Inhānga Kahūich Yôhan 5:1-47
5 Unôichrit e hēk ök paratīn yik Yahūti nö yih ngaich chuh Yērūsalem ang Yēsū.
2 Hěng ök tökiröng mak* tö röhta nö ik inkūp lökhöt nup sīṅp i Yērūsalem ngam tö Pĕtsata nö i ṙô Hiprū, havīlöng ngam tökiröng mak tö minë tö kampavö varanta.
3 Pōyen yik tövāhavö, tötmeuk, tökaròk hēk tölum töng hulalhakṙen nö el ngam varanta.
4 * —
5 Hěngtak ök umuh tarik tö 38 samyeūheu rò-òten nö vāhavö.
6 Meuk ngam tarik ang Yēsū nöng hulalhak, pòrô anga-aṅ nö akahalōn tö ò nö marò-òten samyeūheu nö vāhavö, sön anga-aṅ nö hatöönö ò nö ngö ṙô: “Hòṅ lōnu öm töre öm hòṅ lööken?”
7 Ngö ṙô ngaich ngam tövāhavö tarik nö sapṙô ò: “Mā, öt hōlu chin tö öp ramāḵten chu öre nö el ngam tökiröng mak hē ṙētak ngam mak nö kitövö, pön urēhěkūö taneūngö chu ngaich yip tahëng nö yôkti nö el ngam mak.”
8 Ngö ṙô ngaich ang Yēsū nö in ò: “Choholre man, keun ngam chamamre ngaich kiröönngöre.”
9 Ilööṙen ngaich ngam tarik hē e nö lööken, keunlöre ngaich anga-aṅ tö ngam chamamre ngaich kiröönngöre.
Ṙētak Haneūheu Töhet Sakāmö angū-ö hē e.
10 Lökten ngaich yik Yahūti nö ngö ṙô nö in ök tarik ök tö ngaich lööken: “Ṙētak Haneūheu Töhet Sakāmö ön töngamuh ngaich tövaich ngam inlahen meh nö asā ngam chööngö öm keun ngam chamamre.”
11 Ngö ṙô pöri anga-aṅ: “Öp tö lööken tī tö chu anga-aṅ öp tö ngö ṙô nö in chu, ‘Keun ngam chamamre man ngaich kiröönngöre.’”
12 Ngö ṙô ngaich cha-a nö hatöönö ò: “Achīö öp tö ngatī ṙô nö in meh, ‘keūnö e man ngaich kiröönngöre’?”
13 Öt akahakūö pöri ngam tarik tö ök tö lööken tī tö ò, kūö Yēsū nöng hayunkenre nö hamūltöre nö in yik tömaṙôngö.
14 Unôichrit e, hē Yēsū nö meuk ngam tarik nö el ngam chūök vinë-ekūötēv, ngaich ngö ṙô anga-aṅ: “Yěh meuk, ngaich man öm lööken. Uh man pöich hēk köölö fālen, hòṅ meh min hēk öt ṙūöhngöre rit ötlanöökö.”
15 Kiröönngöre ngaich ngam tarik nö vë-eny nang yik Yahūti tö ò nö anga-aṅ Yēsū ök tö lööken tī tö ò.
16 Angū-ö lāinyngen yik Yahūti nö hakihten Yēsū, kūö ò nö la-evṙen nö el ṙētak ngam Haneūheu Töhet Sakāmö.
17 Ngö ṙô pöri ang Yēsū nö in cha: “Ṙömöng la-evṙen an ngam Yöng chu, ngatī chin chū-ö inrē öich la-evṙen.”
18 Lökten ngaich më Yahūti nö chöhnyö ök tölöng ṙētak re nö hòṅ fëlngen ò, pön rö-ö anga-aṅ nöng filal ngam chööngö hē ṙētak ngam Haneūheu Töhet Sakāmö, pön vënyen ngam Tēv inrē nö Yöngre nö haṙongtöre nö in ò.
19 Lökten ngaich ang Yēsū nö ngö ṙô nö in cha: “Tökò-òṙô chin tö yīö, hö-ö ön ngòh Kūön nö kanahnguṙen tö nup la-enre, nup maheuk ò pöri inlahen ngam Yöng ò, ngatī inlahen anga-aṅ. Lökten nup töng inlahen ngam inyööngö ngatī inlahen ngam Kūön ò nö la-evṙen.
20 Hangenlōn ngam Yöng tö ngam Kūön ngaich nup inlahen ò ngaich hameukhömat ngam kūön re anga-aṅ hēk tö nup tökiröng la-en tö u, hòṅ yīö öi pingangkūö.
21 Sā inlahen ngam Yöng nö hachohlen yip tökapah ngaich kētö nômö cha, ngatī inlahen ön ngòh Kūön nö kētö nômö nö i yip lōnre.
22 Öt kahngenre ngam Yöng nö kahôka, kēten ngam la-en kamhôṅka pöri anga-aṅ nö in ngam Kūönre,
23 hòṅ yip taṙòkhöre nö milēḵṙen tö ngam Kūön ò, sā cha nö milēḵṙen tö ngam Yöng. Ngòh töt milēḵṙen tö ngam Kūön, öt milēḵṙen anga-aṅ tö ngam Yöng ngam tamīnten ò.
24 Tökò-òṙô Chin tö yīö, ngòh hamang ṙô chu hēk ṙamatö-ellōnre inrē nö in ngam tamīnten chu, teūngen min cha-a tö ngam nômö tö örheūheu-aṅ. Öt kētu sācha min cha-a, pò cha min nö chööḵngö kui ngam kinpaha nö teūngen tö ngam nômö.
25 Tökò-òṙô Chin tö yīö, yih an ngaich ngam ṙētak hēk ing töngamuh inrē hē yip tökapah min nö hang ṙô ngam Kūön ngam Tēv, ngaich yip hamang ṙô ò aṅ min cha-a.
26 Sā inlahen ngam Yöng nö īnu tö kumlēḵ re nö kētö nômö,* ngatī ngam Kūön inrē nö īnu tö kumlēḵ re nö kētö nômö.
27 Ngaich kētö chööngö ò inrē anga-aṅ nö kahôka, pò ò nö Kūön tarik.
28 Uh yin pöich pingangkūö tön ngaich an ngam ṙētak nö yih, hē yip taṙòkhöre min yip aṅ el anūlö nö hang ṙô ò
29 ngaich hachohlöng min nö hēk. Yik tölöökö la-en ngaich hachohlöng min cha-a hòṅ cha nö teūngen tö ngam nômö ngaich yik tötlöökö la-en pöri hachohlöng min cha-a, hòṅ cha nö kahòkkaṙen.
30 Öt kanahnguṙen chin tö në la-enre, sā ṙô ngam Yöng chu pöri nö vë-eny nang chu, ngatī inlahen tī chū-ö öich kahôka. Tökô-en an ngam kinṙôka aṅ in chu, pöich öt asā nup kuilōnre, sā lōn ngam tamīnten chu pöri.
31 Yēḵ chu öre höng kahngenre vënyö inlahenre ngaich ötkô-en min öp vahënyö chu.
32 Hěngtak öp inrē vamënyö inlahen chu ngaich akahakūö chū-ö tö nup vahënyö ò inlahen chu nö tökô-en anū-ö.
33 Tīntö tarik yī-ö in Yôhan ngaich anga-aṅ nö vënyö inlahen ngam kanô-en.
34 Öt höng kūö chu öich hòṅ vënyu inlahen tö tarik, ṙënten pöri öich ngatī ṙô, hòṅ yīö öi teūngen tö inyöökenre.
35 Tö hū hēk töpachālakūö ök anga-aṅ tarik nö ëaṅvö ngaich hōḵ yī-ö öi rahëichtakūö öi im yanāngö ò öi kirööngen ṙanamlōn.
36 Mööḵlö pöri ngam vahënyö chu tö ngam vahënyö Yôhan, minë la-en kahëtö ngam Yöng chu nö in chu, ṙònghöichren chin öich la-evṙen tö u, anū-ö nun vamënyö inlahen chu öich tö tīntu tö ngam Yöngre.
37 Ngam Yöng inrē tamīnten chu anga-aṅ an inrē vamënyö inlahen chu. Öt hěngheuh yin yī-ö hang ṙô ò hēk ötrēhěn öi meūkö ò.
38 Ngaich ötköp ngam ṙô nö ellōn yīö, pò yīö öt ṙatö-ellōnre in ngam tahīntö ngam Yöng.
39 Chöh yī-ö öi imat līpöre, pò yīö öi ngölōn tö yīö min öi teūngen tö ngam nômö tö örheūheu-aṅ öi löktö in e, angū-ö* an vamënyö inlahen chu.
40 Hö-ö pöri yī-ö hòṅ yihtöre in chu, hòṅ yīö teūngen tö ngam nômö.
41 Öt hòṅ eū-eu chin tö tarik.
42 Akahakūö pöri chū-ö tö yīö öt īnu tö hanangenlōnre tö ngam Tēv.
43 Yih chū-ö öich i minë-eny ngam Yöngre, hö-ö pöri yī-ö öi hō-en chu. Yěn ōt yamih nö i minë-enyre ngaich hō-en ò yī-ö.
44 Sitih inlahen pöri min yī-ö ṙatö-ellōnre in chu, yēḵ yīö öi höng ameū tarik hēk kēḵ ineū-eure inrē öi in më tarik ngaich hö-ö yī-ö lōntö ngam ineū-eu lamöktö in ngam tö hěngtak tökô-en nö Tēv?
45 Uh yin ngölōn tö chu öich sūöichkö fālen yīö min ikūö ngam Yöngre, tön höng hěngtak an ngam samūöichkö fālen yīö ang Môsös ngam chūök yīö öi maheūkkuvö.
46 Yēḵ yīö öre ṙatö-ellōnre in Môsös, ngatī öre yī-ö ṙatö-ellōnre in chu pön anga-aṅ kamūich minë inlahen chu.
47 Yēḵ yīö öt ṙatö-ellōnre tö ngam tö kūichi imat ngam līpöre ngaich sitih inlahen min öi ṙatö-ellōnre tö në ṙô chu?”
Footnotes
^ Vahīlö tarik ön misī ngih chūök ngih tötöh mak. 150x300 fīt an ngam ṙôkti ngam chūök e.
^ Ngëichköm Tahëng Ātiköl A3.
^ Hēk, “aṅhavin tö ngam nômö inlōnti.”
^ Ngam tö ngö, līpöre.
