Inhānga Kahūich Yôhan 13:1-38
13 Akahakūö ang Yēsū tö ngam ṙētak ngaich nö röhten, urēhěkūö ngam paratīn Pāska, hē ò min nö ṙāngen ngih panam nö chuh in ngam Yöngre, lökten anga-aṅ nö söl manā-aṅ nö hangenlōn tö yik haköptöre hēk tö yip hanangenlōn ò inrē nö ing panam.
2 Ṙònghöichṙen ngam nyinā-aṅ tö lā harap ngaich ngam Satān nö ha-ehöttī nö vīhöt ellōn Yūta Iskaryôt ök kūön Sīmōn tö ò min nö hòṅ kē-ě Yēsū.
3 Akahakūö ang Yēsū tö minë taṙòkhöre nö kētu tö ngam Yöng nö eltī ò* ngaich ṙamā-ang in ngam Tēv anga-aṅ ngaich havan nö chuh in ngam Tēv.
4 Choholre anga-aṅ nö ṙā-ang kui ök mīs cha nö nyā ngaich ṙāḵtö ök kinṙum alahare ngaich kēḵ ök tuhal nö nyëklö ṙatre.
5 Unôichrit e ngaich anga-aṅ nö asëlö mak nö el ök chūök mak ngaich söichröön yik haköptöre ngaich ök tuhal tö nyëkhakṙen nö i ṙat ò chūtröön cha anga-aṅ tö e.
6 Hē ò nö chuh in Sīmōn Pītör ngaich ngö ṙô ang Pītör nö in ò: “Mā, söichröön chu hòng min më-eṅ?”
7 Ngö ṙô ngaich ang Yēsū nö in ò: “Öl man sin min öm akaha elmat tö ngih inlahen Chu, unôich pöri min më-eṅ öm akaha elmat.”
8 Ngö ṙô ngaich ang Pītör nö in ò: “Hö-ö, uh man söichröön chu.” Ngö ṙô ngaich ang Yēsū: “Yēḵ Chu min öt söichröön meh, ngaich öt teūngen min më-eṅ tö nup taneūngen chu.”
9 Ngö ṙô ngaich ang Sīmōn Pītör nö in ò: “Mā, uh man chěi höng söichröön chu, tön söich kël chu hēk söich kui chu inrē.”
10 Ngö ṙô ngaich ang Yēsū nö in ò: “Ngòh tö ngaich nö keuheūt kaha nö vōk öt tahëngu hēk tö söichö höng minë kalröön ò pò ò ngaich nö keuheūtlöre nö het. Töhet yin yī-ö, öt ṙòkhöre pöri.”
11 Akahakūö anga-aṅ töp in cha mahachīlngövah ò min. Lökten anga-aṅ nö ngö ṙô: “Öt ṙòkhöre yin öi het.”
12 Hē ò ngaich nö keuheūten nö söichröön cha, kaṙumlöre ngaich anga-aṅ tök kinṙum alahare ngaich hēk nö ūichtöre nö ik mīs ngaich ngö ṙô nö in cha: “Akaha elmat öi tö ngih inlahen Chu öich in yīö?
13 Ngö ṙô yin öi havëken chu ‘Mahaköphöti’ hēk ‘Mā,’ ngaich kô-en yī-ö öi lööngö ṙô, pò Chu öich ngatī.
14 Lökten yēḵ Chu chū-ö pòrô öich Mā hēk Mahaköphöti, öich söichröön yīö ngaich hòṅ ngatī inlahen yī-ö öi söichröön höö.*
15 Lökten Chin öich ṙā-akūö yīö tö ngih inchōten ngaich sā inlahen tī Chu öich in yīö ngaich hòṅ ngatī inlahen yī-ö.
16 Tökò-òṙô Chin tö yīö, hö-ö ön ngòh mahalanṙen nö kiröng tö ngam mā re, ötrēhěn ngòh tö tīntu nö kiröng tö ngam tamīntöre.
17 Ngaich yin öi akahakūö tö në ṙô, yēḵ yīö pöri min öi ngatī inlahen ngaich ṙamölōn min yī-ö.
18 Hö-ö Chin öich ṙô tö inlahen yīö öi ṙòkhöre; Akahakūö Chū-ö tö yip katöllöre. Ngaich tö hòṅ teungtökūö pöri ngam ṙô ngam līpöre. ‘Ngòh nyamā ngam ròtī nö holkūö chu sin, anga-aṅ lama-al chu.’*
19 Urěhnyi ṙô Chin öich vë-eny nang yīö tö nup tö hòṅ yamih min, hòṅ Chu yěich ngatī inlanken min ngaich ṙatö-ellōnre yī-ö tö minë imat ngam līpöre nö ṙô tö inlahen Chu.
20 Tökò-òṙô Chin tö yīö, yēḵ ngòh tö hěngtak tarik nö hō-en ngòh tahīntö chu ngaich hamô-en Chu anga-aṅ ngaich ngòh hamô-en Chu ngaich hamô-en ngam tamīnten Chu anga-aṅ.”
21 Hē kinheūtö ṙô Yēsū tö në ṙôre höng haṙivlōn anga-aṅ nöng ellōnre lōn ngaich keuheūtnyö ṙôre nö ngö ṙô: “Tökò-òṙô Chin tö yīö, hěngtak öp min aṅ in yīö mahachīlngövah tīre nö kēngen chu.”
22 Höng kö ngëichkö kūö höö ngaich yik mahaköp hē cha nö hang ṙô ò, pön öt akahakūö cha-a töp tö kakka inlahen tö ò.
23 Hěngtak ök haköptö Yēsū ök hanangenlōn ò takô röhta anga-aṅ nö in ò nöng ūichhaka.
24 Lökten ang Sīmōn Pītör nö kileung kuire ngaich ngö ṙô nö in ök mahaköp: “Vë-eny nang ih man, ṙô tö inlahen chīö ang kòl?”
25 Havöölökūöre ngaich ök mahaköp ngaich sōnngöre nö hatöönö Yēsū nö ngö ṙô: “Mā, achīö öp anga-aṅ?”
26 Ngö ṙô ngaich Yēsū nö sapṙô ò: “Ngòh kahë-ekūö Chu min tö ngih tö kasumtu ròtī anga-aṅ an.” Kasum tök ròtī ngaich anga-aṅ ngaich kē-ěkūö Yūta ök kūön Sīmōn Iskaryôt.
27 Kēḵ ngam linköl tit ròtī ngaich ang Yūta, unôichrit e ngaich ngam Satān nö Kuhēthötre nö el alaha ò. Lökten ang Yēsū nö ngö ṙô nö in ò: “Ngam tö hòṅ la-en meh ilööṙen man öm kēken e.”
28 Yik amūichak pöri nö in ök mīs nö nyā, öt hěngtak tö akahakūö tö chö-öny Yēsū nö kūö yòh nö ngatī ṙô nö in Yūta.
29 Töng aṅhav in ang Yūta tök pòks chūök nuk pësa, lökten nö ngö ṙô lōn yik rīkre mahaköp, tö Yēsū nö ngö ṙô nö in ò, “Havah nup lōn hī man chehen in ngih paratīn,” hēk kē-ěkūö yip yāich inrē.
30 Unôichrit Yūta ngaich nö kēḵ linköl tit ök ròtī, ilöö kiröönngöre ngaich anga-aṅ nö ṙā-ang umuh. Ṙētak hatööm hē e angū-ö.
31 Unôichrit kinröönngö ò ngaich, ngö ṙô ngaich ang Yēsū: “Ngaich ön ngòh Kūön tarik nö hapōilöng ngaich löktö in ò min inrē ngam Tēv nö hapōilöng.
32 Hakôtenre an min ngam Tēv nö hapōilen ò ngaich veūten min anga-aṅ nö ngatī inlahen.
33 Yī-ö nyīö, töng rahëichtaṙen Chin öich in yīö ngaich chöhö Chu min yī-ö. Ngaich ök ṙô Chu öich in yik Yahūti ngatī ṙô Chin öich in yīö, ‘Öp chahūhu Chu min ötkô min yī-ö chuh in e.’
34 Hěng ön ngih tufömngöre Chööngö kahëtö Chu öich in yīö, hangenlōn yin tö höö; sā Chu chū-ö öich hangenlōn tö yīö, ngatī inlahen yī-ö hangenlōn tö höö.
35 Yěn ōt min ngam hanangenlōn nö elhôi yīö ngaich löktö in e min yip taṙòkhöre tarik nö akahakūö tö yīö öi mahaköp öi in Chu.”
36 Ngö ṙô ngaich ang Sīmōn Pītör nö in ò: “Mā, chuh yih öm?” Ngaich ngö ṙô ang Yēsū nö sapṙô ò: “Öp chahūhu Chu, ötkô man sin öm chuh in e, unôich pöri min öm chuh in e.”
37 Ngö ṙô ngaich ang Pītör nö in ò: “Mā, kūö yòh öich ötkô fachūkörit meh? Mihôiṅ chin öich kēngö nömöre öich chö-öinyten meh.”
38 Ngö ṙô ngaich Yēsū nö sapṙô ò: “Kēngö nômöre hòng min më-eṅ öm chö-öinyten chu? Tökò-òṙô Chin tö meh, öt takeūk nup hayöm hanöng saha meh öl lūöi heuh ṙô öm mahngen chu.”
