Inhānga Kahūich Yôhan 3:1-36
3 Hěngtak ök Feresī tö Nikòtimös minënyi, ök tö hěngtak nö mākūö tinlööken yik Yahūti.
2 Yihtöre anga-aṅ nö in Yēsū ik hatööm ngaich ngö ṙô: “Rappī, akahakūö in tö meh öm lamöktö in ngam Tēv öm mahaköphöti, pön minë hameuktö meh pinngangkūö, öt hěngtak tökô tarik nö ngatī inlahen yěn öt holṙen ò ngam Tēv.”
3 Sapṙô ò ngaich Yēsū nö ngö ṙô: “Tökò-òṙô Chin tö meh, asā ngòh tarik nö öl nö hēk nö fötnyu,* öthō min anga-aṅ nö meuk ngam Pūlngö ngam Tēv.”
4 Ngö ṙô ngaich ang Nikòtimös: “Sitih inlahen ang min ngòh tarik hēk nö fötnyu yěn ngaich nö kiröng? Havanhötre hòng min hēk anga-aṅ nö ellōn ngam yöngre kikānö ngaich hēk nö fötnyu?”
5 Sapṙô ò ngaich Yēsū nö ngö ṙô: “Tökò-òṙô Chin tö meh, Yēḵ ngòh tarik nö öt fötnyu nö löktö im mak hēk tö ngam töhet kumlēḵ, öthō min anga-aṅ nö kuhēthötre nö el ngam Pūlngö ngam Tēv.
6 Pò ngòh töfötnyu tö ngam alaha, ngaich nöng alaha, ngòh töfötnyu pöri tö ngam töhet kumlēḵ, lamöktö el halīöngö anga-aṅ.
7 Uh yin pingangkūö tö ṙô Chu, tö yīö min hēk öi hòṅ fötnyu.
8 Öptöng kū-ö ngam kuföt nö föököre, ngaich höng hangṙô e yī-ö, hö-ö pöri öi akahakūö töp chahūhu e hēk löktö e inrē. Ngatī inlahen ngòh töfötnyu nö löktö im töhet kumlēḵ.”
9 Ngö ṙô ngaich Nikòtimös hē ò nö hāngö e: “Sitih inlahen nö ngatī?”
10 Ngö ṙô ngaich Yēsū nö sapṙô ò: “Tö hěngtak man më-eṅ öm mahaköpten më Israel, sön öm öt akahakūö tö në ṙô?
11 Tökò-òṙô Chin tö meh, nup mikahkūö ih, anū-ö tö vënyu tö ih, ngaich nup maheuk ih, anū-ö tö vënyu inlahen tö ih, ngaich hö-ö pöri yī-ö öi hō-en nup vahënyö ih.
12 Ngaich chin öich höng vënyö inlahen ngih panam öich in yīö, sön yī-ö höng öt ṙatö-ellōnre, ngaich yēḵ chu min öich vë-eny inlahen ngam halīöngö, ngaich sitih inlahen min yī-ö ṙatö-ellōnre?
13 Öt hěngtak tarik yamônlö nö chuh el halīöngö, höng hěngtak pöri ngam yamônti nö löktö el halīöngö, anga-aṅ ngòh Kūön tarik.
14 Sā inlahen Môsös nö hatamlen ök pēch nö el tönyalnyi, ngatī inlahen min ngòh Kūön tarik nö hatamlöng,
15 hòṅ yip ṙamatö-ellōnre min nö in ò nö teūngen tö ngam nômö tö örheūheu-aṅ.
16 Pön hangenlōn takô ngam Tēv töng panam lökten anga-aṅ nö kēngen ngam töng hěng maneuk Kūönre, hòṅ yip ṙamatö-ellōnre nö in ò nö öt ha-eti, teūngen pöri tö ngam nômö tö örheūheu-aṅ.
17 Hö-ö an ngam Tēv nö tīnten ngam Kūönre nö öthakòlô ngih panam, ṙën pöri anga-aṅ nö tīnten ò, hòṅ ngih panam nö teūngen tö inyöökenre nö löktö in ò.
18 Ngòh ṙamatö-ellōnre nö in ò, öthō min anga-aṅ nö kētu ötinkòlô, ngòh töt ṙamatö-ellōnre pöri, ngaich anga-aṅ nö vënyu ötinkòlô, kūö ò nö öt ṙatö-ellōnre nö minë-eny ngam töng hěng maneuk Kūön ngam Tēv.
19 Ngih ön lökngörit ngam kinṙôka: yih ngam hanātö nö ing panam, hö-ö pöri më tarik nö hangenlōn töm hanātö, hangenlōn pöri cha-a tö ngam sinngūlö kūö minë la-en cha nö tötlöök.
20 Ngòh töng iṙūöhen nö kēken minë tötlöök la-en, tökunyaha elmat anga-aṅ tö ngam hanātö hēk sōḵ inrē nö chuh el ngam hanātö, hòṅ nup tötlöök la-en ò nö öt meūkö.
21 Ngòh tö la-evṙen pöri tö minë tölöök la-en, yamihtöre anga-aṅ nö im hanātö, hòn meūkö minë la-en ò nö inteungngö nup kuilōn ngam Tēv.”
22 Unôichrit e ngaich ang Yēsū nö holten yik haköptöre nö chuh in minë tavat i Yūta, ngaich kē-ěny ṙētak re anga-aṅ nö in cha hēk kētö vinôkö inrē nö in yik tarik.
23 Ngatī ang Yôhan nö kētö vinôkö nö im panam tö Ainōn minënyi ngam tö röhta nö i Sālim, pön pōyen ngam mak nö in e, ngaich höng yihtöre inrē yik tarik nö kēḵ ngam vinôkö;
24 öl hē e Yôhan nö chaphötvö nö el chēl.
25 La-alkūöre ṙô ngaich yik haköptö Yôhan nö in ök tö hěngtak Yahūti nö ṙôten ngam inhetlö.
26 Yihtöre ngaich yik haköptö Yôhan nö in ò ngaich ngö ṙô: “Mahaköphöti, ngam tarik ngam lamāmuh tö Yôtön ngam mī-in meh sin ngam tö vënyu inlahen tö meh, ngaich öp kòl nö kētö vinôkö ngaich ṙòkhöre yip tarik nöng chuh in ò.”
27 Ngö ṙô ngaich ang Yôhan: “Yēḵ ngòh tarik nö öt kē-ěvkūö nö löktö el halīöngö, öthō min anga-aṅ nö teungten tö nup töng sitih inlahen.
28 Yī-ö yin vahë hamang ṙô chu öich ngö ṙô, ‘Hö-ö chin chū-ö Kristū, tö tīntu pöri öich mu-urēhěkūö ò.’
29 Ngòh tö īnu tö ngam töhapīhö kikānö, anga-aṅ töhapīhö kikōnyö, ngaich yěn sökhak ngam hol ngam töhapīhö kikōnyö ngaich hangṙô ngam töhapīhö kikōnyö nö ṙò-òvö, ngaich kirööngen ṙanamölōn takô anga-aṅ nö hang ëlô ò. Lökten ön ngaich ngih ṙanamölōn chu nö hateūngi.
30 Tö hòṅ kū-ö urěh an anga-aṅ nö in minë la-en, ngaich tö hòṅ kūö unôich chū-ö öich in minë la-en.”
31 Ngòh yamih nö löktö lātulöng, lāmatulöng anga-aṅ tö yip taṙòkhöre. Ngòh lamöktö ing panam pöri, aṅ ing panam anga-aṅ hēk ṙô tö inlahen ngih panam. Ngòh yamih pöri nö löktö el halīöngö, lāmatulöng anga-aṅ tö yip taṙòkhöre.
32 Minë maheuk ò hēk ahang ò, anū-ö vahënyö ò, öt hěngtak pöri tarik ṙamatö-ellōnre nö in ò.
33 Ngòh ṙamatö-ellōnre pöri nö in nup vahënyö ò, ngaich öt kintööngulōn* min anga-aṅ tö ngam Tēv nö tökô-en.
34 Ngòh tö tīntu tö ngam Tēv, ngaich ṙôtö ṙô ngam Tēv anga-aṅ, pò ngam Tēv nö töt kūöṅnen tī* nö kētö ngam töhet kumlēḵ re.
35 Hangenlōn an ngam Yöng tö ngam Kūön ngaich keuheūtten nup taṙòkhöre anga-aṅ nö eltī ò.
36 Ngòh ṙamatö-ellōnre nö in ngam Kūön, teūngen min anga-aṅ tö ngam nômö örheūheu-aṅ, ngòh töt hamang ṙô ngam Kūön pöri, öt teūngen min anga-aṅ tö nômöre, tanta pöri min ngam tanānyö ngam Tēv nö ikui ò.
Footnotes
^ Hēk lohten, “öt fötnyu nö löktö lātulöng.”
^ Hēk, “Mikahngö kanô-en ṙô re.”
^ Hēk, “öt kamlah ṙôken tīre.”