Kahūich Mākös 4:1-41
4 Haköphöti hēk anga-aṅ nö chuh kūö mai, ngaich maṙôngö yik tarik yamihtöre nö in ò. Lökten anga-aṅ nö yôklö nö el ök töhěng nòng kupòk ngaich havai rôvatre tö ngam kuyāyö nö ūichhak nö haköpten yik tömaṙôngö. Höng sökhak pöri nö ṙòkhöre yik tömaṙôngö nö ikūö mai.
2 Pōyen nuk ṙô ò nö haköpten cha nö inchō-ovṙô nö ngö ṙô:
3 “Hangihtöre yin! Hěngtak ök yōm panô-òṅ kumröönngöre nö teūich.
4 Hē ò ngaich nö ṙònghöichṙen nö teūich rīkre ngaich nuk kulöl, tö suktöre ngaich fuk taseū talöökö, yihtöre ngaich nuk chehechōn nö nyāngen u.
5 Rīkre nuk kulöl tö suktöre nö el tö ihōngu, tökūöṅnen tumlat, ilööṙen ngaich anū-ö nö sīöplö pön öt aṙū ngam tumlat.
6 Hē ngam tavūöi pöri nö meutlö, ngaich ilöö nyangngö anū-ö pön öt ṙēhěvö.
7 Rīkre pöri hēk nuk kulöl tö suktöre nö el töchökhukūö, ngaich kihngen sanīöpö anū-ö tö tī nuk töchökhukūö chōn, pön rāiti kui tö tī u.
8 Ōt pöri hēk nuk kulöl tö suktöre nö löö el tövai tumlat, ngaich sīöpnyi ṙòng anū-ö, rīkre in u tö 30 ṙòng, 60 ṙòng hēk 100 ṙòng inrē.”
9 Ngö ṙô hēk anga-aṅ: “Ngòh tö elnāngu hökngen ò yēḵ nö akaha elnang tö në ṙô chu.”
10 Hē Yēsū ngaich nöng hěngtöṙah, yihtöre ngaich yik tö Nëtsīön tak mahaköp, tö yik tahëng inrē tarik, nö hatöönö ò tö inlahen minë inchōḵ-oṙô ò.
11 Ngö ṙô pöri ang Yēsū nö in cha: “Höng yī-ö yin tökē-ĕvkūö tö mikah elmatre tö minë ṙô tö hayūni manah, inlahen ngam Pūlngö ngam Tēv, höng hòṅ inchō-ovṙô pöri ayī-ö yěi vë-ekūö vē tahëng tarik,
12 pò cha nöng mātu hö-ö pöri nö meuk, hāngö u yin hö-ö pöri nö akaha elnang tö manah u, hö-ö yin min nö havöötö kūöre öt rēhěn nö teūngen tö inṙē-ělre.”
13 Ngö ṙô hēk anga-aṅ: “Yēḵ yīö öt akaha elnang tö ṙô ngih inchōḵ-oṙô, ngaich sitih inlahen min öi akaha elnang tö manah minë tahëng inchōḵ-oṙô?
14 Teūich tö ngam ṙô an ngam tameūich.
15 Ngam kulöl tö teūichtu nö i taseū talöökö, cha-a yin tarik töng hamang ngam ṙô; ilööṙen pöri ngam Satān nö yihtöre ngaich kēngö ngam ṙô ngam tö teūichtu.
16 Ngatī ṙēngen ngam kulöl tö teūichtu nö ikui öp ihong öp töng rahëichyen tumlat, cha-a yin tarik töng ilöö ṙamölōn nö hang ngam ṙô ngaich hō-en e.
17 Öt ṙēhĕvö pöri nö in re, lökten nöng rahëichtaṙen, yěn yih pöri nup kanihngen cha tö kūö ngam ṙô ngaich ilööṙen cha-a nö ṙāngenre nö ṙatö-ellōnre* nö in ngam ṙô.
18 Ōt minë kulöl tö teūichtu nö ihôi minë tö chökhukūö chōn. Cha-a yin tarik töng kô-en nöng hamang ngam ṙô,
19 kūö nup piṙūtköre pöri cha-a kuilōn ngih nômö i në ṙētak hī,* hēk nup inchīlö tö ngam pësa, nup töt kūöngu inrē kuilōn tö rāingö kui tī tö ngam ṙô, ngaich öt ṙôngu anū-ö.
20 Im manā-aṅ, ngam kulöl tö teūichtu nö el tövai tumlat, cha-a yin tarik hamang ngam ṙô ngaich ṙamlōn takô nö hō-en e ngaich ṙônguvö, ōt tö 30 ṙôken, ōt tö 60 anāi ṙôken hēk ōt tö 100 ṙôken ṙòng inrē.”
21 Ngö ṙô hēk ang Yēsū tö cha: “Ōt hòng tarik tamòttö kūö ëāṅvö ngaich ṙāḵten u nö elkatòh kuvôkö? Hēk ṙāḵten u inrē nö elkatòh pölöng? Öt ṙāḵlen u hòng cha-a nö ikui mīs?
22 Pön öt hěng min töhayūni nö töt meūkö, öt hěng töhayūni nö töt meūkö min tö yip tömaṙôngö.
23 Ngòh tö elnāngu hökngen ò yēḵ nö akaha elnang tö në ṙô chu.”
24 Ngö ṙô hēk ang Yēsū tö cha: “Chumkūöṙen yin hangihtöre tö nup ahangre ṙô. Pön nup tī yīö öi kalah holre, anū-ö min kinlaha yīö, mötlö ṙôken kinlaha min inrē yī-ö tö nup tī yīö öi kalah holre.
25 Pò ngòh tö īnu, ngaich kē-ěvkūö min anga-aṅ nö hēk ngaich pōyen aṅ in min anga-aṅ, ngòh töt īnu pöri, kē-ěyö min nö ṙòkhöre nup töng aṅ in ò ngaich öt aṅhavin min anga-aṅ.”
26 Ngö ṙô hēk anga-aṅ tö cha: “Sā ṙēngen öp tö hěngtak an tarik ngam Pūlngö ngam Tēv, öp tamūingö nup kulöl nö el öp panô-òṅre.
27 Örheūheu ngam tarik nö haṙòh tö hatööm ngaich choholre tö peuheū, hē e minë kulöl nö pöpnyörekūö ngaich kahngenre nö sīöp, öt akahakūö pöri anga-aṅ tö inlahen u.
28 Hiṙeūtkenre ngam tumlat nö kētö ṙòng, nöng kahngenre, urěh nö pöpnyöre kūö, meunylö hēk ngam chūök ṙòng ngaich im manā-aṅ ngam ṙòng nö el ngam chūökre takô.
29 Ngaich yěn yih ngam kanöönyö ṙòng ngaich kētökūö ngam kanötre* anga-aṅ, pön ngaich ngam ṙētak unvòhò nö yih.”
30 Ngö ṙô hēk anga-aṅ: “Sitih ṙô öi min asāten ngam Pūlngö ngam Tēv, hēk asuh öp min inchōḵ-oṙô hī tö e yěi hòṅ ṙôten e?
31 Sā ṙēngen öp kulöl rāi an, yěn teūichtu ngam kulöl nö el tumlat töng kun kun takô angū-ö tö minë tahëng kulöl, yěn teūichtu nö el tumlat.
32 Yěn sīöplö pöri angū-ö ngaich kirööngö mineūkö tö nup söpchī el panô-òṅ. Ngaich vī-ingre anga-aṅ nö tökiröng nö chōn ngaich pōyen nup chehechōn el kahôiyö kumteūtöre nö irōi ò.”
33 Ngatī inlahen anga-aṅ nö kētö inchōḵ-oṙô nö asā öp tölngö mikah elnang cha, ngatī inlahen misī ang Yēsū nö vë-eny nang cha tö ṙô ngam Tēv.
34 Kô-en anga-aṅ nö öthō nö vë-ekūö më tarik nöng öt inchōḵ-ovṙô, mikahtö elnang yik haköptöre pöri anga-aṅ tö manah minë ṙô yěn höng hěngtak nö in cha.
35 Hē e angū-ö sakāmö tö lā harap ngö ṙô anga-aṅ tö yik haköptöre: “Ta-a töi havāngngöre chuh lāmuh tö ngam mai.”
36 Lökten, unôichrit cha nö hökngöröön yik tömaṙôngö nö ṙāngen cha ngaich kē an cha-a nö el ök kupòk, ōt inrē nuk tahëng nòng kupòk holröön ök kupòk cha.
37 Chalô ngaich tök yöng chanôchö nö el ngam mai, fohtöre ngam mahūvö nö i kaha ngam kupòk lökten nö hòṅ tööḵlö ël ngam kupòk tö ngam mai
38 Höng tōmkui re pöri ang Yēsū nö lā rit ngam kupòk nöng haṙòh. Kilanglen ò ngaich yik mahaköp ngaich ngö ṙô: “Mahaköphöti, öt meūkö hī öm kan ngaich öi chuh im öt kanòlô?”
39 Choholre ngaich anga-aṅ nö vëkö ngam kuföt ngaich ngö ṙô tö ngam mai: “Hush! Ṙāḵtöre man!” Ṙāḵtö röönre ngaich ngam kuföt, öt halönyköre takô ngaich ngam mai.
40 Ngö ṙô ngaich ang Yēsū nö in cha: “Kūö yòh öi ngatī pinhë-eṅkūö?* Höng öl öi hòṅ ṙatö-ellōnre?”
41 Yīhi pinhë-eṅkūö pöri ngaich cha-a, ngaich ngö ṙô nö vë-ekūöre: “Achīö takô ang ngòh tarik? Uroh ngam kuföt tö ngam mai inrē nö hang chööngö ò.”
Footnotes
^ Ṙô Krīk, “fukngö.”
^ Ngam tö ngö, nup tökuvôt aṅtī hī yěi uvòh.
^ Hēk, “kūö yòh öi röyö ellōn?”