Inhānga Kahūich Yôhan 6:1-71
6 Unôichrit e ngaich ang Yēsū nö chuh in ök mai Kelelī, ngam lök lāmuh tö Tipěriös.
2 Fachūkörit ò pöri ngaich yik tömaṙôngö tarik, kūö cha nö meuk inlahen ò nö hameuktö pinngangkūö nö halanken yik tövāhavö tarik.
3 Yônlö ngaich ang Yēsū nö ikui ök rôngö nö holtö yik haköptöre ngaich ūichngöre nö in e.
4 Röhta yanīhi hē e ngam paratīn Pāska yik Yahūti.
5 Hē Yēsū ngaich nö môklökūöre ngaich meuk yik tömaṙôngö anga-aṅ tarik nö kū-ötö in re, ngö ṙô ngaich anga-aṅ nö in Filip: “Isuh öi min havah nyā-aṅkūö vē tömaṙôngö tarik tö ròtī?”
6 Kalaha cha pöri anga-aṅ nö ngatī ṙô, pò ò nö akahakūö tö öp tö hòṅ inlahenre min.
7 Ngö ṙô ngaich ang Filip nö sapṙô ò: “Ötrēhěn yin nö kò-òre kūö tö në tö nëtòng tinār* ṙôken ròtī nö kö rahëichyen kinë-ekūö.”
8 Hěngtak ngaich ök haköptö Yēsū ang Antaru, ök kahëm Sīmōn Pītör, ök tö ngö ṙô nö in ò:
9 “Hěngtak ön ngòh nyīö kikōnyö tö aṅhavin tö në tö taneui vīt ròtī hēk tö në tö nët nòng kun kāḵ. Sitih kanò-òṅre kūö min vē tömaṙôngö tarik tö u?”
10 Ngö ṙô ngaich ang Yēsū: “Tölṙô më tarik yin nö ūichngöre nö nyā.” Pōyen nuk tingūyö nö umuh, lökten yik tarik nö kuchiken nö ūichngöre nö umuh, lohten nö 5,000 ṙôken më kikōnyö mi-in cha.
11 Kēḵ nuk ròtī ngaich ang Yēsū ngaich ha-öiny ngam Tēv, ngaich katölngen u nö in yik tarik, kēḵ nuk tö kun kāḵ hēk anga-aṅ, ngaich katölngen u nö sā ṙôken nup lōn cha.
12 Hē cha ngaich nö tööḵngen nö nyā, ngö ṙô ngaich anga-aṅ nö in yik haköptöre: “Hamūl minë chööḵ yin, hòṅ u nö öt yëḵngen.”
13 Lökten hē cha ngaich nö keuheūtkūö nö nyā ngam vīt ròtī ngaich hamūlö ngaich nuk chööḵkūö cha nö tööḵlö tö tö 12 kumvôkö.
14 Hē yik tarik ngaich nö meuk nuk pinngangkūö la-en ò, ngö ṙô ngaich cha-a: “Anga-aṅ ön ngòh lohten Pròfět tö hòṅ yih nö ing panam.”
15 Akahakūö ngaich ang Yēsū tö cha nö hòṅ kēḵ an, pön hòṅ vīlen ò nö rācha, lökten ngaich anga-aṅ nöng hěngtak nö falngöre nö chuh kui ök rôngö.
16 Hē e ngaich nö harap, chuh taseū mai ngaich yik haköptö ò,
17 yôklö ngaich cha-a nö el ök kupòk ngaich kiröönngöre nö chuh lāmuh tö Kafarnahum. Ngaich angū-ö nö sangūla, öl pöri ang Yēsū nö teung nö in cha.
18 Kalēḵ ngam kuföt, lökten ngaich minë mahūvö nö kiröng.
19 Ngaich hē yik mahaköp lohten nö taneui hēk tafūöl kilomitör* rò-ònytī nö kichūtnyen cha nö el ök kupòk, hē cha ngaich nö meūkö Yēsū nö kiröön kui ngam mai nö kū-ötö in ök kupòk cha, kichëyöre ngaich cha-a tökūö pinhë-eṅkūöre.
20 Ngö ṙô pöri ngaich ang Yēsū: “Uh yin öi pa-ekūö, Chū-ö chin kòl!”
21 Hōḵ ngaich cha-a nö hayôklen Yēsū nö el ök kupòk, höng ilöö teung ngaich ngam kupòk nö in ök panam chahūhu cha.
22 Ngaich im tahëng sakāmö yik tömaṙôngö lāmuh tö ngam mai nö meuk ök kun kupòk nö hö-övö, akahalōn ngaich yik tömaṙôngö tö yik mahaköp nö kiröönngöre nö el ök kupòk, hö-ö pöri ang Yēsū nö in cha.
23 Yih ngaich nuk kupòk nö ṙā-ang Tipěriös, ök chūök cha nö nyā nuk ròtī, hē ngam Mā nö kē-ěkūö cha unôichrit inlahenre nö vë-ekūötēv nö ha-öiny ngam Tēv.
24 Hē yik tömaṙôngö nö öt meūkö Yēsū hēk öt meuk yik haköptö ò inrē, yôklö ngaich cha-a nö el ök kupòk ngaich chuh Kafarnahum nö chöhö Yēsū.
25 Hē cha ngaich nö meūkö ò nö lāmuh töm mai, ngö ṙô ngaich cha-a nö hatöönö ò: “Mahaköphöti, ihē tö yīhi öm ihih?”
26 Ngö ṙô ngaich Yēsū nö in cha: “Tökò-òṙô Chin tö yīö, rö-ö yin öi chöhö chu, kūö yīö öi meuk nup pinngangkūö hameuktö chu, kūö yīö pöri öi tööḵngen öi nyā nuk ròtī.
27 Uh yin öi la-evṙen öi chö-öiny tö nup nyā-aṅkūö nup töng chuhngöre, la-evṙen pöri yī-ö öi chö-öiny tö ngam nyā-aṅkūö ngam töt chanuhuvṙen hēk ngam kamëḵtö ngam nômö tö örheūheu-aṅ, angū-ö an nyā-aṅkūö kahëtö ngam Kūön tarik nö in yīö, pò ngam Yöng ngam Tēv tö ṙô hī, nö hakôtenre nö kētö seal minkahngö ngam kūönre nö hameuktöre nö hō-en ò.”
28 Ngö ṙô ngaich cha-a nö hatöönö ò: “Asuh öp tö hòṅ la-en ih yēḵ ih hòṅ hō-ovö tö ngam Tēv?”
29 Ngö ṙô ngaich ang Yēsū nö sapṙô cha: “Yēḵ yīö öi hòṅ hō-ovö tö ngam Tēv, ngaich hòṅ ṙatö-ellōnre yī-ö in öp tahīntö ò.”
30 Ngö ṙô ngaich cha-a nö in ò: “Asuh öp min hameuktö meh pinngangkūö, hòṅ ih öi meūkö u ngaich ṙatö-ellōnre öi in meh? Asuh öp min la-en meh?”
31 Höng nyā manna yik muvöhngö ih misī nö el tönyalnyi, sā kinūichngö e nö ngö: ‘Kētö nyā-aṅkūö cha anga-aṅ nö löktö el halīöngö tö ròtī.’”
32 Ngö ṙô ngaich ang Yēsū: “Tökò-òṙô Chin tö yīö, tö Môsös nö öt kē-ěkūö yīö tö ròtī nö löktö el halīöngö, ngam Yöng chu pöri kamë-ekūö yīö tö ngam tökô-en ròtī nö löktö el halīöngö.
33 Lökten ngòh yamônti nö löktö el halīöngö, anga-aṅ an ròtī ngam Tēv hēk kamëtö nômö ngih panam.”
34 Ngö ṙô ngaich yik tarik: “Mā, örheūheu man yēḵ kē-ěkūö ih tö e angū-ö ròtī.”
35 Ngö ṙô ngaich ang Yēsū: “Chū-ö chin ròtī kamëtö nômö. Ngaich ngòh yamihtöre nö in chu, öthō min hēk anga-aṅ nö ha-euk, ngaich ngòh ṙamatö-ellōnre nö in chu, öthō min hēk anga-aṅ nö haṙëhe nômö.
36 Sā ṙô Chu pöri öich in yīö, tö yīö öt ṙatö-ellōnre in chu pòrô öi meūkö chu.
37 Ṙòkhöre yip kahëtö ngam Yöng chu nö in chu, yihtöre min cha-a nö in Chu, ngaich yip yamihtöre nö in Chu, öthō min chū-ö ṙūöhöngre tö cha
38 pò Chu öt kuilōnre öich yônti ṙā-ang el halīöngö, hateungngö kuilōn ngam tamīnten chu pöri.
39 Ngih ön lōn ngam tamīnten Chu, tö yip taṙòkhöre kahëtö ò nö in chu nö un hěngtak tö chatngen nö in cha, hachohlöng pöri min cha-a ip manā-aṅ sakāmö.
40 Ngih ön kuilōn ngam Yöng chu, tö më hamô-en ngam Kūön hēk ṙatö-ellōnre nö in ò, teūngen min cha-a tö ngam nômö tö örheūheu-aṅ ngaich hachohlen cha min chū-ö ip manā-aṅ sakāmö.”
41 Sirös ṙôre ngaich yik Yahūti kūö ò nö ngö ṙô: “Chū-ö chin ròtī, yamônti öich ṙā-ang el halīöngö.”
42 Ngö ṙô ngaich cha-a: “Röh ang ngòh nö Yēsū nö kūön Yôsěf, höng mikahkūö hī nak yöng ò? Ngaich sitih inlahen min anga-aṅ nö ngö ṙô töre, ‘Yamônti chin öich ṙa-ang el halīöngö’?”
43 Ngö ṙô ngaich ang Yēsū: “Uh yin öi sirös ṙôre.
44 Öt hěngtak tarik tökô nö yihtöre nö in chu, yēḵ ngam Yöng, ngam tamīnten chu, nö öt tūökten ò nö in chu, ngaich hachohlen ò min chū-ö ip manā-aṅ sakāmö.
45 Ngö kinūichngö an tö yik Pròfět: ‘Ṙòkhöre yip min nö töhaköptu tö Yāvē.’* Yip töng hamang ṙô ngam Yöng ngaich haköp ngaich yihtöre nö in chu.
46 Öt hěngtak tarik mameuk ngam Yöng, höng anga-aṅ ngam ṙamā-ang im Tēv, anga-aṅ an ngòh tö hěngtak nö mameuk ngam Yöng.
47 Tökò-òṙô Chin tö yīö, tö ngòh ṙamatö-ellōnre, anga-aṅ min tö teūngen tö ngam nômö tö örheūheu-aṅ.
48 Chū-ö chin ròtī kamëtö nômö.
49 Nyā manna yik misī muvöhngö yīö nö el tönyalnyi, sön pöri cha-a nöng kapah.
50 Ngòh nyamā ngih ròtī pöri lamöktö el halīöngö, öthō min anga-aṅ nö kapah.
51 Chū-ö chin tö aṅ ròtī öich yamôti öich löktö el halīöngö. Yip nyamā ngih ròtī min, örheūheu min cha-a nö aṅ. Ngam ròtī kahëtö chu min nö ngam alaha chu, ngam tökētu min nö chö-önytö taṙòkhöre tarik hòṅ cha nö teūngen tö ngam nômö.”
52 Ngö ṙô ngaich yik Yahūti nö la-alkūöre ṙô: “Sitih inlahen ang min ngòh tarik nö kēten ngam alahare nö nyā-aṅ tö hī?”
53 Ngö ṙô ngaich Yēsū nö in cha: “Tökò-òṙô Chin tö yīö, hanöng sā yīö öl nyā ngam alaha ngòh Kūön tarik hēk òk ngam mahām ò inrē, öt nômu min yī-ö.
54 Ngòh nyamā ngam alaha chu pöri hēk òk ngam mahām chu inrē, anga-aṅ min tö teūngen tö ngam nômö tö örheūheu-aṅ ngaich hachohlen ò chū-ö min ip manā-aṅ sakāmö,
55 pò ngam alaha chu nö tökô-en nö nyā-aṅkūö hēk ngam mahām chu nö tökô-en nö òk.
56 Pò ngòh nyamā ngam alaha chu hēk amòk ngam mahām chu, köp min ngam hinëngö ò nö in chu hēk köp inrē min ngam hinëngö chu öich in ò.
57 Sā ngam tö aṅ Yöng nö tīnten chu, ngatī Chū-ö öich aṅ öich löktö in ngam Yöng, ngatī ngòh nyamā aṅ in chu, aṅ min anga-aṅ nö löktö in chu.
58 Angū-ö ön ngih ròtī yamônti nö löktö el halīöngö. Hö-ö ön nö sā inlahen ök nyahāṅ yik muvöhngö yīö, sön cha-a nöng unôichngöre nö kapah. Ngòh nyamā min nö in ngih ròtī, örheūheu min anga-aṅ nö aṅ.”
59 Ṙô ò anū-ö hē ò nö haköphöti nö el ök chūök vinë-ekūötev* i Kafarnahum.
60 Ngö ṙô ngaich yik töpōyen haköptö ò hē cha nö hāngö e: “Achīö öp min tökô nö hang në tö ngatī tötlanöngö ṙô?”
61 Akahakūö pöri ang Yēsū nöng ellōnre tö ṙô yik haköptöre nöng siṙös ṙôre, lökten anga-aṅ nö ngö ṙô: “Katööngaṙen* öng ngaich ngam ṙinatö-ellōn yīö tökūö në ahang yīö ṙô?
62 Sitih inlahen pöri min yī-ö yěi meuk ngòh Kūön tarik nö yônlö nö lātulöng ngam chūök ò sin urěh?
63 Höng löktö in ngam töhet kumlēḵ ngam Tēv in öi teūngen tö ngam nômö, töng öt kanôluṙô pöri ngam alaha. Minë ṙô ṙahônyö Chu öich in yīö, lamöktö in ngam töhet kumlēḵ ngam Tēv anū-ö ngaich kamëtö ngam nômö.
64 Ōtre pöri min mi-in yīö töt ṙamatö-ellōnre tö në ṙô chu.” Höng löktökūö raneh ang Yēsū nö akahakūö tö yip töt ṙamatö-ellōnre nö in ò hēk tö yip mahachīlngövah ò inrē.
65 Ngö ṙô ngaich anga-aṅ nö in cha: “Ngö ṙô chin vahë öich in yīö, öt hěngtak tarik tökô nö yihtöre nö in chu yēḵ ngam Yöng chu nö öt halöngten cha nö yihtöre nö in chu.”
66 Angū-ö ngih lāinyngen yik tö pōyen haköptö ò, nö ṙāngenre nö tömrit ò ngaich havantöre hēk cha-a nö in nuk la-en, nuk tö ṙā-ayö sin tö cha.
67 Ngö ṙô ngaich ang Yēsū nö in yik tö Nëtsīön tak haköptöre: “Hòṅ kiröönngöre öi yī-ö inrē?”
68 Ngö ṙô ngaich Sīmōn Pītör nö sapṙô ò: “Mā, chuh in chīö öi min kiröönngöre? Pò minë ṙô meh nöng kamū-ötö in ngam nômö tö örheūheu-aṅ.
69 Ṙatö-ellōnre in inrē hēk akahakūö inrē tö meh öm tö Hěngtak öm Töhet öm tö tīntu tö ngam Tēv.”
70 Ngö ṙô ngaich ang Yēsū nö in cha: “Röh öich katöllen yīö, öi tö Nëtsīön tak? Ōtre pöri min öp in yīö tö sā inlahen ngam Satān.”*
71 Rö-ö anga-aṅ pön höng ṙôten Yūta ngam Kūön Sīmōn Iskaryôt, pön anga-aṅ ngòh tö hěngtak aṅ in më tö Nëtsīön tak min kamëngen ò.
Footnotes
^ Ngëichköm Tahëng Ātiköl B14.
^ Ngëichköm Tahëng Ātiköl B14.
^ Ngëichköm Tahëng Ātiköl A5.
^ Hēk lohten, “chūök kamhôka.”
^ Ṙô Krīk, “fukngö.”
^ Ṙô Krīk, “Mahachōchngö ngam tövai minë-eny holre.”
