kūö yòh öi fēkö minë tötlöng ṙô öi ellōnre?
5 Öp yòh öp öre tö lööṙen nö ṙô, ‘Aṙēlöng nup tökööl meh nö ngaich,’ ngih ṙöng, ‘Choholre man ngaich kiröönngöre’?
6 Hòṅ yīö pöri akahalōn tö ngòh Kūön tarik nö kētu chööngö nö aṙē-ěl tökööl tarik nö ing panam . . . .”* ngö ṙô ngaich anga-aṅ tök tövāhavö tölum: “Choholre, kēḵ ngam chamamre, kuṙòh ngaich man chuh patī re.”
7 Choholre ngaich ngam tarik ngaich kiröönngöre nö chuh patī re.
8 Pa-ekūö ngaich yik tarik hē cha nö meūkö e ngaich kaknyöre nö ha-öiny ngam Tēv, ngam kamëtö tö ngatī minhôiyö nö i tarik.
9 Hē Yēsū ngaich nöng iṙūöhöröön nö kiröön nö lök in e, ngaich meuklöre mat anga-aṅ tök tö hěngtak tarik, Mëtiv ök minë-eny ò ök töng amūichhak nö el òfis inmūl ṙāi kinëhöt chehen, ngö ṙô ngaich ang Yēsū tö ò: “Ta-a haköp man öm in chu.” Choholre ngaich ang Mëtiv ngaich tömrit ò.
10 Unôichrit e, hē Yēsū nö ūichngöre nö nyā* nö el ök töhěng patī, ngaich yěh meuk! maṙôngö yik mahamūl ṙāi kinëhöt chehen, tököölö fālen inrē yamihtöre ngaich ūichngöre nö holkūö Yēsū tö yik haköptö ò inrē nö nyā.*
11 Hē yik Feresī pöri nö meūkö e, ngaich ngö ṙô cha-a tö yik haköptö ò: “Kūö yòh ang ngam mahaköpten yīö nö nyā nö holkūö mahamūl ṙāi kinëhöt chehen hēk tököölö fālen inrē?”
12 Hē Yēsū ngaich nö hāngö e, ngaich ngö ṙô anga-aṅ: “Hö-ö yin vē tölööken nö hòṅ le-ënö, höng vē tövāhavö pöri.
13 Lökten yin kuṙòh kiröönngöre ngaich haköp manah ngih ṙô inrē: ‘Hö-ö Chin öich lōntö tö kētu, höng ngamuh pöri lōn chu tö yīö öi kö aṙē-ěvlōn tö höö.’ Pò Chu öich rö-ö öich yih öich mahavëkö yip tölöök,* yip tököölö fālen pöri nö havöötö ellōnre.”
14 Yihtöre ngaich yik haköptö Yôhan nö in Yēsū ngaich hatöönan nö ngö ṙô: “Kūö yòh öi īhö kēken ngam inhīkö tö yip Feresī inrē, hö-ö pöri yip haköptö meh nö ahik?”
15 Ngaich sapṙô cha ang Yēsū nö ngö ṙô: “Yēḵ ngam töhapīhö nö ṙömöng in më holre, ngaich hòṅ haṙivlōn hòng më hol ò min? Hö-ö, yih pöri min öp ṙētak hē ngam töhapīhö nö kē-ěyö nö ṙā-ang in cha ngaich möl min cha-a nö ahik.
16 Öt hěngtak tarik chamôktö tufömngöre hilā nö im tö hötṙeh hilā pön ṙūöhnyöre ṙôktak tinkāchö min angū-ö yēḵ e nö chōktu.
17 Ötrēhěn tarik nö asëhöt tufömngöre vāin nö el nup chūök vāin uk töṙeūla töhötṙeh, pön takach min anū-ö ngaich yëngen min ngam vāin tö ngam chūök e inrē. Asëhöt nup tufömngöre pöri cha-a nö el nup tufömngöre chūök vāin uk töṙeūla, ngaich öt yëngen anū-ö.”
18 Hē Yēsū nö ṙònghöichṙô nö ṙôtö në ṙô re nö in cha, ngaich yěh meuk! hěngtak ök mā yamihtöre nö in ò ngaich sōntö kūöre nö in ò nö salāman, ngaich ngö ṙô: “Ngaich öp lohten kūön chu kikānö nö kapah, sön pöri më-eṅ öm chuh patī chu ngaich ṙātö eltīre öm in ò ngaich öthō min anga-aṅ nö öt aṅ nö hēk.”
19 Choholre ngaich ang Yēsū ngaich chūkörit ò, hol ò inrē yik haköptö ò.
20 Ngaich yěh meuk! hěngtak ök yöngnyīö tö 12 samyeūheu rò-òten nö kunyāhen yihtöre anga-aṅ nö lā-uk Yēsū ngaich lūölkö taseūrit ök inyut ò,
21 pön ngö ṙô anga-aṅ nöng ellōnre: “Yēḵ Chu min höng lūölkö taseūrit öp inyut ò ngaich lööken min Chū-ö.”
22 Havöölökūöre ngaich ang Yēsū ngaich ngö ṙô nö in ò: “Kakūönö, uh man pa-ekūö! Ngam ṙinatö-ellōn meh an tö lööken tī tö meh.” Ilööṙen ngaich anga-aṅ nö lööken ik töng hē ṙô ò.
23 Hē ò ngaich nö teung nö i patī ök mā ngaich meuk yik tarik anga-aṅ tö pōyen pameuiny, tö yik famöö fanöö inrē tökūö miṙivlōn cha töm tökapah,
24 ngö ṙô ngaich ang Yēsū tö yik tarik: “Umu-a yin kiröönngöre, tön rö-ö an ngam nyīö nö kapah pò ò nöng haṙòh.” Hē cha ngaich nö hangṙô ò ngaich hayīölngen ò cha-a nö miyëṙen.
25 Hē më tömaṙôngö ngaich nö kēnyu nö lā tunyī, kuhēthötre ngaich ang Yēsū nö lātuhēt ngaich kēḵ kël ngam nyīö anga-aṅ nö hachohlen ò, ūichlöre ngaich anga-aṅ.
26 Keuheūtngöre chūök hināngö ngaich ngam inlahen ò nö ikūö ngam panam.
27 Hē Yēsū ngaich nö ṙā-ang in e ngaich iṙūöhöröön nö kiröön, nët tak nak tötmeuk tarik nak tamömkörit ò nöng pōitô nö havëken ò nö ngö ṙô: “Më-eṅ Kūön Tāvit, aṙē-ělōn man yēḵ tö ai.”
28 Hē ò nö kuhēthötre nö el ök patī, yihtöre ngaich nak tötmeuk nö in ò ngaich hatöönö cha ang Yēsū nö ngö ṙô: “Ṙatö-ellōnre an tö Chu öich mihôiṅ ngatī la-en?” Ngaich sapṙô ò cha-a nö ngö ṙô: “Heūṅ, Mā.”
29 Lūöltö tīre ngaich anga-aṅ nö imat cha ngaich ngö ṙô: “Sā ngam ṙinatö-ellōn nā hökngen e yēḵ nö ngatī nö in nā.”
30 Löpnyöre kūö mat ngaich cha-a ngaich mihôiṅ nö meuk. Ngö ṙô pöri ang Yēsū nö sōḵngen cha: “Chumkūöṙen pan chö un hěngtak vahë-eny nang tö ngam inlahen re.”
31 Unôichrit inlahen cha pöri ngaich nö kunyi-inyre, ilööṙen ngaich cha-a nö keuheūtngöre chūök nö vë-eny ngam inlahen tī ò tö cha.
32 Hē cha ngaich nö kunyi-inyre ngaich iṙūöhöröön cha-a nö kiröön ngaich yěh meuk! hěngtak ök tarik tötkô nö ṙô-òvö tökētu tö yik tarik nö in ò ök tö aṅhav el alaha tö tötlöök ma-ahānga;
33 hē ngam tötlöök ma-ahānga pöri nö kēnyu nö ṙā-ang in ò ngaich mihôiṅ ök tarik nö ṙò-òvö, pingangkūö ngaich yik tömaṙôngö nö meūkö e ngaich ngö ṙô: “Öt hěngheuh in öi meuk tö ngatī la-en öi i Israel.”
34 Ngö ṙô pöri yik Feresī: “Höng löktö i kumlēḵ öp rācha yip tötlöök ma-ahānga an nö ahōngen më tötlöök ma-ahānga.”
35 Keuheūt chūökre ang Yēsū nö elpanam, el minë tuhēt, el chūök vinë-ekūötēv nö haköphöti, ahangkö ngam tölöök inhangkö ngam Pūlngö inrē, ngatī inlahen anga-aṅ nö halanken nuk invah hēk kēngö nup öt kumlē-en el alaha yik tarik inrē.
36 Hē Yēsū nö meuk yik tömaṙôngö, keuheūtnyöre ngaich anga-aṅ tö miṙēḵlōnre nö meūkö cha, pò cha nöng sā inlahen nup sīṅp nup töng parāta hēk sā nup töng ṙā-ayö nöng öt yōmsuṙen.
37 Ngö ṙô ngaich anga-aṅ tö yik mahaköp: “Pōyen takô nun në ṙòng taneūich hī, kūöṅnen takô pöri vē mu-uvòh tö la-evṙen.
38 Lökten yin öi hayāichtôre vë-ekūö ngam Yōm panô-òṅ, hòṅ ò nö tīntö tö la-evṙen nö el ngih panô-òṅ ò.”
Footnotes
^ Hēk, “perelāis.”
^ nö aṙē-ěl tökööl tarik nö ing panam . . . .: Minë tölūöi dot elipsis vamënyen Yēsū anū-ö nö sökngö ṙôre sin hē ò nö ṙò-òv ngaich halanken ök tarik nö ikūö cha nö ṙòkhöre nö hameuktö kumlēḵ re nö in ngam ṙôre.
^ Hēk, “nö ūichtöre nö ik mīs.”
^ Hēk, “nö ūichtöre nö ik mīs.”
^ Hēk, “vamë-enyre nö töhet tö yip tahëng.”
