Inhānga Kahūich Yôhan 16:1-33
16 Lökten chin öich vënyen në ṙô öich in yīö, hòṅ yīö öt fukngö.
2 Ahōnyen yīö yip min tarik öi ṙā-ang el ngam chūök vinë-ekūötēv, rö-ö nöng angū-ö pön yih min ngam ṙētak hē yip taṙòkhöre tarik min nö hòṅ fëlngen yīö, pön ngölōn cha-a töre nö la-en tö minë tölöök la-en ngam Tēv.
3 Ṙënten pöri cha-a nö la-evṙen tö u pò cha nö öt akahakūö tö ngam Yöng hēk öt akahakūö tö chu.
4 Sön pöri chū-ö öich vë-eny nang yīö tö në ṙô, hòṅ öp ṙētak u min yěn yih ngaich fē-ělre min yī-ö tö chu öich vë-eny nang yīö tö në ṙô.
Hö-ö chin urěhngöre ṙô öich vë-eny nang yīö tö në ṙô, pò Chu hē e öich in yīö.
5 Ngaich pöri chū-ö öich kiröönngöre öich chuh in ngam tamīnten chu; sön pöri nö öt hěngtak in yīö mahatöönö chu nö ngö ṙô, ‘Chuh yih öm?’
6 Kūö në ṙô pöri vahënyö chu öich in yīö lökten ngam ellōn yīö nö haṙivlōn.
7 Tökò-òṙô Chin tö yīö, chö-önytö yanöölen yīö chin öich kiröönngöre. Lökten yēḵ Chu min öich öt kiröönngöre öthō min ngam hamòlṙen nö chuh in yīö; yēḵ Chu pöri min kiröönngöre ngaich tīnten e chū-ö min nö chuh in yīö.
8 Yēḵ ò min nö yih ngaich hameuknyen ngam tökööl, lanöökö hēk töm kinṙôka min anga-aṅ nö ikūö ngih panam:
9 urěh min anga-aṅ nö hameuknyö ngam tökööl, pò cha nö öt ṙatö-ellōnre nö in chu;
10 ngaich hēk min anga-aṅ nö hameuknyen ngam lanöökö, pò Chu öich kiröönngöre chuh in ngam Yöng ngaich öt hēk min yī-ö öi meūkö Chu;
11 ngaich unôichrit e min anga-aṅ nö hameukyen ngam Kinṙôka, pò ngam rācha ngih panam min nö kahòkkaṙen.
12 “Pōyen nup ṙô tö hòṅ vahënyö chu öich in yīö, hö-ö pöri min yī-ö i ngih ṙētak öi akaha elmat tö u.
13 Ngaich yēḵ e pöri min nö yih anga-aṅ* ngam kanô-en ngam töhet kumlēḵ ngaich angū-ö min mahayööken yīö öi akaha elmat töm kanô-en, pön öt lamöktö in ò min nup ṙô ò, pön nup töng ahang ò ṙô anū-ö ṙahônyö ò hēk vë-eny nang yīö min anga-aṅ tö inlahen nup yamih ṙô.
14 Hapōilen chu min anga-aṅ pò nup töng ahang ò nö in chu anū-ö min vahënyö ò.
15 Nup töng chehen ngam Yöng ṙòkhöre anū-ö nöng chehen chu. Lökten chin öich ngö ṙô tö nup töng ahang ngam hamòlṙen nö in chu, anū-ö vahënyö ò nö in yīö.
16 Rahëichhangkūö yin min ngaich öi öt meūkö chu ngaich hēk min yī-ö unôichrit e rahëichtakūö öi meūkö chu.”
17 Rīkre ngaich yik haköptö ò vamë-ekūöre nö ngö ṙô: “Asuh öp vöh manah ngih ṙô ò nö in hī, ‘Rahëichhangkūö yin min ngaich öi öt meūkö chu, ngaich hēk min yī-ö unôichrit e rahëichtakūö öi meūkö chu,’ ngih inrē, ‘pò Chu min hēk kiröönngöre chuh in ngam Yöng’?”
18 Lökten cha-a nö ngö ṙô: “Asuh öp manah ngih ṙô ò nö ngö ṙô, ‘rahëichtöreṙen’? Öt akahakūö in töp ṙô kahakkö ò.”
19 Akahakūö ang Yēsū tö cha nö hòṅ hatöönö ò lökten anga-aṅ nö ngö ṙô nö in yik haköptöre: “Kö hatöönö höö öi tö inlahen ṙô chu öich kūö yòh öich ngö ṙô: ‘Rahëichhangkūö yin min ngaich öi öt meūkö chu, ngaich hēk min yī-ö unôichrit e rahëichtakūö öi meūkö chu?’
20 Tökò-òṙô Chin tö yīö, peuiny yin min hēk harāmöre inrē ṙamölōn pöri min ngih panam, haṙivlōn min yī-ö vītöre pöri min angū-ö nö ṙanamölōn yīö.
21 Yēḵ ngòh kikānö nö hòṅ kayônyö öp nyīö ngaich chök anga-aṅ kūö ngam ṙētak ò ngaich nö hòṅ yih, yēḵ ò pöri ngaich nö kayônyö ngam kūönre ngaich vaichngö anga-aṅ töp chanököre ngaich ṙamölōn nö meuk ngam kūönre.
22 Ngatī ṙēngen yin yī-ö töngamuh öi haṙivlōn, yēḵ chu pöri min öich havan öich chuh in yīö ngaich tööḵlö min yī-ö tö ṙanamölōnre. Ngaich öt hěngtak min tökô nö kēngö ngam ṙanamlōn yīö nö in yīö.
23 Öt hěngtak min tökô nö hatöönö chu ip hē e angū-ö sakāmö. Tökò-òṙô Chin tö yīö, yěn ōt nup havëkö yīö öi in ngam Yöng ngaich kē-ěkūö yīö min anga-aṅ nö i minë-eny chu.
24 Öl yin töngamuh öi hēngö havëka öi i minë-eny chu. Havë-a yin ngaich teūngen min yī-ö hòṅ yīö öi kirööngen ṙanamölōn.
25 Inchōḵ-ovṙô chin öi vë-eny nang yīö tö në ṙô. Yih öp min ṙētak hē chu min öt inchōḵ-ovṙô öich vë-ekūö yīö, halöökṙôre pöri min chū-ö öich vë-eny inlahen ngam Yöng öich in yīö.
26 Vë-ekūötēv yin min öi vë-ekūö ngam Yöng öi i minë-eny chu ip hē e angū-ö sakāmö, öt tö ngö manah pöri ngam ṙô chu, tö chu öich hòṅ aṙētu ṙô tö ngam Yöng öich chö-öinyten yīö.
27 Hangenlōn takô an ngam Yöng tö yīö, pò yīö öi hangenlōn tö Chu ngaich ṙatö-ellōnre yī-ö tö Chu öich ṙamā-ang im Tēv.
28 Ṙamā-ang im Yöng chin öich yih öich ing panam. Ngaich pöri chū-ö öich ṙāngen ngih panam ngaich kiröönngöre öich chuh in ngam Yöng.”
29 Ngö ṙô ngaich yik mahaköp nö in ò: “Ngaich man öm halöökṙôre öm vë-eny nang ih öm öt inchōḵ-ovṙô.
30 Akahakūö in ngaich tö meh öm keuheūtlöre mikahkūö ngaich öt hěngtak tökô hēk nö hatöönö meh. Lökten in ṙatö-ellōnre tö meh öm ṙamā-ang im Tēv.”
31 Ngö ṙô ngaich ang Yēsū: “Ngaich öi ṙatö-ellōnre?
32 Yěh meuk! Ngaich an ngam ṙētak nö yih, rö-ö an pön höng ngaich nö yih hē yīö min ṙòkhöre parātiyö ngaich kö chuh patīre min yī-ö öi kiröönngöre öi höng ṙāngen chu öich höng hěngtak, sön pöri chū-ö öt höng hěngtak pò ngam Yöng nö in chu.
33 Ṙën chin öich ṙôten në ṙô öich in yīö hòṅ yīö öi löktö in chu öi teūngen tö ngam lanāmö. Pōyen nup kanihngen la-al yīö öi ing panam uh pöri yī-ö öi pa-ekūö, pò chu ngaich öich mihôiṅ töng panam.”
Footnotes
^ In ngam tö 13 hēk 14 miröökö ngam “anga-aṅ” nö vënyu ngam manah e nö hamòlṙen nö in ngam tö 7 miröökö. Asāten ngam töhet kumlēḵ ang Yēsū nö in ngam “hamòlṙen.” Hö-ö ön ngam töhet kumlēḵ nö tarik, pön tö hěngkangen nö kumlēḵ.
