Kahūich Mākös 6:1-56
6 Kiröönngöre hēk ang Yēsū nö ṙā-ang umuh, ngaich chuh im panam ngam chūök inruklö ò, holröön ò inrē yik haköptö ò nö umuh.
2 Hē ngam Haneūheu Töhet Sakāmö nö yih, ngaich haköphöti anga-aṅ nö el chūök vinë-ekūötēv. Ṙòkhöre yik töng hamang ṙô ò nö pingangkūö. Ngaich ngö ṙô, “Lamöktö yih ön në heuneū-eu ṙô ngòh tarik nö haköphöti? Lamöktö yih ön në mikah aṅ in ò hēk löktö yih kumlēḵ anga-aṅ nö la-evṙen tö në la-en pinngangkūö?
3 Röh ang kan ngòh nö kūön Mariā, ngòh töheuveū nö ṙat chōn, nö mëm hē Yāköp, Yòsěf, Yūta hēk Sīmōn inrē? Röh yip ṙung kanānö ò nö iyöng nö ihôi hī?” Lökten cha-a nö öt hòṅ ṙatö-ellōnre nö in ò.
4 Ngö ṙô pöri ang Yēsū tö cha, “Keuheūtngöre chūök minlēḵken ön ngòh pròfět nö in minë tahëng panam, hö-ö pöri anga-aṅ nö milēḵkaṙen nö i panamre, i patīre hēk in yip mak alahare inrē.”
5 Lökten nöng haroh tumtak yik tö halankaṙen invah tö ò, öt pōyen hameukti inrē anga-aṅ tö pinngangkūö nö in e.
6 Pingangkūö anga-aṅ hē ò nö meuk ngam ṙinatö-ellōn cha nöng kūöṅnen. Unôichrit e ngaich anga-aṅ nö chuh in minë tö röhta tuhēt nö haköphöti.
7 Havëtö yik tö nëtsīön tak hēk mahaköp ang Yēsū nö in re ngaich nët nët tak tī nö tīnngen cha. Kē-ěkūö cha anga-aṅ tö minhôiṅyö, nö ahōngö tötlöök ma-ahānga.
8 Halēnö cha inrē anga-aṅ tö cha nö mihôiṅ nö keunkö tinkungre, un keunkö ròtī pöri, un rēhěn nö keunkö chūök nyā-aṅre, chūök pësa* re inrē,
9 un rēhěn nö nët tahôl kaheunka tö chehenre, kunröplöre pöri.
10 Ngö ṙô inrē ang Yēsū nö in cha, “Yēḵ yīö min kuhēthötre el nup töng patī, höng ngöh yī-ö öi umuh hanöng sā yīö öl ṙāngö ngam panam.
11 Yěn ōt nup panam chūök yip tarik nö öthō-en yīö hēk sōḵ inrē nö hangṙô yīö, ngaich piṙōngngö pitung röön re yī-ö, yēḵ yīö öi kunyī-inyre, nö minkahngö angū-ö nö in cha.”
12 Kiröönngöre ngaich cha-a ngaich ahānga hòṅ më tarik nö havöötö ellōnre.
13 Pōyen yik tötlöök ma-ahānga tö ahōnyu tö cha ngaich hacham alaha yik tövāhavö cha-a tarik tö tavī-i* nö halanken cha.
14 Hang në ṙô ngaich ök Rācha Heròt, pön keuheūtngöre chūök hināngö nuk la-en Yēsū, ngö ṙô inrē yik tarik, “Yôhan ök Vamôk ön ngòh, ök tö kapah nö ngaich, ngaich hachohlöng nö hēk. Lökten anga-aṅ nö hameuktö në minhôiṅyö la-en.”
15 Rīkre yik tö ngö ṙô, “Ĕlaicha ön.” Ngö ṙô inrē yik tahëng, “Pròfět an, nö tö la-evṙen nö tö sā la-en yik pròfět misī.”
16 Hē Heròt pöri nö hang në ṙô, ngaich ngö ṙô anga-aṅ, “Aṅhlö ök kòl hēk Yôhan ök tö rööki likeun tö Chu.”
17 Pön kē-ě Heròtī ang Heròt nö pīhöre ök pīhö ök kahëm ò ang Filip. Lökten Yôhan nö kē-ě tö Heròt tökūö ṙô Heròtī, ngaich nyëkö tö sayōk ngaich chaphötvö nö el chēl.
18 Pön örheūheu ang Yôhan nö ngö ṙô tö Heròt, “Kūö yòh öm kan kēḵ pīhö öp kahëm re, öm filal chööngö.”
19 Lökten ang Heròtī nö kunyaha elmat tö Yôhan ngaich hòṅ fëlngen ò lang anga-aṅ, ötkô pöri anga-aṅ nö ngatī inlahen.
20 Pön akahakūö ang Heròt tö Yôhan nö tölöök nö tarik hēk tö la-evṙen inrē tö nup tölöök la-en nö ikūö ngam Tēv. Lökten anga-aṅ nö pa-ekūö tö ò, hòṅ laklen ò inrē. Pòrô ang Heròt nö öt akahakūö tö inlahenre unôichrit inlahen ò nö hang nuk ṙô Yôhan. Sön anga-aṅ nöng iṙūöhen nö hang ṙô ò nö holtö ṙanamlōnre.
21 Yih pöri ngaich ngam ṙētak ngam töng ahökkö Heròtī. Infēkö finötnyö Heròt hē e angū-ö, halēnlö tökiröng nyinā-aṅ anga-aṅ hē e ik harap, ngaich havëtu hē e yik tökiröng mā, yik yöngkūö kumyung hēk yik tö akahka tarik aṅ Kelelī.
22 Yih ök kūön Heròtī kikānö nö umuh ngaich kiṙīömhö kūö Heròt tö yik tö havëtu* inrē nö umuh, ṙamlōn yik tahëng tarik tö tī ò. Ngö ṙô ngaich ngam rācha nö in ngam nyīö kikānö, “Öp töng havëkö meh min öm in chu, kē-ěkūö meh chū-ö min tö e.”
23 Kilēḵngôre ngaich ngam rācha nö ngö ṙô, “Havëkö öp töng lōnre man in chu, ngaich mihôiṅ min chū-ö öich haròngtö ngih pūlngö re öich kē-ěkūö meh min tö e.”
24 Kunyī-inyre ngaich ngam nyīö kikānö ngaich hatönkūö ök yöngre nö ngö ṙô, “Asūp öre havëkö chu?” Ngö ṙô ngaich ngam yöng ò kikānö, “Öp kui Yôhan ök Vamôk.”
25 Hē e ngaich ngam nyīö kikānö nöng ilöö kuhēthötre nö chuh in ngam rācha ngaich ngö ṙô, “Lōnu chin tö meh öm ing töngamuh öm kē-ěkūö chu tö öp kui Yôhan ök Vamôk öm el pingāṅl tī.”
26 Haṙivlōn ngaich ngam rācha hē ò nö hāngö e, kūö ò pöri nö chūöku ṙô nö kilēḵngôre, holtuṙah inrē anga-aṅ tö yik yamih tö havëtu,* lökten ngaich anga-aṅ nöng hangṙô ngam nyīö kikānö töm havëkö ò.
27 Ilööṙen ngaich ngam rācha nö tīnngö ök tö sökhak amahati nö kē-ěren ök kui Yôhan. Kiröönngöre ngaich ngam tarik nö chuh el chēl nö rökngö likeun Yôhan
28 ngaich chaplen e nö el ök pingāṅl ngaich kēten e nö eltī ök nyīö kikānö, kētö e ngaich ök nyīö kikānö nö eltī ök yöngre kikānö.
29 Hē yik haköptö Yôhan ngaich nö hāngö e, yih ngaich cha-a nö kēḵ ök alaha ò ngaich ulngen e nö el anūlö.
30 Yihtöre ngaich yik tanīnöṙô nö in Yēsū nö hamūlöre ngaich vë-eny nang ò tö nuk taṙòkhöre la-en kahëken cha nö el ṙôngö yik tarik tö nuk ṙô cha inrē nö haköpten cha.
31 Ngö ṙô ngaich ang Yēsū tö cha, “Ta-a, töi chöh öp tö chēvhakṙen chūök re hòṅ yīö öi rahëichtakūö öi heūheure,” kūö cha nö öt teungtikūö nö nyā tökūö ṙôken yik tarik nöng havötaröön.
32 Lökten ngaich cha-a nö yôklö nö el ök töhěng nòng kupòk ngaich kiröönngöre nö chuh in ök tö chēvngen chūökö nö heūheure.
33 Meukngö chanuhu cha pöri yik tarik nö kiröönngöre, maṙôngö inrē yik tarik tö akahalōn tö inlahen cha nö chuh muh. Ṙòkhöre ngaich yik tarik aṅkūö minë panam nöng fal nö chuh muh ngaich urěhti yīhi tö cha nö umuh nö im chūökö.
34 Hē Yēsū ngaich nö yôkti nö ṙā-ang el ngam kupòk, keuheūtnyöre ngaich anga-aṅ tö miṙēḵlōnre nö meuk më tömaṙôngö, pön sā nup sīṅp cha-a töt yōmsuṙen nup töng parāta. Pōyen ngaich nuk ṙô ò nö haköpten cha.
35 Ngaich angū-ö nö hòṅ harap, yihtöre ngaich yik haköptö ò nö in ò ngaich ngö ṙô, “Tö chēv takô ön ngih chūök hī, ngaich inrē angū-ö nö hòṅ hatööm.
36 Lökten ngaich mihôiṅ nö tīniyö vē tömaṙôngö, hòṅ cha nö havah nyā-aṅkūöre nö in minë töröhta panam.”
37 Ngö ṙô pöri ang Yēsū nö in cha, “Yī-ö yin yēḵ kamëtö nyā-aṅkūö cha.” Hē yik mahaköp ngaich nö hāngö e, ngö ṙô ngaich cha-a, “Ihö hòng havah nup ròtī tö 200 tinār* ṙāi ngaich kētö nyā-aṅ cha öi hanëlen cha?”
38 Ngö ṙô ngaich ang Yēsū nö in cha, “Kuṙòh, ngëichkö ṙôken nup ròtī yin aṅ in yīö.” Ik sā cha ngaich nö ngëichhören u ngö ṙô ngaich cha-a, “Taneui nun në ròtī, ngaich nët nòng në kāḵ.”
39 Tölṙô cha ngaich ang Yēsū nö ūichngöre nö ikui nuk tingūyö.
40 Hatöököre ngaich cha-a nö kö hěng hēngòng hēk taneui taneui anāi ṙôken.
41 Kētam ang Yēsū tö minë tö taneui ròtī, tö minë tö nët nòng kāḵ inrē, ngaich môklö kūöre nö el halīöngö nö ha-öiny ngam Tēv nö vë-ekūötēv. Liköl nuk ròtī ngaich anga-aṅ ngaich kē-ěkūö yik haköptöre hòṅ cha nö katöl yik tarik, katölhökūö cha inrē anga-aṅ tö nuk tö nët nòng kāḵ.
42 Ṙòkhöre kūö ngaich cha-a nö nyā nö tööḵngen
43 ngaich kēḵ nuk chööḵkūö cha-a, 12 kumvôkö anū-ö nö tööḵlö, ōttit inrē nuk kāḵ.
44 Lohten nö 5,000 ṙôken yik kikōnyö nyamā nuk ròtī.
45 Ilööṙen hēk ang Yēsū nö tölṙô yik mahaköp nö yôklö nö el kupòk ngaich havāngngöre nö chuh Petsĕitā hanöng sā ò nö hökngörit yik tömaṙôngö.
46 Unôichrit kinheūten ò nö tīnngörit yik tömaṙôngö, vë-ekūötēv ngaich anga-aṅ nö ikui rung.
47 Yih ngaich ngam harap, ellōn ngam mai ngaich ngam kupòk, höng hěngtak pöri anga-aṅ nö ikui rung.
48 Meuk ngam tökalēḵ ngaich anga-aṅ chanôichö, kihngen inrē yik haköptö ò nö kū-ö urěh tī töm kupòk kūö ngam kuföt nö asatkūö cha. Im finënö pāt alaha ngam hatööm* pöri anga-aṅ nö kiröön nö lök kui ngam mai nö yihtöre nö in cha ngaich sā tö hòṅ chööḵngen cha anga-aṅ nö kū-ö tö lā urěh.
49 Hē yik mahaköp ngaich nö meūkö ò nö kiröön nö lök kui ngam mai, ngö lōn ngaich cha-a, “Höng sanehkūö hī ön lohten!” Ayôṙa ngaich cha-a nö pōitô.
50 Kūö cha nö ṙòkhöre nö meūkö ò, lökten nö pa-ekūö. Ilööṙen pöri anga-aṅ nö vë-ekūö cha nö ngö ṙô, “Hangöönöre yin, chū-ö chin kòl, uh yin öi pa-ekūö.”
51 Yôklö ngaich ang Yēsū nö el kupòk ngaich ṙāḵtöre ngam chanôichö. Pingangkūö ngaich cha-a nöng ellōnre lōn,
52 Pön öt akahakūö cha-a tö manah ngam pinngangkūö hameuktö ò hē ò nö katölngö nuk ròtī, kūö cha nö ngëṅngöre ellōn.
53 Hē cha ngaich nö havāngngöre nö lāmuh töm kuyāyö, ngaich yihtöre nö im panam Keneseret ngaich sukngö kirap ngam kupòk re cha-a.
54 Hē cha pöri ngaich nö yôkti nö ṙā-ang el ngam kupòk, ilöö akahakūö ngaich yik tarik tö Yēsū.
55 Faltöre ngaich yik mi-iyöngkūö ngam panam nö in ò ngaich keuntö yik tövāhavö nö el chamamre nö chuh in Yēsū ök chūök ahang cha tö kamngö ò.
56 Ngaich nuk töng chūök Yēsū tuhēt, elpanam, tavat inrē, ṙòkhöre yik tarik nöng ṙāḵtö yik tövāhavö nö el pachār, hòṅ aṙētu ṙô inrē cha-a nö vë-ekūö ò nöng lūölkö taseū ök hilā ò. Ngaich yik tarik lamūölkö taseū ök hilā ò, ṙòkhöre ngaich cha-a nö lööken.
Footnotes
^ Ṙô Krīk, “mās.”
^ hacham alaha yik tövahavö cha-a tarik tö tavī-i: Höng inchō elmat hī ngam manah ngam tavī-i nö ihih. Rö-ö pön ṙöstu misī ngam tavī-i nö sā lanë-en nö ikūö vah (Asātô e im Lū 10:34), Hö-ö pöri nuk invah nöng kūö tī ngam tavī-i nö lööken pön löktö im töhet kumlēḵ anū-ö nö lööken misī.
^ Hēk, “nö ūichtöre nö ik mīs.”
^ Hēk, “nö ūichtöre nö ik mīs.”
^ Ngëichköm Tahëng Ātiköl B14.
^ im tö lūöi köiny ṙô söl im tö tafūöl köiny ṙô tö peuheū.
