Amukonïmbo yako amukon koreʼnosaton, ijoseʼpa kïyenonosaton kouranarïkon yako tïʼwainie Jehoba poko. Ènïkon ro ambïako kouranarïkon seʼpapai kïpoaton pioko. Amumbotoro moro paʼme otapoʼparo meinien?— Opoto Papa Karetarï kïnekarishan kïʼwainie amu koromono kariʼnia poko, tapokurume Jehoba enènènïmbo, morote tïporopïsepa èíʼpio pioko touranarï poko. Jerimaya ètï me tïweiye ma. Ambòre kïsupusen pioko.

Koromonome Jerimaya aʼta, Jehobaʼwa tokarishe iʼya ma moʼkaron kariʼniakon toʼmasepa yeijï iʼya yaame tïweijïkonïmbo poroʼkatòʼmepa iʼyainie. Moro paʼme Jerimaya weijï te, tope pane ròten iʼya tïweiye ma kïnètïʼkanomba kombaijo. Jehobaʼwa tïka ma: ‹Oʼto wïkarï onuputïʼpapai ya. Awu hero mïreʼkoʼkoʼme ròten.› Jehoba te iʼya tïka ma: ‹Kïsètïʼkai. Awu kopatomaye.›

Ijombo mero te, Jerimaya eʼmarïkon poko  tïwotapoiye ma. Jehobaʼwa chotaʼmaporïkomba ekarishan iʼyainie eʼpetakamaʼpapai aʼtainie. Oʼto Jerimaya wïkaʼpo paʼme ro moʼkaron kariʼniakon wèíshan mekanosan?— Uwa. Toreʼnòpïʼma iʼyainie ma, choʼpo eropa tïyenonòpïʼma iʼyainie ma. Amukonïmbo yòsepa maroro tïweiye mandon! Neiara Jerimaya wotapoʼmaʼpo mekanosan?— Tïwètïʼkapa ma, ijombo tïka ma: ‹Ambore yeuranarï kapïn Jehoba poko ma.› Tïporosepa ro jòke yèíʼpio na?— Uwa, pioropïʼparo tïweiye ma. Choʼpo pane tapokurume Jehoba iʼya tòne ma, pioko touranarï poroʼkarï kapïn iʼya tïweiye ma. Pioropïʼmaʼpa Jerimaya wèíʼpio ke, Jehobaʼwa topatomapa yaangon weinio ma.

Amu yako, yaangon kariʼniakonʼwa Jerimaya tomapa yèíʼpio koroʼnano torona atorïmbo taka ma. Mororo te tanose shaparï ke tïweiye ma. Uwaro ereparï ma, uwaro chunarï ma. Moropo moʼkaron kariʼniakonʼwa Jerimaya tïnopa yèíʼpio ma jomoʼtòʼmepa. Morote, Jehobaʼwa amukonʼwa tawòʼnuʼpopa yèíʼpio ma!

Òti poko mòmepai neiara Jerimaya wèíʼpio weinio?— Tïwètïʼkamaʼpo seʼme amukonïmbo yako, Jehoba poko touranarï ònipioroʼkaʼparo tïweiye ma. Jehoba poko oweuranarï yako, ambïako owereʼnosaton, ijoseʼpa oyenonosaton. Ijokero ambïako mepïíʼchoapa, ijoseʼpa mètïʼkayepa maroro. Morote oporopïijo Jehoba poko oweuranarï poko. Ekemaʼpamboto ròten owepatomanomba, Jerimaya epatomaʼmaʼpombo paʼme roropa tïʼwa.