Inhānga Kahūich Yôhan 17:1-26
17 Unôichrit ṙô Yēsū nö ṙô tö në ṙô, môklökūöre ngaich anga-aṅ nö el halīöngö ngaich ngö ṙô: “Kayööngö, ngaich an ngam ṙētak nö yih. Hapōilen ngòh kūönre man yēḵ hòṅ ngòh kūön meh nö hapōilen meh,
2 kētö chööngö ò më-eṅ öm ikui më taṙòkhöre tarik, hòṅ ò nö kē-ěkūö cha tö ngam nômö tö örheūheu-aṅ nö in yip töng kahëtö meh tarik öm in ò.
3 Tötṙanāngen an nö in cha yip tö hòṅ teūngen tö ngam nômö tö örheūheu-aṅ tö cha nö hòṅ mikahtökūöre* tö ngam töng hěngtak tökô-en Tēv hēk tö ngam tahīntö meh inrē ang Yēsū Kristū.
4 Ngam la-en kinë-ekūö chu tö meh, hateungngen e chin ngaich, hapōilö ngam minë-eny meh inrē öich ing panam.
5 Lökten, Ō Kayööngö, kē-ěkūö chu man tö ngam nöönyö, ngam taneūngen chu sin öich in meh urēhěkūö ngih panam.
6 Ngaich chin öich hameuknyö* ngam minë-eny meh öich in yip tarik yip kahëtö meh öm in chu aṅ ing panam. Tarik meh cha-a ngaich kēten cha më-eṅ öm in chu ngaich cha-a nö haköp nup ṙô meh.
7 Ngaich yin töngamuh nö akahakūö tö nup töng kahëtö meh öm in chu nö ṙòkhöre anū-ö nö lamöktö in meh,
8 pò nup ṙô vahënyö meh öm in Chu ngaich hateungten u Chū-ö öich in cha, hō-en u cha-a ngaich kô-en mikahkūö cha-a tö chu öich ṙamā-ang in meh ngaich ṙatö-ellōnre inrē tö meh öm tamīnten chu.
9 Hayāichtôre chin öich vë-elkui cha, öt hayāichtôre pöri chū-ö öich vë-elkui ngih panam, cha-a pöri yip tökētu tö meh nö in chu pò cha nö tarik meh,
10 pön ṙòkhöre nup töng chehen chu nö chehen meh, ngaich nup chehen meh nö chehen chu ngaich hapōilöng chū-ö öich in u.
11 Rö-ö nöng angū-ö, pò chu min ngaich öt höngngöh öich ing panam, höngngöh pöri min cha-a nö ing panam ngaich chuh in meh chū-ö. Ō Kayööngö Töhet, nup töng kahëtö meh in chu i minë-enyre, meukṙen u man yēḵ, hòṅ cha nö hěng,* sā inlahen hāṅ ai hěng.*
12 Hē Chu öich in cha ngaich nup töng kahëtö meh in chu öm i minë-enyre ngaich chumkūöṙen Chū-ö tö cha, laklen cha Chū-ö ngaich öt hěngtak tö ahetiyö nö in cha, höng ngam kūön ötkanôlò tö ahetiyö, hòṅ ngam ṙô tökūichi aṅmat ngam līpöre nö teungtökūö.
13 Ngaich pöri chū-ö öich yih öich chuh in meh, lökten öich vënyen në ṙô hē chu öich ing panam, hòṅ cha nö teūngen tö ngam taneūngen chu ṙanamölōn.
14 Ngaich Chin öich hateungtö ngam ṙô meh öich in cha, surīkhen cha pöri ngih panam, pò cha nö öt aṅ ngih panam, sā chu Chū-ö öt aṅ ngih panam.
15 Öt hayāichtôre chin öich vë-elkui cha in meh öm kēnyen cha öm ṙā-ang ing panam, chumkūöṙen pöri tö cha öm laklen cha tö ngam Satān.*
16 Hö-ö yin nö aṅ ngih panam, sā chu Chū-ö öt aṅ ngih panam.
17 Ahetlen cha man tö ngam kanô-en, ngam ṙô meh an kanô-en.
18 Sā inlahen meh öm tīnten chu ing panam, ngatī inlahen Chū-ö öich tīnngen cha öich ing panam.
19 Ngaich chö-öinyten cha Chū-ö öich ahetlöre, hòṅ cha cha-a nö ahetlöng tö ngam kanô-en.
20 Rö-ö yin nöng cha-a vahë-elkui chu öich hayāichtôre, vë-elkui cha pöri chū-ö, yip hamang minë ṙô cha ngaich ṙatö-ellōnre nö in chu,
21 hòṅ cha nö ṙòkhöre nöng hěng, sā meh më-eṅ ō Kayööngö, öm im hinëngö öm in chu ngaich ngatī chū-ö inrē öich in meh ngaich ngatī inrē cha-a nö in hāṅ nö im hinëngö, hòṅ ngih panam nö ṙatö-ellōnre tö meh öm tamīnten chu.
22 Kē-ěkūö cha chin tö ngam nöönyö ngam kahëtö meh öm in chu, hòṅ cha cha-a nö hěng sā inlahen hāṅ ai hěng.
23 Im hinëngö chin öich in cha sā chu öich in meh, hòṅ cha nö hěng, hòṅ ngih panam nö akahalōn tö meh öm më-eṅ tamīnten chu ngaich hangenlōn inrē tö cha sā hanangenlōn meh tö chu.
24 Ō Kayööngö, lōnu chin tö vē kahëtö meh öm in chu nö holtöṙah chu min, ip chūök chu min öich iyöng, hòṅ cha nö meuk ngam nöönyö chu, ngam kahëtö meh öm in chu, kūö meh öm hangenlōn tö chu urēhěkūö ranehlö ngih panam.
25 Ō Kayööngö Tökô-en, kô-en ön ngih panam nö öt akahakūö tö meh, akahakūö pöri Chū-ö tö meh, ngatī inrē cha-a nö akahakūö tö meh öm më-eṅ tamīnten chu.
26 Vë-eny nang cha chin tö ngam minë-eny meh ngaich in nup yamih inrē min öich vënyen e, hòṅ ngam hanangenlōn nö in cha ngam hanangenlōn meh tö chu ngaich ngatī chū-ö inrē öich im hinëngö öich in cha.”
Footnotes
^ Hēk, “iṙūöhen kēḵ ngam mikah.”
^ Hēk, “vënyö.”
^ Hēk, “im hinëngö.”
^ Hēk, “im hinëngö.”
^ Ṙô Krīk, “ngam tötlöök.”
