Kahūich Mākös 13:1-37
13 Hē Yēsū nö kunyī-inyre nö ṙā-ang el ngam töhet chūök ngaich yihtöre ök tö hěngtak aṅ in yik mahaköp, ngaich ngö ṙô, “Mahaköphöti, yěh meuk! iṙôkö vanāyö ön në ihong tö në tömarô-òlkui inrē patī!”
2 Ngö ṙô pöri ang Yēsū nö in cha, “Ngih maheuṅk yīö patī tömarô-òlkui, öt hěng hang min ihong tö ṙā-ayö nö hachaphen höö, öp töt suktu min.”
3 Hē Yēsū nö ūichhak nö ikui ök Rôngö Òliv nö kū-ö tö in ngam töhet chūök ngaich haköhngen chūökre hē Pītör, Yāköp, Yôhan hēk Antarū nö hatöönö ò nö ngö ṙô.
4 “Vë-eny nang ih man, ihē ön min në ṙô nö teungtökūö, ngaich yěn yih min öp manāngen u, ngaich asuh min öp minkahngö u?”
5 Ngö ṙô ngaich ang Yēsū nö in cha, “Haṙēmngenre yin hòṅ yīö öt halō-oikūö tö tarik.
6 Pön pōyen min yip yamih nö kēḵ minë-eny chu ngaich vë-enyre nö ngö ṙô, ‘Chū-ö chin anga-aṅ,’ ngaich maṙôngö halō-ongkūö min cha-a tö tarik.
7 Yěi hang kinyūngö min, ineūkö kinyūngö inrē ngaich uh öi pa-ekūö, tön tö hòṅ yih nun anū-ö. Öl pöri min öp manāngen nö yih.
8 Pò në panam min nöng la-al höö hēk pūlngö inrē nöng la-al höö, kumyeūnö nup min nö ṙōlkang chūök hēk inyāichö inrē. Anū-ö nun min në ranehtökūö* nup kanihngen.
9 “Hīnöre pöri yī-ö, tön kētu yin min öi el chūök kamhôka, fōho inrē min öi el chūök vinë-ekūötēv. Kētu inrē öi ikūö yip kamhôka hēk rācha tö pòkūö chu, hòṅ e nö minkahngö nö in cha, tö ngam tölöök inhānga.
10 Töt ṙanāngen pöri angū-ö tö ngam tölöök inhānga nö hòṅ urěh nö ahangka nö ikūö në taṙòkhöre panam.
11 Yēḵ cha pöri min nö kē-ě yīö ngaich kēten yīö öi el chūök kamhôka ngaich ui yaha pinṙūtölōn tö nup ṙôre min öi in cha. Tön ngam töhet kumlēḵ an min kamëtö heuneū-eu ṙô yīö öi ṙò-òvö.
12 Rö-ö nöng anū-ö, pön kētö yip mëmre hēk kahëmre min cha-a nö eltī yip tö hòṅ fëlngen cha, ngatī inlahen min ngam inyööngö kikōnyö nö kēten më kūönre, më nyīö min nö choholre nö hòṅ la-al më yöngre pön hòṅ fëlngen cha.
13 Surīkhu min yī-ö tö taṙòkhöre tarik tö pòkūö ngam minë-eny chu. Ngòh tö köp pöri min nöng möi* nö söl manā-aṅ anga-aṅ min tö hayöökaṙen.
14 Lökten, yēḵ yīö min öi meuk ngam yöng sin-òkkūö ngam Tēv nö sökhak nö umuh nö im tötkô nö chūök e nö sökhak (hökngen öp vamë-ekūö e nö akaha elmat), ngaich yip mi-i Yūta hökngen cha nö ilööṙen nö falngöre nö chuh kui rôngö.
15 Ngaich yip tarik mi-i kui patī, hökngen cha nö un yônti, un rehěn nö kuhēthötre nö chuh el patī nö kē-ěre nup chehenre,
16 ngaich yip tarik më-el panô-òṅ re, hökngen cha nö un havan nö kē-ěre kinṙum re hēk un havan nö kē-ěre nup chehenre tö ṙā-ayö.
17 Höng yöng kanihngen pöri min yip puyōsö tö yip mahapō kūönre inrē yöngnyīö, hē u anū-ö sakāmö!
18 Lökten yin vë-ekūötēv hòṅ e nö öt hē el ṙētak laneūichö,
19 pön öt töngatī-ivö yöng tökiröng ötkanôlò min, öt rēhěn, hēten tö ranehlö ngih panam, öt rēhěn, nö unôichngöre min nö hēk.
20 Lökten yēḵ Yāvē* nö öt hakūöṅnngen u anū-ö sakāmö, lohten nö öt hěngtak öre tö ötkò-òngvah, kūö yip tö katöllöng pöri min në sakāmö nö hakūöṅni ròtòng.
21 Yěn hěngtak öp tarik tö ngö ṙô nö in yīö hē u anū-ö sakāmö, ‘Yěh meuk! Ihih an Kristū,’ hēk, ‘Yěh meuk! Umu-a inrē,’ uh yī-ö hòṅ ṙatö-ellōnre tö ṙô cha.
22 Tön pōyen yip min tö minyôny Kristū hēk tö minyôny pròfět chamòhòlre ngaich hameuknyö nup tökiröng pinngangkūö, kūö cha nö hòṅ halō-ongkūö yip tö katöllöng inrē.
23 Lökten yin aṅhaṅti tön öt akahalōn yin töp sakāmö hē yanīhi ngam mā.
24 Ilööṙen min nö sangulköti mat ngam tavūöi, unôichrit nup kanihngen hē u anū-ö sakāmö, öt yāngö mat inrē min ngam chingëṅt,
25 suktöre inrē min minë taneūsömat nö ṙā-ang el halīöngö, minë kanôlò ngam halīöngö min inrē nö kayīna.
26 Ngaich meuk tö yīhi ngòh Kūön tarik min cha-a nö löktö el halīöngö nö holtö kumlēḵre, kanôlò re inrē.
27 Ngaich tīnngö yip ma-ahānga re min anga-aṅ nö löktökūö im manā-angkūö ngam halīöngö söl im tahëng, nö hamūl yip tö katöllöng tö ò, nö ṙā-ang in nup tö fën lā-a kuföt.
28 Haköp ngam inchōḵ-oṙô yin im anychīr chōn: Yēḵ ngam tö tufömngöre pak ngam chōn nö ayallöre ngaich meunynyi rōi minë chōn, ngaich ilöö akahalōn yī-ö tö ranöhta ngam sikehngö.
29 Ngatī yī-ö, yēḵ yīö meuk minë minkahngö nö teungtökūö, akahalōn ngaich yī-ö tö ngam kūön tarik nöng röhta yanīhi nöng ikūö inkūp.
30 Tökò-òṙô Chin tö yīö hanöng sā në ṙô nö öl nö ṙòkhöre nö teungtakūö, öthō min ngih michaplö nö chuhngöre.
31 Chuhngöre an min ngam halīöngö, ngih panam inrē, öt chanuhuvṙen pöri në ṙô chu.
32 Öt hěngtak pöri tö akahalōn töp sakāmö angū-ö ṙētak inrē, ötrēhěn yip ma-ahānga el halīöngö, ötrēhěn ngam Kūön, höng ngam Yöng tö akahalōn.
33 Lökten yin aṅhaṅti, ui halöngngenre haṙòhlö, tön öt akahalōn yin tö öp tö halēniṙen ṙētak.
34 Sā öp tarik an chamuh tahëng panam, öp ṙama-ang patī re ngaich halēnngen yip mahalanṙen nö kē-ěkūö cha tö la-en, tölṙô öp yōm inkūp inrē nö aṅhaṅti.
35 Lökten yin aṅhaṅti, tön öt akahalōn yin töp sakāmö hē yanīhi ngam Mā, yěn hē el harap hēk chūöl hatööm, hēk hē el ṙētak ṙô hayöm nö takeūk hēk lā peuheū inrē,
36 hòṅ yīö öt rötlö tö yanīhi ò ngaich kôti öi höng haṙòh.
37 Ngam ṙô chu öich in yīö töngamuh, ngatī ṙô Chin inrē öich in yīö öi ṙòkhöre: Aṅhaṅti yin.”
Footnotes
^ Ṙô Krīk, “nö sā ṙēngen chanöökö öp kamyô.”
^ Hēk, “köp nöng ngöh.”
^ Ngëichköm Tahëng Ātiköl A5.
