Kahūich Mākös 14:1-72
-
Chöh inlahen tīre më mākūö kūönṙô nö hòṅ fëlngen Yēsū (1, 2)
-
Röstu ngam tötahūsa tavi-i nö ikui Yēsū (3-9)
-
Hachīlngövah Yēsū ang Yūta (10, 11)
-
Manā-aṅ Pāska (12-21)
-
Ranulten ngam Töhet Inmūlkūö Ngam Mā (22-26)
-
Tö eūka inlahen Pītör nö mahngen ò (27-31)
-
Vë-ekūötēv ang Yēsū nö i Ketsēmenī (32-42)
-
Kinë-eṅ Yēsū (43-52)
-
Kahòkkaṙen ikūö chūök kamhôka (53-65)
-
Mahngen Yēsū ang Pītör (66-72)
14 Unôichrit tö nët sumkam ngam tökiröng sakāmö ngam Pāska hēk tö ngam tötaföhlöng inrē ròtī, yik mākūö kūönṙô hēk tö yik kamūich inrē nö chöh inlahen tīre nö hòṅ hachīlngövah Yēsū, kūö cha nö hòṅ kēḵ an* ngaich fëlngen ò.
2 Ngö ṙô pöri cha-a: “Ötkô in hē el ṙētak ngih paratīn, pön taṙōllöngṙen min yip tarik.”
3 Ngaich hē ò nö i Petenī nö nyā* nö el patī Sīmōn ök töyeūnyu sin. Hěngtak ngaich ök yöngnyīö tökūmu tök tötahūsa tavi-i nö el ök töpōiṙāi pilön,* likuknyökūö e ngaich ngam yöngnyīö ngaich röstö e nö ikui Yēsū.
4 Hē yik tahëng pöri nö meūkö e, hūlökūö tanāinyö ngaich cha-a ngaich ngö ṙô nö vë-ekūöre: “Kūöyòh öng nöng mëchiyö ngih tötahūsa tavi-i.
5 Mihôiṅ öre angū-ö nö inyīhiyö ngaich pōyen tö tö 300 tinār* ṙôken ṙāi ngaich kētu anū-ö nö in yip yāich.” Yīhi tanāinyö* ngaich cha-a nö in ngam yöngnyīö.
6 Ngö ṙô pöri ang Yēsū tö cha: “Kūö yòh öi kan hakihten ò? Hökngen ò yin, tön tölöök an ngam la-en ò töpòkūö chu.
7 Töng örheūheu yin vē yāich nö holtöṙah yīö ngaich mihôiṅ min yī-ö öp töng yòh ṙētak öi meukṙen cha, hö-ö pöri chū-ö öich töng örheūheu min öich in yīö.
8 Nuk töng kanò-òṅ ò, ngatī inlahen anga-aṅ nö in chu, röstö ngam tötahūsa an tavi-i nö i alaha chu nö inlēnkö ngam lināpngö chu.
9 Tökò-òṙô Chin tö yīö, i chūök ngih tölöök inhānga min nö ahangka nö i në taṙòkhöre panam, öthō min ngih tī ngòh yöngnyīö nö öt kakka nö inköpkölōn tö ò.”
10 Kunyī-inyre ngaich ang Yūta Iskaryôt ök tö hěngtak aṅ in yik tö Nëtsīön tak, nö chuh in yik mākūö kūönṙô pön hòṅ kēten Yēsū nö eltī cha.
11 Ik sā cha ngaich nö hang ṙô ò ngaich ṙamlōn cha-a, kilēḵngôre cha-a töre min nö kētö chāntī coin nö in ò, hēten tö e ngaich ang Yūta nö ngëichkö öp tölöng ṙētakre nö kēten Yēsū nö in cha.
12 Im ranehtökūö sakāmö ngam tötaföhlöng ròtī, hē yik Yahūti nö kētö nuk töṙeūla nö tökētu hē el Pāska nö sā inlahenre, ngaich ngö ṙô yik mahaköp nö hatöönö ò: “Isuh chūök lōn öm tö ih öi halēnkö chūök meh öm nyā ngih Pāska?”
13 Tīnngö nak tö nëttak ngaich anga-aṅ haköptöre nö ngö ṙô: “Kuṙòh, kiröönngöre nan chuh im elpanam, ngaich meuk öp tö hěngtak min nā-a tarik tamyuk chūök mak, ngaich tömrit ò,
14 ngaich öp töng chūök ò patī nö kuhēthötre, ngaich ngö ṙô nā-a an in öp tö patī-ivö: “Ngö ṙô öp mahaköphöti nö hatön, ‘Isuh öp urôhò chūök chu min öich holkūö yip haköptöre öich nyā ngam tötaföhlöng ròtī?’”
15 Ngaich hameukhömat nā min anga-aṅ töp tökiröng urôhò lātulöng, öp tö hanyöötö nö ngaich, in e min yī-ö halēnken e.”
16 Kiröönngöre ngaich nak mahaköp ngaich kuhēthötre nö im elpanam ngaich höng ngatī kanôtökūö cha-a, ngaich halēn ngam Pāska cha-a.
17 Holtö yik tö Nëtsīön tak ngaich anga-aṅ mahaköp nö yih, hē e nö harap.
18 Hē cha ngaich nö ṙònghöichkūö nö nyā,* ngö ṙô ngaich ang Yēsū: “Tökò-òṙô Chin tö yīö, hěngtak min öp in yīö öp hamòlkūö chu nö nyā, mahachīlngövah tī re min nö kēngen chu.”
19 Haṙivlōn ngaich cha-a, ngaich hěng hěngtak ṙô nö hatöönö ò, nö ngö ṙô: “Uich höng chū-ö röh?”
20 Ngaich ngö ṙô anga-aṅ: “Aṅ in yīö öp min öi tö Nëtsīön tak, öp kamsumtö nyā-aṅre min nö el ngih töchilū nö hol tī chu.
21 Kô-en ön ngòh Kūön tarik nö tö hòṅ kiröönngöre, nö sā kinūichngö inlahen ò, tötkôlò pöri min öp tarik mahachīlngövah ngòh Kūön tarik nö kēngen ò! Ĕhten öre anga-aṅ tarik nöng öt fötnyu.”
22 Hē cha ngaich nö ṙònghöichkūö nö nyā, kē ök ròtī ngaich ang Yēsū ngaich vë-ekūötēv ngaich likölö e, ngaich kē-ěkūö yik haköptöre nö ngö ṙô: “Euṅh, nyā-aṅ e yin, angū-ö ön minkahngö ngih alaha chu.”
23 Kē ök kulah hēk anga-aṅ ngaich ha-öiny ngam Tēv nö vë-ekūötēv, ngaich ṙòkhöre kūö cha-a nö òkö e.
24 Ngaich ngö ṙô Yēsū nö in cha: “Minkahngö ngam mahām chu an nö kinlēḵngô, tö kitaknyu töpòkūö tömaṙôngö nö inṙē-ěl tökööl.
25 Tökò-òṙô Chin tö yīö, öthō chin min hēk òk ngih vāin hanöng saha öp sakāmö hē chu min öich òk öp tö tufömngöre vāin* öich im Pūlngö ngam Tēv.”
26 Keuheūt hë ṙô ngaich cha-a nö tikökṙôre* tö nöinyö ngam Tēv, ngaich kunyī-inyre nö chuh kui öp Rôngö Òliv.
27 Ngaich ngö ṙô ang Yēsū tö cha: “Kūöṅnngöre an min ngam ṙinatö-ellōn yīö,* pön ngö kinūichngö angū-ö, ‘Fël ngam yōm sīṅp chin min, ngaich minë sīṅp min nö parātiyö.’
28 Yēḵ chu pöri min öich hachohlöng öich ṙā-ang im kinpaha, urēhěkūö yīö chū-ö min öich chuh Kelelī.”
29 Ngö ṙô pöri Pītör nö in ò: “Pòrô min vē hol chu nö kūönngöre ṙinatö-ellōn, öthō pöri min ngam ṙinatö-ellōn chu nö kūönngöre.”
30 Ngö ṙô pöri Yēsū tö ò: “Tökò-òṙô Chin tö meh, lūöi heuh ṙô man min öm mahngen chu, urēhěkūö ṙô hayöm nö nët heuh ṙô nö takeūk i ngih hatööm.”
31 Ṙōlheuh ṙô pöri Pītör nö ngö ṙô: “Yēḵ chu pòrô öich anòngngövah meh kapah, sön min öich öthō öich mahngen meh.” Ngatī ṙô inrē yik mahaköp nö ṙòkhöre.
32 Yih hēk cha-a nö ik chūökö tö Kĕtsemenī minënyi, ngaich ngö ṙô anga-aṅ tö yik haköptöre: “Ūichhak yin ihih öi hökken chu, töich chuh mu-a öich vë-ekūötēv.”
33 Ngaich ngò-òṅ hē Pītör, Yāköp hēk Yôhan anga-aṅ nö holre. Keuheūtnyöre anga-aṅ hē e tö kanihngenre hēk miṙivlōnre inrē.
34 Ngö ṙô ngaich anga-aṅ tö cha: “Kalēḵ takô ön ngih miṙivlōn chu, ngaich takô öich höng sā inlahen yip tö hòṅ kapah. Höngngöh yin sin öi ihih, ngaich holṙen chu öi höng aṅhaṅti.”
35 Rěh rô-òlkūö ngaich anga-aṅ nö ṙūöhöngre tö cha, sulngöre ngaich anga-aṅ nö el tumlat nö vë-ekūötēv yěn kô ngam ṙētak nö chööḵngen ò.
36 Ngö ṙô ngaich anga-aṅ: “Appa,* Kayööngö höng kanò-òṅ meh nun nö ṙòkhöre, yēḵ meh mihôiṅ öm kēngö ngih kulah nö lākūö chu. Hökngen e pöri nö un sā ngam lōn chu, sā ngam lōn meh pöri.”
37 Hē ò ngaich nö havantöre nö in yik mahaköp ngaich meūkö cha anga-aṅ nöng haṙòh, ngö ṙô ngaich anga-aṅ tö Pītör: “Sīmōn höng haṙòh öm kan? Öt kalēḵ alaha ömeh öm rahëichtakūö öm holṙen chu aṅhaṅti?
38 Aṅhaṅti yin lökten, vë-ekūötēv inrē, hòṅ yīö min öt kētu im kinlaha. Höng hō* an ngam ellōn, ötkô pöri ngam alaha.”
39 Havanngöre hēk anga-aṅ ngaich hēk nö vë-ekūötēv.
40 Havantöre hēk anga-aṅ nö in yik mahaköp ngaich kòtökūö tö cha nöng haṙòh, pò cha nö ötkô nö milaklömatre tö kūö ngam inṙòhòre, höng öt heuveū-eu ṙô cha-a nö sapṙô ò.
41 Im linūöi van ò nö chuh in cha ngaich ngö ṙô anga-aṅ: “Ṙētak yīö öng kan ngih öi höng haṙòh, heūheure inrē! Yěh meuk, yih an nö ngaich ngam ṙētak ngòh kūön tarik nö hachīlivah nö kē-ě nö eltī tö köölö fālen.
42 Choholre yin, pöh töi kiröönngöre. Yěh meuk, yih an ngaich ngam mahachīlngövah chu.”
43 Ṙònghöichṙô anga-aṅ tö u, yihtöre ngaich ang Yūta ök tö hěngtak aṅ in yik tö Nëtsīön tak. Hōluröön anga-aṅ tö yik tömaṙôngö tarik tö sanëtu, tinkūngu inrē, yik tö tīntu tö yik mākūö kūönṙô, tö yik kamūich hēk tö yik mākūö yik tarik.
44 Ngö ṙô ngaich ök machīlngövah ò nö kē-ě, nö kētö minkahngö nö in cha: “Öp töng hāmökūö min tö chu, anga-aṅ min tö kē-ě tö yīö. Hachēlhöt ò min yī-ö öi kēḵ an.”
45 Hönglöötöre ngaich anga-aṅ nö in Yēsū ngaich ngö ṙô: “Rappī!” ngaich hāmkūö ò.
46 Kē-ě ò ngaich cha-a ngaich nyëkan.
47 Hěngtak pöri ök in yik samökhaka tamūöknyö sanëtre nö fangngö nang ök mahalanṙen mākūö kūönṙô ngaich tökngö tī tö nang ò.
48 Ngö ṙô ngaich ang Yēsū nö in yik tömaṙôngö: “Tö tūmu öich kan chū-ö, lökten yī-ö öi sanëtu hēk tinkūngu öi kē-ě chu?
49 Töng kaheuk sakāmö chin öich haköphöti öich el ngam töhet chūök, hö-ö pöri yī-ö öi kē-ě chu. Ṙën pöri anū-ö nö ngatī, hòn kinheūtngen ngam tö kūichi im Töhet Līpöre.”
50 Höng ṙāngen ò ngaich nö ṙòkhöre yik mahaköp nö falngöre.
51 Hěngtak ngaich ök ṙāl tarik tö kinṙūmu tök tövai hilā töng famchūkörit ò, hòṅ kē-ě ò lang yik tömaṙôngö tarik,
52 ngaich pöri anga-aṅ nöng ṙāngö nuk chehenre nö eltī cha, ngaich höng öt inyūtu* nö falngöre.
53 Kēten Yēsū ngaich cha-a nö in ök mākūö kūönṙô, in e inrē yik kamūich, tö yik mā nö mūlhakṙen.
54 Höng marôvat pöri ang Pītör nö fachūken Yēsū ngaich sölta anga-aṅ nö lākūö patī ök mākūö kūönṙô ngaich ūichngöre nö holtöṙah yik mahalanṙen ngaich hameūyöre nö ikūö tameūyö.
55 Ngaich yik mākūö kūönṙô, tö yik kamhôka inrē nö sūöchlö fālen Yēsū, pò cha nö hòṅ fëlngen ò, öt taneūnguṙen pöri cha-a.
56 Kô-en nö pōyen yik samūöchlö fālen ò nö yih, öt hěngren pöri nuk ṙô cha nö ṙò-òv.
57 Ōt yik chamòhòlre nö sūöchkö fālen ò nö ngö ṙô:
58 “Hang ṙô ò in hē e nö ngö ṙô, ‘Kò-òren chin tiṙōlngö ngih töhet chūök ngam Tēv ngaich mānlö e min öich höng lūöi sumkam tī, öp töt vahī kuntī tarik.’”
59 Öt hěngren ṙô pöri cha-a nö vënyen e.
60 Söklöre ngaich ök mākūö kūönṙô, ngaich hatöönö Yēsū nö ngö ṙô: “Sitih öm höng öt ṙò-òv? Asuh ön në ṙô vē vamënyö fālen meh?”
61 Höng öt ṙò-òv pöri ang Yēsū nö sapṙô ò, hēk ngam mākūö kūönṙô nö hatöönö ò nö ngö ṙô: “Më-eṅ öm Kristū öm Kūön ngam Tēv aṅ lātulöng?”
62 Ngö ṙô ngaich ang Yēsū: “Heūṅ, Chū-ö chin; ngaich yin min öi meuk ngòh Kūön tarik nö ūichhaka nö lāhāmö ngam tökalēḵ kël ngam Tēv, ngaich meūkan min yī-ö nö yih nö löktö el minë taṙul ngam halīöngö.”
63 Hang ṙô ò ngaich ök mākūö kūönṙô ngaich tikaichngö ök inyutre nö ngö ṙô: “Iṙôktöre lōn öi hēk tö vamë-eny inlahen ò?
64 Ngaich yin öi kôta ahang tö ṙô ò nö ötlēḵken ngam Tēv. Sitih lōn öi yī-ö?” Ngaich ṙòkhöre ṙô cha-a tö ò, nö hòṅ kumpaha.
65 Ōtre ngaich yik kamösngö elmat ò hēk nyëkngömat ò inrē ngaich kisōl kūö ò, ngaich ngö ṙô nö hatöönan, “Vë-eny nang ih man! Achīö öp kumsōlkūö meh.” Fatākkūö ò ngaich yik amahati ngaich kēḵ an.
66 Hē Pītör nö el kahôiyö ngaich hěngtak ök mahalanṙen kikānö yamihtöre nö in ò.
67 Ik sā ò nö meūkö Pītör nö hameūyöre ngaich haköpmatre anga-aṅ nö ngëichkö kūö ò ngaich ngö ṙô: “Më-eṅ man inrē hol Yēsū ngam aṅ Nāsaröt.”
68 Mahangre pöri anga-aṅ nö ngö ṙô: “Hö-ö chin chū-ö öich akahakūö tö ò hēk öt akahakūö inrē tö ngam ṙô meh,” kunyī-inyre ngaich anga-aṅ nö ikūö ngam inkūp.*
69 Hēk anga-aṅ nö meūkö tö ök mahalanṙen kikānö, ngaich ngö ṙô ök kikānö nö in yik samökhaka: “Ngòh ön inrē tarik hol cha.”
70 Mahangre pöri hēk ang Pītör. Rěh rò-angen hēk yik samökhak nö lā taseū Pītör nö ngö ṙô: “Tö hěngtak man më-eṅ inrē öm aṅ in cha, pò meh öm aṅ Kelelī.”
71 Rūttökuire ngaich anga-aṅ ngaich kilēḵngôre nö ngö ṙô: “Höng töng öt akahakūö chin chū-ö tö ò anga-aṅ tarik ngam kahakkö yīö!”
72 Hē e ngaich ök hayöm nö nët heuh ṙô nö takeūk, fē-ělre ngaich ang Pītör tö ṙô Yēsū nö ngö ṙô: “Urēhěkūö ṙô hayöm nö nët heuh ṙô nö takeūk, lūöi heuh ṙô min më-eṅ öm mahngen chu.” Haṙivlōn takô ngaich anga-aṅ ngaich peuiny.
Footnotes
^ Hēk, “hachēlhöt ò.”
^ Hēk, “nö ūichtöre nö ik mīs.”
^ Ṙô Krīk, “tö vī-i nö ṙā-ang in nup tövai ihong alapastör marpöl i Aikup.”
^ Ngëichköm Tahëng Ātiköl B14.
^ Hēk, “līplö; tainy.”
^ Hēk, “nö ūichtöre nö ik mīs.”
^ Ṙô Krīk, “tö vī-i nö lökngörit in ngam angkūr.”
^ Hēk, “salmai.”
^ Ṙô Krīk, “fukngö yin min.”
^ Ṙô Heprāi hēk Aramik ön ngih ṙô, tö ngö manah “Kayööngö”
^ Hēk, “höng lōnu.”
^ Hēk, “kūöṅnen chehen alaha.”
^ Hēk, “löknyi.”
