Kahūich Mākös 7:1-37
7 Yihtöre ngaich yik Feresī tö yik kamūich nö hamūlöre nö in ò, yik yamih nö umuh nö löktö Yērūsalem.
2 Pön meuk yik tö haroh tumtak haköptö ò nöng öt söichtīre ngaich nöng nyā.*
3 (Kūö vē Feresī hēk Yahūti nö ṙòkhöre nö hamang nuk chööngö yik muvöhngöre misī. Nö öt hō nö nyā yěn öt söich tīre nö söl sikòng këlre tī.
4 Öt hō cha-a inrē nöng ilöö nyā yěn havan nö löktö el pachār yěn öl nö söichlö alahare tö mak. Ōt inrē minë tahëng chööngö kahëtö yik muvöhngö cha nö tötkô nö öt hāngö tö cha, tö sā minë kulah chūök òk, chūök ṙinösnyö òk, mās tanīöyö inrē nö hòṅ söichlöng tö mak.)
5 Lökten yik Feresī hēk tö yik kamūich nö ngö ṙô nö hatöönö Yēsū: “Kūö yòh aich më haköptö meh nö öt hang chööngö yik muvöhngö ih nöng öt hëtö kuntī yěn nyā?”
6 Ngö ṙô pöri ang Yēsū tö cha: “Kò-òṙô ök pròfēt Isayā nö eūkö inlahen yīö, öi höng sā mahanyatkö elmat, nö ngö ṙô, ‘Höng i minuhre ṙô yin nö milēḵṙen tö chu, marôvat pöri minë ellōn cha tö chu.
7 Höng chök alaha yin nö ha-öönyö chu, kūö cha nö vënyö minë chööngö vahī tarik nö chööngö ngam Tēv tö ṙô cha.’
8 Ṙāngö minë chööngö ngam Tēv yī-ö ngaich köptī öi kiṙapkö minë chööngö vahī tarik.”
9 Ngö ṙô hēk anga-aṅ: “Heuveū-en yī-ö öi sō-en minë chööngö ngam Tēv, pöi ööire tö minë chööngö vahī tarik.
10 Tö sā ngih ṙô Môsös misī, nö ngö ṙô, ‘Milēḵṙen man tö minā yöngre kikōnyö hēk kikānö inrē,’ hēk, ‘Ngòh töt lamëḵkôre tö yöngre tö kikōnyö hēk kikānö, ngaich tö hòṅ fëli anga-aṅ.’
11 Ngö ṙô pöri yī-ö, ‘Yēḵ ngòh tö hěngtak tarik nö ngö ṙô tö ngam yöngre kikōnyö hēk yöngre kikānö: “Nuk töng mi-in chu chehen, nuk tö mihôiṅ nö yöölen tī öre tö meh kurpān anū-ö tö tī chu (ngam tö ngö, kētu nuk ngaich tö chu nö in ngam Tēv),” ngaich töt vaich angū-ö tö ṙô yīö.’
12 Ngatī inlahen yī-ö öi öt halöngten ò nö rahëichyen tī nö hayööken ngam yöngre kikōnyö hēk ngam yöngre inrē kikānö.
13 Ngatī inlahen yī-ö öi haköptö minë chööngö vahīre, öi filal minë chööngö ngam Tēv. Pōyen nup inrē tö ngatī la-en yīö.”
14 Havëten yik tömaṙôngö hēk anga-aṅ nö in re ngaich ngö ṙô tö cha: “Hangihtö ṙô chu yin öi ṙòkhöre, ngaich haköp manah në ṙô chu.
15 Nup töng sitih lamöktö lātunyī kumhëthötre nö chuh ellōn ngòh tarik, öt hō anū-ö nö chōchngöre tī min tö ò, nup töng sitih pöri lamöknyö lātuhēt ngaich kunyī nö ṙā-ang ellōn ngòh tarik anū-ö min tö chōchngöre tī tö ò.”
16 * —
17 Hē ò ngaich nö ṙūöhöngre tö yik tömaṙôngö, ngaich kuhēthötre nö el ök töhěng patī, hatöönö ò ngaich yik haköptö ò tö manah ngam inchōḵ-oṙô ò nö in cha.
18 Ngö ṙô ngaich anga-aṅ tö yik haköptöre: “Höng öl öi yī-ö inrē öi akaha elnang öi sā cha? Höng öt akaha elmat öi yī-ö, tö nup lamöktö lātunyī, kumhēthötre nö chuh ellōn ngòh tarik, hö-ö anū-ö nö chōchngöre tī tö ngòh tarik,
19 kūö u nö öt chuh im ellōn ò chuh el ngam aich ò pöri ngaich kunyī hēk nö chuh lātunyī nö löknyö el ngam puhū ò.” Ngatī ṙô anga-aṅ nö vënyen minë töng sitih nyā-aṅkūö tö nyā-aṅ tö hī nö töhet.
20 Unôichngöre hēk anga-aṅ nö ngö ṙô nö in cha: “Nup lamöktö lātuhēt pöri nö kunyī nö ṙā-ang ellōn ngòh tarik anū-ö nup töchōchngöre tī tö ò.
21 Pön höng löknyö lātuhēt im ellōn ngòh tarik, nup tötlöök lōn nö kunyī, lökten anga-aṅ nö kēken ngam chinô-òṅkānö,* unlāya, finël tarik,
22 insěha,* yinikhanga, tötlöök la-en, inchīlö, töt sinrōngkūö la-en,* ranāinyngö,* minṙēḵngö, tanāilölōn, kumlō-ovö inrē.
23 Ṙòkhöre në öt lanöökö kumnyī nö ṙā-ang ellōn ngòh tarik, ngaich anū-ö tö tī-ivö tö ò nö öthet.”
24 Choholre ngaich Yēsū nö ṙā-ang umuh, ngaich kiröönngöre nö chuh in minë panam Tūrös hēk Sītōn inrē kuhēthötre ngaich anga-aṅ nö el ök töhěng patī, sōḵten yik tarik lang anga-aṅ nö akahalōn tö ò nö umuh, sön anga-aṅ nö ötkô nö hayunngöre tö yik tömaṙôngö.
25 Hěngtak ngaich ök yöngnyīö ök tö kūönu tök nyīö kikānö tö aṅhav el alaha tö tötlöök ma-ahānga, hē Yēsū nö yihtöre nö umuh, hang inlahen yanīhi ò ngaich ök yöngnyīö ngaich yihtöre nö in ò, ngaich afukngöre nö iröön ò.
26 Ṙamô Krīk ök yöngnyīö nö aṅ Finikē aṅkūö ngam panam Siriā, hòṅ aṙēḵtu ṙô anga-aṅ tö ò nö kēnyen ngam tötlöök ma-ahānga nö el alaha ngam kūön ò.
27 Ngö ṙô pöri ang Yēsū tö ò: “Hökngen vē nyīö nö urĕh nö hatöö-öiṙen nö nyā, tön ötkô nun në nyā-aṅkūö nyīö nö kavaltu nö ikūö kun am.”
28 Ngö ṙô pöri ngam yöngnyīö: “Mā lööngö ṙô man, sönen pöri ṙung në kun am nö nyā nup pinṙōngö, nup tösuktöre nö ṙā-ang el mīs yip nyīö.”
29 Ngö ṙô ngaich ang Yēsū hē ò nö hang ṙô ò: “Asā ṙô meh ngaich, lökten kuṙòh; ngaich an ngam tötlöök ma-ahānga nö kunyī-inyre nö ṙā-ang el alaha ngam kūön meh.”
30 Kiröönngöre ngaich ngam yöngnyīö nö chuh patīre ngaich meuk ök kūönre nöng ṙōlhaka nö el ök chamamre, ngaich ngam tötlöök ma-ahānga nö kunyī-inyre nö ṙā-ang el alaha ò.
31 Hē Yēsū ngaich nö kiröönngöre nö ṙā-ang im panam Tūrös ngaich havantöre hēk nö im mai Kelelī nö lökngö Sītōn hēk lökngö ellōn ngam panam Tekapòlis* inrē.
32 Kēten ök tarik ngaich cha-a nö in ò ök töthang hēk tösiknyô inrē nö ṙò-òvö ngaich cha-a nö hòṅ aṙēḵtu ṙô tö Yēsū nö hōten ò nö ṙātö eltīre nö in ò.
33 Haköhngenre ngaich ang Yēsū tö yik tömaṙôngö ngaich chaphöt kuntīre nö elnang ò. Unôichrit ò ngaich nö kösnyö kūöre, lūölkö litāk ò ngaich anga-aṅ.
34 Ngaich môklö kūöre nö ngëichkö el halīöngö, ngaich uhômlöre nö ngö ṙô: “Effata” ngam tö ngö manah, “Löpnyökūöre yēḵ.”
35 Löpnyörekūö elnang ngaich ök tarik, heveū-eu ṙô inrē ngaich nö ṙò-òvö.
36 Kētö chööngö pöri ang Yēsū nö in ò nö un hěngtak vahë-eny nang, sā sinôngen ò pöri nö vë-eny inlahen re, vaichtö ṙūöhnyôre hēk anga-aṅ nö vë-eny nang yik tahëng tö inlahen re.
37 Kô-en ngaich yik tarik nö pingangkūö, ngaich ngö ṙô: “Lööken tī an inrē tö vē töt hang nö hang, vē tötkô inrē nö ṙò-òvö nö mihôiṅ nö ṙò-òvö.”
Footnotes
^ Ngam tö ngö, öt ha-etlöre nö sā nuk chööngö yik muvöhngöre.
^ Ngëichköm Tahëng Ātiköl A3.
^ Ṙô Krīk, “mat tö tööḵlö tö ranāinyngö.”
^ Hēk, “kamtö chūök minë tö söm elpanam.”
