Inhānga Kahūich Yôhan 10:1-42
10 “Tökò-òṙô Chin tö yīö, ngòh töt kumhēthötre nö lökhötkūö inkūp patī sīṅp, tahëngö talöökö pöri nö yôkhötre, anga-aṅ an mu-ulāiya hēk tötūmu inrē.
2 Ngòh kumhēthötre pöri nö lökhötkūö inkūp anga-aṅ an yōm sīṅp.
3 Löpnyukūö anga-aṅ tö ngam yōmkūö inkūp ngaich akahakūö minë sīṅp tö ṙô ò. Kēḵ minë-eny minë sīṅp re anga-aṅ ngaich havënyen u nö elkahôyö.
4 Yěn ṙòkhöre ngaich minë sīṅp nö elkahôiṙen ngaich urēhěkūö u anga-aṅ nö kiröön ngaich chūkörit ò minë sīṅp ò, kūö u nö akahakūö tö ṙô ò.
5 Öthō anū-ö nö chūngörit yip töt mikahkūöre, pön öt akahakūö anū-ö tö ṙô yip töt mikahkūöre.”
6 Kētö ngih inchōḵ-oṙô ang Yēsū nö in cha, öt akaha elnang pöri cha-a tö ṙô ò.
7 Lökten hēk ang Yēsū nö ngö ṙô: “Tökò-òṙô Chin tö yīö, chū-ö chin lökhötkūö inkūp minë sīṅp.
8 Yip yamih pöri nö i chūök chu, ṙòkhöre cha-a nö mu-ulāiya hēk tötūmu inrē, hö-ö pöri minë sīṅp nö hang ṙô cha.
9 Chū-ö chin inkūp ngaich ngòh lamökhöt in chu min nö kuhēthötre, teūngen min anga-aṅ tö inyöökenre hēk kuhēthötre kunyī-inyre inrē ngaich teūngen min anga-aṅ tö nyā-aṅkūöre.
10 Höng yamih ön ngòh mu-ulāya nö ulāya, fëlhanga hēk ahethanga inrē. Ṙën pöri chū-ö öich yih hòṅ minë sīṅp nö teūngen tö nômöre ngaich pōyen taneūngen tö e.
11 Chū-ö chin tö akaha yōm sīṅp, mihôiṅ ön ngòh tö akaha yōm sīṅp nö kēngö nômöre nö chö-öinyten tö minë sīṅp re.
12 Öp tarik tö kētu rineushö, öt tökô-en anga-aṅ nö yōm sīṅp, ötrēhěn anū-ö nö tökô-en nö sīṅp ò ngaich yēḵ ò nö meuktö yanīhi öp am aṅ el inchōn ngaich höng ṙāngen minë sīṅp anga-aṅ (ngaich minë am aṅ el inchōn nö kap minë sīṅp ngaich paratī anū-ö)
13 pò ngam tarik nö töng kētu rineushö, lökten anga-aṅ nö öt chumkūöṙen tö minë sīṅp.
14 Chū-ö chin tö akaha yōm sīṅp, akahakūö chū-ö tö minë sīṅp re ngaich akahakūö inrē anū-ö tö chu.
15 Sā inlahen ngam Yöng nö akahakūö tö chu, akahakūö chū-ö inrē tö ngam Yöng. Kēngö nômöre chin öich chö-önytö minë sīṅp re.
16 Ōt nup inrē sīṅp chu nup töt aṅ el ngih patī sīṅp, anū-ö nup inrē tö hòṅ lukka tö chu. Hang ṙô chu min anū-ö ngaich hěng kiteūm min nö elkatòh ngam töng hěngtak yōm sīṅp.
17 Lökten an ngam Yöng nö hangenlōn tö chu, pò chu öich kēngö nômöre hòṅ chu hēk öich teūngen tö cha.
18 Öt hěngtak tarik tö kô nö kēngen ngih nômö Chu nö ṙā-ang in chu, kahngenre pöri Chū-ö öich kēngen e. Mihôiṅ chin kēngen e hēk havanö e inrē, pò chu öich teūngen tö chööngöre öich löktö im Yöngre.”
19 Ngaich hēk yik Yahūti nö taṙōlaṙen tö kūö në ṙô.
20 Pōyen yik tö ngö ṙô: “Aṅhav el alaha an kòl tö tötlöök ma-ahānga ngaich nö katūöilöng elkui. Kūö yòh yī-ö öi hang ṙô ò?”
21 Ngö ṙô yip tahëng: “Hö-ö ön ngih nö ṙô tarik tö aṅhav el alaha tö tötlöök ma-ahānga, ōt hòng tötlöök ma-ahānga tökô nö löpnyökūö mat yip tötmeuk?”
22 Ṙònghöichṙen hē e angū-ö nö ṙētak ök paratīn tinfömlö ngam chūök vinë-ekūötēv i Yērūsalem. Ṙētak laneūichö angū-ö hē e,
23 ngaich ha-ösköre ang Yēsū nö el chūök vinë-ekūötēv Sòlòmön el ök varanta tö kampavö.
24 Havīlen ò ngaich yik Yahūti ngaich hatöönö ò nö ngö ṙô: “Irò-òten öm min kitöngö ih? Vë-enyre man, yēḵ meh öm më-eṅ Kristū.”
25 Ngö ṙô ang Yēsū nö sapṙô cha: “Ngaich chin kòl öich ṙò-òvö in yīö, sön yī-ö öt ṙatö-ellōnre. Nup töng la-en kahëken chu öich i minë-eny ngam Yöng, anū-ö nup vamënyö inlahen chu.
26 Ṙën pöri yī-ö öt ṙatö-ellōnre in chu, pò yīö öi öt sīṅp chu.
27 Hang ṙô chu nup sīṅp chu ngaich akahakūö chū-ö tö cha ngaich tömrit chu anū-ö.
28 Kē-ěkūö u min chū-ö tö ngam nômö tö örheūheu-aṅ ngaich öthō min cha-a nö ahëtiyö hēk öt hěngtak min tökô nö kēngen u nö ṙā-ang eltī chu.
29 Nup kahëtö ngam Yöng nö in chu mötlö anū-ö tö nup töng sitih chehen ngaich öt hěngtak tökô nö kēngen u nö ṙā-ang eltī ngam Yöng.
30 Töng hěng an āyö tö ngam Yöng.”*
31 Hēk yik Yahūti nö hòṅ kēḵ ihong nö hòṅ kulëhe ò.
32 Ngö ṙô ngaich ang Yēsū tö cha: “Pōyen nup hameuktö chu tövai la-en öich i minë-eny ngam Yöng. Asuh nup in u la-en chu tö öp lökten yīö hòṅ kulëhe chu tö ihong?”
33 Ngö ṙô ngaich yik Yahūti nö sapṙô ò: “Öt kūö nup tölöök la-en meh in öi kulëhe meh tö ihong kūö meh pöri ötlēḵköṙôre tö ngam Tēv, höng tarik man më-eṅ ngaich kūö yòh öm asātöre öm i chūök ngam tēv.”
34 Ngö ṙô ngaich ang Yēsū nö in cha: “Öt ngö kinūichngö öng nö imat öp Chööngö, ‘Ngö ṙô chin: “Ṙòkhöre yin yī-ö tēv”’?*
35 Yēḵ ngam Tēv nö “tēvu” ṙô tö yip tarik yip tö fāluṙen ngaich ötkô ngih ṙô ngam līpöre nö ṙā-aiṙen.
36 Kūö yòh pöri yī-ö öi ngö ṙô tö chu öich ötlēḵkôre tö ngam Tēv yēḵ chu öich vë-enyre öich kūön ò. Kaheūkö chū-ö tö ngam Tēv öich töhet hēk tīntu inrē öich ing panam.
37 Yēḵ chu öt la-evṙen tö nup la-en ngam Yöng ngaich ui ṙatö-ellōnre öi in chu.
38 Ngaich yēḵ chu pöri öich la-evṙen tö nup la-en ngam Yöng ngaich ui ṙatö-ellōnre in chu, ṙatö-ellōnre pöri öi in minë la-en chu, hòṅ yīö akahakūö hēk iṙūöhen inrē öi ṙatö-ellōnre tö ai tö ngam Yöng ai im hinëngö.”
39 Lökten hēk cha-a nö hòṅ kē-ě ò, öt teungta tī pöri.
40 Chuh lāmuh ngaich anga-aṅ tö Yôtön ök chūök Yôhan sin urěh nö kētö vinôkö ngaich in e anga-aṅ nöngngöh.
41 Pōyen yik tarik yamihtöre nö in ò ngaich ngö ṙô: “Öt hěng pinngangkūö hameuktö Yôhan, nup vahënyö ò pöri inlahen ngòh tarik ṙòkhöre anū-ö nö löng.”
42 Maṙôngö yik tarik umuh ṙamatö-ellōnre nö in Yēsū.
