Rebeka amu wòrïi choʼpo tapokurume Jehoba enenenïmbo. Inio ètï me tïweiye ma Aisak. Moʼko apokurume eropa Jehoba tïweiye ma. Neiara Rebeka Aisak epòrïi? Neiara mose wòrïi Jehoba ewaʼpoʼrose tïweijï enepoi? Oro kïtòmepasen ambòre pioko.

Aisak yumï me tïweiye ma Eprïham, shano me te Sera. Wèʼchopo Kenan ta tomamïʼma mandon. Moro wèʼchopo tanokon te, Jehobaʼwa wòkunamatonon kapïn moʼkaron. Eprïham Jehobaʼwa wòkunamatoto wòrïi maritimie ïrïse tïmuruʼwa tïweiye ma. Ijòkero tïnapoyomarï, ambïako Èriesa, tïmïose iʼya ma Aisak pïtï amu epoye Heran me tòtïnen wèʼchopoʼwa, amukonïmbo Eprïham asakarïkon emandopoʼwa.

Amukon ròten eropa Eprïham napoyomarïkon Èriesa maro tïtoʼmainie mandon. Moe pane ròten moro wèʼchopo tïweiye ma. Okororo oinia tòkïkon camel-kon iʼyainie taro ma tonasen maro òtïkon tïnïrïkon aronamome iʼyainie tïtotoʼkonʼwa. Neiara katu Èriesa nupusamba nei wòrïi apoijï Aisak ekataka? Moʼkaron takonokon tapoyomamïngon maro tïtundaʼmasan mero Heranʼwa amu torona po tïpïorose mandon, kïnupusamba kombaijo Èriesa penarone watï wòrïiangon wòpïrï moroʼwa tuna amu pese. Ènï paʼme Jehobaʼwa tïwòpekase ma: ‹Amu koromono wòrïiʼya wïoturupïoʼpoto tuna poko, ijombo yopaʼpoto iʼya, moʼkaron yèkïkon camel opaʼpoto eropa iʼya tuna ke, moro poko  ijombo supusa moʼkoro wòrïi onanumïʼpïo me yeijï.›

Penarone watï yòpekatïʼmaʼpo paʼpopo, Rebeka tïwose moro toronaʼwa ma. Poʼcho neròten wòrïi me tokarishe Opoto Papa Karetarïʼwa ma. Amu tïnèʼnïrï tuna poko iʼya tïwòturupïo Èriesa ma. ‹Ëʼhë,› tïka moʼko wòrïi ma, ‹Sïaro oʼwa amu tuna, oyèkïkon camel-konʼwa eropa.› Etako moro! Tuna sanòrï niyoʼmasan camel-kon niemban neròten tuna ènïatomba. Ijòkero Rebeka tokaʼne tïweramapotïʼma moro toronaʼwa ma tuna amu peʼpose ekatakainie. Meneyan ro moro uʼkuʼpïo ta neiara tope neròten emaminiarï?— Choʼpo Èriesa apoipia neiara Jehobaʼwa tïwòpekatïʼpïo èyukuʼpïopa.

Èriesa Rebekaʼwa apïimie kurangon chïʼrïkon ïrïʼmai. Ijombote moʼko wòrïi Èriesa maro moʼkaron akonokon aroi tïyumï èʼtïʼwa. Oʼtonòʼme Eprïhamʼwa iyainie toneʼpoʼpo tokarishe Èriesaʼwa ma, neiara eropa Jehobaʼwa tïwòpekatïʼpïo èyukuʼpïopa. Rebeka asakarïkon apokurume neròten ma Aisak maro maritimie yèíʼpiotopa.

Rebekaʼwa te, maritimie Aisak ïrïsepa mekanosan?— Kïnupusamba Rebeka Jehobaʼwa ro Èriesa aropoʼpo tïʼwainie. Ijòkero tasakarïkon wòturupïoʼpoto tïʼwa Kenanʼwa tïtose tïweijï poko Aisak maritimie ïtoʼme, ‹Eʼhe, wïtose ro wa.› tïka yèíʼpio ma. Ijombo tïtopa ro yèíʼpio Èriesa maro ma. Tïtundaʼmasan mero Kenanʼwa, maritimie ro iʼya Aisak tïyepa ma.

Rebekaʼwa tamïʼchaʼpo ke Jehoba juʼpïa neròten pioko tïweiye ma. Apïimie siricho moro paʼpo po, Jesus asakarïkon weinio ro tïwoma ma! Rebeka paʼme oʼyata, towaʼpòre Jehoba ïpïorï yako oʼwa, juʼpïa neròten eropa opoko kïneian.