Kahūich Mākös 12:1-44
12 Kaknyöre hēk anga-aṅ nö vë-ekūö cha nö inchōḵ-ovṙô nö ngö ṙô: “Hěngtak ök tarik vamī panô-òṅ vāin ngaich keuheūtlöre tī anga-aṅ nö kalonglen e, ultö kinrān vāin anga-aṅ nö ël ök panô-òṅ ngaich mānlö ök tökiröng patī, tölṙô yik yōm panô-òṅ ngaich anga-aṅ nö ngëichken e ngaich kiröönngöre nö chuh tahëng panam.
2 Yih ngaich ngam ṙētak unvòhò, tīntö ök tö hěngtak ngaich anga-aṅ mahalanṙenre, nö chuh in yik yōm panô-òṅ, hòṅ ò nö kē nuk kintöölö ò aṅ in minë ṙòng taneūich.
3 Kē ök mahalanṙen pöri yik yōm panô-òṅ, ngaich fōho ò, hěnghöre tīnngörit ò nöng öt kūmuṙen.
4 Tīnngö ök tahëng hēk anga-aṅ mahalanṙen nö chuh in yik yōm panô-òṅ, kuleh kui ò pöri cha-a ngaich miṙēḵngen ò.
5 Tīnngö ök tö hěngtak hēk mahalanṙen ngam mākūö panô-òṅ ngaich hēk cha-a nöng fëlngen ò, pōyen tahīnngö hēk ngam mākūö panô-òṅ tö yik tarik alahare, ōt pöri yik tö fōho hēk fëliyö inrē tö cha.
6 Höng hěngtit tak ngaich ngam in ngam mākūö ngam panô-òṅ, ngam töng hanangenlōn ò takô nö Kūön ò. Ngölōn ngaich anga-aṅ nö tīnngen ò nö in yik yōm panô-òṅ, ‘öthō yip min nö öt milēḵken ngòh kūön chu.’
7 Vë-ekūöre pöri yik yōm panô-òṅ nö ngö ṙô, ‘Anga-aṅ ön ngòh tö amīnu. Pöh töi fëlngen ò, hòṅ hī min amīnu tö në kanòlô ò.’
8 Kēḵ an ngaich cha-a ngaich fëlngen ò ngaich kavalnyen ò nö la-uk ök panô-òṅ.
9 Asuh öp min ngaich inlahen ngam mākūö ngam panô-òṅ? Yih min anga-aṅ, ngaich fëlngö yik yōm kūö ngam panô-òṅ ngaich kē-ěkūö yip tahëng tö ngam panô-òṅ vāin re.
10 Höng öt vë-ekūö ngam töhet līpöre öi yī-ö ṙung: ‘Ngam ihong tö sō-ovö tö yip mamānö ngaich anga-aṅ nö vītu nö yöng kūö minë ihong tanapkūö ngam patī.
11 Öt vë-ekūö ngih hòng inrē yī-ö, aṅ in Yāvē* ön angū-ö hēk töt insā-av inrē nö imat hī’?”
12 Hē yik tö kunyaha elmat pöri nö hang ṙô ò, hòṅ kēḵ an ngaich cha-a,* pön akaha elnang tö ngam inchōḵ-oṙô ò nöng ṙô tö inlahen cha. Pa-ekūö pöri cha-a tö yik tömaṙôngö lökten nöng kiröönngöre nö ṙāngen ò.
13 Unôichrit e ngaich cha-a nö tīnngö yik Feresī hēk tö yik tamömrit Heròt nö chuh in Yēsū hòṅ cha nö vīlö fālen ò nö löktö in nup ṙô ò.
14 Yihtöre ngaich cha-a nö in ò ngaich ngö ṙô: “Mahaköphöti, akahalōn in tö meh öm tökô-en, öt mahaṙamlōn tarik më-eṅ inrē hēk öt höng ngëichkö mòkūö tarik yěm vë-ekūö cha, pò meh im kanô-en öm haköptö talöökö ngam Tēv. Vë-eny nang ih man, tölöng* öng ngam inlahen hī, yěi kē-ěkūö më mahayöng* tö tax hēk hö-ö?
15 Hòṅ kētö tax hòng ayī-ö hēk hö-ö ṙöng?” Akahakūö pöri ang Yēsū tö ngam ellōn cha nöng öt löng, ngaich ngö ṙô anga-aṅ: “Kūö yòh öi kalaha chu? Hameukhömat chu yin töp tö hěng tinār.”*
16 Kētö ök tö hěng tinār ngaich cha-a nö in ò, ngaich ngö ṙô: “Insā chīö öng ngih hēk minë-eny chīö öng ngih tö kūichtu nö in e?” Ngaich ngö ṙô cha-a: “Insā ngam mahayöng.”
17 Ngö ṙô ngaich ang Yēsū: “Lökten kē-ěkūö Kaisör tö nup aṅ in Kaisör, kē-ěkūö ngam Tēv pöri tö nup aṅ in ngam Tēv.” Pingangkūö ngaich cha-a nö hang ṙô ò.
18 Yihtöre ngaich yik Satukī nö in ò, yik tö ngö ṙô tö ngam inköphöti invanlö tökapah nö töng ötkô-en, ngö ṙô ngaich cha-a nö hatöönö ò:
19 “Mahaköphöti, ngö ṙô ök misī Môsös yēḵ öp tarik nöng kapah nöng ṙāngö ngam pīhöre nöng öt kūönu, ngaich mihôiṅ ngam kahëm ò nö pīhövö tö ngam pīhötit ò, ngaich hakūöntö kūön ngam mëmre.
20 Tö sat tak yik ihih tökahëmre. Pīhövö ngaich ök maṙöinylö, ngaich kapah nöng öt kūönu.
21 Pīhövö hēk ök innëtö kahëm ò tök pīhötit ò, ngaich ngatī inlahen nöng kapah nöng öt kūönu. Ngatī hēk ngam linūöi tak.
22 Satre tak ngaich cha-a tökahëmre nöng kapah nöng öt kūönu, unôichngöre hēk ök kikānö nö kapah.
23 Vë-eny nang ih öm chěi, yēḵ ò min nö hachohlöng nö ṙā-ang in yip tökapah, achīö öp min pīhö ò nö in më tö sat tak? Pön ṙòkhöre cha-a sin nö pīhö ò?”
24 Ngö ṙô ngaich ang Yēsū tö cha: “Yöng vanāichö mufē yīö, pöi öt rēhěn akahakūö tö ṙô ngam Töhet Līpöre, öt rēhěn öi akahakūö tö kumlēḵ ngam Tēv.
25 Pò yip tökapah yēḵ cha min nö hachohlöng, nö öt hěngtak min kamë ngam pinīhö, pòrô kikōnyö hēk kikānö, ṙòkhöre pöri min cha-a nöng sā inlahen yip ma-ahānga aṅ el halīöngö.
26 Öt hang inchohlö yik tökapah öi hēk öt vë-ekūö nuk līpöre Môsös hòng yī-ö, tö ngam Tēv nö löknyö el nuk töchökhukūö kun kiyôp ṙô nö vë-ekūö ò nö ngö ṙô: ‘Chū-ö chin Tēv Aprahām Tēv Isāk, Tēv Yāköp inrē’?
27 Pön rö-ö anga-aṅ nö Tēv yik tökapah, pön Tēv yip tö aṅ, höng vaich takô nun minë mufē yīö.”
28 Ngaich hěngtak ök aṅ in yik kamūich yamihtöre ngaich hang ṙô cha nö la-alkūöre ṙô nö vë-ekūöre, meuk ngam inlahen Yēsū anga-aṅ nö heuveū-eu ṙô nö sapṙô cha, ngaich hatöönan nö ngö ṙô: “Asuh öp raneh* chööngö nö in minë chööngö nö ṙòkhöre?”
29 Ngaich ngö ṙô ang Yēsū nö sapṙô ò: “Ngih ön raneh,* ‘Ō Israel hangihtöre yin, Yāvē an Tēv hī, höng hěngtak ang Yāvē* nö Tēv.
30 Hangenlōn man tö ngam Tēv re Yāvē,* öm keuheūttö ellōnre, keuheūttö nômöre* hēk keuheūttö elkuilōnre hēk keuheūttö kumlēḵre inrē öm hangenlōn tö ò.’
31 Ngam innëtö, ‘Hangenlōn man tö holre öm sā hanangenlōnre töre.’ Anū-ö në tökiröng tö në chööngö nö ṙòkhöre.”
32 Ngö ṙô ngaich ök kamūich nö in ò: “Mahaköphöti, lööngö ṙô takô man kô-en nun minë ṙô meh nö kanô-en, ‘Tö ngam Tēv nöng hěng, öt tahëngu Tēv tö sā ò.’
33 Ngaich hòṅ keuheūttö ellōnre ngòh tarik, keuheūttö mikah elmatre hēk keuheūttö kumlēḵre nö hangenlōn tö ò hēk hangenlōn inrē tö holre nö sāre töre, anū-ö nun tö mööḵlö tö nup töföngö tökētu.”
34 Hē Yēsū nö meuk heuneū-eu ṙô ök kamūich nö sapṙô ò, ngö ṙô ngaich anga-aṅ: “Höng öt marôvat man tö ngam Pūlngö ngam Tēv.” Unôichrit e nö öt hěngtak tökô nö yihtöre nö in Yēsū nö hatöönan.
35 Ngö ṙô ang Yēsū nö in cha hē ò nö haköphöti nö el chūök vinë-ekūötēv: “Kūö yòh pöri yik kamūich nö ngö ṙô tö Kristū nö tö hěngtak nö kūön Tāvit?
36 Hōnyu ṙô ang Tāvit tö ngam töhet kumlēḵ nö ngö ṙô, ‘Ngö ṙô ang Yāvē* tö ngam Mā chu: “Ūichngöre man lāhāmö chu hanöng saha tī chu öich vītö yip tökunyaha elmat tö meh, nö ranöönö röön meh.”’
37 Lökten yēḵ Tāvit nö Mā ngö ṙô nö havëken Kristū, ngaich sitih inlahen min ang Kristū nö kūön Tāvit?”
Ṙamlōn yik tömaṙôngö nö hang nuk ṙô ò.
38 Haköpten yik tarik inrē anga-aṅ nö ngö ṙô: “Hīnöre yin tö yip kamūich, yip tömarôtòng kinlölrit inyut ngaich havöt nö lök kūö pachār pön ööire nö hang ṙô yip tarik nö salāmö cha.
39 Ööire inrē cha-a nö ūich el nup töhalēniṙen lamākūö* anūichö mā, yěn yih nö el nup tökiröng nyinā-aṅ tö kēkaṙen hē el harap.
40 Cha-a yin ngameūktö inlānen* tafīösi, höng hayatkö elmat pöri nö marô-òtö ṙô nö vë-ekūötēv. Lökten yin min nö mötlö ötinkòlô tö yip tahëng.”
41 Ūichngöre hēk ang Yēsū nö lākūö nuk kòntripiūsön pòks nö ngëichkö inlahen yik tömaṙôngö tarik, nö chaplö nuk rupīö nö el minë kòntripiūsön pòks, pōyen yik umuh tökòlô tarik tö pōyen chahaplö tö coin.
42 Yih hēk ök yāich tafīösi kikānö nö chaplö nuk aṅ in re töng nët pësa,* nuk töng ötkô nö ṙāi tī hī öi havah tö kūö kun ṙôken re.
43 Havëten yik haköptöre ngaich ang Yēsū nö in re ngaich ngö ṙô: “Tökò-òṙô Chin tö yīö, i tumtak vē tarik chamaplö rupīö nö el minë kòntripiūsön pòks, ngam yāich tafīösi an tö mötlö ṙôken chahaplö nö i tumtak cha.
44 Pò cha nö ṙòkhöre nö chaplö nup töpōyen aṅ in re, hö-ö pöri ngòh yöngnyīö pön höng keuheūttöre tī tö nup töng aṅ in re.”
Footnotes
^ Ngëichköm Tahëng Ātiköl A5.
^ Hēk, “nö halökö.”
^ Hēk, “sā ngam chööngö.”
^ Ṙô Krīk, “Kaisör.”
^ Ngëichköm Tahëng Ātiköl B14.
^ Hēk, “tökiröng.”
^ Hēk, “tökiröng.”
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Ngëichköm Tahëng Ātiköl A5.
^ Hēk, “tövai takô.”
^ Hēk, “kanòlô.”
^ Ngëichköm Tahëng Ātiköl B14.
