Menean ro moʼko worïiʼmie moro uʼkuʼpïo ta?— Jefta èmïijï moʼko. Opoto Papa Karetarï ètï onekarichïʼpapai ma, morote kïsupusatomba tïyumï maro Jehoba towaʼpòre ïpïoʼpo iʼya. Oro kïsupusen pioko, yumï Jefta poko eropa.

Juʼpïn kariʼnia moʼko Jefta, ekemaʼpa ròten eropa iʼya tòmïijï tòmepaʼma Jehoba poko ma. Pòripyin kariʼnia moʼko, juʼpïa amukon yopotomanen eropa. Ijòkero moʼkaron yatonon Isrerï asakarïkon tïwòturupïo mandon iʼya taronamome yeijï poko woó tïtòrïkon yako tïyenonoʼnamon maro.

Opoto Papaʼwa tïwòpekase Jefta ma topatomatoʼkonʼme iʼya moro woóno apoʼkarïpïa poko. Apoʼkasandopa tïʼwainie, tïweramarïpïa mero moʼko koromone tòʼtï  weinio topoye epaʼkaʼpo ïrïpïa Jehobaʼwa tokarishe iʼya ma. Moʼkoro te, ijombo ororo kïnemainian, kïnemaminiano eropa Opoto Papa tabernacle po. Moro tabernacle hero morokon yako Opoto Papaʼwa piòʼchòrïkon wòkunamatopo pataiyarï. Jeftaʼwa tapoʼkaparo moro woóno wèíʼpio ma! Mupusan ro nòʼkï nasen wepaʼkaʼpo èʼtï weinio yeramaʼpopa mero?—

Jefta èmïijï moʼko! Moʼko neroʼkon iʼmie me tïweiye ma, erome te Jefta kinimiosamba. Choʼpo neròten èni kïnènuminganoʼpoamba. Morote, koromone toponenïmbo ïrïpïa te iʼya tokarishe ma. Imieroro jòke èmïijï nïkai: ‹Yumï, Jehobaʼwa te tïkapa owèíʼpio ma, ijòkero owïkaʼpo paʼmero owèíshepa ma.›

Jefta èmïijï eropa choʼpo kïnònuminganomba. Moro tabernacle po tïaʼta iniotarï kapïn ma, tïʼmakon amu epòrï kapïn iʼya ma. Jehoba ïpïotòʼme te, tïyumï wïkaʼpo paʼme tïwèíshe tïweiye ma. Ambòre moro enean tiniotarï koʼpo, ijoseʼpa tïʼmetarï koʼpo. Ijòkero tòʼtï iʼya tïnopa ma moro tabernacle po tomandòʼme tomamïrï taroro.

Mekanosamba  oʼto yèíʼpioʼwa tïyumï maro Jehoba towaʼpòre ïpïoʼpo?— Ëʼhë, moro paʼmero ma! Amïʼchato oyaʼta, oyapokurume Jehoba aʼta eropa, Jefta èmïijï paʼmero ma. Amoro eropa oyumï maro osano towaʼpòre mïpoa, Jehoba eropa.