Inhānga Kahūich Yôhan 9:1-41
9 Hē Yēsū nö kiröön, ngaich meukkūö ök tarik anga-aṅ ök töng löktökūö finötnyöre nö ötmeuk
2 Ngö ṙô ngaich yik haköptö ò: “Mahaköphöti,* achīö öp tököölö fālen, anga-aṅ hòng nap yöng ò ṙöng lökten ngòh tarik nö ötmeuk nö fötnyu?”
3 Ngö ṙô ngaich ang Yēsū nö sapṙô cha: “Öt fāluṙen ön ngòh tarik hēk tö nap yöng ò inrē ṙën pöri angū-ö nö ngatī hòṅ minë la-en ngam Tēv nö meūkö tö tarik.
4 Yěn ṙònghëichṙen ngam sakāmö ngaich hòṅ la-evṙen ayī-ö tö la-en ngam tamīnten chu, pön öt la-evṙen min ngòh tarik yěn yih ngam hatööm.
5 Hanöng sā chu öich ing panam, Chū-ö chin hanātö ngih panam.”
6 Unôichrit ṙô ò nö ṙò-òvö, kösnyö kūöre ngaich anga-aṅ nö el tumlat ngaich kalūöichten e nö ik tilin ngaich lūöpten e nö imat ök tarik tötmeuk,
7 ngaich ngö ṙô nö in ò: “Kuṙòh söichlö matre man el öp mak Sīlōm” (ngam manah ngam Sīlōm “Tö Tīniyö”). Kiröönngöre ngaich anga-aṅ nö söichlö matre ngaich meuk ngaich anga-aṅ nö havan.
8 Ngö ṙô ngaich yik tarik tö yik hol ò yik mameūkö ò sin nö icheū-a: “Anga-aṅ ön ngòh tarik yiröh ngòh töng amūichhak sin nö icheū-a?”
9 Ngö ṙô yik rīkre: “Heūṅ anga-aṅ ön kòl ngòh.” Ngö ṙô yik tahëng: “Hö-ö, hö-ö ön kòl nö anga-aṅ, sā mineūkö ò pöri.” Ngö ṙô pöri ök tarik: “Chū-ö chin kòl.”
10 Ngö ṙô ngaich cha-a nö hatöönö ò: “Sitih inlahen ön minë mat meh nö lööken?”
11 Ngö ṙô ngaich anga-aṅ: “Yēsū minënyi ök tarik kamlūöich öp tilin ngaich lūöpten e nö imat chu ngaich ngö ṙô ‘söichlö matre man chuh Sīlōm’ hē chu öich söichlen minë matre ngaich meuk ngaich chū-ö.”
12 Ngö ṙô ngaich cha-a nö hatöönö ò: “Isuh öp anga-aṅ tarik?” Ngö ṙô ngaich anga-aṅ: “Hö-ö chin akahakūö.”
13 Kē ök tarik ngaich cha-a ngaich chuh in yik Feresī.
14 Rònglen hē e ngam Haneūheu Töhet Sakāmö hē ṙētak Yēsū nö lūöptömat ngam tarik tök tilin nö ṙòngnyökūö mat ò.
15 Lökten ngaich yik Feresī nö hatön ök tarik tö minë mat ò nö sitih inlahen nö lööken. Ngö ṙô ngaich ök tarik: “Lūöptömat Chu anga-aṅ tök tilin ngaich tölṙô Chu öich söichlö matre ngaich meuk ngaich Chū-ö.”
16 Lökten nö rīkre yik Feresī tö ngö ṙô: “Hö-ö an ngam tarik nö lamöktö in ngam Tēv, pò ò nö öt ṙatö-ellōnre nö in ngam Haneūheu Töhet Sakāmö.” Ngö ṙô pöri yik tahëng: “Sitih inlahen ang min ngòh tarik nö hameuktö pinngangkūö yēḵ ò nö töng köölö fālen?” Ngatī inlahen ngaich ngam tinṙōlen nö elhôi cha.
17 Ngö ṙô hēk cha-a nö in ök tötmeuk tarik, sitih ṙô öm tö inlahen ngòh tarik ngòh lamöpnyökūö minë mat meh? Ngö ṙô ngaich ngam tarik: “Tö hěngtak öp nö pròfět.”
18 Öt ṙatö-ellōnre pöri më Yahūti tö ò sin nö tötmeuk, hanöng sā cha nö öl nö havëten nak yöng ò nö chöhnyö ngam tökô-en inlahen ò, öt ṙatö-ellōnre cha-a tö ò sin nö tötmeuk ngaich meuk nö ngaich.
19 Ngö ṙô ngaich cha-a nö hatön nak yöng ò: “Kūön nā ang ngòh, ngòh tö vënyu inlahen tö nā nö löktökūö finötnyöre nö tötmeuk? Sitih inlahen pöri ngaich anga-aṅ nö meuk?”
20 Ngö ṙô ngaich nak yöng ò: “Heūṅ, kūön ai ön ngòh lamöktökūö finötnyöre nö tötmeuk.
21 Öt akahakūö pöri āyö töp löktö inlahen ò nö meuk hēk tö öp mahalanken ò. Hatöönö ò yin. Mihôiṅ ön kòl nö vënyö inlahenre pön rö-ö nöng nyīö.”
22 Ṙën nak yöng ò nö ngatī ṙô, kūö cha nö vöö tö yik mākūö tinlööken yik Yahūti, pön ngaich yik Yahūti nö halēn ngö ṙôre tö yip ṙamatö-ellōnre min tö Yēsū nö Kristū ngaich ha-uknyu min cha-a tö ngam chūök vinë-ekūötēv.
23 Lökten nak yöng ò nö ngö ṙô: “Hatöönö ò yin, tön rö-ö ön nö nyīö.”
24 Havëten ök tarik cha-a hēk ök tötmeuk sin, ngaich ngö ṙô: “Halöng ṙôre man öm kēḵ minë-eny ngam Tēv, tön akahakūö in töp tarik nö tököölö fālen.”
25 Ngö ṙô ngaich anga-aṅ: “Öt akahakūö chin töp tarik yěn tököölö fālen hēk yěn hö-ö. Akahakūö pöri Chū-ö tö Chu sin öich tötmeuk, ngaich pöri Öich meuk.”
26 Ngö ṙô ngaich cha-a nö hatöönö ò: “Sitih tī öp hēk sitih inlahen tī inrē nö löpnyökūö minë mat meh?”
27 Ngö ṙô ngaich anga-aṅ: “Ngaich chin taheui öi vë-eny nang yīö, hö-ö pöri yī-ö hòṅ hangihtö ṙô chu. Kūö yòh hēk öi hatöönö chu? Ui höng hòṅ tömrit ò inrē yī-ö röh?”
28 Ngö ṙô ngaich cha-a nö miyëḵ tö ò: “Më-eṅ man lohten öm mahaköp öm in ò, hö-ö in īhö pöi mahaköp öi in Môsös.
29 Akahakūö in tö ngam Tēv nö vë-ekūö Môsös misī, öt akahakūö pöri īhö tö öp löktö ngòh tarik ngòh.”
30 Ngö ṙô ngaich ngam tarik: “Pingangkūö chin, ngaich anga-aṅ nö löpnyökūö në mat chu sön yī-ö höng öt akahakūö tö öp löktö ò nö yih?
31 Akahakūö in tö ngam Tēv nö öt hangṙô yip tököölö fālen, yěn ōt tö pa-ekūö tö ngam Tēv hēk hateungngö kuilōn ò inrē ngaich öthō anga-aṅ nö öt hang ṙô ò.
32 Öt hěngheuh in öi hang tö löpnyukūömat nö löktö kūö finötnyöre nö ötmeuk.
33 Yēḵ ngòh tarik öre nö öt lamöktö in ngam Tēv, ngaich öthō anga-aṅ nö kanô-òvö nö ngatī inlahen.”
34 Ngö ṙô ngaich cha-a nö in ò: “Höng lamöktökūö finötnyöre man më-eṅ öm töng köölö fālen, ngaich öm hòṅ haköpten ih?” Ahōnyen ò ngaich cha-a!
35 Hē Yēsū ngaich nö hang inlahen ök tarik nö ahōnyu chuh in ò ngaich ang Yēsū ngaich ngö ṙô: “Ṙatö-ellōnre öm in ngòh Kūön tarik?”
36 Ngö ṙô ngaich ök tarik: “Mā, achīö öp anga-aṅ, hòṅ Chu ṙatö-ellōnre in ò?”
37 Ngö ṙô ngaich ang Yēsū nö in ò: “Ngaich man öm meūkö ò, anga-aṅ an tö ṙònghöich ṙô nö vë-ekūö meh.”
38 Ngö ṙô ngaich anga-aṅ: “Mā, ṙatö-ellōnre chin in ò.” Ngaich sōntökūöre nö salāmö Yēsū.
39 Ngö ṙô ngaich ang Yēsū: “Ṙënten chin öich yih öich kamhòkken ngih panam ngaich yip töt mameuk ngaich meuk cha-a ngaich yip tö meuk ngaich vī-ingre cha-a nö öt meuk.”
40 Hē yik Feresī mi-in ò nö hāngö e, ngö ṙô ngaich cha-a: “Nö yòh öi kan īhö, tötmeuk?”
41 Ngö ṙô ngaich ang Yēsū nö in cha: “Yēḵ yīö öre tötmeuk ngaich öt īnu yī-ö tö tökööl ngaich pöri yī-ö öi ngö ṙô, ‘Meuk in.’ Lökten min nö öt inṙēḵlu minë tökööl yīö.”
Footnotes
^ Ṙô Krīk, “Rappī.”
