Iʼmiembo weiniomboro Sanueru tomamïʼma ma, tomaminiaʼma eropa moro tabernacle po ma, moro Jehobaʼwa wòkunamatopo èʼtï po. Mupusan ro neiara moro tabernacle pono me Sanueru wèíʼpiombo? Oro nasen asi kïsupusen Sanueru sano, Hanna, poko.

Apïimie siricho iʼmieʼmaro Hanna tïweiye ma, choʼpo ròrïpïo tisipiyuru amu se tïweiye ma. Ijòkero choʼpo tïwòpekatïʼma Jehobaʼwa ma topatomatòʼmene iʼya. Wïkïrï tïʼme me epòrïʼpïoto moro tabernacleʼwa Jehobaʼwanome miokïrïpïa iʼya tokarishe ma, moropo emandòʼme, emaminiatoʼme eropa. Yòpekatïʼpïo Jehobaʼwa toyusepa ma, wïkïrï iʼya tïʼme me topoye ma. Sanueru me iʼya tòtïka ma. Ijombo tïkaʼpo paʼmero Hanna tïweiye ma, oruwa, ijòseʼpa okopaimieme siricho Sanueru aʼta moro tabernacleʼwaro iʼya taropa ma Opoto Papaʼwanome yèʼchòʼme moropo.

Erai moʼko nuseno priest me tïweiye ma moro tabernacle po, kariʼniakon ekatakanomene Opoto Papa poʼponaka. Oko eropa imiurukon moropo kïnemaminiaton miaro. Mupusa moro tabernacle Opoto Papaʼwa wòkunamatopo èʼtï me yeijï, ijòkero juʼpïngon òtïkon poko tïwèíshepa moropo amukon weijï. Morote, Erai murukon yaangon pane ròten òtïkon poko moropo mandon. Sanueru oʼto yeijïkon eneamba. Sanueru Erai murukon paʼme roropa yaame tïwèíʼmia na?— Uwa, ororo juʼpïa tïwèíʼmia ma, tïyumï maro tïsanoʼwa tòmepaʼmaʼpo paʼmero.

Oʼto mekanosan Erai weijï manombo moʼkaron oko tïmurukon poko?— Chotaʼmapòrïkon manombopa rïpïo iʼya ma. Ambòre Opoto Papa èʼtï po emaminianoʼpòrïkon manombo kapïn rïpïo iʼya ma. Sheʼme te, moropo moʼkaron tïmurukon emaminianoʼpoan Erai, ijòkero Jehoba choʼpo pioko tïworekopa ma, imiurukon poko eropa. Ijòkero te, erome Jehoba kinichotaʼmapoatomba.

Tïwoʼnïkïrï yako koko aʼta, Sanueruʼwa amuʼwa tïkoʼmarï tota ma. Ero pame ïngano:  ‹Sanueru!› Tokaʼne jòke Eraiʼwa tïto ma, morote Erai ïngano: ‹Okoʼmaʼpapai wèí.› Sheʼme te, okomboto neroʼkon tïkoʼmarï iʼya tota ma. Oruwa yèʼchopo poko te, Eraiʼwa tokarishe Sanueruʼwa tïkoʼmarï etaʼpoto eropa iʼya, ero paʼme icharï: ‹Oweuranakoʼko Jehoba; oʼto owïkarï setaye.› Moro paʼmero jòke Sanueru tïweiye ma. Ijombote Jehoba nïkai Sanueruʼwa: ‹Ekariʼcho Eraiʼwa tasakarïkonïmbo maroro chotaʼmaporïkomba ïʼwa, yaangon neròten òtïkon poko yèíʼmiasan poko.› Takurepa mekanosan Sanueruʼwa ènï ouranano ekarichïrï Eraiʼwa?— Uwane, takure kapïn tïweiye ma. Tïwètïʼkarï seʼmero te, Jehoba wïkaʼpo paʼmero Sanueru tïweiye ma. Piaʼmero ijombo tïweiyepa Jehoba euranïmbo ma. Okororo mokaron Erai murukon tïwoʼmainiepa mandon, Erai eropa ro tïromosepa ma.

Sanueru hero amu juʼpïn kïwomepatoʼkon yeinio. Juʼpïa tïwèíʼmia ma, yaame amukon weijï enèrï seʼme ròrïpïo tïʼwa. Amoro katu ropa? Ororo juʼpïn poko meian, Sanueru paʼme? Moro paʼme oyaʼta Jehoba, oyumï, osano eropa towaʼpore mïpoaton.