Kahūich Mākös 1:1-45
-
Ahānga ang Yôhan ök Vamôk (1-8)
-
Vinôkö Yēsū (9-11)
-
Hachō-oi ang Yēsū tö ngam Satān (12, 13)
-
Rultenre ang Yēsū nö ahānga nö i Kelelī (14, 15)
-
Kintöllö yik raneh mahaköp (16-20)
-
Ahōnyu yik tötlöök ma-ahānga (21-28)
-
Halanken yik töpōyen tövāhavö ang Yēsū nö i Kafarnahum (29-34)
-
Im tö chēvhakṙen nö vë-ekūötēv. (35-39)
-
Halanken ök töhěngtak töyeūnyu (40-45)
1 Ngö inlahen ranehnyi an ngam tölöök inhānga inlahen Yēsū Kristū, ngam Kūön ngam Tēv:
2 Sā kinūichngö e nö imat ngam līpöre ök pròfět Isayā nö ngö: “(Yěh meuk! Tīntö ma-ahānga Chin min nö urēhěkūö meh, nö mahalēnkö el talöökö meh min nö urěh.)
3 Hāngö ṙô öp hamū-a nö el tönyalnyi nö ngö ṙô: ‘Halēnkö talöökö Yāvē* yin! Hachip nup talöökö ò.’”
4 Ngatī yanīhi ang Yôhan ök Vamôk nö löktö el tönyalnyi. Ahānga anga-aṅ, tö më tarik nö hòṅ kēḵ ngam vinôkö, nö minkahngö min nö in cha, tö cha nö haṙivlōn tö nup tököölre, hòṅ aṙēlöng cha-a inrē.
5 Lökten yik aṅ ngam panam Yūta tö yik tarik aṅ Yērūsalem nö ṙòkhöre nö yihtöre nö in Yôhan. Ngaich vë-eny nuk tököölre nö ikūö ò, ngaich vōkö* cha anga-aṅ nö el öp Tahël Yôtön.
6 Inyūtu misī ang Yôhan tö sanôi ūṅt, uk töṙeūla inrē nuk inmöpṙat ò, höng kāḵ nuk tö kun kun anga-aṅ mufākö, òk tö pachāka hönī inrē aṅ el inchōn.
7 Ngö ṙô anga-aṅ nö ahānga: “Mötlö kumlēḵ öp min tö Chu, öp yamih nö mu-unôichrit Chu. Öt rēhěn inrē öich kô sōnngöre luhnyö nyanëk kūö nup kunröpö ò.
8 Höng aṅhtī tö mak Chin chū-ö öich vōkö yīö, aṅhtī tö ngam töhet kumlēḵ pöri min anga-aṅ nö vōkö yīö.”
9 Hē u anū-ö sakāmö ang Yēsū, nö yihtöre nö in Yôhan nö löktö im panam Nāsaröt i Kelelī ngaich vōkö anga-aṅ tö Yôhan nö el öp tahël Yôtön.
10 Hē Yēsū nö yôklö nö ṙā-ang el ngam mak, meuk ngam halīöngö ngaich anga-aṅ nö löpnyörekūö ngaich sā mineūkö nyö-öṅ ngam töhet kumlēḵ nö teungtöre nö ikui ò.
11 Hāngö ngaich ök ṙô nö löktö el halīöngö ök tö ngö ṙô: “Hanangenlōn chu ön ngòh nö Kūön chu, in ò Chin ṙamölōn* takô.”
12 Ilöö unôichrit e ngaich ngam töhet kumlēḵ nö hachōngen Yēsū nö chuh el tönyalnyi.
13 Fën anāi sumkam rò-òten anga-aṅ nöng el tönyalnyi im chūök ngam Satān nö kalahtenre nö haṙěingen ò. Holtöṙah nuk töṙeūla anga-aṅ nö el inchōn ngaich yihtöre yik ma-ahānga nö meukṙen ò.
14 Unôichrit kinë-e Yôhan hēk ang Yēsū nö chuh Kelelī, ngaich in e anga-aṅ nö ahangkö ngam tölöök inhānga aṅ im Tēv.
15 Ngö ṙô anga-aṅ nö ahānga: “Yih an nö ngaich ngam tö halēniṙen ṙētak, röhta an nö ngaich ngam Pūlngö ngam Tēv. Lökten yin yī-ö tarik öi havöötö ellōnre, ṙatö-ellōnre inrē im tölöök inhānga.”
16 Hē ò nöng iṙūöhöröön nö lökkūö ngam mai i Kelelī ngaich meūkö Sīmōn anga-aṅ tök kahëm ò inrē ang Antarū. Ṙònghöichṙen cha-a nö sukngö nuk inhāṅl re nö el mai, kūö cha nö nëtre tak nö kamë kāḵ.
17 Ngö ṙô ngaich ang Yēsū nö in cha: “Ta-a tömrit Chu nan, hòṅ chu vīten nā an kamë tarik nö kāḵ.”
18 Ilööṙen ngaich cha-a nö ṙāngö nuk inhāṅlre ngaich tömrit ò.
19 Rĕh rô-òlkūö hēk anga-aṅ nö kiröön ngaich meūkö Yāköp anga-aṅ tök kahëm ò inrē ang Yôhan. Nëtre tak cha-a nö kūön Sepetī, ṙömöng ngattit nuk inhāṅlre cha-a nö el ök kupòkre.
20 Höng ilööṙen anga-aṅ nö havëten cha. Ilöö ṙāngen ök yöngre ngaich cha-a ang Sepetī nö holtö yik tarik tö la-evṙen nö el ök kupòk ngaich tömrit ò.
21 Unôichrit e ngaich cha-a nö chuh Kafarnahum.
Hē ranulten ngam Haneūheu Töhet Sakāmö, chuh el ngam töhet chūök ngaich anga-aṅ ngaich haköpten yik tarik.
22 Pingangkūö yik tarik nö hang inlahen ṙô ò nö haköphöti, pön öt sā ṙô yik kamūich anga-aṅ yěn haköphöti, sā ṙô yip tö chööngu pöri anga-aṅ yěn haköphöti.
23 Hěngtak ök umuh tarik, töng më-el ngam töhet chūök ök tö aṅhav el alaha tök tötlöök ma-ahānga, ayôṙa anga-aṅ nö ngö ṙô:
24 “Më-eṅ Yēsū aṅ Nāsaröt asuh öp la-en meh chuh in ih? Yih ömeh, öm öt hakôlò ih? Akahakūö chin tö meh öm Töhet Tarik ngam Tēv! Öm tö söömtu tö ò.”
25 Ngaich ngö ṙô ang Yēsū nö hatainyken ò: “Ṙāngôre man ngaich kunyī-inyre öm ṙā-ang in ò!”
26 Ngaich ngam tötlöök ma-ahānga nö hangīhire tī tö ò, pōitô ngaich anga-aṅ nö ayôṙa ngaich kunyī-inyre nö ṙā-ang el alaha ò.
27 Pingangkūö ngaich yik tarik nö meuk inlahen ò, ngaich vë-ekūöre nö ngö ṙô: “Asuh öng ngih tö ngatī? Tö tufömngöre inköphöti! Chööngu an nö ikui më tötlöök ma-ahānga ngaich hang ṙô ò cha-a.”
28 Ilöö keuheūtngöre chūök ngaich nö hāngö ngam inlahen ò nö im panam Kelelī.
29 Kunyī-inyre ngaich cha-a nö ṙā-ang el ngam töhet chūök ngaich chuh patī nā Sīmōn nā Antarū. Hol cha inrē nā Yāköp nā Yôhan.
30 Vāhavö hē e ök kikānö yöng pīhö Sīmōn nö vūöi. Ilööṙen cha-a nö vë-eny inlahen ò nö in Yēsū.
31 Yihtöre ngaich ang Yēsū nö in ò, ngaich kēḵ kël ò nö hachohlen ò, ilööṙen ngaich ök vanūöyö ò nö ṙāngen ò, ngaich meukṙen cha anga-aṅ.
32 Hē ngam tavūöi ngaich nö sipti im harap, maṙôngö yik tövāhavö tarik tökētu nö in ò, yik tö aṅhav el alaha inrē tö tötlöök ma-ahānga;
33 höng hòṅ ṙòktöre më aṅ kūö ngam panam, nö hamūlöre nö ikūö inkūp ök patī ò.
34 Pōyen ngaich yik tarik tölööken tö tī ò, tö nuk töṙōlkangen invahre, pōyen inrē yik tötlöök ma-ahānga tökēnyu tö ò, öt halöngnyô yik tötlöök ma-ahānga pöri anga-aṅ nö ṙò-òvö kūö cha nö akahakūö tö ò nö Kristū.*
35 Ṙömöng sangūla angū-ö, hē minlīlö ngam peuheū, choholre ngaich anga-aṅ ngaich kunyī-inyre nö chuh ik chūökö tö chēvhakṙen. In e ngaich anga-aṅ nö vë-ekūötēv.
36 Chöhö ò pöri ang Sīmōn tö yik hol ò inrē
37 ngaich hē cha nö kôtökūö tö ò, ngö ṙô ngaich cha-a nö in ò: “Ṙòkhöre in kòl höng chamöhö meh.”
38 Ngö ṙô pöri anga-aṅ tö cha: “Ta-a töi chuh in minë tö röhta tuhēt, hòṅ Chu öich ahangkö ngam tölöök inhānga öich in e, tön angū-ö an chö-öny chu öich yih.”
39 Kiröönngöre ngaich anga-aṅ nö ṙā-ang in e, ngaich ahānga nö el chūök vinë-ekūötēv, keuheūtngöre chūök inrē nö i Kelelī, ahōngö yik tötlöök ma-ahānga inrē anga-aṅ nö ṙā-ang el alaha yik tarik.
40 Hěngtak hēk ök tarik töyeūnyu yamihtöre nö in ò, ngaich sulngöre nö ikūö ò ngaich peunyhö kūö ò nö ngö ṙô: “Yēḵ e nö lōn meh, ngaich mihôiṅ min chū-ö hetlö tö ngih invahre.”
41 Aṙē-ěvlōn ngaich ang Yēsū nö meūkö ò ngaich hateutnyö këlre nö lūölken ò nö ngö ṙô: “Heūṅ, lōnu Chin! Lööken man yēḵ ngaich.”
42 Ilööṙen ngaich nuk yeūnyö ò nö hö-övö ngaich lööken anga-aṅ.
43 Ilöö ṙāngen ò ngaich ang Yēsū, ngaich ngö ṙô nö sōngen ò:
44 “Chumkūöṙen pömchö um vë-eny nang tahëng tö inlahenre. Kiröönngöre pöri öm hameuktöre in yip kūönṙô ngaich kētö tökētu sā nup inchöngtenre tö Môsös nö minkahngö nö in cha.”
45 Kiröönngöre pöri ngaich anga-aṅ nö ṙā-ang umuh ngaich ilöö ve-eny nang yik tahëng tö inlahenre, ilöö keuheūtngöre chūök hināngö ngaich ngam inlahen ò. Lökten ngaich ang Yēsū nö ötkô nö kunyī-inyre nö el ṙôngö, höng ngöh pöri nö inup tö chēvhakṙen kamngö, sön më tarik nöng yihtöre nö chuh in ò.
Footnotes
^ Hēk, “Ngëichköm Tahëng Ātiköl A5.”
^ Hēk, “chupeuktu.”
^ Hēk, “Hō-en.”
^ Hēk lohten, “pön akahakūö cha-a tö ò.”
