Amuro wane oʼwa amukon nuputïʼtòrï ònekarichïʼpïaro nèí?— * Opoto Papa Karetarï kïneuranano amu juʼpïn pane ròten ‹òtï upuʼpïn› poko. Òtï upuʼpïn me kinichoʼmano amukon kombaijo pioko ònuputïʼpapai tïweiye mandon. Moʼkaron ònèpïngon Opoto Papa pòʼchòrïkon maroro ambòre ènï poko uputïse tïweiye mandon. Amoro òtï me yeijï uputïrï seʼparo ma?—

Penaro yako pane ròten, Opoto Papaʼwa tòkïrï moʼko koromoneno kariʼnia maro wòrïi ma. Ètïkon me tïweiye ma Adam, Íf eropa. Opoto Papaʼwa amu poʼcho yèʼchoʼkon tïye ma, amu mainiaʼme. Eden me ètï tïweiye ma. Opoto Papa amïʼchaʼpomboto rïpïo Adam maro Ífʼwa, tïʼmakon maroro tïaʼroro ènï nono tòkïrïpïa rïpïo iʼyainie ma moro poʼcho mainiaʼme, tïwèʼchoʼkon, enekero. Oronomero eropa nemamïrïkomba icha. Morote mupusan ro oʼto Adam maro Íf wèíʼpiombo?—

Adam maro Íf Opoto Papa onamïʼchaʼpapai tïweiye mandon, ijòkero amu poʼcho wèʼchopo ta emamïʼpapai kïtaton erome. Morote, Opoto Papaʼwa tokarishe ma tïaʼroro ènï nono ïpòrïpïa poʼchome, ijombote paʼpororo amukon kïnemainiaton oronomero, towaʼpòre eropa. Neiara moro ïpoamba? Apïimie siricho kariʼnia moro ònuputïʼpïaro tïweiye ma, upuʼpïn me kombaijo tïweiye ma.

Jesas wòpïʼpïomboto ènï nono kuʼpo naka, ambòre iʼya amukon tòmepaʼma mororo upuʼpïn poko ma. Opoto Papaʼwa nono yopotomarïman moro, tïka ma. Poʼcho wèʼchopo me kïnèkïrïamba. Moro wòpïrï poko òpekaʼtoko, tïka eropa ma.

Oyapokurume watïro na ènï upuʼpïn uputïʼpopa oʼwa?— Upuʼko kombaijo, moʼkaron Jehoba amïʼchanamon neroʼkon kïnemainiaton moro poʼcho wèʼchopo ta. Opoto Papa Karetarï kïnekarishan kïʼwainie apïimie kariʼniakon maro wòrïiangon poko, Jehoba amïʼchaʼmanamombo. Uputïrï seʼparo piokoinie ma?— Oro kïsenesen amukonïmbo moʼkaron poko, neiara eropa piaʼmeinie kïweijïkomba.