Oʼto amoro meian owètïʼkarï yako?— Ambïako osanoʼwa, oyumïʼwa mïsa owepatomatòʼme. Moropo eropa amu owepatomanepa ma. Amuro koʼpo moʼko pòriʼpie ma. Mupusan ro nòʼkï me yeijï?— Jehoba moʼko. Oro kïtòrupïan amu koromono kariʼnia Opoto Papa Karetarï nekarichïʼpïo poko. Tèpiti (David) ètï me ma. Ekemaʼpa ròten Jehobaʼwa topatomarïpïa upusan, ijòkero ètïʼkaʼparo tïweiye ma.

Sipiyu weiniomboro Tèpiti yumï maro shanoʼwa tòmepaʼma ma tapokurume Jehoba enèrï poko iʼya. Ijòkero Tèpiti ètïʼkaʼparo tïweiye ma, tïʼkanamopa òtïkon weiji seʼme ròrïʼpïo. Tïpïanarïme Jehoba yeijï upusamba, topatomarïpïa eropa iʼya. Òwiʼniome, Tèpitiʼwa kaparakon wariyatòrï yako amu kaʼchusi tamuru tïwosepa yèíʼpio ma, ijombo tïnda òʼwin amu kapara taropa iʼya ma! Mupusan ro oʼto Tèpiti wèíʼpio? Moʼko kaʼchusi tamuru tïwekenapa iʼya ma, ijombo toiniarï ke ro iʼya tïwopa ma! Amu yako eropa, amu opoto tïpïoken nòʼkï tamuru, kaʼchusi wato pòre, wopïpïoto tïkapararïkon ono, Tèpitiʼwa tïwopa eropa yèíʼpio ma! Nòʼkïʼwa Tèpiti epatomaʼpo mekanosan?— Ëʼhë, Jehobaʼwa.

Amu yako teropa Tèpiti panaʼpe nekatu tïweiye ma. Moʼkaron Isrerï ponokon kïnoóaton moʼkaron Piristia ponokon maro. Òʼwin amu moʼkaron Piristia ponokon ekataka woótoto choʼpo pane ròten misipiïn kariʼnia moʼko, opoto pane ròten eropa moʼko! Koraiat (Goliath) ètï me ma. Mosero opoto pane ròten kariʼnia Jehoba maro moʼkaron Isrerï ekataka woótonon ènuʼkarïkon ta kïneunoʼposaton. Tïwo moʼkaron Isrerï ekataka woótonon wopïse ma. Choʼpo te kïnètïʼkatomba iyo tïwopïrïkon poko. Moro etaʼpo mero Tèpiti Koraiat ʼwa nïkai: ‹Awu te omaro woóa! Jehoba yepatomanopa. Awu kapoʼkaiyepa!› Panaʼpe watïro Tèpiti na?— Ëʼhë, panaʼpe neròten ma. Uputïse ma òtï wèíʼpio ijombo?

Tèpitiʼwa toiniano pïpïai me tòpu ematopo tanuinie ma, otoneinia eropa tïkuʼmeyamon tòpuʼmakon, ijombote tïto ma moʼko opoto pane ròten kariʼnia maro woó. Koraiat, neiara koromonome paneʼko ròten Tèpiti weijï enèrï ke, kïnereʼnosan! Tèpiti te iʼya ïngano: ‹Amoro mosa ïʼwa okororo yeʼtoʼpopono supïara maro, awu te oʼwa wosa Jehoba ètï ta!› Ijombote, tòpu amu aruʼkai pïpïai me tïʼwa tòpu ematopo taka, tokaʼne nïtomba  Koraiat poʼponaka, ijombo topatoro iʼya nimiokïipia. Moro tòpu emèpï raʼna ne nipiokaipia! Moʼko opoto pane ròten kariʼnia tïromose nomaipia! Moʼkaron Piristia ponokon choʼpo nètïʼkapoʼtomba, ijomboro nekaʼnumïʼmatomba. Neiara mose koromono kariʼnia, Tèpiti, opoto pane ròten kariʼnia apoʼkaipia?— Jehobaʼwa topatomapa ma, Jehoba kombaijo ambòre nekatu pòriʼpiepa ma moʼko opoto pane ròten kariʼnia koʼpo!

Òtï owòmepatopomepa na Tèpiti poko ekarichïʼmaʼpo weinio?— Jehoba ambòre poriʼpie ma amuro koʼpo. Opanarï eropa moʼko. Ijòkero amu yakoro owètïʼkarïpïa yako, Jehobaʼwa owepatomarïpïa upuʼko panaʼpe owèʼchòʼme!