Topepa mekanosan juʼpïn poko weinio?— Apïimie amukon topepa kïnekanosaton. Opoto Papa Karetarï kïnekarishan amu mireʼkoʼkoʼme, Josaya me tòtïnen, poko. Moʼkoʼwaro topepa pòre juʼpïn poko yeijï tïweiye ma. Juʼpïngon te, pianarïkon me tïweiye ma. Mokaronʼwa ro topatomaʼma yèíʼpiombo ma. Ambòre kïsupusen Josaya poko, pianarïkon poko eropa.

Josaya yumï ètï me tïweiye ma Amon, Juda yopotorï. Amon yaan pane ròten me tïweiye ma, èkïrïpïotïʼmasan eropa yòkunamatopo me tïweiye ma. Tïyumï rombïʼpombotopa Josayaʼno Juda yopotorï me tïweiye ma. Morote, òruwa yòpïimiaʼpo sirichoʼko ròten tïweiye ma! Tïyumï paʼme eropa yaan me yèíʼpio mekanosan?— Uwa, yaan me kapïn tïweiye ma!

Iʼmiembo weiniomboro Josaya Jehoba wïkarï paʼme tïwèíshe tïweiye ma. Ijokero Jehoba tapokurume enenamon maro roʼkon osepaname tïweiye ma. Moʼkaronʼwaro topatomaʼma Josaya ma juʼpïn poko yeijï poko. Nòʼkan amukonïmbo Josaya panarïkon me èíʼmiasan?

 Òʼwin amu pianarïmbo hero Sepanaya. Òʼwin amu Opoto Papa euran ekariʼnienïmbo moʼko. Moʼkoʼwaro Juda ponokon toʼmaʼma yèíʼpio ma èkïrïpïotïʼmasanʼwa yòkunamarïkon yako eiʼpiopïn neròten wopïrïpïa poko iʼchuʼpïonakainie. Josayaʼwa Sepanaya euran tamïʼcha yèíʼpio ma, Jehobaʼwaro tïwòkunama ma, èkïrïʼmasanʼwa kapïn.

Amu eropa Josaya panarïme èíʼpio hero Jerimaya. Josaya sirichorï paʼme pòre roropa tïweiye ma, moene wati eropa oseweinio tïwètuwaroʼmaʼmainie mandon. Juʼpïngon osepanakon me tïwèíʼmiainie mandon, ijòkero Josaya rombïʼpombotopa Jerimayaʼwa choʼpo piïne tïweijï warekatopo tïmero ma. Okororo tïwosepatomaʼmainie mandon juʼpïn poko ne tïweijïkon poko, Jehoba amïʼchatòʼme ne tïʼwainie.

Òtï poko mòmepanopa neiara Josaya wèíʼpyo poko?— Iʼmiembome tïwèíʼpio weiniomboro, Josaya juʼpïn poko tïwèíshe tïweiye ma. Kïnupusamba tapokurume Jehoba enenamon maro osepaname tïwèíshepa tïweijï. Tapokurume Jehoba enenamon ne opanarïkon me anungo, juʼpïn poko oweijï poko owepatomanamon!