Menean moʼkaron kariʼniakon moro uʼkuʼpïo ta?— Mowan hero Machu, Mak, Ruk, Jan, Pita, Jemsï, Jud, Par eropa. Paʼpororo mowan kariʼniakon nono kuʼpo Jesas aʼta emamïʼmasan moʼkaron, Jesas poko eropa iʼyainie tïmero ma. Ambòre kïsupusen piokoinie.

Òruwa moʼkaron wòrupïa Jesas nimiokïʼmasan tokatakanome, miaroro eropa wòrupïa tïtopòtïʼmainie mandon. Nòʼkan me yeijïkon ro mupusan?— Machu, Jan, Pita moʼkaron. Matthew (Machu) maro John (Jan) juʼpïa Jesas upusatomba. Machuʼwa Jesas emamïʼmaʼpombo poko amu kareta tïmero ma, Janʼwa eropa amu tïmero ma. Amu eropa kareta Janʼwa tïmero  ma Revelation me tòtïnen, òruwa eropa karetaʼmakon. Ètïkon me ma òʼwin yèʼchopo John, oko yèʼchopo John, òruwa yèʼchopo John. Amu eropa tokatakanome wòrupïa Jesas nimiokïʼpombo hero Peter (Pita). Moʼkoʼwaro oko eropa karetaʼmakon tïmero ma Opoto Papa Karetarï ta wèʼchonon. Ètïkon me ma òʼwin yèʼchopo Peter, oko yèʼchopo Peter. Oko yèʼchopo tinimieroʼpo karetaʼme ta, Pitaʼwa tïmero yèíʼpiombo ma kapu weiniomboro Jehoba euranaʼpombo poko Jesas poko, ènï paʼme ichaʼpo: ‹Mose hero ïmuru. Choʼpo yapokuru moʼko. Choʼpo yïponoʼponen.›

Moʼkaron amukon ròten moro uʼkuʼpio ta kïnenerïkon kariʼniakonʼwa, eropa karetakon tïmeroʼma Jesas poko ma kòmepanamopa pioko. Òʼwin amu mieronenïmbo hero Mark (Mak). Ambïako moroporo tïweiye yèíʼpio ma Jesas apòíʼpiombotopa yonamonʼwa, ijomboro jòke oʼto ïrï iʼya tonepa yèíʼpio ma. Amu eropa kareta meronenïmbo hero Luke (Ruk), amu taʼta me èíʼpiombo. Moko ro te ambïako Jesas rombïʼpopa paʼpopo amu yekenanen me tïweiye ma.

Moʼkaron oko neroʼkon Opoto Papa Karetarï meronangonïmbo moro uʼkuʼpïo ta kïnenerïkon hero Jesas pijïan. Mupusan ro ètïkon?— James (Jemsï) maro Jude (Jud) moʼkaron. Koromone, Jesas onamïʼchapapai tïweiye mandon. Yaame pòre maroro upuʼpo iʼyainie tokanose ma. Aijenasen pòre te iʼyainie Jesas tamïʼchapa ma, ijombo yekenanamon me eropa tïwèíʼmiainiepa mandon.

Ijomboromene kïnenerïkon moro uʼkuʼpïo ta tero Par, amu eropa Opoto Papa Karetarï meronenïmbo. Koromone Saul me ètï tïweiye ma. Amu Krais wekenanen me tïweijï uwapo, choʼpo iʼya yekenanamon tïyenonopïʼma yèíʼpio ma, choʼpo eropa yaame piokoinie tïwèíʼmia ma. Òtï katu ijombo Par ïposepa nèí amu Krais wekenanen me?— Amu kuriʼcha Par wïtorï yako oma ta, mondokon pane ròten kapu weinio tïʼwa amu euranarï iʼya tota ma. Jesas moʼko! ‹Oʼtonòʼme choʼporone yaame moʼkaron yamïʼchanamon poko ma?› tïka Parʼwa ma. Moro weiniomboro Par tïweʼpetakamapa ma, amu Krais wekenanen me tïweiyepa ma. Tïaʼro 14 Opoto Papa Karetarï tanokon karetakon Parʼwa tïmero ma, Romans weiniomboro Hebrews taro.

Ekemaʼpa Opoto Papa Karetarï kïsèrupïaton, taʼro wane?— Èrupïarï patoro, apïimie òtïkon kïsupusaton Jesas poko. Ambòre uputïrï seʼparo Jesas poko ma?—