Kahūich Mākös 5:1-43
5 Havāngngöre hēk cha-a nö chuh im tahëng lā kaha ngam mai, ngaich teung nö im panam Keresēn.
2 Hē Yēsū ngaich nö yôkti nö ṙā-ang el ök kupòk, hěngtak ngaich ök tarik tö aṅhav el alaha tö tötlöök ma-ahānga, löknyö kui kupah anga-aṅ nö kunyī-inyre ngaich yihtöre nö in ò.
3 Höng mi-iyöng kui kupah anga-aṅ, öt hěngtak tökô nö nyëkngen ò, pòrô lang cha-a nö nyëkngen ò tö sayōk.
4 Ṙōlheuh anga-aṅ nö nyëki tö sayōk, halööki kël hēk kalröön inrē tö inlök, sön anga-aṅ nö litòkngen nuk sayōk hēk likölngen nuk inlök inrē. Öt hěngtak tökô nö yihtöre nö ṙapken ò.
5 Höng örheūheu anga-aṅ tö hatööm hēk sakāmö nöng ayôṙa nö ikui kupah hēk ikui rôngö inrē, ngaich ṙat alahare anga-aṅ tö ihong.
6 Hē ò pöri nö meūkö Yēsū nö marôvat, faltöre ngaich anga-aṅ nö in ò, ngaich sōnngöre nö salāman.
7 Pōitô ngaich anga-aṅ nö hū-a nö ngö ṙô: “Më-eṅ Yēsū Kūön ngam Tēv Lamātulöng, asuh öp lōn meh in chu? I minë-eny ngam Tēv ṙô chin öich kilēḵngôre öich vë-ekūö meh, uh man öt hakòlô chu.”
8 Ṙën anga-aṅ nö ngatī ṙô nö in Yēsū, kūö ò nö ngö ṙô: “Më-eṅ tötlöök ma-ahānga, kunyī-inyre man ṙā-ang el alaha ngòh tarik.”
9 Ngö ṙô pöri ang Yēsū nö hatöönö ò: “Achīö öp minë-eny meh?” Ngaich ngö ṙô anga-aṅ: “Pöltön öp minë-eny chu, kūö ih öi pōyen takô.”
10 Höng ṙōlheuh ṙô pöri anga-aṅ nö vë-ekūö Yēsū, pön sōḵ nö ahōnyu nö ṙā-ang ikūö ngam panam.
11 Pōyen nup muh ha-un tö ṙònghöichṙen nö hanëlöng nö ikui rôngö.
12 Lökten yik tötlöök ma-ahānga nö ngö ṙô nö in ò, nö hòṅ aṙētu ṙô: “Yēḵ meh hòṅ tīnngörit ih öi kiröönngöre, tölṙô ih man yēḵ öi höng kuhēthötre öi el alaha minë ha-un.”
13 Halöngten cha ngaich anga-aṅ nö kiröönngöre. Kunyī-inyre ngaich yik tötlöök ma-ahānga nö ṙā-ang el alaha ngam tarik, ngaich kuhēthötre nö el alaha nuk ha-un tö 2,000 ṙôken ngaich veut nö fal, ngaich tisūtöre nö löktö kui rôngö nö chuh el mai ngaich ṙòkngörevah nö kapah.
14 Ngaich pöri yik mahanëlen u nö falngöre nö chuh im panam nö vë-eny nang yik tarik tö inlahen u, ngaich yihtöre yik tarik nö ngëichkö ök inlahngen cha.
15 Yihtöre ngaich cha-a nö chuh in Yēsū, ngaich meuk ngam tarik acha-a nö ūichhaka ngam tö aṅhav el alaha sin tö yik tötlöök ma-ahānga, anga-aṅ ön ngòh tarik ngòh tö aṅhav el alaha sin tö yik tö pōyen pöltön yik tötlöök ma-ahānga. Meūkö ngaich anga-aṅ tö cha nö inyutu, lööklö ngam elkui ò inrē, pa-ekūö ngaich yik tarik.
16 Yik tö kôtamat nö meūkö e vë-eny nang yik tarik ngaich cha-a tö inlahen ngam tarik ngam tö aṅhav el alaha sin tö yik tötlöök ma-ahānga hēk inlahen nuk ha-un inrē.
17 Lökten cha-a nö tölṙô Yēsū nö ṙāngen ngam panam cha.
18 Hē Yēsū nö yôklö nö el ngam kupòk ngaich ngam tarik tö aṅhav el alaha sin tö ngam tötlöök ma-ahānga nö hòṅ aṙētu ṙô nö hòṅ in ò.
19 Öt halöngngen ò pöri ang Yēsū nö in re, lökten anga-aṅ nö ngö ṙô: “Umu-a man chuh patīre ngaich vë-eny nang yip mak alahare tö inlahen tī Yāvē* nö in meh tö ṙôken miṙēḵlōn ò inrē tö meh.”
20 Kiröönngöre ngaich ngam tarik nö ṙā-ang umuh ngaich vënyen minë la-en Yēsū nö i Tekapòlis* ngaich pingangkūö yik tarik nö ṙòkhöre.
21 Hē Yēsū ngaich nö el ök kupòk nö havāngngöre, hamūlöre ngaich yik tömaṙôngö tarik ngaich yihtöre nö in ò hē ò nö ikūö mai.
22 Hěngtak ngaich ök mākūö chūök vinë-ekūötēv yamihtöre nö in ò ök tö minënyu tö Yāirös, höng meuktöre anga-aṅ tö Yēsū ngaich ilöö afukngöre nö i röön ò,
23 ngaich vë-ekūö ò pön hòṅ aṙētu ṙô nö ngö ṙô: “Aṙētô chu man öm holröön chu, tön hòṅ ngaich öp kūön chu nö lā kinpaha tö kūö öp invahre, kò-òren min öm höng ṙāḵtö tī re ikui ò, ngaich lööken min anga-aṅ töp invahre ngaich aṅ.
24 Kiröönngöre ngaich Yēsū nö holröön ò ngaich maṙôngö yik tarik tamömrit ò ngaich cha-a nöng singngen ò tö kūö ṙôkenre.
25 Hěngtak ök umuh yöngnyīö tö 12 samyeūheu rò-òtökūö nö kunyahen.
26 Kihngen takô anga-aṅ pön ngaich nö ṙōlkang chūök nö chöh chūökre nö le-ënöre, keuheūt takô nuk aṅ in ò rupīö, sön anga-aṅ nöng öt lanöökuṙen tök invahre, höng ṙūöhngenre pöri ngam inlahen ò.
27 Hē ò pöri nö hāngö Yēsū nö umuh yihtöre ngaich anga-aṅ nö lā uk yik tömaṙôngö ngaich lūölkö taseū ök hilā ò,
28 pò ò nö ngö ṙô: “Yēḵ chu min höng lūölkö taseū öp inyut ò, ngaich lööken min chū-ö.”
29 Ilööṙen ngaich ök kunnyahen ò nö nyôklö, akahaiṙen ngaich anga-aṅ tök invahre nö lööken.
30 Ilöö akahaiṙen ngaich Yēsū tök kumlēḵre nö kunyi hē e, havöötökūöre ngaich anga-aṅ nö in yik tömaṙôngö ngaich ngö ṙô: “Achīö öp lamūölkörit ngih hilā chu?”
31 Ngö ṙô pöri yik mahaköp: “Höng öt meuk ṙôken më tömaṙôngö öm kan nö singngen meh, ngaich kūö yòh öm hatön öm ngö ṙô, ‘Achīö öp lamūölken chu?’”
32 Chöh chūök matre ngaich ang Yēsū nö ngëichken ök tö tī-iv.
33 Hē ngam yöngnyīö ngaich nö akahaiṙen töre nö lööken, holtö pinhë-eṅkūöre ngaich anga-aṅ nö yihtöre nö in ò ngaich afukngöre nö iröön ò ngaich keuheūtnyö ṙôre nö vënyö nuk inlahen re.
34 Ngö ṙô ngaich ang Yēsū nö in ò: “Kakūönö, ngam ṙinatö-ellōn meh an tölööken tī tö meh. Kuṙòh kiröönngöre ngaich, uh man pa-ekūö, öt hēk man min yīhiv tö ngih invah.
35 Hē ò nö ṙònghöich ṙô nö ṙò-òv, yihtöre ngaich yik tarik alaha ök mākūö chūök vinë-ekūötēv, ngaich ngö ṙô: “Ngaich öp kūön meh nö kapah! Ngaich kūö yòh min hēk öi hakihten ngam mahaköphöti?”
36 Hanglöre ngaich ang Yēsū tö ṙô cha ngaich ngö ṙô nö in ök mākūö chūök vinë-ekūötēv: “Uh man pa-ekūö, höng ṙatö-ellōnre man.”
37 Öt halöngten yik tahëng pöri anga-aṅ nö holröön ò, höng hē Pītör, Yāköp, tök kahëm ò Yôhan.
38 Hē cha ngaich nö teung nö i patī ök yöngṙen chūök vamëkūötēv, ngaich meuk ök yöng tinṙōlen cha-a nö umuh, pōitô yik tarik nö peuiny, harāmöre inrē.
39 Ngö ṙô ngaich ang Yēsū nö in cha unôichrit ò nö kuhēthötre: “Kūö yòh öi peuiny hēk harāmöre? Hö-ö ön ngòh nyīö nö kapah, pò ò nöng haṙòh.”
40 Hayīölngen ò ngaich cha-a hē cha nö hang ṙô ò, tölṙô yik tarik pöri ang Yēsū nö ṙòkhöre nö kunyī-inyre ngaich holtö nak yöng ök nyīö tö yik hol ò inrē nö kuhēthötre nö chuh in ök nyīö kikānö.
41 Kēḵ kël ök nyīö kikānö ngaich ang Yēsū, ngaich ngö ṙô: “Talitā kūmi” ngam tö ngö manah: “Më-eṅ nyīö kikānö ngö ṙô chin tö meh, ‘Choholre man!’”
42 Ilööṙen ngaich ök nyīö kikānö nö choholre ngaich kiröön. (12 höiny samyeūheu ṙēḵti anga-aṅ.) Ṙamlōn takô ngaich cha-a hē cha nö meūkö e.
43 Kētö chööngö pöri ngaich ang Yēsū nö sōngen cha nö vë-eny nang tahëng tö ngam inlahen ò, ngaich tölṙô cha anga-aṅ nö kētö nyā-aṅkūö ök nyīö kikānö.
